ທ່ານ​ສາມາດ​ປະສົບ​ຄວາມ​ສຳເລັດ​ເຖິງ​ວ່າ​ເປັນ​ພໍ່​ຫຼື​ແມ່​ທີ່​ຂາດ​ຄູ່

ມີ​ການ​ເວົ້າ​ວ່າ​ຄອບຄົວ​ທີ່​ມີ​ທັງ​ພໍ່​ແລະ​ແມ່​ປຽບ​ຄື​ສິ່ງ​ມີ​ຊີວິດ​ເຊິ່ງ​ໃກ້​ຈະ​ສູນ​ພັນ. ຂໍ​ໃຫ້​ພິຈາລະນາ: ໃນ​ໂລກ​ນີ້​ມີ​ພໍ່​ແລະ​ແມ່​ມາກ​ມາຍ​ທີ່​ຂາດ​ຄູ່ ແຕ່​ສ່ວນ​ຫຼາຍ​ແລ້ວ​ເປັນ​ແມ່​ທີ່​ຂາດ​ຄູ່. ການ​ສຶກສາ​ຄົ້ນ​ຄວ້າ​ສະແດງ​ໃຫ້​ເຫັນ​ວ່າ​ເດັກ​ນ້ອຍ​ສ່ວນ​ຫຼາຍ​ໃຊ້​ເວລາ​ໃນ​ໄວ​ເດັກ​ຢູ່​ໃນ​ຄອບຄົວ​ທີ່​ມີ​ແຕ່​ພໍ່​ຫຼື​ແມ່​ເທົ່າ​ນັ້ນ.

ຖ້າ​ເຮົາ​ເປັນ​ພໍ່​ຫຼື​ແມ່​ທີ່​ຂາດ​ຄູ່ ຂໍ​ໃຫ້​ໝັ້ນ​ໃຈ​ວ່າ​ຊີວິດ​ຄອບຄົວ​ຂອງ​ເຮົາ​ສາມາດ​ປະສົບ​ຄວາມ​ສຳເລັດ​ໄດ້. ຂໍ​ໃຫ້​ລອງ​ໃຊ້​ຄຳ​ແນະນຳ​ຕໍ່​ໄປ​ນີ້.

◼ ຫຼີກ​ລ່ຽງ​ການ​ຄຶດ​ໃນ​ແງ່​ລົບ. ຄຳພີ​ໄບເບິນ​ກ່າວ​ວ່າ: ‘ວັນ​ຄືນ​ທັງ​ປວງ​ຂອງ​ຄົນ​ທຸກ​ໃຈ​ກໍ​ເສົ້າ​ໝອງ ແຕ່​ຄົນ​ທີ່​ມີ​ຈິດ​ໃຈ​ຊື່ນ​ບານ​ປຽບ​ເໝືອນ​ມີ​ການ​ກິນ​ລ້ຽງ​ຢູ່​ສະເໝີ.’ (ສຸພາສິດ 15:15) ແມ່ນ​ຢູ່ ຊີວິດ​ຂອງ​ເຮົາ​ອາດ​ບໍ່​ເປັນ​ຄື​ກັບ​ການ​ກິນ​ລ້ຽງ​ທີ່​ມ່ວນ​ຊື່ນ​ລ່າເລີງ ແຕ່​ຕາມ​ທີ່​ຂໍ້​ນີ້​ກ່າວ​ໄວ້ ຄວາມ​ລ່າເລີງ​ເປັນ​ເລື່ອງ​ຂອງ​ຈິດ​ໃຈ​ຫຼາຍ​ກວ່າ​ສະພາບການ. (ສຸພາສິດ 17:22) ບໍ່​ມີ​ປະໂຫຍດ​ຫຍັງ​ທີ່​ຈະ​ຄຶດ​ວ່າ​ລູກ​ຂອງ​ເຮົາ​ບໍ່​ມີ​ທາງ​ໄດ້​ດີ​ຫຼື​ຄຶດ​ວ່າ​ຄອບຄົວ​ຂອງ​ເຮົາ​ແຕກ​ສະ​ຫຼາຍ​ແລ້ວ. ການ​ຄຶດ​ແບບ​ນັ້ນ​ມີ​ແຕ່​ເຮັດ​ໃຫ້​ທໍ້​ໃຈ​ແລະ​ເຮັດ​ໜ້າ​ທີ່​ຂອງ​ພໍ່​ຫຼື​ແມ່​ສຳເລັດ​ໄດ້​ຍາກ.—ສຸພາສິດ 24:10

