ຄຳຖາມຈາກຜູ້ອ່ານ
ໃນອະນາຄົດໃກ້ໆນີ້ “ຄວາມຄິດ” ແບບໃດທີ່ພະເຢໂຫວາຈະດົນໃຈລັດຖະບານຕ່າງໆ?
ໃນຕອນເລີ່ມຕົ້ນຂອງຄວາມທຸກລຳບາກຄັ້ງໃຫຍ່ ພະນິມິດ 17:16, 17 ບອກວ່າ: “ເຂົາ 10 ເຂົາກັບສັດຮ້າຍທີ່ເຈົ້າເຫັນຈະພາກັນຊັງແມ່ຈ້າງຄົນນັ້ນແລະທຳຮ້າຍລາວ ເຮັດໃຫ້ລາວປະໂປ້ ກັດກິນຊີ້ນຂອງລາວ ແລະເອົາໄຟຈູດລາວຈົນບໍ່ເຫຼືອຫຍັງ. ພະເຈົ້າໃຫ້ເຂົາເຈົ້າເຮັດຕາມຄວາມຄິດຂອງເພິ່ນ ໂດຍດົນໃຈເຂົາເຈົ້າໃຫ້ເຮັດຕາມຄວາມຄິດແບບດຽວກັນ ແລະໃຫ້ເຂົາເຈົ້າມອບອຳນາດການປົກຄອງຂອງໂຕເອງໃຫ້ສັດຮ້າຍນັ້ນ.” ແຕ່ກີ້ ປຶ້ມຕ່າງໆຂອງເຮົາເຄີຍເວົ້າວ່າ “ຄວາມຄິດ” ທີ່ພະເຢໂຫວາຈະດົນໃຈລັດຖະບານຕ່າງໆແມ່ນໃຫ້ເຂົາເຈົ້າທຳລາຍສາສະໜາປອມ.
ແຕ່ຈຳເປັນຕ້ອງມີການປັບປ່ຽນຄວາມເຂົ້າໃຈໃໝ່. ທີ່ຈິງ “ຄວາມຄິດ” ທີ່ພະເຢໂຫວາຈະດົນໃຈລັດຖະບານຕ່າງໆແມ່ນໃຫ້ເຂົາເຈົ້າ “ມອບອຳນາດການປົກຄອງຂອງໂຕເອງໃຫ້ສັດຮ້າຍ.” ເພື່ອຈະເຂົ້າໃຈວ່າເລື່ອງນີ້ຈະເກີດຂຶ້ນແທ້ແນວໃດ ໃຫ້ເຮົາມາຕອບຄຳຖາມຕໍ່ໄປນີ້ນຳກັນ.
ຄຳພະຍາກອນນີ້ເວົ້າເຖິງໃຜ? “ແມ່ຈ້າງ” ຍັງຖືກເອີ້ນວ່າ “ບາບີໂລນໃຫຍ່” ເຊິ່ງໝາຍເຖິງສາສະໜາປອມຢູ່ທົ່ວໂລກ. “ສັດຮ້າຍສີແດງສົດ” ໝາຍເຖິງອົງການສະຫະປະຊາຊາດ. ອົງການນີ້ຖືກຕັ້ງຂຶ້ນໃນປີ 1919 ເພື່ອຮັກສາຄວາມສະຫງົບສຸກຢູ່ທົ່ວໂລກແລະເຄີຍຖືກເອີ້ນວ່າອົງການສັນນິບາດຊາດ. (ພນມ. 17:3-5) “ເຂົາ 10 ເຂົາ” ໝາຍເຖິງລັດຖະບານຕ່າງໆທີ່ມີອຳນາດເຊິ່ງສະໜັບສະໜູນສັດຮ້າຍນັ້ນ.
ແມ່ຈ້າງກັບສັດຮ້າຍສີແດງສົດມີສາຍສຳພັນແນວໃດ? ແມ່ຈ້າງ “ນັ່ງຢູ່ເທິງ” ສັດຮ້າຍ ເຊິ່ງໝາຍຄວາມວ່າລາວສະໜັບສະໜູນສັດຮ້າຍແລະພະຍາຍາມໃຫ້ມັນເຮັດຕາມທີ່ລາວຕ້ອງການ.
