ບົດຄວາມສຶກສາທີ 50
ເພງທີ 48 ໃຊ້ຊີວິດຕາມແນວທາງຂອງພະເຢໂຫວາທຸກວັນ
ຮຽນແບບຄວາມຖ່ອມຂອງພະເຢໂຫວາ
“ໃຫ້ພວກເຈົ້າຮຽນແບບພະເຈົ້າຄືກັບລູກທີ່ຮັກຂອງເພິ່ນ.”—ອຟຊ. 5:1
ຈຸດສຳຄັນ
ມີ 4 ວິທີທີ່ເຮົາຈະຮຽນແບບຄວາມຖ່ອມຂອງພະເຢໂຫວາ.
1. ເປັນຫຍັງຄວາມຖ່ອມຂອງພະເຢໂຫວາຈຶ່ງເດັ່ນຫຼາຍ?
ເມື່ອເຈົ້າເຫັນຄົນທີ່ມີອຳນາດໃນໂລກທຸກມື້ນີ້ ເຈົ້າຄິດວ່າເຂົາເຈົ້າມີຄວາມຖ່ອມຢູ່ບໍ? ຄືຊິບໍ່ມີ. ແຕ່ພະເຢໂຫວາທີ່ເປັນພະເຈົ້າຜູ້ມີລິດເດດສູງສຸດ ເພິ່ນຖ່ອມຫຼາຍ. (ພສ. 113:5-8) ບໍ່ມີຜູ້ໃດຖ່ອມຄືກັບພະເຢໂຫວາ ເພິ່ນບໍ່ມີຄວາມຍິ່ງໃນໂຕຈັກໜ້ອຍເລີຍ. ໃນບົດນີ້ ເຮົາຈະຮຽນກ່ຽວກັບຄຸນລັກສະນະ 4 ຢ່າງຂອງພະເຢໂຫວາ ແລະເຮົາຈະເບິ່ງວ່າແຕ່ລະຄຸນລັກສະນະສະແດງເຖິງຄວາມຖ່ອມຂອງເພິ່ນແນວໃດ. ເຮົາຍັງຈະເບິ່ງວ່າພະເຢຊູຮຽນແບບຄວາມຖ່ອມຂອງພະເຢໂຫວາພໍ່ຂອງເພິ່ນແນວໃດ. ການຮຽນຮູ້ເລື່ອງເຫຼົ່ານີ້ຈະຊ່ວຍເຮົາໃຫ້ສະໜິດກັບພະເຢໂຫວາຫຼາຍຂຶ້ນແລະຊ່ວຍເຮົາໃຫ້ຮຽນແບບຄວາມຖ່ອມຂອງເພິ່ນໄດ້ຫຼາຍຂຶ້ນ.
ພະເຢໂຫວາເຂົ້າຫາໄດ້ງ່າຍ
2. ເພງສັນລະເສີນ 62:8 ບອກໃຫ້ເຮົາຮູ້ຫຍັງກ່ຽວກັບພະເຢໂຫວາ? (ເບິ່ງຮູບໜ້າປົກນຳ)
2 ຕາມປົກກະຕິແລ້ວ ຄົນຍິ່ງເຂົ້າຫາໄດ້ຍາກ. ຄວາມຍິ່ງເຮັດໃຫ້ຄົນອື່ນບໍ່ຢາກເຂົ້າໃກ້ເຂົາເຈົ້າຫຼືເຮັດໃຫ້ຄົນອື່ນບໍ່ຢາກຫຍຸ້ງກ່ຽວນຳເຂົາເຈົ້າເລີຍ. ພະເຢໂຫວາແຕກຕ່າງຈາກຄົນເຫຼົ່ານີ້. ຍ້ອນພະເຢໂຫວາເປັນພະເຈົ້າທີ່ຖ່ອມ ເພິ່ນຈຶ່ງເຊີນເຮົາໃຫ້ເຂົ້າຫາເພິ່ນໂດຍການອະທິດຖານແລະບອກເພິ່ນກ່ຽວກັບສິ່ງທີ່ເຮົາອຸກໃຈ. (ອ່ານເພງສັນລະເສີນ 62:8) ຄືກັບພໍ່ທີ່ມີຄວາມຫ່ວງໃຍເຊິ່ງພ້ອມທີ່ຈະຟັງເລື່ອງທີ່ລູກກັງວົນ ພະເຢໂຫວາກໍພ້ອມທີ່ຈະຟັງຄຳອະທິດຖານຂອງຜູ້ຮັບໃຊ້ຂອງເພິ່ນ. ທີ່ຈິງ ພະເຢໂຫວາໃຫ້ມີຄຳອະທິດຖານຂອງຫຼາຍຄົນຂຽນໄວ້ໃນຄຳພີໄບເບິນ. ນີ້ສະແດງວ່າພະເຢໂຫວາເຂົ້າຫາໄດ້ງ່າຍແລະຢາກຟັງຄຳອະທິດຖານຂອງເຮົາຫຼາຍແທ້ໆ. (ຢຊ. 10:12-14; 1ຊມ. 1:10-18) ແຕ່ບາງເທື່ອເຮົາອາດຮູ້ສຶກວ່າເຮົາບໍ່ສາມາດເຂົ້າຫາພະເຢໂຫວາໂດຍການອະທິດຖານຍ້ອນເຮົາເຮັດຜິດຫຼາຍຢ່າງ ຄັນຊັ້ນເຮົາຄວນເຮັດແນວໃດ?
