ການຄືນມາຈາກຕາຍແມ່ນຫຍັງ?
ຄຳຕອບຈາກຄຳພີໄບເບິນ
“ການຄືນມາຈາກຕາຍ” ໃນຄຳພີໄບເບິນມາຈາກຄຳພາສາກຣີກ ອະນາທາຊິດສ໌ ໝາຍເຖິງ “ການເຮັດໃຫ້ລຸກຂຶ້ນ.” ຄົນທີ່ຄືນມາຈາກຕາຍຈະກັບມາມີຊີວິດອີກ ແລະເປັນຄົນເກົ່າຄືກັບຕອນທີ່ລາວຍັງບໍ່ຕາຍ.—1 ໂກຣິນໂທ 15:12, 13
ພະຄຳພີພາກພາສາເຮັບເຣີຫຼືທີ່ຫຼາຍຄົນເອີ້ນວ່າພັນທະສັນຍາເດີມ ບໍ່ມີຄຳວ່າ: “ການຄືນມາຈາກຕາຍ” ແຕ່ກໍມີການສອນເລື່ອງນີ້ໄວ້. ຕົວຢ່າງເຊັ່ນ ພະເຈົ້າສັນຍາຜ່ານທາງໂອເຊຜູ້ສົ່ງຂ່າວວ່າ “ເຮົາຈະໄຖ່ເຂົາເຈົ້າຈາກອຳນາດຂອງຂຸມຝັງສົບ. ເຮົາຈະຊ່ວຍເຂົາເຈົ້າໃຫ້ພົ້ນຈາກຄວາມຕາຍ.”—(ໂອເຊ 13:14; ໂຢບ 14:13-15; ເອຊາຢາ 26:19; ດານີເອນ 12:2, 13)
ຄົນທີ່ຄືນມາຈາກຕາຍຈະຢູ່ໃສ? ບາງຄົນຈະໄດ້ຮັບການປຸກໃຫ້ຄືນມາຈາກຕາຍເພື່ອໄປຢູ່ໃນສະຫວັນ ເຂົາເຈົ້າຈະປົກຄອງເປັນກະສັດຮ່ວມກັບພະຄລິດ. (2 ໂກຣິນໂທ 5:1; ພະນິມິດ 5:9, 10) ຄຳພີໄບເບິນເອີ້ນການຄືນມາຈາກຕາຍແບບນີ້ວ່າ: ການ “ຄືນມາຈາກຕາຍລຳດັບທຳອິດ” ແລະ “ກຸ່ມທຳອິດທີ່ໄດ້ຮັບການປຸກໃຫ້ຄືນມາຈາກຕາຍ” ນີ້ສະແດງວ່າຈະມີການຄືນມາຈາກຕາຍແບບອື່ນນຳ. (ພະນິມິດ 20:6; ຟີລິບປອຍ 3:11) ການຄືນມາຈາກຕາຍອີກແບບໜຶ່ງແມ່ນການຄືນມາເພື່ອຈະຢູ່ໃນໂລກ ເຊິ່ງຄົນທີ່ຄືນມາຈາກຕາຍສ່ວນຫຼາຍຈະມີຄວາມຫວັງແບບນີ້.—ຄຳເພງ 37:29
ຈະຄືນມາຈາກຕາຍໄດ້ແນວໃດ? ພະເຈົ້າໃຫ້ພະລັງກັບພະເຢຊູເພື່ອຈະປຸກຄົນຕາຍໃຫ້ຟື້ນ. (ໂຢຮັນ 11:25) ພະເຢຊູຈະໃຫ້ຊີວິດກັບ “ທຸກຄົນເຊິ່ງຢູ່ໃນອຸໂມງຝັງສົບ” ແຕ່ລະຄົນຈະກັບມາເປັນຄົນເກົ່າ ມີຄຸນລັກສະນະ ນິດໄສ ແລະຄວາມຊົງຈຳທຸກຢ່າງຄືເກົ່າ. (ໂຢຮັນ 5:28, 29) ຄົນທີ່ຄືນມາຈາກຕາຍໃນສະຫວັນຈະໄດ້ຮັບຮ່າງກາຍວິນຍານເຊິ່ງເປັນຮ່າງກາຍສຳລັບສະຫວັນ ສ່ວນຄົນທີ່ຄືນມາຈາກຕາຍເທິງໂລກຈະໄດ້ຮັບຮ່າງກາຍເນື້ອໜັງທີ່ແຂງແຮງສົມບູນ.—ເອຊາຢາ 33:24; 35:5, 6; 1 ໂກຣິນໂທ 15:42-44, 50
ຈະມີໃຜຄືນມາຈາກຕາຍ? ຄຳພີໄບເບິນບອກວ່າ: “ທັງຄົນດີແລະຄົນຊົ່ວຈະຄືນມາຈາກຕາຍ.” (ກິດຈະການ 24:15) ຄົນດີແມ່ນຄົນສັດຊື່ຕໍ່ພະເຈົ້າ ເຊັ່ນ: ໂນອາ ຊາຣາ ແລະອັບຣາຮາມ. (ປະຖົມມະການ 6:9; ເຮັບເຣີ 11:11; ຢາໂກໂບ 2:21) ຄົນຊົ່ວແມ່ນຄົນທີ່ບໍ່ໄດ້ເຮັດຕາມມາດຕະຖານຂອງພະເຈົ້າຍ້ອນບໍ່ມີໂອກາດຮຽນຮູ້ກ່ຽວກັບເພິ່ນ.
