ບົດທີ 41

ເດັກນ້ອຍທີ່ເຮັດໃຫ້ພະເຈົ້າມີຄວາມຍິນດີ

ລູກຄິດວ່າເດັກນ້ອຍຄົນໃດຢູ່ໃນໂລກນີ້ທີ່ເຮັດໃຫ້ພະເຢໂຫວາມີຄວາມຍິນດີຫຼາຍທີ່ສຸດ?— ເດັກນ້ອຍຄົນນັ້ນຄືພະເຍຊູລູກຊາຍຂອງພະອົງ. ໃຫ້ເຮົາມາເວົ້າເຖິງສິ່ງຕ່າງໆທີ່ພະເຍຊູໄດ້ເຮັດເພື່ອໃຫ້ພໍ່ທີ່ຢູ່ທາງພາກສະຫວັນມີຄວາມຍິນດີ.

ຄອບຄົວຂອງພະເຍຊູອາໄສຢູ່ຫ່າງໄກຈາກເມືອງເຢຣຶຊາເລມເຊິ່ງຕ້ອງໃຊ້ເວລາເດີນທາງປະມານສາມມື້ຈຶ່ງຈະໄປຮອດເມືອງນີ້ ເຊິງເປັນທີ່ຕັ້ງຂອງວິຫານທີ່ສະຫງ່າງາມຂອງພະເຢໂຫວາ. ພະເຍຊູເອີ້ນວິຫານວ່າ “ເຮືອນແຫ່ງພະບິດາ.” ໃນທຸກໆປີພະອົງກັບຄອບຄົວໄດ້ໄປທີ່ນັ້ນເພື່ອເຂົ້າຮ່ວມເທດສະການປັດສະຄາ.

ຢູ່ມາມີປີໜຶ່ງຕອນນັ້ນພະເຍຊູອາຍຸໄດ້ 12 ປີ ຫຼັງຈາກເທດສະການປັດສະຄາແລ້ວໆຄອບຄົວຂອງພະອົງເລີ່ມເດີນທາງກັບເມືອເຮືອນ. ຮອດຕອນທີ່ເຂົາເຈົ້າຢຸດພັກຄ້າງຄືນຈຶ່ງໄດ້ສັງເກດວ່າພະເຍຊູບໍ່ໄດ້ຢູ່ໃນທ່າມກາງພວກຍາດຕິພີ່ນ້ອງແລະຫມູ່ເພື່ອນ. ດັ່ງນັ້ນ ນາງມາລີແລະທ້າວໂຢເຊບຈຶ່ງຟ້າວກັບຄືນເມືອເມືອງເຢຣຶຊາເລມເພື່ອຊອກຫາພະເຍຊູ. ລູກຄິດວ່າພະເຍຊູຢູ່ໃສ?—

ເຂົາເຈົ້າພົບພະເຍຊູຢູ່ໃນວິຫານ. ພະອົງກຳລັງຟັງພວກອາຈານ ແລະພະອົງຖາມຄຳຖາມຫຼາຍຂໍ້. ແລະເມື່ອເຂົາເຈົ້າຖາມບັນຫາໜຶ່ງ ພະອົງກໍຕອບໄດ້. ເຂົາເຈົ້າຮູ້ສຶກແປກໃຈໃນຄຳຕອບທີ່ດີເລີດຂອງພະອົງ. ລູກເຂົ້າໃຈບໍວ່າເປັນຫຍັງພະເຈົ້າຈຶ່ງພູມໃຈໃນລູກຊາຍຂອງພະອົງ?—

ແນ່ນອນວ່າໃນທີ່ສຸດເມື່ອມາລີແລະໂຢເຊບພົບພະເຍຊູແລ້ວ ເຂົາເຈົ້າຮູ້ສຶກໂລ່ງໃຈ. ແຕ່ພະເຍຊູພັດບໍ່ໄດ້ກັງວົນຫຍັງ. ພະອົງຮູ້ວ່າວິຫານເປັນສະຖານທີ່ທີ່ປອດໄພ. ດັ່ງນັ້ນພະອົງຈຶ່ງຖາມວ່າ: “ພວກເຈົ້າບໍ່ຮູ້ບໍວ່າ ເຮົາຕ້ອງຢູ່ໃນເຮືອນແຫ່ງພະບິດາຂອງເຮົາ?” ພະອົງຮູ້ວ່າວິຫານເປັນເຮືອນຂອງພະເຈົ້າ ແລະພະອົງມັກທີ່ຈະຢູ່ຫັ້ນ.

