ພາກ 5
ຊີວິດມີຈຸດມຸ່ງໝາຍອັນຍອດຢ້ຽມ
1, 2. ເຮົາຈະບອກໄດ້ຢ່າງໃດວ່າພະເຈົ້າເບິ່ງແຍງເຮົາ ແລະເຮົາຄວນຈະຫັນໄປຫາບ່ອນໃດເພື່ອຈະໄດ້ຄຳຕອບໃນເລື່ອງຊີວິດ?
1 ວິທີທີ່ແຜ່ນດິນໂລກແລະສິ່ງມີຊີວິດໃນໂລກຖືກສ້າງຂຶ້ນສະແດງວ່າພະຜູ້ສ້າງສິ່ງເຫຼົ່ານັ້ນເປັນພະເຈົ້າແຫ່ງຄວາມຮັກຊຶ່ງເບິ່ງແຍງຢ່າງແທ້ຈິງ. ແລະຄຳພີໄບເບິນພະຄຳຂອງພະອົງສະແດງໃຫ້ເຫັນວ່າພະອົງເບິ່ງແຍງພວກເຮົາ ຄຳພີໄບເບິນໃຫ້ຄຳຕອບດີທີ່ສຸດກ່ຽວກັບຄຳຖາມຕ່າງໆ ທີ່ວ່າ ເປັນຫຍັງເຮົາຈຶ່ງຢູ່ທີ່ນີ້ເທິງແຜ່ນດິນໂລກ? ແລະເຮົາຈະໄປໃສ?
2 ເຮົາຕ້ອງຊອກຄົ້ນຄຳພີໄບເບິນເພື່ອຫາຄຳຕອບເຫຼົ່ານັ້ນ. ພະຄຳຂອງພະເຈົ້າມີກ່າວວ່າ: “ຖ້າພວກທ່ານຊອກຫາພະອົງທ່ານກໍ່ຈະພົບພະອົງແລະຖ້າພວກທ່ານປະພະອົງ ພະອົງຈະປະທ່ານ.” (2 ຂ່າວຄາວ 15:2) ຖ້າເຊັ່ນນັ້ນ ການຄົ້ນຫາພະຄຳຂອງພະເຈົ້າເຜີຍໃຫ້ເຫັນຢ່າງໃດໃນເລື່ອງພະປະສົງທີ່ພະອົງມີຕໍ່ເຮົາ?
ເຫດຜົນທີ່ພະເຈົ້າສ້າງມະນຸດ
3. ເປັນຫຍັງພະເຈົ້າຈຶ່ງສ້າງແຜ່ນດິນໂລກ?
3 ຄຳພີໄບເບິນເຜີຍໃຫ້ເຫັນວ່າພະເຈົ້າໄດ້ກະກຽມແຜ່ນດິນໂລກໄວ້ໂດຍຄຳນຶງເຖິງມະນຸດໂດຍສະເພາະ. ເອຊາອີ 45:18 ບອກກ່ຽວກັບແຜ່ນດິນໂລກວ່າ: “ພະເຈົ້າໄດ້ນິລະມິດສ້າງແຜ່ນດິນບໍ່ໃຊ່ໃຫ້ຢູ່ເປົ່າ ພະອົງໄດ້ສ້າງແຜ່ນດິນໃຫ້ມີຊາວຊົນ.” ແລະພະອົງຈັດກຽມແຜ່ນດິນໂລກໃຫ້ມີທຸກສິ່ງທີ່ຜູ້ຄົນຈຳເປັນຕ້ອງມີ ບໍ່ພຽງເພື່ອມີຊີວິດຢູ່ເທົ່ານັ້ນ ແຕ່ເພື່ອຈະເພີດເພີນກັບຊີວິດເຕັມທີ່.—ຕົ້ນເດິມ ບົດ 1 ແລະ 2.
4. ເປັນຫຍັງພະເຈົ້າສ້າງມະນຸດຄູ່ທຳອິດ?
