ບົດທີ 2
ລັກຄົບກັນມັນຊິເປັນຫຍັງ?
ເຈດຊິກ້າລຳບາກໃຈແລະບໍ່ຮູ້ວ່າຊິຕັດສິນໃຈແນວໃດ. ທຸກຢ່າງເລີ່ມຈາກໝູ່ທີ່ຮຽນຢູ່ຫ້ອງດຽວກັນຊື່ເຈເຣມີ້ໄດ້ເລີ່ມສະແດງຄວາມສົນໃຈໃນໂຕເຈດຊິກ້າ. ເຈດຊິກ້າເວົ້າວ່າ: “ລາວຫຼໍ່ຫຼາຍ ແຖມໝູ່ຂ້ອຍກໍບອກວ່າລາວເປັນຜູ້ຊາຍທີ່ດີທີ່ສຸດທີ່ຂ້ອຍເຄີຍເຈິ. ຜູ້ຍິງຫຼາຍຄົນຢາກເປັນແຟນກັບລາວ ແຕ່ລາວບໍ່ສົນໃຈເຂົາເຈົ້າ. ລາວສົນໃຈແຕ່ຂ້ອຍຜູ້ດຽວ.”
ບໍ່ດົນ ເຈເຣມີ້ກໍຊວນເຈດຊິກ້າອອກໄປຫຼິ້ນນຳກັນ. ເຈດຊິກ້າບອກວ່າລາວເປັນພະຍານພະເຢໂຫວາແລະພໍ່ແມ່ກໍບໍ່ໃຫ້ລາວຄົບກັບຄົນທີ່ບໍ່ມີຄວາມເຊື່ອ. ລາວເລົ່າວ່າ: “ແລ້ວເຈເຣມີ້ກໍສະເໜີໄອເດຍວ່າ ‘ຊັ້ນເຮົາເປັນແຟນກັນໂດຍບໍ່ໃຫ້ພໍ່ແມ່ເຈົ້າຮູ້ກໍໄດ້!’”
ຖ້າຄົນທີ່ເຈົ້າສົນໃຈສະເໜີແບບນີ້ ເຈົ້າຈະເຮັດແນວໃດ? ເຈົ້າອາດຈະບໍ່ຄິດວ່າເຈດຊິກ້າຊິຍອມເຮັດຕາມແຜນຂອງເຈເຣມີ້. ເຈດຊິກ້າເວົ້າວ່າ: “ຖ້າຂ້ອຍເປັນແຟນກັບລາວ ຂ້ອຍຄືຊິຊ່ວຍລາວໃຫ້ມາຮູ້ຈັກແລະຮັກພະເຢໂຫວາໄດ້.” ຜົນເປັນແນວໃດ? ດຽວເຮົາຈະໄດ້ຮູ້ນຳກັນ. ແຕ່ກ່ອນອື່ນໃຫ້ເຮົາມາເບິ່ງວ່າ ເປັນຫຍັງບາງຄົນຈຶ່ງລັກມີແຟນທັງໆທີ່ຮູ້ວ່າມັນບໍ່ຖືກ.
ເຫດຜົນທີ່ໄວລຸ້ນບາງຄົນລັກຄົບກັນ
ເປັນຫຍັງບາງຄົນຈຶ່ງລັກຄົບກັນ? ໄວລຸ້ນຊາຍຊື່ດາວິດເວົ້າກົງໆວ່າ: “ເຂົາເຈົ້າຮູ້ວ່າພໍ່ແມ່ຈະບໍ່ເຫັນດີນຳ ເຂົາເຈົ້າຈຶ່ງບໍ່ບອກພໍ່ແມ່.” ເຈນເວົ້າເຖິງອີກເຫດຜົນໜຶ່ງ. ລາວເວົ້າວ່າ: “ການລັກມີແຟນສະແດງໃຫ້ເຫັນວ່າເຈົ້າເປັນໂຕຂອງໂຕເອງ. ເຈົ້າຮູ້ສຶກວ່າໂຕເອງໃຫຍ່ແລ້ວແຕ່ພໍ່ແມ່ຍັງເຮັດຄືກັບວ່າເຈົ້າເປັນເດັກນ້ອຍ ເຈົ້າຈຶ່ງຢາກຕັດສິນໃຈເອງວ່າຈະເຮັດຫຍັງໂດຍທີ່ບໍ່ບອກພໍ່ແມ່.”
ເຈົ້າຄິດວ່າມີເຫດຜົນຫຍັງອີກບໍທີ່ເຮັດໃຫ້ບາງຄົນລັກມີແຟນ? ຖ້າຄິດອອກ ຂໍໃຫ້ຂຽນໃສ່ທາງລຸ່ມນີ້.
․․․․․
ເຈົ້າຮູ້ວ່າຄຳພີໄບເບິນບອກໃຫ້ເຈົ້າເຊື່ອຟັງພໍ່ແມ່. (ເອເຟໂຊ 6:1) ແລະຖ້າພໍ່ແມ່ບໍ່ຢາກໃຫ້ເຈົ້າມີແຟນ ເຂົາເຈົ້າກໍຕ້ອງມີເຫດຜົນທີ່ດີແນ່ນອນ. ແຕ່ມັນກໍບໍ່ແປກຖ້າບາງເທື່ອເຈົ້າຈະຮູ້ສຶກວ່າ:
● ທຸກຄົນມີແຟນໝົດຍົກເວັ້ນຂ້ອຍ ຂ້ອຍລະບໍ່ຄືໝູ່.
● ຂ້ອຍມັກຄົນທີ່ບໍ່ໄດ້ເປັນພະຍານພະເຢໂຫວາ.
● ຂ້ອຍຢາກມີແຟນທີ່ເປັນພະຍານພະເຢໂຫວາ ແຕ່ຂ້ອຍກໍຍັງນ້ອຍຢູ່.
ເຈົ້າຄືຊິຮູ້ດີວ່າພໍ່ແມ່ຂອງເຈົ້າຈະເວົ້າແນວໃດກ່ຽວກັບຄຳເວົ້າທາງເທິງນີ້ ແລະເລິກໆໃນໃຈແລ້ວ ເຈົ້າກໍຮູ້ວ່າພໍ່ແມ່ຂອງເຈົ້າເປັນຝ່າຍຖືກ. ແຕ່ເຈົ້າອາດຮູ້ສຶກຄືກັບຜູ້ຍິງທີ່ຊື່ມານາມິ ເຊິ່ງເວົ້າວ່າ: “ເປັນໄປບໍ່ໄດ້ດອກທີ່ໄວລຸ້ນໃນທຸກມື້ນີ້ຈະບໍ່ມີແຟນ. ຂ້ອຍເອງກໍຢາກມີຄືກັນ ຂ້ອຍຈຶ່ງຮູ້ສຶກຖືກກົດດັນຫຼາຍຈົນບາງເທື່ອກໍເລີ່ມສົງໄສວ່າໂຕເອງຄິດຖືກແລ້ວບໍທີ່ບໍ່ຍອມມີແຟນ.” ເມື່ອມີຄວາມກົດດັນແບບນີ້ ບາງຄົນຈຶ່ງເລີ່ມມີແຟນໂດຍບໍ່ໃຫ້ພໍ່ແມ່ຮູ້. ເຂົາເຈົ້າເຮັດແນວໃດ?
“ໃຫ້ເກັບເປັນຄວາມລັບ”
ເມື່ອເວົ້າເຖິງ “ການລັກຄົບກັນ” ໝາຍຄວາມວ່າຈະຕ້ອງມີການຕົວະຢູ່ນຳ. ບາງຄົນລັກລົມກັນທາງໂທລະສັບຫຼືອິນເຕີເນັດເພື່ອຈະບໍ່ໃຫ້ໃຜຮູ້. ຕອນຢູ່ຕໍ່ໜ້າຄົນອື່ນ ເຂົາເຈົ້າເຮັດຄືວ່າເປັນໝູ່ກັນ ແຕ່ຕອນລົມກັນທາງໂທລະສັບ ອີເມວ ແລະຂໍ້ຄວາມພັດເຮັດໃຫ້ເຫັນວ່າເຂົາເຈົ້າກຳລັງເປັນແຟນກັນແທ້ໆ.
