ສອນຄົນໃຫ້ເປັນລູກສິດ
ບົດທີ 10
ຕັ້ງໃຈ
ຫຼັກການ: “ພວກເຮົາຈຶ່ງບໍ່ໄດ້ໃຫ້ແຕ່ຂ່າວດີຂອງພະເຈົ້າກັບພວກເຈົ້າເທົ່ານັ້ນ ແຕ່ຕັ້ງໃຈຈະໃຫ້ຊີວິດຂອງພວກເຮົານຳ ຍ້ອນພວກເຮົາຮັກພວກເຈົ້າຫຼາຍ.”—1 ທຊ. 2:8
ສິ່ງທີ່ພະເຢຊູເຮັດ
1. ເບິ່ງ ວິດີໂອ ຫຼືອ່ານໂຢຮັນ 3:1, 2. ແລ້ວຕອບຄຳຖາມຕໍ່ໄປນີ້:
ກ. ເຈົ້າຄິດວ່າເປັນຫຍັງນີໂກເດມຈຶ່ງມາຫາພະເຢຊູໃນຕອນກາງຄືນ?—ເບິ່ງໂຢຮັນ 12:42, 43
ຂ. ການທີ່ພະເຢຊູລົມນຳນີໂກເດມໃນຕອນກາງຄືນ ສະແດງໃຫ້ເຫັນແນວໃດວ່າເພິ່ນຕັ້ງໃຈສອນລາວໃຫ້ເປັນລູກສິດແທ້ໆ?
ເຮົາໄດ້ບົດຮຽນຫຍັງຈາກພະເຢຊູ?
2. ຍ້ອນເຮົາຮັກຜູ້ຄົນ ເຮົາຈຶ່ງຕັ້ງໃຈທີ່ຈະຊ່ວຍເຂົາເຈົ້າໃຫ້ເປັນລູກສິດ.
ຮຽນແບບພະເຢຊູ
3. ສອນໃນເວລາແລະສະຖານທີ່ທີ່ລາວສະດວກ. ຄົນທີ່ເຈົ້າສອນອາດຈະສະດວກແຕ່ບາງມື້ຫຼືບາງເວລາ. ລາວຈະສະບາຍໃຈກວ່າບໍຖ້າຮຽນຢູ່ບ່ອນເຮັດວຽກ ຢູ່ເຮືອນ ຫຼືຢູ່ບ່ອນສາທາລະນະ? ຖ້າເປັນໄປໄດ້ ໃຫ້ລອງປັບປ່ຽນຕາຕະລາງເວລາຂອງເຈົ້າເພື່ອທີ່ເຈົ້າຈະໄດ້ສອນໃນເວລາແລະສະຖານທີ່ທີ່ລາວສະດວກທີ່ສຸດ.
4. ສອນເປັນປະຈຳ. ຖ້າເຈົ້າຈະບໍ່ຢູ່ ຢ່າຍົກເລີກການສຶກສາ. ໃຫ້ຄິດເບິ່ງວ່າ:
ກ. ເຈົ້າຈະສອນໃນເວລາອື່ນຫຼືມື້ໃດມື້ໜຶ່ງຂອງອາທິດນັ້ນແທນໄດ້ບໍ?
ຂ. ເຈົ້າຈະສອນທາງໂທລະສັບຫຼືທາງອອນລາຍໄດ້ບໍ?
ຄ. ເຈົ້າຈະຂໍໃຫ້ພີ່ນ້ອງຄົນອື່ນສອນແທນໄດ້ບໍ?
5. ອະທິດຖານຂໍໃຫ້ມີຄວາມຄິດທີ່ຖືກຕ້ອງ. ຂໍພະເຢໂຫວາຊ່ວຍເຈົ້າບໍ່ໃຫ້ຍອມແພ້ໃນການຊ່ວຍຄົນທີ່ເຈົ້າສອນ ເຖິງວ່າລາວຈະບໍ່ໄດ້ຮຽນເປັນປະຈຳຫຼືບໍ່ໄດ້ເອົາສິ່ງທີ່ໄດ້ຮຽນໄປໃຊ້ທັນທີກໍຕາມ. (ຟລປ. 2:13) ຄົນທີ່ເຈົ້າສອນໜ້າຈະມີຂໍ້ດີຫຼາຍຢ່າງ ໃຫ້ເຈົ້າອະທິດຖານຂໍພະເຢໂຫວາຊ່ວຍເຈົ້າໃຫ້ເບິ່ງເຫັນຂໍ້ດີຂອງລາວ.