ບົດທີ 03

ຄຳພີໄບເບິນເຊື່ອຖືໄດ້ບໍ?

ສະບັບພິມ

ຄຳພີໄບເບິນມີຄຳສັນຍາແລະຄຳແນະນຳຫຼາຍຢ່າງ. ຫຼາຍລ້ານຄົນເຊື່ອສິ່ງທີ່ຄຳພີໄບເບິນບອກ ແຕ່ເຈົ້າອາດຍັງບໍ່ກ້າເຊື່ອຮ້ອຍເປີເຊັນ. ເຈົ້າອາດຄິດວ່າຄຳແນະນຳໃນຄຳພີໄບເບິນທີ່ຂຽນມາຫຼາຍພັນປີຈະຍັງໃຊ້ໄດ້ໃນທຸກມື້ນີ້ບໍ ແລະບໍ່ໝັ້ນໃຈວ່າຄຳສັນຍາທີ່ບອກໄວ້ລ່ວງໜ້າຈະເຊື່ອຖືໄດ້ບໍ? ເຮົາຢາກເຊີນເຈົ້າໃຫ້ມາພິສູດດ້ວຍໂຕເອງວ່າຄຳພີໄບເບິນເຊື່ອຖືໄດ້ແທ້ບໍ່.

1. ເລື່ອງຕ່າງໆໃນຄຳພີໄບເບິນເປັນຄວາມຈິງບໍ?

ຄຳພີໄບເບິນບັນທຶກ “ສິ່ງທີ່ເປັນຄວາມຈິງຢ່າງຖືກຕ້ອງ.” (ປັນຍາຈານ 12:10) ເລື່ອງຕ່າງໆໃນຄຳພີໄບເບິນກ່ຽວຂ້ອງກັບເຫດການແລະຜູ້ຄົນທີ່ມີຢູ່ແທ້. (ອ່ານລູກາ 1:3; 3:1, 2) ນັກປະຫວັດສາດແລະນັກບູຮານຄະດີຫຼາຍຄົນຢືນຢັນຄວາມຖືກຕ້ອງຂອງມື້ທີ່ສຳຄັນ ຜູ້ຄົນ ສະຖານທີ່ ແລະເຫດການຕ່າງໆທີ່ບອກໄວ້ໃນຄຳພີໄບເບິນ.

2. ເປັນຫຍັງເຮົາຈຶ່ງເວົ້າໄດ້ວ່າຄຳພີໄບເບິນຍັງບໍ່ຫຼ້າສະໄໝ?

ຫຼາຍເທື່ອຄຳພີໄບເບິນເວົ້າເຖິງເລື່ອງຕ່າງໆທີ່ຄົນໃນສະໄໝກ່ອນຍັງບໍ່ຮູ້ຈັກ. ຕົວຢ່າງເຊັ່ນ ຄຳພີໄບເບິນເວົ້າເຖິງຄວາມຮູ້ທາງວິທະຍາສາດ ເຊິ່ງຫຼາຍຄົນໃນສະໄໝນັ້ນບໍ່ເຊື່ອວ່າເປັນຄວາມຈິງ. ແຕ່ເມື່ອວິທະຍາສາດກ້າວໜ້າຂຶ້ນກໍເຮັດໃຫ້ເຮົາຮູ້ວ່າສິ່ງທີ່ຄຳພີໄບເບິນເວົ້າເປັນຄວາມຈິງ. ຄຳພີໄບເບິນ “ເຊື່ອຖືໄດ້ທັງຕອນນີ້ແລະຕະຫຼອດໄປ.”—ເພງສັນລະເສີນ 111:8

3. ເປັນຫຍັງເຮົາຈຶ່ງເຊື່ອສິ່ງທີ່ຄຳພີໄບເບິນເວົ້າເລື່ອງອະນາຄົດໄດ້?

ຄຳພີໄບເບິນມີຄຳພະຍາກອນaຫຼາຍເລື່ອງທີ່ບອກລ່ວງໜ້າ “ກ່ຽວກັບສິ່ງຕ່າງໆທີ່ຍັງບໍ່ທັນເກີດຂຶ້ນ.” (ເອຊາຢາ 46:10) ແລະຍັງບອກຢ່າງຖືກຕ້ອງນຳວ່າສະພາບການຂອງໂລກໃນທຸກມື້ນີ້ຈະເປັນແນວໃດ. ໃນບົດນີ້ເຮົາຈະມາເບິ່ງຄຳພະຍາກອນບາງເລື່ອງໃນຄຳພີໄບເບິນ. ຄວາມຖືກຕ້ອງຂອງຄຳພະຍາກອນເຫຼົ່ານັ້ນຈະເຮັດໃຫ້ເຈົ້າຮູ້ສຶກງຶດງໍ້!

ຮຽນຮູ້ຫຼາຍຂຶ້ນ

ໃຫ້ເຮົາມາເບິ່ງວ່າຄວາມຮູ້ທາງວິທະຍາສາດສອດຄ່ອງກັບຄຳພີໄບເບິນແນວໃດ ແລະເບິ່ງລາຍລະອຽດຂອງຄຳພະຍາກອນບາງເລື່ອງໃນຄຳພີໄບເບິນທີ່ໜ້າງຶດງໍ້ນຳ.

