ຄຳສອນໃນຄຳພີໄບເບິນ
ຜິດບໍຖ້າຈະຢູ່ກິນນຳກັນກ່ອນແຕ່ງດອງ?
ເຮົາຈະຊື້ເຄື່ອງນຸ່ງລາຄາແພງໂດຍບໍ່ໄດ້ລອງກ່ອນບໍ? ຄົງຈະບໍ່ເຮັດແນວນັ້ນ. ຖ້າໃສ່ບໍ່ໄດ້ ກໍມີແຕ່ເສຍເວລາແລະເສຍເງິນຖິ້ມລ້າໆ.
ຫຼາຍຄົນຫາເຫດຜົນແບບນັ້ນໃນເລື່ອງການແຕ່ງດອງ. ເຂົາເຈົ້າຮູ້ສຶກວ່າກ່ອນຈະເຮັດຂໍ້ຜູກມັດເປັນຜົວເປັນເມຍກັນ ດີກວ່າຖ້າຊາຍແລະຍິງຢູ່ກິນນຳກັນກ່ອນ. ເຂົາເຈົ້າຫາເຫດຜົນວ່າ ‘ຖ້າຢູ່ນຳກັນບໍ່ໄດ້ ຕ່າງຄົນກໍຕ່າງໄປໂດຍບໍ່ຕ້ອງມີຂັ້ນຕອນການຢ່າຮ້າງທີ່ຫຍຸ້ງຍາກແລະເປືອງເງິນ.’
ບາງຄົນອາດຮູ້ສຶກແບບນັ້ນຍ້ອນເຫັນໝູ່ເພື່ອນທີ່ແຕ່ງດອງແລ້ວແລະຕ້ອງທົນກັບການຖືກທຳຮ້າຍຈາກຄູ່ຂອງຕົນ ຫຼືອາດເຄີຍເຫັນຄວາມເຈັບປວດໃຈໃນຊີວິດຄູ່ທີ່ຂາດຄວາມຮັກ. ດັ່ງນັ້ນ ເຂົາເຈົ້າອາດເຫັນວ່າການຢູ່ກິນນຳກັນກ່ອນແຕ່ງດອງເປັນການປ້ອງກັນບັນຫາໃນວັນຂ້າງໜ້າ.
ຄຳພີໄບເບິນບອກແນວໃດໃນເລື່ອງນີ້? ເພື່ອຈະໄດ້ຄຳຕອບ ກ່ອນອື່ນເຮົາຕ້ອງພິຈາລະນາສິ່ງທີ່ຄຳພີໄບເບິນກ່າວເຖິງເລື່ອງການຈັດຕັ້ງຄອບຄົວ.
“ເນື້ອໜັງອັນດຽວກັນ”
ຄຳພີໄບເບິນຖືວ່າການແຕ່ງດອງເປັນເລື່ອງສຳຄັນ ແລະບໍ່ຄວນແປກໃຈໃນເລື່ອງນີ້ ເພາະພະເຢໂຫວາເປັນຜູ້ຈັດຕັ້ງການແຕ່ງດອງ. (ຕົ້ນເດີມ 2:21-24) ຕັ້ງແຕ່ເລີ່ມຕົ້ນ ພະເຢໂຫວາໃຫ້ຊາຍແລະຍິງເປັນ “ເນື້ອໜັງອັນດຽວກັນ” ໂດຍທາງການແຕ່ງດອງ. (ຕົ້ນເດີມ 2:24) ຫຼັງຈາກຍົກຖ້ອຍຄຳໃນຄຳພີໄບເບິນທີ່ຊີ້ເຖິງເລື່ອງນີ້ ພະເຍຊູເວົ້າເສີມວ່າ: “ສິ່ງນັ້ນທີ່ພະເຈົ້າໄດ້ກະທຳໃຫ້ຕິດພັນກັນຢູ່ແລ້ວ ຢ່າໃຫ້ຄົນກະທຳໃຫ້ແຍກແຕກຈາກກັນ.”—ມັດທາຍ 19:6
ແມ່ນຢູ່ວ່າພາຍຫຼັງທີ່ແຕ່ງດອງແລ້ວບາງຄົນກໍຢ່າຮ້າງກັນ.a ເມື່ອເກີດເຫດການແບບນີ້ ບໍ່ແມ່ນເປັນຍ້ອນວ່າການຈັດຕຽມເລື່ອງການແຕ່ງດອງມີບາງຢ່າງຜິດພາດ ແຕ່ເປັນຍ້ອນຜົວຫຼືເມຍຫຼືທັງສອງຝ່າຍບໍ່ໄດ້ໃຊ້ຊີວິດຕາມຄຳປະຕິຍານທີ່ໃຫ້ໄວ້ຕອນແຕ່ງດອງ.