4 ໃນພະຄຳຂອງພະອົງ ພະເຈົ້າບອກເຖິງການສ້າງມະນຸດຄູ່ທຳອິດ ອາດາມກັບເອວາ ແລະເຜີຍໃຫ້ຮູ້ສິ່ງທີ່ພະອົງຄຳນຶງເຖິງເພື່ອຄອບຄົວມະນຸດ. ພະອົງກ່າວດັ່ງນີ້: “ພວກເຮົາຈົ່ງສ້າງມະນຸດຕາມຮູບ (“ຕາມແບບສາຍາ,” ລ.ມ.) ຂອງເຮົາ ຕາມແບບຢ່າງຂອງເຮົາເຖີດແລະໃຫ້ມະນຸດນັ້ນຄຸ້ມຄອງຝູງປາໃນນ້ຳທະເລກໍ່ດີ ແລະຝູງນົກໃນຟ້າອາກາດກໍ່ດີ ແລະຝູງສັດໃຊ້ກໍ່ດີແລະແຜ່ນດິນໂລກທັງສິ້ນກໍ່ດີແລະສັດລອຍຄານທຸກຕົວທີ່ລອຍຄານເທິງດິນກໍ່ດີ.” (ຕົ້ນເດິມ 1:26) ມະນຸດຈະມີໜ້າທີ່ດູແລ “ແຜ່ນດິນໂລກທັງສິ້ນ” ແລະສັດທີ່ຖືກສ້າງໃຫ້ຢູ່ເທິງແຜ່ນດິນໂລກ.
5. ມະນຸດຄູ່ທຳອິດຖືກຈັດໃຫ້ຢູ່ບ່ອນໃດ?
5 ພະເຈົ້າສ້າງສວນຂະໜາດໃຫຍ່ໄວ້ໃນບໍລິເວນທີ່ຮຽກວ່າເອເດນ ຕັ້ງຢູ່ໃນຕາເວັນອອກກາງ. ຄັນແລ້ວພະອົງ “ໄດ້ເອົາຄົນນັ້ນມາໃຫ້ຢູ່ໃນສວນເອເດນ ເພື່ອຈະໄດ້ທຳການເພາະປູກແລະເຝົ້າຮັກສາສວນນັ້ນ.” ນັ້ນເປັນອຸດທະຍານຊຶ່ງມີທຸກສິ່ງທີ່ມະນຸດຄູ່ທຳອິດຈຳເປັນຕ້ອງມີເພື່ອກິນເປັນອາຫານ. ແລະອຸດທະຍານນັ້ນຍັງລວມທັງ “ຜົນລະໄມ້ທຸກຢ່າງທີ່ຊອບຕາແລະໃຊ້ເປັນອາຫານກິນ” ແລະພືດຜັກອື່ນໆ ແລະສັດທີ່ໜ້າສົນໃຈຫຼາຍຊະນິດ.—ຕົ້ນເດິມ 2:7-9, 15, ລ.ມ.
6. ມະນຸດຖືກສ້າງໃຫ້ມີຄຸນສົມບັດອັນໃດທາງດ້ານຈິດໃຈແລະດ້ານຮ່າງກາຍ?
6 ຮ່າງກາຍມະນຸດຄູ່ທຳອິດຖືກສ້າງຂຶ້ນໃຫ້ສົມບູນ ດັ່ງນັ້ນພວກເຂົາຈະບໍ່ຕ້ອງເຈັບປ່ວຍ, ເຖົ້າແກ່, ຫຼືຕາຍ. ນອກຈາກນັ້ນ ພວກເຂົາຍັງມີຄຸນລັກສະນະອື່ນໆ ອີກເຊັ່ນເຈດຈຳນົງເສລີເປັນຕົ້ນ. ວິທີທີ່ພວກເຂົາຖືກສ້າງຂຶ້ນນັ້ນມີຊີ້ແຈງໄວ້ທີ່ ຕົ້ນເດິມ 1:27 (ລ.ມ.) ດັ່ງນີ້: “ພະເຈົ້າຈຶ່ງສ້າງມະນຸດຂຶ້ນຕາມແບບສາຍາຂອງພະອົງ ແລະຕາມແບບສາຍາຂອງພະອົງນັ້ນພະເຈົ້າໄດ້ສ້າງມະນຸດຂຶ້ນ ພະອົງໄດ້ສ້າງທັງຊາຍທັງຍິງ.” ເນື່ອງຈາກມະນຸດເຮົາຖືກສ້າງຂຶ້ນຕາມແບບສາຍາຂອງພະເຈົ້າ ເຮົາຈຶ່ງໄດ້ຮັບບໍ່ພຽງແຕ່ຄຸນສົມບັດທາງກາຍແລະໃຈເທົ່ານັ້ນ ແຕ່ລັກສະນະທາງສິນທຳແລະຝ່າຍວິນຍານດ້ວຍ ແລະສິ່ງເຫຼົ່ານີ້ຕ້ອງໄດ້ຮັບການຕອບສະໜອງຖ້າເຮົາຈະມີຄວາມສຸກຢ່າງແທ້ຈິງ. ພະເຈົ້າໄດ້ຈັດກຽມວິທີການຕ່າງໆ ເພື່ອສະໜອງຄວາມຕ້ອງການເຫຼົ່ານັ້ນເຊັ່ນດຽວກັບຄວາມຕ້ອງການດ້ານອາຫານ, ນ້ຳ, ແລະອາກາດ. ດັ່ງທີ່ພະເຍຊູຕັດ “ມະນຸດຈະລ້ຽງຊີບດ້ວຍເຂົ້າຈີ່ແຕ່ຢ່າງດຽວບໍ່ໄດ້ ແຕ່ດ້ວຍຄຳຕັດທຸກຄຳທີ່ອອກຈາກປາກຂອງພະເຢໂຫວາ.”—ມັດທາຍ 4:4, ລ.ມ.