ຄຳ​ແນະນຳ: ໃຫ້​ຂຽນ​ຄຳ​ເວົ້າ​ໃນ​ແງ່​ລົບ​ທີ່​ໃຊ້​ກ່າວ​ເຖິງ​ສະພາບການ​ຂອງ​ຕົວ​ເອງ ແລ້ວ​ຈາກ​ນັ້ນ​ໃຫ້​ຂຽນ​ຄຳ​ເວົ້າ​ໃນ​ແງ່​ບວກ​ທີ່​ເອົາ​ມາ​ໃຊ້​ແທນ​ໄດ້. ຕົວຢ່າງ​ເຊັ່ນ: ແທນ​ທີ່​ຈະ​ເວົ້າ​ວ່າ “ຂ້ອຍ​ອົດ​ຕໍ່​ໄປ​ບໍ່​ໄດ້​ແລ້ວ” ໃຫ້​ເວົ້າ​ວ່າ “ຂ້ອຍ​ມີ​ຄວາມ​ສາມາດ​ພຽງ​ພໍ​ຈະ​ເຮັດ​ໜ້າ​ທີ່​ພໍ່​ຫຼື​ແມ່​ທີ່​ຂາດ​ຄູ່ ແລະ​ຖ້າ​ຈຳເປັນ​ຂ້ອຍ​ກໍ​ຂໍ​ຄວາມ​ຊ່ວຍ​ເຫຼືອ​ໄດ້.”—ຟິລິບ 4:13

◼ ຕັ້ງ​ງົບ​ປະມານ. ບັນຫາ​ເງິນ​ຄຳ​ເປັນ​ເລື່ອງ​ໜັກ​ໜ່ວງ​ທີ່​ສຸດ​ຂອງ​ພໍ່​ຫຼື​ແມ່​ທີ່​ຂາດ​ຄູ່ ໂດຍ​ສະເພາະ​ຢ່າງ​ຍິ່ງ​ຜູ້​ເປັນ​ແມ່. ແຕ່​ໃນ​ບາງ​ກໍລະນີ​ຄວາມ​ກົດ​ດັນ​ດ້ານ​ການ​ເງິນ​ອາດ​ເບົາ​ບາງ​ລົງ​ໄດ້​ຖ້າ​ຮູ້ຈັກ​ກຳນົດ​ການ​ໃຊ້​ຈ່າຍ. ສຸພາສິດ​ໃນ​ຄຳພີ​ໄບເບິນ​ກ່າວ​ວ່າ: “ຄົນ​ຮູ້ [ສະ​ຫຼາດ] ກໍ​ເຫັນ​ການ​ຮ້າຍ [ໄພ] ແລະ​ໄປ​ລີ້​ຕົວ.” (ສຸພາສິດ 22:3) ເພື່ອ​ຫຼີກ​ລ່ຽງ “ໄພ” ດ້ານ​ການ​ເງິນ ການ​ວາງ​ແຜນ​ແລະ​ຄຶດ​ລ່ວງ​ໜ້າ​ເປັນ​ເລື່ອງ​ສຳຄັນ​ຫຼາຍ.