ຫຼັງຈາກນັ້ນມາລີແລະໂຢເຊບກໍພາພະເຍຊູເຊິ່ງມີອາຍຸ 12 ປີກັບເມືອເຮືອນຂອງຕົນທີ່ເມືອງນາຊາເລດ. ລູກຄິດວ່າພະເຍຊູປະຕິບັດຕໍ່ພໍ່ແມ່ຂອງເພິ່ນແນວໃດ?— ທີ່ຈິງ ຄຳພີໄບເບິນບອກວ່າພະອົງ “ໄດ້ຢູ່ໃຕ້ບັງຄັບເຂົາ” ຕໍ່ໆໄປ. ລູກຄິດວ່ານັ້ນໝາຍຄວາມວ່າແນວໃດ?— ນັ້ນໝາຍຄວາມວ່າພະອົງເຊື່ອຟັງ ພໍ່ແມ່. ແມ່ນແລ້ວ ພະອົງເຮັດໃນສິ່ງທີ່ພໍ່ແມ່ຂໍໃຫ້ພະອົງເຮັດ ແມ່ນກະທັ່ງການໄປຕັກນ້ຳຢູ່ສ້າງ.—ລືກາ 2:41-51, 52, ທ.ປ.

Young Jesus helps carry water from a well, and questions men at the temple — ຕອນເປັນເດັກນ້ອຍ ພະເຍຊູເຮັດໃຫ້ພະເຈົ້າມີຄວາມຍິນດີແນວໃດ?

ດັ່ງນັ້ນຂໍໃຫ້ຄິດກ່ຽວກັບເລື່ອງນີ້ ທັງໆທີ່ພະເຍຊູເປັນມະນຸດສົມບູນແບບ ພະອົງຍັງເຊື່ອຟັງພໍ່ແມ່ທີ່ບໍ່ສົມບູນແບບ. ເລື່ອງນີ້ເຮັດໃຫ້ພະເຈົ້າມີຄວາມຍິນດີບໍ?— ຍິນດີແທ້ໆ ເພາະພະຄຳຂອງພະເຈົ້າບອກເດັກນ້ອຍວ່າ “ຈົ່ງ [“ເຊື່ອ,” ລ.ມ.] ຟັງພໍ່ແມ່ໃນພະອົງເຈົ້າ.” (ເອເຟດ 6:1) ລູກຈະເຮັດໃຫ້ພະເຈົ້າມີຄວາມຍິນດີໄດ້ເຊັ່ນກັນ ຖ້າລູກເຊື່ອຟັງພໍ່ແມ່ຄືກັບທີ່ພະເຍຊູໄດ້ເຮັດ.

ອີກວິທີໜຶ່ງທີ່ລູກອາດເຮັດໃຫ້ພະເຈົ້າມີຄວາມຍິນດີກໍຄືການບອກຄົນອື່ນໆໃນເລື່ອງພະອົງ. ບາງຄົນອາດເວົ້າວ່ານີ້ບໍ່ແມ່ນສິ່ງທີ່ຄົນຫນຸ່ມສາວຄວນເຮັດ. ແຕ່ເມື່ອມີຄົນພະຍາຍາມຫ້າມພວກເດັກນ້ອຍບໍ່ໃຫ້ເຮັດສິ່ງນີ້ ພະເຍຊູກ່າວວ່າ: “ທ່ານທັງຫຼາຍບໍ່ໄດ້ອ່ານສັກເທື່ອຫຼືຂໍ້ທີ່ວ່າ ‘ພະອົງໄດ້ຕັ້ງຄວາມສັນລະເສີນແຫ່ງຕົນໄວ້ດ້ວຍປາກຂອງພວກເດັກນ້ອຍ . . . ?’” (ມັດທາຍ 21:16) ດັ່ງນັ້ນ ຖ້າເຮົາຕ້ອງການແທ້ໆ ເຮົາທຸກຄົນສາມາດບອກຄົນອື່ນໃຫ້ຮູ້ກ່ຽວກັບພະເຢໂຫວາແລະໃນເລື່ອງທີ່ວ່າພະອົງເປັນພະເຈົ້າຜູ້ດີປະເສີດ. ແລະຖ້າເຮົາເຮັດແບບນັ້ນ ເຮົາຈະເຮັດໃຫ້ພະເຈົ້າມີຄວາມຍິນດີ.