ພໍ່ຮຽນແບບຄວາມຖ່ອມຂອງພະເຢໂຫວາໂດຍຕັ້ງໃຈຟັງຕອນທີ່ລູກຊາຍອະທິບາຍວ່າເປັນຫຍັງໂຖດອກໄມ້ຈຶ່ງຕົກແຕກຕອນທີ່ລາວຫຼິ້ນຢູ່ໃນເຮືອນ (ເບິ່ງຂໍ້ 2)
3. ເປັນຫຍັງເຈົ້າໝັ້ນໃຈວ່າພະເຢໂຫວາຢາກໃຫ້ເຈົ້າອະທິດຖານຫາເພິ່ນເລື້ອຍໆ?
3 ເຮົາສາມາດເຂົ້າຫາພະເຢໂຫວາໂດຍການອະທິດຖານບໍ່ວ່າເຮົາຈະຮູ້ສຶກແນວໃດຕໍ່ກັບໂຕເອງ. ເປັນຫຍັງຈຶ່ງເວົ້າແບບນັ້ນ? ໃນຕົວຢ່າງປຽບທຽບຂອງພະເຢຊູເລື່ອງລູກທີ່ຫຼົງທາງ ເພິ່ນສົມທຽບພະເຢໂຫວາເປັນຄືກັບພໍ່ທີ່ໃຈດີທີ່ໃຫ້ລູກຊາຍທີ່ກັບໃຈແລ້ວເຊິ່ງຮູ້ສຶກວ່າໂຕເອງບໍ່ມີຄ່າໄດ້ກັບເຂົ້າມາໃນຄອບຄົວອີກ. ພໍ່ເຮັດແນວໃດເມື່ອລູກຊາຍກັບຄືນມາເຮືອນ? ພະເຢຊູບອກວ່າເມື່ອພໍ່ແນມເຫັນລູກຊາຍຕັ້ງແຕ່ຢູ່ໄກໆ ພໍ່ກໍ “ແລ່ນໄປຫາ ທັງກອດແລະຈູບລາວ.” (ລກ. 15:17-20) ພະເຢໂຫວາເປັນຄືກັບພໍ່ຜູ້ນັ້ນ. ເມື່ອພະເຢໂຫວາໄດ້ຍິນຄຳອະທິດຖານຂອງເຮົາແຕ່ລະຄົນທີ່ທຸກໃຈແລະຮູ້ສຶກເສຍໃຈໃນສິ່ງທີ່ເຮົາໄດ້ເຮັດຜິດ ຄວາມຖ່ອມຂອງພະເຢໂຫວາກໍເຮັດໃຫ້ເພິ່ນຕັ້ງໃຈຟັງຄຳອະທິດຖານຂອງເຮົາ. (ສສ. 3:19, 20) ພະເຢໂຫວາອີ່ຕົນເຮົາ ແລະເພິ່ນແລ່ນມາຫາເຮົາໃນຄວາມໝາຍທີ່ວ່າເພິ່ນໃຫ້ກຳລັງໃຈເຮົາແລະເຮັດໃຫ້ເຮົາໝັ້ນໃຈໃນຄວາມຮັກແລະຄວາມເມດຕາຂອງເພິ່ນ. (ອຊຢ. 57:15) ເພິ່ນເຮັດສິ່ງເຫຼົ່ານີ້ໂດຍວິທີໃດ? ເພິ່ນມັກໃຊ້ຜູ້ເບິ່ງແຍງ ຄົນໃນຄອບຄົວທີ່ເປັນພະຍານ ແລະພີ່ນ້ອງຮ່ວມຄວາມເຊື່ອເພື່ອໃຫ້ກຳລັງໃຈເຮົາແລະເຮັດໃຫ້ເຮົາໝັ້ນໃຈວ່າເພິ່ນຮັກເຮົາ. (ຢກບ. 5:14, 15) ພະເຢໂຫວາຈັດໃຫ້ມີການຊ່ວຍເຫຼືອແບບນີ້ຍ້ອນເພິ່ນຢາກໃຫ້ເຮົາໃກ້ຊິດກັບເພິ່ນ.
4. ພະເຢຊູເຮັດໃຫ້ເຫັນແນວໃດວ່າເພິ່ນເປັນຄົນທີ່ເຂົ້າຫາໄດ້ງ່າຍ?