ມີຄົນອີກກຸ່ມໜຶ່ງທີ່ຈະບໍ່ໄດ້ຮັບການປຸກໃຫ້ຄືນມາຈາກຕາຍ ນັ້ນແມ່ນຄົນຊົ່ວທີ່ໄດ້ຮຽນຮູ້ມາດຕະຖານຂອງພະເຈົ້າແລ້ວແຕ່ບໍ່ຍອມປ່ຽນແປງໂຕເອງ. ເມື່ອຄົນເຫຼົ່ານີ້ຕາຍແລ້ວ ເຂົາເຈົ້າຈະຖືກທຳລາຍຢ່າງຖາວອນ ເຊິ່ງບໍ່ມີຄວາມຫວັງທີ່ຈະກັບມາມີຊີວິດອີກ.—ມັດທາຍ 23:33; ເຮັບເຣີ 10:26, 27
ຈະຄືນມາຈາກຕາຍເມື່ອໃດ? ຄຳພີໄບເບິນບອກວ່າການຄືນມາຈາກຕາຍໃນສະຫວັນຈະເກີດຂຶ້ນຫຼັງຈາກພະເຢຊູຄລິດເລີ່ມປົກຄອງເປັນກະສັດໃນສະຫວັນຕັ້ງແຕ່ປີ 1914. (1 ໂກຣິນໂທ 15:21-23) ການຄືນມາຈາກຕາຍເທິງໂລກຈະເກີດຂຶ້ນໃນອະນາຄົດລະຫວ່າງທີ່ພະເຢຊູປ່ຽນໂລກໃຫ້ເປັນອຸທິຍານ.—ລູກາ 23:43; ພະນິມິດ 20:6, 12, 13
ຄວາມເຊື່ອເລື່ອງການຄືນມາຈາກຕາຍສົມເຫດສົມຜົນບໍ? ຄຳພີໄບເບິນມີບັນທຶກຢ່າງລະອຽດກ່ຽວກັບການຄືນມາຈາກຕາຍຂອງ 9 ຄົນ ແລະແຕ່ລະຄົນມີພະຍານຮູ້ເຫັນຢືນຢັນໄດ້. (1 ກະສັດ 17:17-24; 2 ກະສັດ 4:32-37; 13:20, 21; ລູກາ 7:11-17; 8:40-56; ໂຢຮັນ 11:38-44; ກິດຈະການ 9:36-42; 20:7-12; 1 ໂກຣິນໂທ 15:3-6) ຄົນທີ່ໜ້າສົນໃຈເປັນພິເສດແມ່ນລາຊະໂຣຍ້ອນພະເຢຊູເຮັດການອັດສະຈັນໃຫ້ລາວຟື້ນຄືນຈາກຕາຍຕໍ່ໜ້າຄົນກຸ່ມໃຫຍ່ ເຖິງວ່າລາຊະໂຣຈະຕາຍໄປແລ້ວ 4 ມື້. (ໂຢຮັນ 11:39, 42) ແມ່ນແຕ່ສັດຕູຂອງພະເຢຊູກໍຍັງຍອມຮັບວ່າເລື່ອງນີ້ເກີດຂຶ້ນແທ້. ເຂົາເຈົ້າວາງແຜນຈະຂ້າທັງພະເຢຊູແລະລາຊະໂຣ.—ໂຢຮັນ 11:47, 53; 12:9-11