ເພື່ອເຮົາຈະເວົ້າໃຫ້ຄົນອື່ນຟັງ ເຮົາສາມາດຮຽນຮູ້ເລື່ອງຕ່າງໆກ່ຽວກັບພະເຈົ້າໄດ້ຈາກໃສ?— ຈາກການສຶກສາຄຳພີໄບເບິນຢູ່ເຮືອນ. ທີ່ຈິງເຮົາຈະຮຽນຮູ້ໄດ້ຫຼາຍຕື່ມອີກຢູ່ສະຖານທີ່ເຊິ່ງປະຊາຊົນຂອງພະເຈົ້າພົບກັນເພື່ອສຶກສາ. ແຕ່ເຮົາຈະບອກໄດ້ແນວໃດວ່າໃຜຄືປະຊາຊົນຂອງພະອົງ?—

ຜູ້ຄົນເຮັດຫຍັງຢູ່ການປະຊຸມຂອງເຂົາເຈົ້າ? ເຂົາເຈົ້າສອນສິ່ງທີ່ມີຢູ່ໃນຄຳພີໄບເບິນແທ້ໆບໍ? ເຂົາເຈົ້າອ່ານແລະພິຈາລະນາຄຳພີໄບເບິນບໍ? ນັ້ນເປັນວິທີທີ່ເຮົາຟັງພະເຈົ້າແມ່ນບໍ?— ແລະຢູ່ການປະຊຸມຕ່າງໆຂອງຄລິດສະຕຽນເຮົາຄົງຄາດໝາຍວ່າຈະໄດ້ຍິນສິ່ງທີ່ພະເຈົ້າກ່າວແມ່ນບໍ?— ແຕ່ຈະວ່າແນວໃດຖ້າມີຄົນບອກລູກວ່າບໍ່ຈຳເປັນຕ້ອງໃຊ້ຊີວິດຕາມທີ່ພະຄຳພີສອນ? ລູກຈະເວົ້າໄດ້ບໍວ່າເຂົາເຈົ້າເປັນປະຊາຊົນຂອງພະເຈົ້າ?—

ນີ້ຄືອີກສິ່ງໜຶ່ງທີ່ຕ້ອງຄິດເຖິງ. ຄຳພີໄບເບິນບອກວ່າປະຊາຊົນຂອງພະເຈົ້າຈະເປັນ “ພວກໜຶ່ງ . . . ສຳລັບນາມຊື່ແຫ່ງພະອົງ.” (ກິດຈະການ 15:14) ເນື່ອງຈາກຊື່ຂອງພະເຈົ້າຄືເຢໂຫວາ ເຮົາອາດຖາມຜູ້ຄົນວ່າພະເຢໂຫວາແມ່ນພະເຈົ້າຂອງເຂົາເຈົ້າຫຼືບໍ່. ຖ້າເຂົາເຈົ້າຕອບວ່າບໍ່ແມ່ນ ເຮົາກໍຮູ້ໂລດວ່າເຂົາເຈົ້າບໍ່ແມ່ນປະຊາຊົນຂອງພະອົງ. ນອກຈາກນັ້ນ ປະຊາຊົນຂອງພະເຈົ້າຈະເວົ້າລົມກັບຄົນອື່ນໆເລື່ອງລາຊະອານາຈັກຂອງພະເຈົ້າ. ແລະເຂົາເຈົ້າຈະສະແດງຄວາມຮັກຕໍ່ພະເຈົ້າໂດຍຮັກສາຂໍ້ຄຳສັ່ງຕ່າງໆຂອງພະອົງ.—1 ໂຢຮັນ 5:3.