ອີກວິທີໜຶ່ງທີ່ເຮັດແມ່ນການຈັດກິດຈະກຳຫຼືໄປທ່ຽວເປັນກຸ່ມ ຈາກນັ້ນກໍແຍກອອກມາຢູ່ນຳກັນເປັນຄູ່. ເຈມສ໌ບອກວ່າ: “ມີຢູ່ເທື່ອໜຶ່ງ ມີຄົນຊວນພວກເຮົາໄປທ່ຽວນຳກັນເປັນກຸ່ມ ບາດໄປແລ້ວເຮົາຈຶ່ງໄດ້ມາຮູ້ວ່າເຂົາເຈົ້າວາງແຜນໃຫ້ໝູ່ສອງຄົນໄດ້ຢູ່ນຳກັນ. ແລ້ວສອງຄົນນັ້ນກໍຂໍໃຫ້ເຮົາເກັບເລື່ອງນີ້ໄວ້ເປັນຄວາມລັບ.”
ຄືກັບທີ່ເຈມສ໌ບອກ ຄົນທີ່ລັກຄົບກັນໄດ້ມັກຈະມີໝູ່ໃຫ້ຄວາມຮ່ວມມື. ແຄຣໍເວົ້າວ່າ: “ຫຼາຍເທື່ອ ມີໝູ່ຢ່າງໜ້ອຍໜຶ່ງຄົນທີ່ຮູ້ກ່ຽວກັບແຜນການນີ້ແຕ່ເລືອກທີ່ຈະບໍ່ບອກໃຜ ຍ້ອນຢ້ານໝູ່ຄຽດ.” ບາງເທື່ອກໍເຖິງຂັ້ນຕົວະກັນ. ເບດອາຍຸ 17 ປີເວົ້າວ່າ: “ຫຼາຍຄົນຕ້ອງຕົວະພໍ່ແມ່ເພື່ອບໍ່ໃຫ້ຮູ້ວ່າໄປທ່ຽວກັບແຟນ.” ມິຊາກິອາຍຸ 19 ປີ ກໍເຄີຍເຮັດແບບນັ້ນ. ລາວເວົ້າວ່າ: “ຂ້ອຍຕ້ອງລະວັງຕອນທີ່ຕົວະພໍ່ແມ່. ຂ້ອຍບອກຄວາມຈິງທຸກຢ່າງ ແຕ່ບໍ່ໄດ້ບອກວ່າມີແຟນໄປນຳເພື່ອພໍ່ແມ່ຈະຍັງໄວ້ໃຈຂ້ອຍ.”
ອັນຕະລາຍຂອງການລັກຄົບກັນ
ຖ້າຕອນນີ້ເຈົ້າລັກຄົບກັບຄົນໜຶ່ງຢູ່ ຫຼືກຳລັງຄິດທີ່ຈະເຮັດແບບນັ້ນ ໃຫ້ເຈົ້າຖາມໂຕເອງດ້ວຍຄຳຖາມສອງຂໍ້ຕໍ່ໄປນີ້:
ຜົນຈະເປັນແນວໃດ? ເຈົ້າຕັ້ງໃຈຈະແຕ່ງດອງກັບຄົນນີ້ໃນໄວໆນີ້ບໍ? ອີວານອາຍຸ 20 ປີເວົ້າວ່າ: “ການມີແຟນໂດຍບໍ່ໄດ້ຄິດທີ່ຈະແຕ່ງດອງກໍຄືກັບການໂຄສະນາສິ່ງທີ່ເຈົ້າບໍ່ຢາກຂາຍ.” ຜົນເປັນແນວໃດ? ສຸພາສິດ 13:12 ບອກວ່າ “ຄວາມຫວັງທີ່ຖືກເລື່ອນອອກໄປເຮັດໃຫ້ເສຍໃຈ.” ເຈົ້າຢາກໃຫ້ຄົນທີ່ເຈົ້າສົນໃຈເສຍໃຈແທ້ໆບໍ? ຄຳເຕືອນອີກຢ່າງໜຶ່ງແມ່ນ ການລັກມີແຟນຈະເຮັດໃຫ້ພໍ່ແມ່ແລະຜູ້ໃຫຍ່ຄົນອື່ນໆທີ່ເປັນຫ່ວງເຈົ້າບໍ່ຮູ້ວ່າເຈົ້າກຳລັງຄົບກັບເພດກົງກັນຂ້າມຢູ່ ເຂົາເຈົ້າເລີຍບໍ່ສາມາດຄຳແນະນຳດີໆໃນເລື່ອງການມີແຟນ. ນີ້ອາດເຮັດໃຫ້ເຈົ້າມີໂອກາດທີ່ຈະເຮັດຜິດສິນລະທຳທາງເພດໄດ້ງ່າຍ.—ຄາລາເຕຍ 6:7