ຄຳພີໄບເບິນສະແດງໃຫ້ເຫັນວ່າ ພະເຈົ້າມີທັງຄວາມສາມາດແລະຄວາມຕ້ອງການທີ່ຈະປຸກຄົນຕາຍໃຫ້ມີຊີວິດອີກເທື່ອໜຶ່ງ. ເພິ່ນມີຄວາມຈື່ຈຳທີ່ບໍ່ມີຂີດຈຳກັດ ເພິ່ນຈຶ່ງສາມາດຈື່ລາຍລະອຽດຂອງທຸກໆຄົນທີ່ເພິ່ນຕ້ອງການຈະປຸກ ແລະຈະເຮັດໃຫ້ເຂົາເຈົ້າມີຊີວິດອີກເທື່ອໜຶ່ງດ້ວຍພະລັງອຳນາດສູງສຸດຂອງເພິ່ນ. (ໂຢບ 37:23; ມັດທາຍ 10:30; ລູກາ 20:37, 38) ພະເຈົ້າຕ້ອງການປຸກຄົນຕາຍໃຫ້ຄືນມາມີຊີວິດອີກຢ່າງແນ່ນອນ ເພາະຄຳພີໄບເບິນບອກວ່າ: ‘ພະອົງຈຶ່ງຢາກເຫັນ [ຄົນທີ່ຕາຍ] ອີກເທື່ອໜຶ່ງແທ້ໆ.’—ໂຢບ 14:15
ເລື່ອງເຂົ້າໃຈຜິດກ່ຽວກັບການຄືນມາຈາກຕາຍ
ເລື່ອງເລົ່າ: ການຄືນມາຈາກຕາຍແມ່ນການທີ່ດວງວິນຍານກັບຄືນເຂົ້າຮ່າງກາຍອີກ.
ຄວາມຈິງ: ຄຳພີໄບເບິນສອນວ່າ ເມື່ອຄົນໜຶ່ງຕາຍ ລາວບໍ່ມີຊີວິດຢູ່ອີກຕໍ່ໄປ ບໍ່ມີວິນຍານລອດຢູ່ຫຼັງຈາກຕາຍ. (ຜູ້ເທສະໜາປ່າວປະກາດ 9:5, 10) ດັ່ງນັ້ນ ເມື່ອຄົນໜຶ່ງຄືນມາຈາກຕາຍ ວິນຍານບໍ່ໄດ້ກັບເຂົ້າຮ່າງກາຍລາວຄືນ ແຕ່ລາວໄດ້ຮັບຮ່າງກາຍໃໝ່ແລະມີຊີວິດອີກເທື່ອໜຶ່ງ.
ເລື່ອງເລົ່າ: ບາງຄົນຈະຄືນມາຈາກຕາຍແລະຖືກທຳລາຍທັນທີ.
ຄວາມຈິງ: ຄຳພີໄບເບິນບອກວ່າ: “ຄົນທີ່ເຮັດຊົ່ວຈະຄືນມາແລ້ວຖືກຕັດສິນ.” (ໂຢຮັນ 5:29) ການຕັດສິນທີ່ເວົ້າເຖິງໃນຂໍ້ນີ້ເບິ່ງຈາກການກະທຳຫຼັງຈາກຄືນມາຈາກຕາຍ ບໍ່ແມ່ນກ່ອນຕາຍ. ພະເຢຊູບອກວ່າ: “ຄົນຕາຍຈະໄດ້ຍິນສຽງລູກຂອງພະເຈົ້າ ແລະຄົນທີ່ເຊື່ອຟັງຈະມີຊີວິດ.” (ໂຢຮັນ 5:25) ຄົນທີ່ “ເຊື່ອຟັງ” ພະເຢຊູສອນຫຼັງຈາກທີ່ຄືນມາຈາກຕາຍຈະມີຊື່ຈົດໄວ້ໃນ “ມ້ວນໜັງສືແຫ່ງຊີວິດ.”—ພະນິມິດ 20:12, 13
ເລື່ອງເລົ່າ: ພະເຈົ້າຈະເຮັດໃຫ້ຄົນຄືນມາຈາກຕາຍໃນຮ່າງກາຍເກົ່າ.
ຄວາມຈິງ: ເມື່ອຄົນເຮົາຕາຍຮ່າງກາຍກໍເນົ່າເປື່ອຍແລະຍ່ອຍສະຫຼາຍໄປເປັນດິນ.—ຜູ້ເທສະໜາປ່າວປະກາດ 3:19, 20