ຖ້າລູກຮູ້ຈັກຜູ້ຄົນທີ່ເຮັດສິ່ງຕ່າງໆທັງໝົດນີ້ ລູກກໍຄວນພົບກັບເຂົາເຈົ້າເພື່ອການນະມັດສະການ. ລູກຄວນຕັ້ງໃຈຟັງຢູ່ການປະຊຸມເຫຼົ່ານີ້ແລະຕອບຄຳຖາມຕ່າງໆເມື່ອມີການຖາມຄຳຖາມ. ນັ້ນແມ່ນສິ່ງທີ່ພະເຍຊູເຮັດເມື່ອພະອົງຢູ່ໃນເຮືອນຂອງພະເຈົ້າ. ແລະຖ້າລູກເຮັດສິ່ງຕ່າງໆເຫຼົ່ານັ້ນ ລູກຈະເຮັດໃຫ້ພະເຈົ້າມີຄວາມຍິນດີຄືກັບທີ່ພະເຍຊູເຮັດ.

ລູກຄຶດອອກບໍວ່າຄຳພີໄບເບິນເວົ້າເຖິງເດັກນ້ອຍຄົນໃດອີກທີ່ເຮັດໃຫ້ພະເຈົ້າມີຄວາມຍິນດີ?— ທ້າວຕີໂມເຕເປັນຕົວຢ່າງທີ່ໂດດເດັ່ນ. ພໍ່ຂອງລາວເປັນຜູ້ທີ່ບໍ່ໄດ້ມີຄວາມເຊື່ອໃນພະເຢໂຫວາ. ແຕ່ແມ່ຂອງລາວນາງເອິນິດແລະແມ່ເຖົ້າຂອງລາວນາງໂລອິດພັດເປັນຜູ້ມີຄວາມເຊື່ອ. ຕີໂມເຕຟັງແມ່ກັບແມ່ເຖົ້າແລະຮຽນຮູ້ກ່ຽວກັບພະເຢໂຫວາ.

Eunice teaches young Timothy, while his father and his grandmother Lois are nearby — ເຖິງແມ່ນວ່າພໍ່ບໍ່ໄດ້ເຂົ້າມາເປັນຜູ້ທີ່ມີຄວາມເຊື່ອ ທ້າວຕີໂມເຕຕ້ອງການເຮັດຫຍັງ?

ເມື່ອຕີໂມເຕເຕີບໃຫຍ່ຂຶ້ນ ອັກຄະສາວົກໂປໂລໄດ້ມາຢາມເມືອງທີ່ຕີໂມເຕອາໄສຢູ່. ທ່ານໂປໂລສັງເກດເຫັນວ່າຕີໂມເຕຕ້ອງການທີ່ຈະຮັບໃຊ້ພະເຢໂຫວາຫຼາຍແທ້ໆ. ດັ່ງນັ້ນທ່ານໂປໂລຈຶ່ງຊວນຕີໂມເຕໄປກັບລາວເພື່ອຈະຮັບໃຊ້ພະເຈົ້າໄດ້ຫຼາຍຂຶ້ນ. ທຸກໆບ່ອນທີ່ເຂົາເຈົ້າເດີນທາງໄປ ເຂົາເຈົ້າໄດ້ບອກຜູ້ຄົນກ່ຽວກັບເລື່ອງລາຊະອານາຈັກຂອງພະເຈົ້າແລະເລື່ອງພະເຍຊູ.—ກິດຈະການ 16:1-5; 2 ຕີໂມເຕ 1:5; 3:14, 15.

ແຕ່ຕົວຢ່າງໃນຄຳພີໄບເບິນເວົ້າເຖິງສະເພາະເດັກນ້ອຍຜູ້ຊາຍເທົ່ານັ້ນບໍທີ່ເຮັດໃຫ້ພະເຈົ້າມີຄວາມຍິນດີ?— ບໍ່ແມ່ນ. ຂໍໃຫ້ພິຈາລະນາເລື່ອງຂອງເດັກຍິງຊາວອິດສະລາແອນທີ່ເຮັດໃຫ້ພະເຈົ້າມີຄວາມຍິນດີ. ໃນສະໄໝທີ່ລາວມີຊີວິດຢູ່ ຊາດຊີລີແລະຊາດອິດສະລາແອນເປັນສັດຕູກັນ. ຢູ່ມາມື້ໜຶ່ງຊາວຊີລີໄດ້ເຮັດສົງຄາມກັບຊາວອິດສະລາແອນແລະຈັບເດັກຍິງຄົນນັ້ນໄປເປັນຊະເລີຍ. ລາວຖືກສົ່ງໄປເຮືອນຂອງຫົວໜ້າກອງທັບທີ່ຊື່ນາມານ. ຢູ່ທີ່ນັ້ນລາວໄດ້ເປັນຄົນຮັບໃຊ້ເມຍຂອງທ່ານນາມານ.