ຄຳ​ແນະນຳ: ໃຫ້​ຂຽນ​ງົບ​ປະມານ​ທີ່​ຕັ້ງ​ໄວ້. ຈົດ​ລາຍ​ຈ່າຍ​ໃນ​ໄລຍະ​ໜຶ່ງ​ເດືອນ​ແລະ​ເບິ່ງ​ວ່າ​ໃຊ້​ຈ່າຍ​ຫຍັງ​ແດ່. ໃຫ້​ກວດ​ເບິ່ງ​ນິດໄສ​ການ​ໃຊ້​ຈ່າຍ. ເຮົາ​ອາໄສ​ການ​ຢືມ​ເງິນ​ຫຼາຍ​ເກີນ​ໄປ​ບໍ? ຊື້​ເຄື່ອງ​ໃຫ້​ລູກ​ຫຼາຍ​ໂພດ​ບໍ​ເພື່ອ​ຊົດເຊີຍ​ການ​ທີ່​ລູກ​ຂາດ​ພໍ່​ຫຼື​ແມ່? ຖ້າ​ລູກ​ໃຫຍ່​ແລ້ວ ໃຫ້​ນັ່ງ​ກັບ​ລູກ​ແລະ​ຊ່ວຍ​ກັນ​ຄຶດ​ຫາ​ວິທີ​ປະຢັດ​ເງິນ ເພາະ​ນັ້ນ​ຈະ​ເປັນ​ການ​ຝຶກ​ສອນ​ທີ່​ດີ​ສຳລັບ​ລູກ. ລູກ​ອາດ​ມີ​ຄວາມ​ຄິດ​ເຫັນ​ບາງ​ຢ່າງ​ທີ່​ໃຊ້​ໄດ້​ແທ້!

◼ ຮັກສາ​ສັນຕິສຸກ​ເມື່ອ​ຕິດ​ຕໍ່​ພົວ​ພັນ​ກັບ​ອະດີດ​ຜົວ​ຫຼື​ເມຍ. ຖ້າ​ທັງ​ສອງ​ໄດ້​ສິດ​ໃນ​ການ​ຄຸ້ມຄອງ​ລູກ ຂໍ​ໃຫ້​ຈື່​ວ່າ​ເປັນ​ເລື່ອງ​ບໍ່​ເໝາະ​ສົມ​ທີ່​ຈະ​ເວົ້າ​ເຖິງ​ສິ່ງ​ບໍ່​ດີ​ກ່ຽວ​ກັບ​ອະດີດ​ຜົວ​ຫຼື​ເມຍ ຫຼື​ໃຊ້​ລູກ​ເປັນ​ສາຍ​ລັບ​ເພື່ອ​ຮູ້​ການ​ເຄື່ອນ​ໄຫວ​ຂອງ​ອີກ​ຝ່າຍ​ໜຶ່ງ.a ດີ​ກວ່າ​ຖ້າ​ຮ່ວມ​ມື​ກັນ​ໃນ​ການ​ສັ່ງ​ສອນ​ແລະ​ໃນ​ດ້ານ​ອື່ນໆທີ່​ມີ​ຜົນ​ດີ​ຕໍ່​ການ​ເປັນ​ຢູ່​ຂອງ​ລູກ. ຄຳພີ​ໄບເບິນ​ກ່າວ​ວ່າ: “ຖ້າ​ອາດ [ເຮັດ] ໄດ້ . . . ຈົ່ງ​ມີ​ຄວາມ​ສຸກ​ສຳລານ​ກັນ​ກັບ​ຄົນ​ທັງ​ປວງ” ເຊິ່ງ​ລວມ​ເຖິງ​ອະດີດ​ຜົວ​ຫຼື​ເມຍ​ຂອງ​ເຮົາ​ນຳ.—ໂລມ 12:18