4 ພະເຢຊູຮຽນແບບພໍ່ຂອງເພິ່ນ. ພະເຢຊູຖ່ອມຄືກັບພະເຢໂຫວາ. ຍ້ອນແນວນີ້ ຕອນທີ່ພະເຢຊູຢູ່ໃນໂລກ ພວກລູກສິດຈຶ່ງຮູ້ສຶກສະດວກໃຈທີ່ຈະເຂົ້າຫາເພິ່ນ. ເຂົາເຈົ້າບໍ່ຢ້ານທີ່ຈະຖາມເພິ່ນ. (ມຣກ. 4:10, 11) ເມື່ອພະເຢຊູຖາມເຂົາເຈົ້າວ່າຄິດແນວໃດກ່ຽວກັບເລື່ອງໃດເລື່ອງໜຶ່ງ ເຂົາເຈົ້າກໍກ້າບອກເພິ່ນວ່າເຂົາເຈົ້າຮູ້ສຶກແນວໃດແທ້ໆ. (ມທ. 16:13-16) ນອກຈາກນັ້ນ ເມື່ອເຮັດຜິດພາດ ເຂົາເຈົ້າກໍບໍ່ຢ້ານວ່າພະເຢຊູຈະໃຈຮ້າຍໃຫ້ເຂົາເຈົ້າ ຍ້ອນເຂົາເຈົ້າຮູ້ວ່າພະເຢຊູໃຈດີ ມີຄວາມອົດທົນ ແລະເຂົ້າໃຈເຂົາເຈົ້າ. (ມທ. 17:24-27) ຍ້ອນພະເຢຊູຮຽນແບບພະເຢໂຫວາພໍ່ຂອງເພິ່ນໄດ້ດີຫຼາຍ ພວກລູກສິດຈຶ່ງຮູ້ຈັກພະເຢໂຫວາດີຂຶ້ນ. (ຢຮ. 14:9) ເຂົາເຈົ້າໄດ້ຮຽນຮູ້ວ່າພະເຢໂຫວາຖ່ອມແລະເຂົ້າຫາໄດ້ງ່າຍ ເຊິ່ງບໍ່ຄືກັບພວກຫົວໜ້າສາສະໜາໃນສະໄໝນັ້ນທີ່ຍິ່ງ ບໍ່ມີຄວາມຫ່ວງໃຍ ແລະບໍ່ເຫັນອົກເຫັນໃຈ.
5. ຄວາມຖ່ອມຊ່ວຍເຮົາແນວໃດໃຫ້ເປັນຄົນທີ່ເຂົ້າຫາໄດ້ງ່າຍ?
5 ເຮົາຈະຮຽນແບບພະເຢໂຫວາໄດ້ແນວໃດ? ການເປັນຄົນຖ່ອມເຮັດໃຫ້ຄົນອື່ນເຂົ້າຫາເຮົາໄດ້ງ່າຍ. ຖ້າເຮົາບໍ່ເປັນຄົນຖ່ອມ ເຮົາກໍຈະອິດສາຄົນອື່ນ ຄິດວ່າໂຕເອງດີກວ່າຄົນອື່ນ ແລະບໍ່ຢາກໃຫ້ອະໄພຄົນອື່ນເມື່ອເຂົາເຈົ້າເຮັດຜິດຕໍ່ເຮົາ ເຊິ່ງນິດໄສແບບນີ້ຈະເຮັດໃຫ້ຄົນອື່ນບໍ່ຢາກຢູ່ໃກ້ເຮົາ. ແຕ່ຖ້າເຮົາເປັນຄົນຖ່ອມ ເຮົາກໍຈະມີຄວາມເມດຕາ ມີຄວາມອົດທົນ ແລະໃຫ້ອະໄພຄົນອື່ນ ເຊິ່ງນິດໄສແບບນີ້ຈະເຮັດໃຫ້ຄົນອື່ນຢາກຢູ່ໃກ້ເຮົາ. (ກລຊ. 3:12-14) ຜູ້ເບິ່ງແຍງຕ້ອງພະຍາຍາມເປັນພິເສດທີ່ຈະເປັນຄົນທີ່ເຂົ້າຫາໄດ້ງ່າຍ. ເພື່ອຈະເຮັດແບບນີ້ໄດ້ ເຂົາເຈົ້າຕ້ອງມັກຢູ່ກັບພີ່ນ້ອງ. ນີ້ໝາຍຄວາມວ່າຜູ້ເບິ່ງແຍງຕ້ອງພະຍາຍາມເຂົ້າຮ່ວມປະຊຸມແບບເຈິໂຕກັນແທນທີ່ຈະເຂົ້າຮ່ວມການປະຊຸມທາງຊູມຖ້າບໍ່ຈຳເປັນ. ຖ້າເຮັດໄດ້ ຜູ້ເບິ່ງແຍງຄວນພະຍາຍາມໄປປະກາດກັບພີ່ນ້ອງ. ເມື່ອພີ່ນ້ອງຮູ້ຈັກກັບຜູ້ເບິ່ງແຍງຫຼາຍຂຶ້ນ ເຂົາເຈົ້າກໍຈະສະດວກໃຈລົມກັບຜູ້ເບິ່ງແຍງເມື່ອຕ້ອງການຄວາມຊ່ວຍເຫຼືອ.