ຈະເກີດຫຍັງຂຶ້ນກັບແມ່ຈ້າງ? ສັດຮ້າຍກັບເຂົາ 10 ເຂົາ “ຈະພາກັນຊັງແມ່ຈ້າງຄົນນັ້ນ.” ເຂົາເຈົ້າຊັງລາວຫຼາຍຈົນຈະເອົາຊັບສິນເງິນຄຳແລະທຸກສິ່ງທຸກຢ່າງຂອງລາວໄປແລະຈະເປີດໂປງໃຫ້ທຸກຄົນຮູ້ວ່າລາວຊົ່ວຮ້າຍຫຼາຍແທ້ໆ. ຈາກນັ້ນ ເຂົາເຈົ້າຈະທຳລາຍລາວ ເຊິ່ງຈະເປັນໄປຕາມທີ່ພະເຢໂຫວາໄດ້ບອກໄວ້. (ພນມ. 17:1; 18:8) ນີ້ຈະເປັນຈຸດຈົບຂອງສາສະໜາປອມ. ແຕ່ກ່ອນທີ່ເລື່ອງນີ້ຈະເກີດຂຶ້ນ ພະເຢໂຫວາຈະດົນໃຈໃຫ້ລັດຖະບານຕ່າງໆເຮັດບາງຢ່າງທີ່ບໍ່ເຄີຍເກີດຂຶ້ນມາກ່ອນໃນປະຫວັດສາດການປົກຄອງຂອງມະນຸດ.
ພະເຢໂຫວາຈະໃຫ້ລັດຖະບານຕ່າງໆເຮັດຫຍັງ? ເພິ່ນຈະດົນໃຈໃຫ້ເຂົາ 10 ເຂົາມີ “ຄວາມຄິດຂອງເພິ່ນ” ນັ້ນໝາຍເຖິງ “ເຂົາເຈົ້າ [ຈະ] ມອບກຳລັງແລະອຳນາດຂອງໂຕເອງໃຫ້ສັດຮ້າຍ [ສີແດງສົດ]” ເຊິ່ງກໍຄືອົງການສະຫະປະຊາຊາດ. (ພນມ. 17:13) ນີ້ໝາຍຄວາມວ່າມັນຈະບໍ່ແມ່ນຄວາມຄິດຂອງລັດຖະບານຕ່າງໆທີ່ຈະມອບກຳລັງແລະອຳນາດຂອງໂຕເອງໃຫ້ສັດຮ້າຍນັ້ນ. ຄຳພະຍາກອນໃນຄຳພີໄບເບິນສະແດງໃຫ້ເຫັນວ່າພະເຢໂຫວາຈະເປັນຜູ້ທີ່ເຮັດໃຫ້ເຂົາເຈົ້າເຮັດແບບນັ້ນ. (ສພສ. 21:1 ສົມທຽບກັບເອຊາຢາ 44:28) ການປ່ຽນແປງນີ້ຈະບໍ່ໄດ້ເກີດຂຶ້ນແບບຄ່ອຍເປັນຄ່ອຍໄປ ແຕ່ມັນຈະເກີດຂຶ້ນແບບໄວໆ. ຈາກນັ້ນ ສັດຮ້າຍທີ່ມີອຳນາດຈະເຮັດຕາມການຕັດສິນຂອງພະເຢໂຫວາໂດຍທຳລາຍສາສະໜາປອມທັງໝົດໃຫ້ດັບສູນໄປຢ່າງຖາວອນ.
ເຮົາຄາດຫວັງວ່າຈະເກີດຫຍັງຂຶ້ນໃນອະນາຄົດ? ເຮົາບໍ່ຄວນຄາດຫວັງວ່າຈະໄດ້ຍິນລາຍງານຂ່າວທີ່ບອກວ່າລັດຖະບານຕ່າງໆກຳລັງຄ່ອຍໆສະໜັບສະໜູນອົງການສະຫະປະຊາຊາດຫຼາຍຂຶ້ນ. ແຕ່ເຮົາຄວນຄາດຫວັງວ່າ ໃນທັນທີທັນໃດ ພະເຢໂຫວາຈະດົນໃຈໃຫ້ລັດຖະບານຕ່າງໆມອບອຳນາດຂອງໂຕເອງໃຫ້ອົງການສະຫະປະຊາຊາດ. ເມື່ອເລື່ອງນີ້ເກີດຂຶ້ນ ເຮົາກໍຈະຮູ້ວ່າຄວາມທຸກລຳບາກຄັ້ງໃຫຍ່ກຳລັງຈະເລີ່ມຕົ້ນ. ໃນຕອນນີ້ “ໃຫ້ [ເຮົາ] ຕື່ນໂຕແລະມີສະຕິຢູ່ສະເໝີ” ຍ້ອນການປ່ຽນແປງແບບກະທັນຫັນກຳລັງຈະເກີດຂຶ້ນໃນໄວໆນີ້.—1ທຊ. 5:6