ຄຳ​ແນະນຳ: ເມື່ອ​ເກີດ​ຄວາມ​ຂັດ​ແຍ່ງ​ກັນ​ເທື່ອ​ໜ້າ ໃຫ້​ປະຕິບັດ​ກັບ​ອະດີດ​ຜົວ​ຫຼື​ເມຍ​ຄື​ກັບ​ເປັນ​ໝູ່​ທີ່​ເຮັດ​ວຽກ​ນຳ​ກັນ. ຢູ່​ບ່ອນ​ເຮັດ​ວຽກ ເຮົາ​ຄົງ​ພະຍາຍາມ​ເປັນ​ມິດ​ກັບ​ໝົດ​ທຸກ​ຄົນ ແມ່ນ​ແຕ່​ຜູ້​ທີ່​ເຮົາ​ບໍ່​ມັກ​ປານ​ໃດ. ໃຫ້​ເຮັດ​ແບບ​ດຽວ​ກັນ​ນັ້ນ​ກັບ​ອະດີດ​ຜົວ​ຫຼື​ເມຍ​ຂອງ​ເຮົາ. ເຮົາ​ອາດ​ບໍ່​ເຫັນ​ດີ​ນຳ​ກັນ​ໃນ​ທຸກ​ເລື່ອງ ແຕ່​ກໍ​ບໍ່​ຈຳເປັນ​ຕ້ອງ​ຜິດ​ຖຽງ​ກັນ​ທຸກ​ຄັ້ງ.—ລືກາ 12:58

◼ ວາງ​ຕົວຢ່າງ​ທີ່​ດີ. ໃຫ້​ຖາມ​ຕົວ​ເອງ​ວ່າ: ‘ຂ້ອຍ​ຢາກ​ໃຫ້​ລູກ​ມີ​ຫຼັກ​ການ​ແລະ​ຄວາມ​ຄຶດ​ແບບ​ໃດ? ຂ້ອຍ​ເອງ​ມີ​ຫຼັກ​ການ​ແລະ​ຄວາມ​ຄຶດ​ແບບ​ນັ້ນ​ບໍ?’ ຕົວຢ່າງ​ເຊັ່ນ ເຖິງ​ວ່າ​ເປັນ​ພໍ່​ຫຼື​ແມ່​ທີ່​ຂາດ​ຄູ່ ຕາມ​ປົກກະຕິ​ແລ້ວ​ເຮົາ​ເປັນ​ຄົນ​ເບີກບານ​ມ່ວນ​ຊື່ນ​ບໍ? ຫຼື​ເຮົາ​ປ່ອຍ​ໃຫ້​ສະພາບການ​ຕ່າງໆພາ​ໃຫ້​ເບິ່ງ​ທຸກ​ຢ່າງ​ໃນ​ຊີວິດ​ໃນ​ແງ່​ລົບ​ບໍ? ເຮົາ​ຍັງ​ຜູກ​ໃຈ​ເຈັບ​ກັບ​ອະດີດ​ຜົວ​ຫຼື​ເມຍ​ທີ່​ເຄີຍ​ເຮັດ​ໃຫ້​ເຮົາ​ເຈັບ​ໃຈ​ບໍ ຫຼື​ເຮົາ​ເອົາ​ຊະນະ​ຄວາມ​ບໍ່​ທ່ຽງ​ທຳ​ຕ່າງໆໄດ້​ແລ້ວ? (ສຸພາສິດ 15:18) ແມ່ນ​ຢູ່ ການ​ເຮັດ​ແນວ​ນັ້ນ​ບໍ່​ງ່າຍ ແລະ​ເຮົາ​ຈະ​ເຮັດ​ໄດ້​ແບບ​ບໍ່​ຄົບ​ຖ້ວນ. ເຖິງ​ຢ່າງ​ນັ້ນ ລູກ​ອາດ​ຈະ​ຮັບ​ເອົາ​ຄວາມ​ຄຶດ​ໃນ​ເລື່ອງ​ຊີວິດ​ແບບ​ທີ່​ເຫັນ​ເຮົາ​ເຮັດ.

ຄຳ​ແນະນຳ: ໃຫ້​ຂຽນ​ຄຸນ​ລັກສະນະ​ສາມ​ຢ່າງ​ທີ່​ຮົາ​ຢາກ​ໃຫ້​ລູກ​ມີ​ເມື່ອ​ເປັນ​ຜູ້​ໃຫຍ່.b ທາງ​ຂ້າງ​ຄຸນ​ລັກສະນະ​ແຕ່​ລະ​ຢ່າງ ໃຫ້​ຂຽນ​ສິ່ງ​ທີ່​ເຮົາ​ເຮັດ​ໄດ້​ຕອນ​ນີ້​ເພື່ອ​ເປັນ​ຕົວຢ່າງ​ຊ່ວຍ​ລູກ​ໃຫ້​ພັດທະນາ​ຄຸນ​ລັກສະນະ​ດັ່ງ​ກ່າວ.