ພະເຢໂຫວາມີເຫດຜົນ
6-7. ພະເຢໂຫວາຟັງຄຳຮ້ອງຂໍຂອງຜູ້ຮັບໃຊ້ຂອງເພິ່ນແນວໃດ? ຂໍໃຫ້ຍົກຕົວຢ່າງ
6 ຄົນຍິ່ງມັກຄິດວ່າໂຕເອງຮູ້ດີທີ່ສຸດແລະເປັນຄົນບໍ່ມີເຫດຜົນໃນການປະຕິບັດກັບຄົນອື່ນ. ແຕ່ຍ້ອນພະເຢໂຫວາຖ່ອມ ເພິ່ນຈຶ່ງມີເຫດຜົນແລະຍອມຟັງຄົນອື່ນເຖິງວ່າເພິ່ນເໜືອກວ່າມະນຸດທຸກຄົນໃນທຸກໆດ້ານ. ໃຫ້ເຮົາມາເບິ່ງວ່າພະເຢໂຫວາປະຕິບັດກັບມີຣີອາມເອື້ອຍຂອງໂມເຊແນວໃດ? ມີຣີອາມກັບອາໂຣນຈົ່ມໃຫ້ໂມເຊຜູ້ທີ່ເປັນຕົວແທນຂອງພະເຢໂຫວາ. ທີ່ຈິງ ການທີ່ມີຣີອາມເຮັດແບບນີ້ເປັນການບໍ່ສະແດງຄວາມນັບຖືຕໍ່ພະເຢໂຫວາ. ຍ້ອນແນວນີ້ ພະເຢໂຫວາຈຶ່ງໃຈຮ້າຍໃຫ້ລາວຫຼາຍແລະເຮັດໃຫ້ລາວເປັນຂີ້ທູດ. ແຕ່ເມື່ອອາໂຣນຂໍໃຫ້ໂມເຊຊ່ວຍມີຣີອາມ ໂມເຊຈຶ່ງຮ້ອງຂໍພະເຢໂຫວາໃຫ້ປົວເອື້ອຍຂອງລາວ. ພະເຢໂຫວາເຮັດແນວໃດ? ພະເຢໂຫວາບໍ່ໄດ້ໃຫ້ຄວາມຍິ່ງເຮັດໃຫ້ເພິ່ນຍຶດຢູ່ກັບການຕັດສິນລົງໂທດມີຣີອາມ. ຍ້ອນພະເຢໂຫວາຖ່ອມ ເພິ່ນຈຶ່ງຟັງໂມເຊແລະປົວມີຣີອາມໃຫ້ເຊົາ.—ຈຊບ. 12:1-15
7 ເຮົາຍັງເຫັນຄວາມຖ່ອມຂອງພະເຢໂຫວາຕອນທີ່ເພິ່ນປະຕິບັດກັບກະສັດເຮເຊກີຢາ. ພະເຢໂຫວາໄດ້ສົ່ງຜູ້ພະຍາກອນເອຊາຢາໄປບອກເຮເຊກີຢາວ່າລາວຈະຕາຍ. ເຮເຊກີຢາຈຶ່ງຮ້ອງໄຫ້ແລະອະທິດຖານຂໍໃຫ້ພະເຢໂຫວາປົວລາວ. ພະເຢໂຫວາຟັງຄຳອະທິດຖານຂອງເຮເຊກີຢາແລະໃຫ້ລາວມີຊີວິດຢູ່ຕໍ່ໄປອີກ 15 ປີ. (2ກສ. 20:1, 5, 6) ຍ້ອນພະເຢໂຫວາຖ່ອມ ເພິ່ນຈຶ່ງສະແດງຄວາມເມດຕາແລະຟັງຄຳອະທິດຖານຂອງຜູ້ຮັບໃຊ້ຂອງເພິ່ນ.
8. ມີຕົວຢ່າງຫຍັງແດ່ທີ່ສະແດງວ່າພະເຢຊູມີເຫດຜົນ? (ມາຣະໂກ 3:1-6)
8 ພະເຢຊູຮຽນແບບພໍ່ຂອງເພິ່ນ. ຕອນທີ່ຢູ່ໃນໂລກ ພະເຢຊູເຮັດສິ່ງທີ່ດີຫຼາຍຢ່າງເພື່ອຄົນອື່ນເມື່ອເພິ່ນເຫັນວ່າມີເຫດຜົນທີ່ຈະເຮັດແບບນັ້ນ. ຕົວຢ່າງເຊັ່ນ: ເພິ່ນໄດ້ປົວຄົນໃນວັນຊະບາໂຕເຖິງວ່າພວກຫົວໜ້າສາສະໜາທີ່ມີໃຈແຂງກະດ້າງຄິດວ່າບໍ່ຄວນເຮັດ. (ອ່ານມາຣະໂກ 3:1-6) ໃນທຸກມື້ນີ້ ພະເຢຊູກໍຍັງມີເຫດຜົນແລະສະແດງຄວາມເຫັນອົກເຫັນໃຈໃນວິທີທີ່ເພິ່ນຊີ້ນຳປະຊາຄົມຕ່າງໆ. ຕົວຢ່າງເຊັ່ນ: ເມື່ອບາງຄົນໃນປະຊາຄົມເຮັດຜິດຮ້າຍແຮງ ເພິ່ນກໍອົດທົນກັບຜູ້ນັ້ນແລະເປີດໂອກາດໃຫ້ລາວໄດ້ປ່ຽນແປງໂຕເອງ.—ພນມ. 2:2-5
9. ເຮົາຈະຄິດແລະເຮັດແບບມີເຫດຜົນໄດ້ແນວໃດ? (ເບິ່ງຮູບນຳ)