4. ຄຳພີໄບເບິນສອດຄ່ອງກັບວິທະຍາສາດ

ໃນສະໄໝບູຮານ ຄົນສ່ວນຫຼາຍເຊື່ອວ່າໂລກຢອງຢູ່ເທິງບາງຢ່າງ. ເປີດວິດີໂອ.

ວິດີໂອ: ໂລກລອຍຢູ່ໂດຍບໍ່ໄດ້ຍຶດກັບຫຍັງ (1:13)

ຂໍສັງເກດສິ່ງທີ່ບອກໄວ້ໃນປຶ້ມໂຢບປະມານ 3.500 ປີມາແລ້ວ. ອ່ານໂຢບ 26:7 ແລ້ວລົມກັນກ່ຽວກັບຄຳຖາມຕໍ່ໄປນີ້:

ການທີ່ຄຳພີໄບເບິນບອກວ່າໜ່ວຍໂລກລອຍຢູ່ “ໂດຍບໍ່ໄດ້ຍຶດກັບຫຍັງ” ເປັນຄວາມຮູ້ທີ່ໜ້າງຶດງໍ້ບໍ? ຍ້ອນຫຍັງ?

ຄົນເຮົາຫາກໍມີຄວາມເຂົ້າໃຈກ່ຽວກັບວົງຈອນຂອງນ້ຳເມື່ອປະມານ 200 ປີມານີ້. ແຕ່ຂໍໃຫ້ສັງເກດສິ່ງທີ່ຄຳພີໄບເບິນບອກເມື່ອຫຼາຍພັນປີກ່ອນ. ອ່ານໂຢບ 36:27, 28 ແລ້ວລົມກັນກ່ຽວກັບຄຳຖາມຕໍ່ໄປນີ້:

ການທີ່ຄຳພີໄບເບິນເວົ້າກ່ຽວກັບວົງຈອນຂອງນ້ຳແບບງ່າຍໆເມື່ອຫຼາຍພັນປີ ກ່ອນທີ່ຄົນເຮົາຈະມີຄວາມເຂົ້າໃຈເລື່ອງນີ້ ເຈົ້າຄິດວ່າເປັນເລື່ອງທີ່ໜ້າງຶດງໍ້ບໍ?
ຂໍ້ຄຳພີທີ່ເຈົ້າຫາກໍອ່ານເຮັດໃຫ້ເຈົ້າເຊື່ອຖືຄຳພີໄບເບິນຫຼາຍຂຶ້ນບໍ?

ຄຳພີໄບເບິນອະທິບາຍເລື່ອງວົງຈອນຂອງນ້ຳ. ລູກສອນສະແດງໃຫ້ເຫັນທິດທາງການໝູນວຽນຂອງນ້ຳ.

5. ຄຳພີໄບເບິນບອກລ່ວງໜ້າເຖິງເຫດການຕ່າງໆທີ່ສຳຄັນ

ອ່ານເອຊາຢາ 44:27–45:2 ແລ້ວລົມກັນກ່ຽວກັບຄຳຖາມຕໍ່ໄປນີ້:

ມີລາຍລະອຽດຫຍັງແດ່ທີ່ຄຳພີໄບເບິນບອກໄວ້ລ່ວງໜ້າ 200 ປີກ່ອນທີ່ບາບີໂລນຈະຖືກຍຶດ?

ເປີດວິດີໂອ.

ວິດີໂອ: ຄຳພີໄບເບິນບອກລ່ວງໜ້າເລື່ອງການຫຼົ້ມຈົມຂອງບາບີໂລນ (0:58)

ປະຫວັດສາດຢືນຢັນວ່າໄຊຣັດກະສັດຂອງເປີເຊຍແລະທະຫານຂອງລາວຍຶດເມືອງບາບີໂລນໃນປີ 539 ກ່ອນ ຄ.ສ.b ເຂົາເຈົ້າປ່ຽນທິດທາງການໄຫຼຂອງແມ່ນ້ຳທີ່ອ້ອມເມືອງນັ້ນ. ຫຼັງຈາກນັ້ນກໍເຂົ້າໄປໃນເມືອງທາງປະຕູທີ່ເປີດປະໄວ້ ເຂົາເຈົ້າຍຶດເມືອງນັ້ນໄດ້ໂດຍທີ່ບໍ່ມີການສູ້ຮົບ. ຈົນຮອດທຸກມື້ນີ້ ເວລາໄດ້ຜ່ານມາ 2.500 ປີແລ້ວ ແລະຕອນນີ້ເມືອງບາບີໂລນກໍເປັນພຽງຊາກຫັກພັງ. ຂໍໃຫ້ເຮົາມາເບິ່ງວ່າຄຳພີໄບເບິນບອກລ່ວງໜ້າກ່ຽວກັບເລື່ອງນີ້ແນວໃດ.

ອ່ານເອຊາຢາ 13:19, 20 ແລ້ວລົມກັນກ່ຽວກັບຄຳຖາມຕໍ່ໄປນີ້: