ທຸກສາສະໜາກໍຄືກັນແທ້ບໍ? ພະເຈົ້າຍອມຮັບທຸກສາສະໜາບໍ?
ຄຳຕອບຈາກຄຳພີໄບເບິນ
ແຕ່ລະສາສະໜາບໍ່ຄືກັນ. ໃນຄຳພີໄບເບິນມີຕົວຢ່າງຂອງຫຼາຍສາສະໜາທີ່ພະເຈົ້າບໍ່ມັກແລະບໍ່ຍອມຮັບ. ມີການແບ່ງອອກເປັນສອງປະເພດຫຼັກໆ.
1. ສາສະໜາທີ່ນະມັດສະການພະປອມ
ຄຳພີໄບເບິນບອກວ່າການນະມັດສະການພະປອມ “ເປັນສິ່ງຫຼອກລວງ” “ບໍ່ມີຄ່າ” ແລະ “ບໍ່ມີປະໂຫຍດ.” (ເຢເຣມີ 10:3-5; 16:19, 20, ລ.ມ.) ພະເຢໂຫວາaພະເຈົ້າສັ່ງພວກອິດສະຣາເອນໃນສະໄໝບູຮານວ່າ: “ຫ້າມນະມັດສະການພະເຈົ້າອື່ນນອກຈາກເຮົາ.” (ອົບພະຍົບ 20:3, 23; 23:24, ລ.ມ.) ແລະ “ພະເຢໂຫວາໃຈຮ້າຍ” ເມື່ອຄົນອິດສະຣາເອນນະມັດສະການພະອື່ນ.—ຈົດເຊັນບັນຊີ 25:3, ລ.ມ.; ພວກເລວີ 20:2; ຜູ້ຕັດສິນ 2:13, 14
ພະເຈົ້າຍັງຮູ້ສຶກຄືເກົ່າໃນເລື່ອງການນະມັດສະການພະ “ທີ່ຜູ້ຄົນຖືກັນວ່າເປັນ ‘ພະເຈົ້າ’.” (1 ໂກຣິນໂທ 8:5, 6; ຄາລາເຕຍ 4:8) ເພິ່ນສັ່ງຜູ້ທີ່ຢາກນະມັດສະການເພິ່ນໃຫ້ເຊົາຫຍຸ້ງກ່ຽວກັບຄົນທີ່ນະມັດສະການພະປອມໂດຍສັ່ງວ່າ: “ອອກມາຈາກພວກເຂົາແລະແຍກຢູ່ຕ່າງຫາກ.” (2 ໂກຣິນໂທ 6:14-17) ຖ້າທຸກສາສະໜາຄືກັນແລະພະເຈົ້າຍອມຮັບທຸກສາສະໜາ ເປັນຫຍັງເພິ່ນຈຶ່ງສັ່ງແບບນີ້?
2. ສາສະໜາທີ່ນະມັດສະການພະເຈົ້າໃນວິທີທີ່ເພິ່ນບໍ່ຍອມຮັບ
ມີບາງເທື່ອທີ່ຄົນອິດສະຣາເອນນະມັດສະການພະເຈົ້າໂດຍລວມເອົາຄວາມເຊື່ອແລະວິທີນະມັດສະການພະປອມເຂົ້າມານຳ ແຕ່ພະເຢໂຫວາບໍ່ຍອມຮັບການເອົາສາສະໜາແທ້ມາປົນກັບສາສະໜາປອມ. (ອົບພະຍົບ 32:8; ພະບັນຍັດ 12:2-4) ພະເຢຊູຕຳໜິພວກຫົວໜ້າສາສະໜາໃນສະໄໝຂອງເພິ່ນຍ້ອນວິທີນະມັດສະການພະເຈົ້າຂອງເຂົາເຈົ້າບໍ່ຖືກຕ້ອງ ເຂົາເຈົ້າເຮັດໂຕເປັນຄົນເຄັ່ງສາສະໜາ ແຕ່ແທ້ໆແລ້ວເຂົາເຈົ້າເປັນຄົນຕີສອງໜ້າ “ເບິ່ງຂ້າມເລື່ອງທີ່ສຳຄັນກວ່າໃນກົດໝາຍຂອງໂມເຊ ນັ້ນຄື ຄວາມຍຸຕິທຳ ຄວາມເມດຕາ ຄວາມສັດຊື່.”—ມັດທາຍ 23:23