9 ເຮົາຈະຮຽນແບບພະເຢໂຫວາໄດ້ແນວໃດ? ເຮົາຕ້ອງຮຽນແບບພະເຢໂຫວາໃນວິທີທີ່ເຮົາຄິດແລະເຮັດແບບມີເຫດຜົນ. (ຢກບ. 3:17) ຕົວຢ່າງເຊັ່ນ: ພໍ່ແມ່ທີ່ມີເຫດຜົນຈະບໍ່ຄາດໝາຍຫຼາຍເກີນໄປໃນສິ່ງທີ່ລູກເຮັດບໍ່ໄດ້. ຢາໂຄບເປັນຕົວຢ່າງທີ່ດີໃນເລື່ອງນີ້ທີ່ຄິດເຖິງລູກຂອງໂຕເອງ. (ປຖກ. 33:12-14) ພໍ່ແມ່ທີ່ຖ່ອມແລະມີເຫດຜົນບໍ່ຄວນສົມທຽບລູກຜູ້ໜຶ່ງກັບລູກອີກຜູ້ໜຶ່ງ. ຜູ້ເບິ່ງແຍງກໍຄືກັນຕ້ອງເປັນຄົນມີເຫດຜົນ. ວິທີໜຶ່ງທີ່ຜູ້ເບິ່ງແຍງເຮັດໄດ້ແມ່ນ ຟັງຄຳຄິດເຫັນສ່ວນຫຼາຍຂອງຄະນະຜູ້ເບິ່ງແຍງເມື່ອຄຳຄິດເຫັນນັ້ນບໍ່ຂັດກັບຫຼັກການໃນຄຳພີໄບເບິນ. (1ຕມ. 3:2, 3) ເຮົາທຸກຄົນຄວນພະຍາຍາມເຂົ້າໃຈວ່າຄົນອື່ນຄິດແລະຮູ້ສຶກແນວໃດເຖິງວ່າເຮົາບໍ່ໄດ້ຄິດແລະຮູ້ສຶກຄືກັບເຂົາເຈົ້າ. (ຣມ. 14:1) ທຸກຄົນໃນປະຊາຄົມຄວນພະຍາຍາມເຮັດໃຫ້ຄົນອື່ນເຫັນວ່າເຮົາ “ເປັນຄົນມີເຫດຜົນ.”—ຟລປ. 4:5
ພໍ່ທີ່ມີເຫດຜົນຮູ້ວ່າລາວຄວນຄາດໝາຍຫຼາຍໜ້ອຍສ່ຳໃດຈາກລູກໃນການປະກາດ (ເບິ່ງຂໍ້ 9)
ພະເຢໂຫວາອົດທົນ
10. ພະເຢໂຫວາສະແດງຄວາມອົດທົນໃນເລື່ອງໃດແດ່?
10 ເຈົ້າອາດສັງເກດເຫັນວ່າຄົນຍິ່ງບໍ່ມັກການລໍຖ້າ. ຄວາມຍິ່ງເຮັດໃຫ້ເຂົາເຈົ້າຂາດຄວາມອົດທົນ ແຕ່ພະເຢໂຫວາບໍ່ເປັນແບບນັ້ນ ເພິ່ນມີຄວາມອົດທົນຫຼາຍທີ່ສຸດ. ຕົວຢ່າງເຊັ່ນ: ໃນສະໄໝຂອງໂນອາ ພະເຢໂຫວາບອກວ່າເພິ່ນຈະລໍຖ້າ 120 ປີກ່ອນທີ່ຈະທຳລາຍຄົນຊົ່ວ. (ປຖກ. 6:3) ໂນອາມີເວລາທີ່ຈະລ້ຽງລູກໃຫ້ໃຫຍ່ແລະມີເວລາສ້າງເຮືອໃຫຍ່ໃຫ້ແລ້ວໂດຍທີ່ມີຄອບຄົວຊ່ວຍລາວ. ຕໍ່ມາ ພະເຢໂຫວາຕັ້ງໃຈຟັງອັບຣາຮາມດ້ວຍຄວາມອົດທົນເມື່ອລາວຖາມເພິ່ນກ່ຽວກັບການທຳລາຍເມືອງໂຊໂດມແລະເມືອງໂກໂມຣາ. ຖ້າເປັນຄົນຍິ່ງ ລາວກໍຈະເວົ້າວ່າ: ‘ເປັນຫຍັງເຈົ້າກ້າຖາມຂ້ອຍແບບນີ້!’ ແຕ່ຍ້ອນພະເຢໂຫວາຖ່ອມ ເພິ່ນຈຶ່ງຟັງອັບຣາຮາມຢ່າງອົດທົນ.—ປຖກ. 18:20-33
11. ຕາມ 2 ເປໂຕ 3:9 ເປັນຫຍັງພະເຢໂຫວາຈຶ່ງອົດທົນໃນສະໄໝຂອງເຮົາ?
11 ພະເຢໂຫວາສະແດງຄວາມອົດທົນໃນສະໄໝຂອງເຮົາຄືກັນ. ເພິ່ນກຳລັງລໍຖ້າໃຫ້ຮອດເວລາທີ່ເພິ່ນກຳນົດໄວ້ເພື່ອຈະທຳລາຍໂລກຊົ່ວນີ້. ເປັນຫຍັງພະເຢໂຫວາຈຶ່ງອົດທົນ? ເພິ່ນອົດທົນ “ຍ້ອນບໍ່ຢາກໃຫ້ຜູ້ໃດຕ້ອງຖືກທຳລາຍ ແຕ່ຢາກໃຫ້ທຸກຄົນກັບໃຈ.” (ອ່ານ 2 ເປໂຕ 3:9) ຄວາມອົດທົນຂອງພະເຢໂຫວາມີປະໂຫຍດຫຍັງບໍ? ມີແທ້! ຍ້ອນພະເຢໂຫວາອົດທົນ ຫຼາຍລ້ານຄົນທີ່ມີຫົວໃຈທີ່ດີຈຶ່ງມີໂອກາດໄດ້ເປັນໝູ່ກັບເພິ່ນ. ເຮົາຫວັງວ່າຈະມີອີກຫຼາຍລ້ານຄົນຈະມາເປັນໝູ່ກັບພະເຢໂຫວາຕື່ມອີກ. ແຕ່ຄວາມອົດທົນຂອງພະເຢໂຫວາກໍມີຂີດຈຳກັດ. ເພິ່ນຮັກຜູ້ຄົນ ແຕ່ເພິ່ນຈະບໍ່ຍອມໃຫ້ເຂົາເຈົ້າເຮັດຕາມໃຈໂຕເອງ. ເພິ່ນຈະບໍ່ປ່ອຍໃຫ້ຄວາມຊົ່ວມີຢູ່ຕະຫຼອດໄປ.—ຮບກ. 2:3
12. ພະເຢຊູຮຽນແບບຄວາມອົດທົນຂອງພະເຢໂຫວາແນວໃດ?