ສົມມຸດວ່າຜົວເມຍຄູ່ໜຶ່ງມີລົດຈັກຄັນໜຶ່ງ ແຕ່ທັງສອງບໍ່ໄດ້ເບິ່ງແຍງຮັກສາລົດຕາມຄຳແນະນຳຂອງຜູ້ຜະລິດ. ຖ້າລົດເພຈະໂທດໃຜ? ໂທດຜູ້ຜະລິດຫຼືໂທດເຈົ້າຂອງທີ່ບໍ່ໄດ້ເບິ່ງແຍງຮັກສາລົດຕາມທີ່ແນະນຳໄວ້?
ຫຼັກການດຽວກັນນີ້ໃຊ້ໄດ້ກັບຊີວິດຄູ່. ເມື່ອຮັກສາສາຍສຳພັນຂອງການເປັນຜົວເມຍ ແລະຕັ້ງໃຈທີ່ຈະແກ້ໄຂບັນຫາໂດຍໃຊ້ຫຼັກການໃນຄຳພີໄບເບິນ ໂອກາດທີ່ຈະຢ່າຮ້າງກັນແມ່ນເກືອບບໍ່ມີເລີຍ. ແຕ່ລະຝ່າຍຈະຮູ້ສຶກໝັ້ນຄົງໃນສາຍສຳພັນຂອງຊີວິດຄູ່ເພາະໄດ້ສັນຍາວ່າຈະຍຶດໝັ້ນກັບສາຍຜົວເມຍ.
“ຈົ່ງອົດກັ້ນໄວ້ຈາກການຜິດຊາຍຍິງທຸກຢ່າງ”
ແຕ່ບາງຄົນອາດສົງໄສວ່າ: ‘ເປັນຫຍັງຈຶ່ງບໍ່ຢູ່ນຳກັນກ່ອນ? ການທົດລອງເບິ່ງຄວາມສຳພັນນັ້ນວ່າຈະສຳເລັດຫຼືບໍ່ກ່ອນເຮັດຂໍ້ຜູກມັດສະແດງເຖິງການນັບຖືຄວາມສັກສິດຂອງການແຕ່ງດອງບໍ່ແມ່ນບໍ?’
ຄຳພີໄບເບິນມີຄຳຕອບທີ່ຊັດເຈນ. ໂປໂລຂຽນວ່າ: “ຈົ່ງອົດກັ້ນໄວ້ຈາກການຜິດຊາຍຍິງ [ການຜິດປະເວນີ] ທຸກຢ່າງ.” (1 ເທຊະໂລນີກ 4:3) ຄຳວ່າ “ການຜິດປະເວນີ” ໝາຍເຖິງຄວາມສຳພັນທາງເພດທຸກຮູບແບບທີ່ເຮັດຢູ່ນອກສາຍຜົວເມຍ. ນັ້ນລວມເຖິງການມີເພດສຳພັນຂອງຄົນສອງຄົນທີ່ຢູ່ກິນນຳກັນ ເຖິງວ່າມີແຜນຈະແຕ່ງດອງກັນໃນພາຍຫຼັງ. ດັ່ງທີ່ກ່າວໄວ້ໃນຄຳພີໄບເບິນ ການເຮັດແບບນັ້ນແມ່ນຜິດ ເຖິງວ່າທັງສອງຕັ້ງໃຈຈະແຕ່ງດອງກັນໃນພາຍຫຼັງກໍຕາມ.