ໃນທຸກມື້ນີ້ກໍຄືກັນ ພະເຈົ້າຍອມຮັບພຽງແຕ່ສາສະໜາທີ່ສອນຄວາມຈິງເທົ່ານັ້ນ. ຄວາມຈິງນີ້ມີຢູ່ໃນຄຳພີໄບເບິນ. (ໂຢຮັນ 4:24; 17:17; 2 ຕີໂມທຽວ 3:16, 17) ສາສະໜາທີ່ສອນຂັດແຍ່ງກັບຄຳພີໄບເບິນເຮັດໃຫ້ຜູ້ຄົນບໍ່ຮູ້ຈັກພະເຈົ້າ. ຄຳສອນຫຼາຍຢ່າງທີ່ຜູ້ຄົນຄິດວ່າມາຈາກຄຳພີໄບເບິນ ເຊັ່ນ: ຕີເອການຸພາບ ວິນຍານທີ່ເປັນອະມະຕະ ຫຼືການທໍລະມານໃນນາລົກຕະຫຼອດໄປ ລ້ວນແຕ່ເປັນຄຳສອນທີ່ມາຈາກການນະມັດສະການພະປອມ. ການເຊື່ອຄຳສອນແບບນັ້ນ “ບໍ່ມີປະໂຫຍດ” ເພາະບໍ່ໄດ້ເຮັດຕາມສິ່ງທີ່ພະເຈົ້າຕ້ອງການ ແຕ່ເຮັດຕາມທຳນຽມທາງສາສະໜາທີ່ພະເຈົ້າບໍ່ຍອມຮັບ.—ມາຣະໂກ 7:7, 8
ພະເຈົ້າກຽດຊັງຄົນທີ່ມືຖືສາກປາກຖືສິນ. (ຕີໂຕ 1:16) ເພື່ອຊ່ວຍຜູ້ຄົນໃຫ້ໃກ້ຊິດກັບພະເຈົ້າ ສາສະໜາຕ້ອງຊ່ວຍຜູ້ຄົນໃຫ້ນຳສິ່ງທີ່ຮຽນມາໃຊ້ໃນຊີວິດປະຈຳວັນ ບໍ່ພຽງແຕ່ເຮັດພິທີຕ່າງໆທາງສາສະໜາເທົ່ານັ້ນ. ເພື່ອເປັນຕົວຢ່າງ ຄຳພີໄບເບິນບອກວ່າ: “ຖ້າຜູ້ໃດຄິດວ່າຕົວເອງນະມັດສະການພະເຈົ້າຢູ່ ແຕ່ບໍ່ໄດ້ຄວບຄຸມລີ້ນຂອງຕົນ ລາວກຳລັງຫຼອກລວງຕົວເອງ ແລະການນະມັດສະການຂອງລາວກໍບໍ່ມີປະໂຫຍດ. ການນະມັດສະການ [ການປະຕິບັດສາສະໜາ] ແບບທີ່ສະອາດແລະບໍລິສຸດ ຕາມຄວາມຄິດຂອງພະເຈົ້າຜູ້ເປັນພໍ່ຂອງພວກເຮົາແມ່ນ ການເບິ່ງແຍງລູກກຳພ້າກັບແມ່ໝ້າຍທີ່ມີຄວາມທຸກລຳບາກ ແລະຮັກສາຕົວໃຫ້ພົ້ນຈາກແນວທາງທີ່ບໍ່ສະອາດຂອງໂລກນີ້.” (ຢາໂກໂບ 1:26, 27; ໄຂເງື່ອນ) ຄຳພີໄບເບິນສະບັບຄິງເຈມສ໌ ແປຄຳວ່າ ການນະມັດສະການແບບທີ່ສະອາດແລະບໍລິສຸດວ່າ “ສາສະໜາບໍລິສຸດ.”
a ເຢໂຫວາ ເປັນຊື່ຂອງພະເຈົ້າທ່ຽງແທ້ຕາມທີ່ບອກໄວ້ໃນຄຳພີໄບເບິນ.