ໃນຂະນະນັ້ນທ່ານນາມານເປັນພະຍາດຂີ້ທູດ. ບໍ່ມີທ່ານໝໍຄົນໃດສາມາດຊ່ວຍລາວໄດ້. ແຕ່ເດັກຍິງຈາກປະເທດອິດສະລາແອນເຊື່ອວ່າຜູ້ພະຍາກອນຊິ່ງເປັນຜູ້ຮັບໃຊ້ພິເສດຄົນໜຶ່ງຂອງພະເຈົ້າສາມາດຊ່ວຍທ່ານນາມານໄດ້. ແມ່ນແລ້ວ ທ່ານນາມານແລະເມຍຂອງລາວບໍ່ໄດ້ເປັນຜູ້ນະມັດສະການພະເຢໂຫວາ. ເດັກຍິງຄົນນີ້ຄວນບອກເຂົາເຈົ້າໃນສິ່ງທີ່ລາວຮູ້ບໍ? ຖ້າເປັນລູກ ລູກຈະເຮັດແນວໃດ?—

An Israelite girl talks to Naaman’s wife — ເດັກຍິງຊາວອິດສະລາແອນຄົນນີ້ເຮັດໃຫ້ພະເຈົ້າມີຄວາມຍິນດີແນວໃດ?

ທີ່ຈິງເດັກຍິງຄົນນັ້ນເວົ້າວ່າ: ‘ຖ້າທ່ານນາມານຈະໄປຫາຜູ້ພະຍາກອນຂອງພະເຢໂຫວາໃນປະເທດອິດສະລາແອນ ເມື່ອນັ້ນທ່ານຈະໄດ້ຮັບການປິ່ນປົວໃຫ້ເຊົາຈາກພະຍາດຂີ້ທູດນີ້.’ ທ່ານນາມານໄດ້ເຊື່ອຟັງເດັກຍິງຄົນນີ້ແລະໄປຫາຜູ້ພະຍາກອນຂອງພະເຢໂຫວາ. ເມື່ອລາວເຮັດໃນສິ່ງທີ່ຜູ້ພະຍາກອນບອກໃຫ້ເຮັດ ລາວກໍໄດ້ຮັບການປິ່ນປົວໃຫ້ເຊົາ. ເລື່ອງນີ້ເປັນສາເຫດໃຫ້ທ່ານນາມານເຂົ້າມາເປັນຜູ້ນະມັດສະການພະເຈົ້າອົງທ່ຽງແທ້.—2 ກະສັດ 5:1-15.

ລູກຢາກຊ່ວຍບາງຄົນໃຫ້ຮຽນຮູ້ເລື່ອງພະເຢໂຫວາແລະສິ່ງທີ່ພະອົງສາມາດເຮັດ ຄືກັບທີ່ເດັກຍິງຄົນນັ້ນໄດ້ເຮັດບໍ?— ມີໃຜແດ່ທີ່ລູກອາດຊ່ວຍໄດ້?— ແນ່ນອນ ທຳອິດເຂົາເຈົ້າອາດຄິດວ່າຕົນເອງບໍ່ຕ້ອງການຄວາມຊ່ວຍເຫຼືອ. ແຕ່ລູກອາດເວົ້າກັບເຂົາເຈົ້າກ່ຽວກັບສິ່ງດີໆທີ່ພະເຢໂຫວາເຮັດ ແລະເຂົາເຈົ້າອາດຈະຟັງກໍໄດ້. ລູກສາມາດໝັ້ນໃຈໄດ້ວ່າການເຮັດແບບນີ້ຈະເຮັດໃຫ້ພະເຈົ້າມີຄວາມຍິນດີ.

ຖ້ອຍຄຳທີ່ຫນູນກຳລັງໃຈສຳລັບຄົນຫນຸ່ມສາວເພື່ອຈະມີຄວາມຍິນດີໃນການຮັບໃຊ້ພະເຈົ້າຈະເບິ່ງໄດ້ຕື່ມອີກໃນພະທຳຄຳເພງ 122:1; 148:12, 13; ຜູ້ເທສະໜາປ່າວປະກາດ 12:1; 1 ຕີໂມເຕ 4:12; ແລະເຫບເລີ 10:23-25.