12 ພະເຢຊູຮຽນແບບພໍ່ຂອງເພິ່ນ. ພະເຢຊູຮຽນແບບຄວາມອົດທົນຂອງພະເຢໂຫວາມາຫຼາຍພັນປີແລ້ວ. ພະເຢຊູເຫັນຊາຕານໃສ່ຮ້າຍພະເຢໂຫວາແລະມະນຸດທີ່ສັດຊື່. (ປຖກ. 3:4, 5; ໂຢບ 1:11; ພນມ. 12:10) ເພິ່ນຍັງເຫັນມະນຸດເຈິກັບຄວາມຍາກລຳບາກຫຼາຍຢ່າງ. ພະເຢຊູຄືຊິຢາກ “ທຳລາຍທຸກສິ່ງທີ່ມານຮ້າຍເຮັດ” ແທ້ໆ! (1ຢຮ. 3:8) ອັນໃດຊ່ວຍພະເຢຊູໃຫ້ລໍຖ້າຢ່າງອົດທົນຈົນກວ່າຈະຮອດເວລາທີ່ພະເຢໂຫວາບອກເພິ່ນໃຫ້ທຳລາຍທຸກສິ່ງທີ່ຊາຕານເຮັດ? ຄວາມຖ່ອມຊ່ວຍເພິ່ນ. ພະເຢຊູຮູ້ວ່າພະເຢໂຫວາເປັນຜູ້ທີ່ກຳນົດວັນເວລາວ່າຕອນໃດທີ່ຄວນຈະທຳລາຍໂລກຊົ່ວນີ້.—ກຈກ. 1:7
13. ພະເຢຊູສະແດງຄວາມອົດທົນກັບພວກອັກຄະສາວົກແນວໃດ ແລະເປັນຫຍັງເພິ່ນຈຶ່ງອົດທົນ?
13 ຕອນທີ່ພະເຢຊູຢູ່ໃນໂລກ ເພິ່ນຍັງໄດ້ອົດທົນກັບພວກອັກຄະສາວົກ. ຕົວຢ່າງເຊັ່ນ: ເມື່ອພວກອັກຄະສາວົກຖຽງກັນແລ້ວຖຽງກັນອີກວ່າໃຜຈະເປັນໃຫຍ່ທີ່ສຸດ ພະເຢຊູກໍບໍ່ໄດ້ໃຈຮ້າຍໃຫ້ເຂົາເຈົ້າ ແຕ່ເພິ່ນອົດທົນກັບເຂົາເຈົ້າຕໍ່ໄປ. (ລກ. 9:46; 22:24-27) ເພິ່ນໝັ້ນໃຈວ່າໃນຕອນໃດຕອນໜຶ່ງເຂົາເຈົ້າຈະປ່ຽນແປງໂຕເອງແລະເປັນຄົນຖ່ອມຫຼາຍຂຶ້ນ. ເຈົ້າເຄີຍເຮັດຜິດຊ້ຳແລ້ວຊ້ຳອີກບໍ? ຖ້າເຄີຍ ເຈົ້າຄືຊິດີໃຈທີ່ມີພະເຢຊູເປັນກະສັດຍ້ອນເພິ່ນຖ່ອມແລະມີຄວາມອົດທົນ.
14. ອັນໃດຈະຊ່ວຍເຮົາໃຫ້ເປັນຄົນອົດທົນຫຼາຍຂຶ້ນ?