ຄຳກ່າວໃນຄຳພີໄບເບິນຫຼ້າສະໄໝບໍ? ບາງຄົນອາດຄຶດແນວນັ້ນ. ແມ່ນຢູ່ ໃນຫຼາຍປະເທດການຢູ່ກິນນຳກັນບໍ່ວ່າມີເປົ້າໝາຍທີ່ຈະແຕ່ງດອງກັນຫຼືບໍ່ກໍຕາມ ຖືວ່າເປັນເລື່ອງປົກກະຕິທຳມະດາ. ໃຫ້ຄຶດເຖິງຜົນກະທົບທີ່ຈະຕິດຕາມມາ. ຜູ້ທີ່ຢູ່ກິນນຳກັນໂດຍບໍ່ແຕ່ງດອງກັນພົບເຄັດລັບຄວາມສຳເລັດໃນຄອບຄົວແລ້ວບໍ? ເຂົາເຈົ້າມີຄວາມສຸກຫຼາຍກວ່າຜູ້ທີ່ແຕ່ງດອງກັນບໍ? ຜູ້ທີ່ຢູ່ກິນນຳກັນກ່ອນແລ້ວຈຶ່ງແຕ່ງດອງມີເປີເຊັນສູງກວ່າໃນເລື່ອງຄວາມສັດຊື່ຕໍ່ຄູ່ຂອງຕົນບໍ? ການສຶກສາຄົ້ນຄວ້າສະແດງໃຫ້ເຫັນຜົນທີ່ກົງກັນຂ້າມກັນເລີຍ. ທີ່ຈິງແລ້ວ ການຄົ້ນຄວ້າພົບວ່າຄູ່ທີ່ເຄີຍຢູ່ກິນນຳກັນກ່ອນໄດ້ປະສົບບັນຫາຄອບຄົວຫຼາຍກວ່າແລະໃນທີ່ສຸດກໍມີການຢ່າຮ້າງສູງກວ່າ.
ຜູ້ຊ່ຽວຊານບາງຄົນອາດກ່າວວ່າການສຶກສາຄົ້ນຄວ້ານັ້ນມີຂໍ້ຜິດພາດ. ຕົວຢ່າງເຊັ່ນ ນັກຈິດຕະວິທະຍາຄົນໜຶ່ງກ່າວວ່າ ຜູ້ທີ່ຢູ່ກິນນຳກັນກ່ອນແລ້ວຈຶ່ງແຕ່ງດອງ ຕ່າງຈາກຜູ້ທີ່ແຕ່ງດອງກັນໂດຍບໍ່ໄດ້ຢູ່ກິນນຳກັນກ່ອນ. ລາວບອກວ່າ ການຢູ່ກິນນຳກັນກ່ອນແຕ່ງດອງບໍ່ແມ່ນປະເດັນທີ່ສຳຄັນ. ລາວກ່າວຕື່ມວ່າ ປະເດັນສຳຄັນກໍຄື “ການເຫັນຄຸນຄ່າຂອງການແຕ່ງດອງ.”
ເບິ່ງຄືວ່າເລື່ອງນັ້ນເປັນຄວາມຈິງ ທັງເນັ້ນເຖິງຄວາມສຳຄັນຂອງການມີຄວາມຄຶດແບບພະເຢໂຫວາໃນເລື່ອງການແຕ່ງດອງ. ຄຳພີໄບເບິນກ່າວວ່າ: “ການເອົາຜົວເອົາເມຍຈົ່ງໃຫ້ເປັນທີ່ນັບຖືແຕ່ຄົນທັງປວງ.” (ເຫບເລີ 13:4) ເມື່ອຊາຍຍິງສັນຍາວ່າຈະຢູ່ເປັນເນື້ອໜັງອັນດຽວກັນແລະນັບຖືຕໍ່ການຈັດຕຽມເລື່ອງການແຕ່ງດອງ ທັງສອງຈະມີຄວາມຜູກພັນທີ່ບໍ່ມີຫຍັງຕັດຂາດໄດ້ງ່າຍໆ.—ຜູ້ເທສະໜາປ່າວປະກາດ 4:12
ດັ່ງນັ້ນ ເມື່ອກັບໄປເບິ່ງຕົວຢ່າງທີ່ສົມທຽບໃນຕອນຕົ້ນ ຖືວ່າມີເຫດຜົນທີ່ຈະລອງໃສ່ເຄື່ອງນຸ່ງລາແພງກ່ອນຊື້. ແນວໃດກໍຕາມ ຕົວຢ່າງນີ້ບໍ່ສາມາດສົມທຽບໄດ້ກັບການຢູ່ກິນນຳກັນກ່ອນແຕ່ງດອງ. ແຕ່ສົມທຽບໄດ້ກັບການໃຊ້ເວລາຫຼາຍໆເພື່ອຮູ້ຈັກລຶ້ງເຄີຍກັບຜູ້ທີ່ເຮົາຄຶດຈະແຕ່ງດອງນຳ. ຂັ້ນຕອນນີ້ສຳຄັນແຕ່ພັດຖືກມອງຂ້າມເລື້ອຍໆໃນເຄັດລັບຫຼາຍຢ່າງທີ່ເຮັດໃຫ້ຄອບຄົວປະສົບຄວາມສຳເລັດ.