7. ມະນຸດຄູ່ທຳອິດໄດ້ຮັບພະບັນຊາອັນໃດ?
7 ຍິ່ງກວ່ານີ້ ພະເຈົ້າໄດ້ປະທານພະບັນຊາອັນໜ້າພິດສະຫວົງປະການນຶ່ງແກ່ມະນຸດຄູ່ທຳອິດດ້ວຍຂະນະທີ່ເຂົາຢູ່ໃນເອເດນ: “ຈົ່ງພາກັນອອກແມ່ແຜ່ລູກເກີດມາກທະວີຂຶ້ນໃຫ້ແຜ່ນດິນເຕັມ.” (ຕົ້ນເດິມ 1:28) ດັ່ງນັ້ນເຂົາທັງສອງຈະສາມາດເກີດລູກຫຼານແລະໃຫ້ກຳເນີດລູກໆ ທີ່ສົມບູນ. ແລະໃນເມື່ອປະຊາກອນມະນຸດເພີ່ມຂຶ້ນ ພວກເຂົາກໍ່ຈະມີວຽກງານອັນໜ້າຍິນດີໃນການແຜ່ຂະຫຍາຍເຂດແດນຫຼືອານາບໍລິເວນຂອງອຸດທະຍານເອເດນດັ້ງເດີມອອກໄປ. ໃນທີ່ສຸດແຜ່ນດິນໂລກທັງສິ້ນກໍ່ຈະຖືກພັດທະນາສູ່ສະພາບອຸດທະຍານ ມີຜູ້ຄົນທີ່ສົມບູນແລະມີຄວາມສຸກຊຶ່ງຈະມີຊີວິດຢູ່ຕະຫຼອດໄປໄດ້ນັ້ນອາໄສຢູ່. ຄຳພີໄບເບິນແຈ້ງແກ່ເຮົາວ່າຫຼັງຈາກພະເຈົ້າໃຫ້ທຸກສິ່ງເລີ່ມຕົ້ນແລ້ວ “ພະເຈົ້າໄດ້ເຫັນສິ່ງທັງປວງທີ່ພະອົງໄດ້ສ້າງໄວ້ນັ້ນແລະດັ່ງນີ້ສິ່ງນັ້ນກໍ່ວິເສດດີແທ້ໆ.”—ຕົ້ນເດິມ 1:31; ໂປດເບິ່ງຄຳເພງ 118:17 ດ້ວຍ.
8. ມະນຸດຄວນເບິ່ງແຍງແຜ່ນດິນໂລກຢ່າງໃດ?
8 ເຫັນໄດ້ແຈ່ມແຈ້ງວ່າມະນຸດຄວນໃຊ້ແຜ່ນດິນໂລກທີ່ມີການບຸກເບີກນັ້ນເພື່ອປະໂຫຍດຂອງຕົນ. ແຕ່ການນີ້ຈະຕ້ອງເຮັດດ້ວຍຄວາມຮັບຜິດຊອບ. ມະນຸດຄວນເປັນຜູ້ດູແລແຜ່ນດິນໂລກດ້ວຍຄວາມນັບຖື ບໍ່ແມ່ນເປັນຜູ້ປຸ້ນທຳລາຍແຜ່ນດິນໂລກ. ການທຳລາຍແຜ່ນດິນໂລກທີ່ເຮົາເຫັນຢູ່ໃນທຸກມື້ນີ້ຂັດກັບພະໄທປະສົງຂອງພະເຈົ້າແລະຄົນທີ່ມີສ່ວນໃນການທຳລາຍນັ້ນກໍ່ພວມດຳເນີນໃນທາງກົງກັນຂ້າມກັບຈຸດປະສົງໃນເລື່ອງຊີວິດເທິງແຜ່ນດິນໂລກ. ພວກເຂົາຈະໄດ້ຮັບໂທດສຳລັບການເຮັດເຊັ່ນນັ້ນເພາະຄຳພີໄບເບິນບອກວ່າພະເຈົ້າຈະ “ທຳລາຍຄົນເຫຼົ່ານັ້ນທີ່ທຳລາຍແຜ່ນດິນໂລກ.”—ຄຳປາກົດ 11:18, ລ.ມ.