14 ເຮົາຈະຮຽນແບບພະເຢໂຫວາໄດ້ແນວໃດ? ເພື່ອເຮົາຈະຄິດແລະເຮັດຄືກັບພະເຢໂຫວາຫຼາຍຂຶ້ນ ເຮົາຕ້ອງຮຽນຮູ້ທີ່ຈະ “ຄິດຄືກັບພະຄລິດ.” (1ກຣ. 2:16) ອັນໃດຈະຊ່ວຍເຮົາໃຫ້ຄິດຄືກັບພະເຢຊູຫຼາຍຂຶ້ນ? ແນ່ນອນວ່າບໍ່ມີທາງລັດ. ເຮົາຕ້ອງອ່ານປຶ້ມຂ່າວດີກ່ຽວກັບຊີວິດຂອງພະເຢຊູ. ຈາກນັ້ນ ເຮົາຕ້ອງໃຊ້ເວລາຄິດຕຶກຕອງໃນສິ່ງທີ່ອ່ານເພື່ອຈະຮູ້ວ່າພະເຢຊູຄິດແນວໃດໃນເລື່ອງຕ່າງໆ. ນອກຈາກນັ້ນ ເຮົາຕ້ອງຂໍໃຫ້ພະເຢໂຫວາຊ່ວຍເຮົາໃຫ້ເປັນຄົນຖ່ອມແລະມີຄວາມອົດທົນຄືກັບພະເຢຊູ. ແຮ່ງເຮົາຮຽນຮູ້ທີ່ຈະຄິດຄືກັບພະເຢຊູ ເຮົາກໍແຮ່ງຈະຮຽນແບບພະເຢໂຫວາໄດ້ຫຼາຍຂຶ້ນໃນການສະແດງຄວາມອົດທົນຕໍ່ກັບໂຕເອງແລະຕໍ່ຄົນອື່ນ.—ມທ. 18:26-30, 35
ພະເຢໂຫວາໃຫ້ກຽດຄົນທີ່ຕ່ຳຕ້ອຍ
15. ມີຕົວຢ່າງຫຍັງແດ່ທີ່ສະແດງວ່າພະເຢໂຫວາສົນໃຈຄົນທີ່ຕ່ຳຕ້ອຍ? (1 ຊາມູເອນ 2:8)
15 ອ່ານ 1 ຊາມູເອນ 2:8. ເປັນກຽດແທ້ໆທີ່ພະເຈົ້າຜູ້ຍິ່ງໃຫຍ່ສູງສຸດໃນເອກະພົບສົນໃຈຄົນທີ່ຕ່ຳຕ້ອຍ. ໃຫ້ເຮົາເບິ່ງເລື່ອງຂອງບາງຄົນທີ່ພະເຢໂຫວາໃຫ້ກຽດເຂົາເຈົ້າໃນຫຼາຍຮ້ອຍປີທີ່ຜ່ານມາ. ເຮົາອາດຈະຄິດຫາເຂົາເຈົ້າບາງຄົນບໍ່ພໍ້ ແຕ່ພະເຢໂຫວາໃຫ້ມີເລື່ອງຂອງເຂົາເຈົ້າຂຽນໄວ້ໃນຄຳພີໄບເບິນ. ພະເຢໂຫວາໃຫ້ໂມເຊຂຽນຊື່ຂອງເດໂບຣາທີ່ເປັນຄົນເບິ່ງແຍງເຣເບກາໄວ້ໃນຄຳພີໄບເບິນ. ລາວມີຊີວິດຢູ່ໃນສະໄໝພວກປູ່ຍ່າຕານາຍຂອງຄົນອິດສະຣາເອນ. ລາວຮັບໃຊ້ໃນຄອບຄົວຂອງອີຊາກແລະຢາໂຄບຢ່າງສັດຊື່ເປັນເວລາປະມານ 125 ປີ. ເຖິງວ່າເຮົາບໍ່ຮູ້ຫຼາຍປານໃດກ່ຽວກັບຜູ້ຍິງທີ່ພັກດີຄົນນີ້ ແຕ່ພະເຢໂຫວາໃຫ້ມີເລື່ອງຂອງລາວຂຽນໄວ້ໃນຄຳພີໄບເບິນ ເຊິ່ງສະແດງວ່າຢາໂຄບກັບຄອບຄົວຮັກເດໂບຣາຫຼາຍ. (ປຖກ. 24:59; 35:8, ໄຂເງື່ອນ) ຫຼາຍຮ້ອຍປີຕໍ່ມາ ພະເຢໂຫວາໄດ້ເລືອກເດັກນ້ອຍຄົນໜຶ່ງທີ່ເປັນຄົນລ້ຽງແກະທີ່ຊື່ດາວິດໃຫ້ເປັນກະສັດຂອງຊາດອິດສະຣາເອນ. (2ຊມ. 22:1, 36) ບໍ່ດົນຫຼັງຈາກທີ່ພະເຢຊູເກີດ ພະເຢໂຫວາໄດ້ສົ່ງພວກທູດສະຫວັນໃຫ້ໄປຫາຄົນລ້ຽງແກະກຸ່ມໜຶ່ງ ແລະເພິ່ນໄດ້ໃຫ້ກຽດເຂົາເຈົ້າຮູ້ເປັນກຸ່ມທຳອິດວ່າຜູ້ທີ່ຈະເປັນເມຊີອາໃນອະນາຄົດໄດ້ເກີດແລ້ວໃນເມືອງເບັດເລເຮັມທີ່ຢູ່ໃກ້ໆນັ້ນ. (ລກ. 2:8-11) ຕອນທີ່ໂຢເຊັບກັບມາຣິອາພາພະເຢຊູໄປວິຫານ ພະເຢໂຫວາໄດ້ໃຫ້ກຽດຊີເມໂອນກັບອານາທີ່ເຖົ້າແລ້ວ ໂດຍໃຫ້ເຂົາເຈົ້າໄດ້ເຫັນລູກຊາຍຂອງເພິ່ນ. (ລກ. 2:25-30, 36-38) ເຫັນໄດ້ແຈ້ງວ່າ ເຖິງວ່າພະເຢໂຫວາຍິ່ງໃຫຍ່ ແຕ່ເພິ່ນກໍຍັງສົນໃຈຄົນທີ່ຕ່ຳຕ້ອຍ.
16. ພະເຢຊູຮຽນແບບພະເຢໂຫວາແນວໃດໃນການປະຕິບັດກັບຄົນອື່ນ?