[ຂໍ້ຄວາມໄຂເງື່ອນ]
a ຄຳພີໄບເບິນອະນຸຍາດໃຫ້ຢ່າຮ້າງແລະແຕ່ງດອງໃໝ່ໄດ້ຖ້າຝ່າຍໃດຝ່າຍໜຶ່ງມີເພດສຳພັນນອກສາຍຜົວເມຍ.—ມັດທາຍ 19:9
ທ່ານເຄີຍສົງໄສບໍ?
◼ ເປັນຫຍັງຄຳພີໄບເບິນຈຶ່ງຫ້າມບໍ່ໃຫ້ມີເພດສຳພັນກັບຜູ້ທີ່ບໍ່ແມ່ນຜົວຫຼືເມຍຂອງເຮົາ?—ຄຳເພງ 84:11; 1 ໂກລິນໂທ 6:18
◼ ເຮົາຄວນເບິ່ງຈຸດໃດໃນຕົວຜູ້ທີ່ຈະມາເປັນຄູ່ຂອງເຮົາ?—ລຶດ 1:16, 17; ສຸພາສິດ 31:10-31
[ຂອບໜ້າ 29]
“ຜິດຕໍ່ກາຍຂອງຕົນເອງ”
ຄຳພີໄບເບິນກ່າວວ່າ: “ຄົນທີ່ລ່ວງຜິດຊາຍຍິງ [ຜິດປະເວນີ] ກໍຜິດຕໍ່ກາຍຂອງຕົນເອງ.” (1 ໂກລິນໂທ 6:18) ໃນບໍ່ເທົ່າໃດສິບປີມານີ້ ຄວາມຈິງຂອງຖ້ອຍຄຳເຫຼົ່ານີ້ແຮ່ງເດັ່ນແຈ້ງຂຶ້ນເພາະຫຼາຍລ້ານຄົນເສຍຊີວິດຍ້ອນໂລກເອດສແລະພະຍາດອື່ນໆທີ່ຕິດຕໍ່ທາງເພດສຳພັນ. ແຕ່ຍັງບໍ່ໝົດເທົ່ານັ້ນ ການສຶກສາຄົ້ນຄວ້າສະແດງວ່າອາການຊຶມເສົ້າແລະການພະຍາຍາມຂ້າຕົວຕາຍມີຫຼາຍຂຶ້ນທ່າມກາງໝຸ່ມສາວທີ່ເຄີຍມີເພດສຳພັນ. ນອກຈາກນັ້ນ ການສຳສ່ອນທາງເພດນຳໄປສູ່ການຖືພາໂດຍທີ່ບໍ່ຕ້ອງການ ເຊິ່ງໃນບາງກໍລະນີເຖິງຂັ້ນພະຍາຍາມເອົາລູກອອກ. ເມື່ອຄຳນຶງເຖິງຄວາມຈິງເຫຼົ່ານີ້ ເຮົາສາມາດສະຫຼຸບໄດ້ວ່າກົດສິນລະທຳໃນຄຳພີໄບເບິນບໍ່ໄດ້ຫຼ້າສະໄໝ.