◼ ເບິ່ງ​ແຍງ​ຕົວ​ເອງ. ເນື່ອງ​ຈາກ​ຊີວິດ​ມີ​ແຕ່​ຄວາມ​ຟ້າວຟັ່ງ ອາດ​ເປັນ​ໄປ​ໄດ້​ຫຼາຍ​ທີ່​ເຮົາ​ຈະ​ປ່ອຍ​ໃຫ້​ສຸຂະພາບ​ທາງ​ກາຍ​ແລະ​ທາງ​ອາລົມ​ເສື່ອມ​ໂຊມ. ຢ່າ​ປ່ອຍ​ໃຫ້​ເລື່ອງ​ນັ້ນ​ເກີດ​ຂຶ້ນ! ການ​ສະໜອງ​ຄວາມ​ຕ້ອງການ​ທີ່​ວ່າ ເຮົາ “ຕ້ອງການ​ພະເຈົ້າ” ເປັນ​ສິ່ງ​ທີ່​ຄວນ​ເຮັດ! (ມັດທາຍ 5:3, ທ.ປ.) ຂໍ​ໃຫ້​ຈື່​ໄວ້​ວ່າ ລົດ​ທີ່​ມີ​ນ້ຳ​ມັນ​ແຕ່​ໜ້ອຍ​ດຽວ​ກໍ​ໄປ​ບໍ່​ໄດ້​ໄກ. ເຮົາ​ກໍ​ຄົງ​ໄປ​ບໍ່​ໄດ້​ໄກ​ເຊັ່ນ​ກັນ​ຖ້າ​ບໍ່​ໄດ້​ຕື່ມ​ພະລັງ.

ນອກ​ຈາກ​ນັ້ນ ມີ “ເວລາ​ຫົວເລາະ” ແລະ “ເວລາ​ເຕັ້ນ​ຍິນດີ.” (ຜູ້​ເທສະໜາ​ປ່າວ​ປະກາດ 3:4) ການ​ພັກຜ່ອນ​ບໍ່​ແມ່ນ​ເລື່ອງ​ເສຍ​ເວລາ ແຕ່​ເຮັດ​ໃຫ້​ເຮົາ​ສົດ​ຊື່ນ​ແລະ​ພາ​ໃຫ້​ມີ​ເຫື່ອ​ແຮງ​ເພື່ອ​ຈະ​ເຮັດ​ໜ້າ​ທີ່​ພໍ່​ຫຼື​ແມ່​ທີ່​ຂາດ​ຄູ່​ໄດ້.

ຄຳ​ແນະນຳ: ໃຫ້​ຖາມ​ພໍ່​ຫຼື​ແມ່​ທີ່​ຂາດ​ຄູ່​ວ່າ​ເຂົາ​ເຈົ້າ​ເບິ່ງ​ແຍງ​ຕົວ​ເອງ​ແນວ​ໃດ. ໃນ​ຂະນະ​ທີ່ “ເລືອກ​ສິ່ງ​ທັງ​ຫຼາຍ​ທີ່​ເປັນ​ອັນ​ປະເສີດ [ສຳຄັນ] ທີ່​ສຸດ” ເຮົາ​ຈະ​ໃຊ້​ເວລາ​ຈັກ​ໜ້ອຍ​ໜຶ່ງ​ໄດ້​ບໍ​ໃນ​ແຕ່​ລະ​ອາທິດ​ເພື່ອ​ເຮັດ​ໃນ​ສິ່ງ​ທີ່​ເຮົາ​ມັກ? (ຟີລິບ 1:10) ໃຫ້​ຂຽນ​ສິ່ງ​ທີ່​ເຮົາ​ຢາກ​ເຮັດ​ແລະ​ຈະ​ເຮັດ​ເມື່ອ​ໃດ.

[ຂໍ້​ຄວາມ​ໄຂ​ເງື່ອນ]