16 ພະເຢຊູຮຽນແບບພໍ່ຂອງເພິ່ນ. ພະເຢຊູຮັກແລະໃຫ້ກຽດຄົນຕ່ຳຕ້ອຍຄືກັບທີ່ພະເຢໂຫວາເຮັດ. ເພິ່ນສອນ “ຄົນທຳມະດາແລະບໍ່ມີການສຶກສາ” ເລື່ອງການປົກຄອງຂອງພະເຈົ້າ. (ກຈກ. 4:13; ມທ. 11:25) ພະເຢຊູຍັງປົວຄົນເຈັບປ່ວຍແລະປະຕິບັດຕໍ່ເຂົາເຈົ້າໃນແບບທີ່ເຮັດໃຫ້ເຂົາເຈົ້າຮູ້ສຶກວ່າເພິ່ນຮັກແລະໃຫ້ກຽດເຂົາເຈົ້າ. (ລກ. 5:13) ໃນຄືນກ່ອນທີ່ພະເຢຊູຈະຕາຍ ເພິ່ນລ້າງຕີນໃຫ້ພວກອັກຄະສາວົກເຊິ່ງຕາມປົກກະຕິແລ້ວເປັນວຽກຂອງຄົນຮັບໃຊ້. (ຢຮ. 13:5) ກ່ອນຈະໄປສະຫວັນ ພະເຢຊູໄດ້ໃຫ້ກຽດພວກລູກສິດຂອງເພິ່ນທຸກຄົນເຊິ່ງລວມເຖິງພວກເຮົາໃນທຸກມື້ນີ້ແລະຄົນທີ່ຈະເຂົ້າມາເປັນລູກສິດໃນອະນາຄົດ ໂດຍມອບໝາຍວຽກທີ່ສຳຄັນທີ່ສຸດໃຫ້ເຮັດ ນັ້ນຄືການຊ່ວຍຄົນອື່ນໃຫ້ໄດ້ຊີວິດຕະຫຼອດໄປ.—ມທ. 28:19, 20
17. ເຮົາຈະສະແດງຄວາມຮັກແລະໃຫ້ກຽດຄົນອື່ນແນວໃດ? (ເບິ່ງຮູບນຳ)
17 ເຮົາຈະຮຽນແບບພະເຢໂຫວາໄດ້ແນວໃດ? ເຮົາສະແດງຄວາມຮັກແລະໃຫ້ກຽດຄົນອື່ນເມື່ອເຮົາເວົ້າເລື່ອງຂ່າວດີກັບເຂົາເຈົ້າບໍ່ວ່າເຂົາເຈົ້າຈະມີພູມຫຼັງແບບໃດ ມີເຊື້ອຊາດໃດ ຫຼືລະດັບການສຶກສາສ່ຳໃດ. ເຮົາສະແດງຄວາມຮັກແລະໃຫ້ກຽດພີ່ນ້ອງເມື່ອເຮົາເບິ່ງວ່າເຂົາເຈົ້າດີກວ່າເຮົາ ບໍ່ວ່າເຮົາຈະມີຄວາມສາມາດຫຼືສິດທິພິເສດແບບໃດກໍຕາມ. (ຟລປ. 2:3) ພະເຢໂຫວາພໍໃຈເມື່ອເຮົາ “ເປັນຝ່າຍເລີ່ມ” ໃຫ້ກຽດຄົນອື່ນກ່ອນໃນວິທີເຫຼົ່ານີ້ແລະໃນວິທີອື່ນໆ.—ຣມ. 12:10; ຊຟຢ. 3:12
ເຮົາຮຽນແບບຄວາມຖ່ອມຂອງພະເຢໂຫວາເມື່ອເຮົາເວົ້າເລື່ອງຂ່າວດີກັບຄົນທຸກປະເພດ (ເບິ່ງຂໍ້ 17)a
18. ເປັນຫຍັງເຈົ້າຈຶ່ງຢາກຮຽນແບບຄວາມຖ່ອມຂອງພະເຢໂຫວາ?
18 ເມື່ອເຮົາພະຍາຍາມເຕັມທີທີ່ຈະຮຽນແບບຄວາມຖ່ອມຂອງພະເຢໂຫວາ ເຮົາກໍຈະເປັນຄົນທີ່ເຂົ້າຫາໄດ້ງ່າຍຂຶ້ນ ມີເຫດຜົນຫຼາຍຂຶ້ນ ແລະອົດທົນຫຼາຍຂຶ້ນ ແລະເຮົາກໍຈະຮັກແລະໃຫ້ກຽດຄົນອື່ນຄືກັບທີ່ພະເຢໂຫວາເຮັດ. ຂໍໃຫ້ຄວາມພະຍາຍາມຂອງເຮົາທີ່ຈະສະໜິດຫຼາຍຂຶ້ນກັບພະເຢໂຫວາພະເຈົ້າທີ່ຖ່ອມເຮັດໃຫ້ເຮົາແຕ່ລະຄົນມີຄ່າຫຼາຍຂຶ້ນສຳລັບເພິ່ນ.—ອຊຢ. 43:4
ເພງທີ 159 ສັນລະເສີນພະເຢໂຫວາ
a ຄຳອະທິບາຍຮູບ: ພີ່ນ້ອງຍິງຮຽນແບບຄວາມຮັກທີ່ພະເຢໂຫວາມີຕໍ່ທຸກຄົນໂດຍສອນຄຳພີໄບເບິນໃຫ້ພວກຜູ້ຍິງທີ່ຢູ່ໃນຄຸກ.