ເຄັດລັບທີ 4 ການສະແດງຄວາມນັບຖື
“ການຮ້ອງຖຽງກັນແລະຄວາມປ້ອຍດ່າ . . . ທຸກຢ່າງຈົ່ງຖິ້ມເສຍຈາກທ່າມກາງທ່ານທັງຫຼາຍ.”—ເອເຟດ 4:31
ເລື່ອງນີ້ໝາຍຄວາມວ່າແນວໃດ? ທັງຄອບຄົວທີ່ມີບັນຫາແລະຄອບຄົວທີ່ປະສົບຄວາມສຳເລັດລ້ວນແຕ່ມີຂໍ້ຂັດແຍ່ງກັນ. ແຕ່ໃນຄອບຄົວທີ່ປະສົບຄວາມສຳເລັດຈະເວົ້າລົມກັນເລື່ອງຂໍ້ຂັດແຍ່ງໂດຍທີ່ບໍ່ເວົ້າສຽດສີ ດູຖູກ ຫຼືໃຊ້ຄຳເວົ້າທີ່ຫຍາບຄາຍ. ແຕ່ລະຄົນໃນຄອບຄົວປະຕິບັດຕໍ່ກັນໃນແບບທີ່ຢາກໃຫ້ຄົນອື່ນປະຕິບັດຕໍ່ຕົວເອງ.—ມັດທາຍ 7:12
ເປັນຫຍັງເລື່ອງນີ້ຈຶ່ງສຳຄັນ? ຄຳເວົ້າສາມາດເປັນອາວຸດທີ່ສ້າງຄວາມເສຍຫາຍຮ້າຍແຮງ. ສຸພາສິດໃນຄຳພີໄບເບິນກ່າວວ່າ: “ຕັ້ງຢູ່ໃນປ່າຮ້າງກໍດີກວ່າຢູ່ນຳຜູ້ຍິງທີ່ມັກຮ້າຍມັກຜິດກັນ.” (ສຸພາສິດ 21:19) ແນ່ນອນວ່າຂໍ້ນີ້ກໍໃຊ້ໄດ້ກັບຜູ້ຊາຍທີ່ມັກເວົ້າໃຫ້ຄົນອື່ນເຈັບໃຈ. ເມື່ອເວົ້າເຖິງບົດບາດຂອງພໍ່ແມ່ ຄຳພີໄບເບິນກ່າວວ່າ: “ຢ່າກະທຳລູກທັງຫຼາຍແຫ່ງຕົນໃຫ້ເຄືອງໃຈຢ້ານວ່າເຂົາຈະເສຍໃຈ.” (ໂກໂລດ 3:21) ເດັກນ້ອຍທີ່ຖືກຕຳໜິຕະຫຼອດອາດຮູ້ສຶກວ່າບໍ່ມີທາງທີ່ຈະເຮັດໃຫ້ພໍ່ແມ່ພໍໃຈ ແລະອາດຈະເຊົາພະຍາຍາມເຮັດເລີຍ.
ລອງວິທີຕໍ່ໄປນີ້. ໃຫ້ກວດກາເບິ່ງເລື່ອງການສະແດງຄວາມນັບຖືພາຍໃນຄອບຄົວຂອງເຮົາໂດຍຕອບຄຳຖາມຕໍ່ໄປນີ້.
◼ ໃນຄອບຄົວຂອງເຮົາ ຕາມປົກກະຕິແລ້ວການຂັດແຍ່ງມັກຈົບລົງໂດຍທີ່ຜູ້ໜຶ່ງຍ່າງຟຶດຟັດອອກໄປບໍ?
◼ ເມື່ອເວົ້າກັບຜົວຫຼືເມຍຫຼືກັບລູກ ເຮົາມັກໃຊ້ຄຳເວົ້າທີ່ດູຖູກເຊັ່ນ “ຈັ່ງແມ່ນໂງ່ ຈັ່ງແມ່ນຈ້າ” ຫຼືຄຳເວົ້າທີ່ຄ້າຍກັນນີ້ບໍ?
◼ ເຮົາເຕີບໃຫຍ່ໃນສະພາບແວດລ້ອມທີ່ຖືວ່າການໃຊ້ຄຳເວົ້າຫຍາບຄາຍເປັນເລື່ອງທຳມະດາບໍ?
ຕັ້ງໃຈຢ່າງເດັດຂາດ. ໃຫ້ຄຶດເຖິງເປົ້າໝາຍໜຶ່ງຫຼືສອງຢ່າງໃນການສະແດງຄວາມນັບຖືດ້ວຍວິທີການເວົ້າ. (ຄຳແນະນຳ: ຕັ້ງໃຈທີ່ຈະໃຊ້ຄຳວ່າ “ຂ້ອຍ” ແທນທີ່ຈະໃຊ້ຄຳວ່າ “ເຈົ້າ.” ຕົວຢ່າງເຊັ່ນ “ຂ້ອຍຮູ້ສຶກເສຍໃຈເມື່ອເຈົ້າ . . . ” ແທນທີ່ຈະເວົ້າວ່າ “ເຈົ້າກໍເປັນແບບນີ້ຕະຫຼອດ.”)
ຄົງຈະດີຖ້າບອກຜົວຫຼືເມຍໃຫ້ຮູ້ກ່ຽວກັບເປົ້າໝາຍຂອງເຮົາ. ພາຍໃນສາມເດືອນໃຫ້ຖາມວ່າເຫັນການປ່ຽນແປງໃນຕົວເຮົາຫຼາຍສ່ຳໃດແລ້ວ.
ໃຫ້ຄຶດເຖິງວິທີທີ່ຈະຍັບຢັ້ງຕົວເອງເພື່ອບໍ່ເວົ້າຄຳຫຍາບຄາຍກັບລູກ.
ເປັນສິ່ງທີ່ດີຖ້າຈະຂໍໂທດລູກເມື່ອເຮົາໃຊ້ຄຳເວົ້າທີ່ຮຸນແຮງຫຼືສຽດສີ.
[ຮູບພາບໜ້າ 6]
ນ້ຳເຊາະກິນຫີນ ຄຳເວົ້າທີ່ເຈັບແສບກໍທຳລາຍຄວາມໝັ້ນຄົງຂອງຄອບຄົວເຊັ່ນກັນ