ຍັງຄົງເປັນພະປະສົງຂອງພະເຈົ້າ
9. ເປັນຫຍັງເຮົາຈຶ່ງໝັ້ນໃຈວ່າພະປະສົງຂອງພະເຈົ້າຈະສຳເລັດເປັນຈິງ?
9 ດ້ວຍເຫດນີ້ ພະເຈົ້າມີພະປະສົງຕັ້ງແຕ່ຕອນເລີ່ມຕົ້ນໃຫ້ຄອບຄົວມະນຸດສົມບູນອາໄສຢູ່ຕະຫຼອດໄປທີ່ແຜ່ນດິນໂລກໃນອຸດທະຍານ. ແລະນັ້ນຍັງເປັນພະປະສົງຂອງພະເຈົ້າຢູ່! ພະປະສົງນັ້ນຈະສຳເລັດເປັນຈິງໂດຍບໍ່ມີການລົ້ມເຫຼວ. ຄຳພີໄບເບິນກ່າວວ່າ: “ພະເຢໂຫວາແຫ່ງກອງທັບທັງຫຼາຍໄດ້ສຳບານວ່າ: ‘ຈິງແທ້ການທີ່ເຮົາໄດ້ຄຶດຈະກະທຳນັ້ນກໍ່ຈະບັງເກີດມາແລະເຮົາໄດ້ຕັ້ງໃຈຈະກະທຳຢ່າງໃດກໍ່ຈະສຳເລັດຢ່າງນັ້ນ.’” “ເຮົາໄດ້ບອກແລ້ວແລະເຮົາຈະໃຫ້ການນັ້ນບັງເກີດມາ ເຮົາໄດ້ໝາຍໃຈແລ້ວແລະເຮົາຈະໃຫ້ສຳເລັດ.”—ເອຊາອີ 14:24; 46:11.
10, 11. ພະເຍຊູ, ເປໂຕ, ແລະດາວິດຜູ້ປະພັນຄຳເພງກ່າວເຖິງອຸດທະຍານຢ່າງໃດ?
10 ພະເຍຊູຄລິດກ່າວເຖິງພະປະສົງຂອງພະເຈົ້າໃນການຟື້ນຟູອຸດທະຍານເທິງແຜ່ນດິນໂລກໃນຄາວທີ່ພະອົງບອກຊາຍຄົນນຶ່ງຊຶ່ງຕ້ອງການຄວາມຫວັງສຳລັບອະນາຄົດວ່າ: “ເຈົ້າຈະຢູ່ກັບເຮົາໃນອຸດທະຍານ.” (ລຶກາ 23:43, ລ.ມ.) ອັກຄະສາວົກເປໂຕເຊັ່ນກັນໄດ້ກ່າວເຖິງໂລກໃໝ່ທີ່ຈະມີມາເມື່ອທ່ານບອກລ່ວງໜ້າວ່າ: “ມີຟ້າສະຫວັນໃໝ່ [ການປົກຄອງໃໝ່ຈາກສະຫວັນ] ແລະແຜ່ນດິນໂລກໃໝ່ [ສັງຄົມໃໝ່ເທິງແຜ່ນດິນໂລກ] ຊຶ່ງເຮົາພວມລໍຖ້າຢູ່ຕາມຄຳສັນຍາຂອງ [ພະເຈົ້າ] ແລະຊຶ່ງຄວາມຊອບທຳຈະດຳລົງຢູ່ທີ່ນັ້ນ.”—2 ເປໂຕ 3:13, ລ.ມ.
11 ນອກຈາກນັ້ນ ດາວິດຜູ້ປະພັນຄຳເພງກໍ່ໄດ້ຈາລຶກໄວ້ຄືກັນກ່ຽວກັບໂລກໃໝ່ທີ່ຈະມີມາແລະໂລກໃໝ່ຈະຍືນຍົງພຽງໃດ. ທ່ານບອກໄວ້ລ່ວງໜ້າວ່າ: “ຄົນຊອບທຳທັງຫຼາຍຈະມີແຜ່ນດິນໄວ້ແລະເຂົາຈະຕັ້ງຢູ່ທີ່ນັ້ນສືບໆ ໄປເປັນນິດ.” (ຄຳເພງ 37:29) ນັ້ນຄືເຫດຜົນທີ່ພະເຍຊູສັນຍາໄວ້ວ່າ: “ຄວາມສຸກມີແກ່ຄົນອ່ອນໂຍນ ເພາະວ່າເຂົາຈະໄດ້ຮັບແຜ່ນດິນໂລກເປັນມໍລະດົກ.”—ມັດທາຽ 5:5, ລ.ມ.
12, 13. ຈົ່ງສະຫລຸບພະປະສົງອັນຍອດຢ້ຽມທີ່ພະເຈົ້າມີສຳລັບມະນຸດ.
12 ນັບວ່າເປັນຄວາມຫວັງອັນຍອດຢ້ຽມແທ້ໆ ທີ່ຈະໄດ້ຢູ່ຕະຫຼອດໄປເທິງແຜ່ນດິນໂລກທີ່ເປັນອຸດທະຍານຊຶ່ງປັດສະຈາກຄວາມຊົ່ວ, ອາດຊະຍາກຳ, ຄວາມເຈັບປ່ວຍ, ຄວາມໂສກເສົ້າ, ແລະຄວາມເຈັບປວດ! ໃນພະທຳເຫຼັ້ມສຸດທ້າຍຂອງຄຳພີໄບເບິນ ຄຳພະຍາກອນຂອງພະເຈົ້າສະຫລຸບພະປະສົງອັນຍິ່ງໃຫຍ່ນີ້ໂດຍຖະແຫຼງວ່າ: “[ພະເຈົ້າ] ຈະເຊັດນ້ຳຕາທຸກໆ ຢົດຈາກຕາຂອງເຂົາ ແລະຄວາມຕາຍຈະບໍ່ມີອີກຕໍ່ໄປ ທັງການໂສກເສົ້າຫຼືສຽງຮ້ອງໄຫ້ຫຼືຄວາມເຈັບປ່ວຍຈະບໍ່ມີອີກເລີຍ. ສິ່ງທີ່ເຄີຍມີກ່ອນນັ້ນໄດ້ຜ່ານພົ້ນໄປແລ້ວ.” ແລະເພີ່ມເຕີມອີກວ່າ: “ແລະພະອົງຜູ້ປະທັບເທິງພະທີ່ນັ່ງນັ້ນຈຶ່ງຕັດວ່າ: ‘ຈົ່ງເບິ່ງ ເຮົາພວມສ້າງສິ່ງທັງປວງໃຫ້ໃໝ່.’ ແລະພະອົງໄດ້ຕັດວ່າ: ‘ຈົ່ງຂຽນໄວ້ເຖີດ. ເພາະຖ້ອຍຄຳເຫຼົ່ານີ້ວາງໃຈໄດ້ແລະສັດຈິງ.’”—ຄຳປາກົດ 21:4, 5, ລ.ມ.
13 ແມ່ນແລ້ວ ພະເຈົ້າມີພະປະສົງອັນຍອດຢ້ຽມຢູ່ໃນພະໄທ. ນັ້ນຈະເປັນໂລກໃໝ່ແຫ່ງຄວາມຊອບທຳ ອຸດທະຍານນິລັນດອນຊຶ່ງມີບອກໄວ້ລ່ວງໜ້າໂດຍພະອົງຜູ້ມີຄວາມສາມາດແລະຈະກະທຳຕາມທີ່ພະອົງສັນຍາໄວ້ ເພາະຖ້ອຍຄຳຂອງພະອົງ “ວາງໃຈໄດ້ແລະສັດຈິງ.”
[ຮູບພາບໜ້າ 20, 21]
ພະເຈົ້າປະສົງໃຫ້ມະນຸດອາໄສຢູ່ຕະຫຼອດໄປເທິງແຜ່ນດິນໂລກທີ່ເປັນອຸດທະຍານ. ນັ້ນຍັງເປັນພະປະສົງຂອງພະອົງຢູ່
[ຮູບພາບໜ້າ 22]
ເຈົ້າຂອງເຮືອນສາມາດເອີ້ນຜູ້ເຊົ່າທີ່ເຮັດໃຫ້ເຮືອນຂອງເຂົາເພມາຄິດໄລ່ຄ່າເສຍຫາຍໄດ້