ພະເຢໂຫວາພະເຈົ້າຮູ້ສຶກແນວໃດກັບສິ່ງທີ່ຂ້ອຍເຮັດຢູ່? ຄຳພີໄບເບິນບອກວ່າ: “ທຸກສິ່ງຖືກເປີດເຜີຍແລະປາກົດແຈ້ງຕໍ່ສາຍຕາຂອງເພິ່ນຜູ້ທີ່ພວກເຮົາຕ້ອງໃຫ້ການ.” (ເຮັບເຣີ 4:13) ດັ່ງນັ້ນ ເຖິງວ່າເຈົ້າຈະພະຍາຍາມປິດບັງເລື່ອງທີ່ໂຕເອງມີແຟນ ຫຼືປິດບັງຊ່ວຍໝູ່ ແຕ່ພະເຢໂຫວາກໍຮູ້. ແລະຖ້າເຈົ້າຕົວະ ເຈົ້າກໍແຮ່ງຕ້ອງຄິດໃຫ້ດີໆເພາະພະເຢໂຫວາພະເຈົ້າຊັງການເວົ້າຕົວະ. ທີ່ຈິງ “ລີ້ນທີ່ເວົ້າຕົວະ” ຈັດຢູ່ໃນອັນດັບຕົ້ນໆຂອງສິ່ງທີ່ເພິ່ນຊັງທີ່ບອກໃນຄຳພີໄບເບິນ.—ສຸພາສິດ 6:16-19
ຢ່າປິດບັງ
ຖ້າຕອນນີ້ເຈົ້າກຳລັງຄົບກັບໃຜຢູ່ກໍຄວນບອກໃຫ້ພໍ່ແມ່ຫຼືພີ່ນ້ອງທີ່ເປັນຜູ້ໃຫຍ່ຮູ້. ແລະຖ້າໝູ່ຂອງເຈົ້າລັກມີແຟນ ກໍຢ່າຊ່ວຍເຂົາເຈົ້າປິດບັງ. (1 ຕີໂມທຽວ 5:22) ຖ້າເຈົ້າຊ່ວຍໝູ່ປິດບັງ ແລ້ວມີເລື່ອງທີ່ບໍ່ດີເກີດຂຶ້ນກັບເຂົາເຈົ້າ ເຈົ້າຈະຮູ້ສຶກແນວໃດ? ເຈົ້າຕ້ອງມີສ່ວນຮັບຜິດຊອບກັບເລື່ອງນີ້ນຳບໍ່ແມ່ນບໍ?
ສົມມຸດວ່າໝູ່ຂອງເຈົ້າເປັນໂລກເບົາຫວານແລະລັກກິນເຂົ້າໜົມຫວານ. ຖ້າເຈົ້າຮູ້ເລື່ອງນີ້ ແຕ່ໝູ່ຂອງເຈົ້າຂໍບໍ່ໃຫ້ບອກໃຜ ເຈົ້າຈະເຮັດເປັນແນວໃດ? ເຈົ້າຈະຊ່ວຍໝູ່ປິດບັງຫຼືຈະຊ່ວຍຊີວິດລາວໂດຍລົງມືເຮັດຫຍັງບາງຢ່າງ?
ຄ້າຍກັນເຈົ້າຕ້ອງຕັດສິນໃຈວ່າຈະເຮັດແນວໃດຖ້າເຈົ້າຮູ້ວ່າໝູ່ກຳລັງລັກຄົບກັບຄົນໜຶ່ງຢູ່. ຢ່າຢ້ານວ່າຈະເສຍໝູ່. ເມື່ອເວລາຜ່ານໄປ ໝູ່ແທ້ຈະຮູ້ວ່າທີ່ເຈົ້າເຮັດແບບນີ້ກໍເພື່ອປະໂຫຍດຂອງລາວ.—ເພງສັນລະເສີນ 141:5
ລັກຄົບຫຼືເລື່ອງສ່ວນໂຕ?
ການທີ່ຄົນໃດຄົນໜຶ່ງຄົບກັນແຕ່ຍັງບໍ່ເປີດເຜີຍ ກໍບໍ່ໄດ້ໝາຍຄວາມວ່າຄົນນັ້ນເວົ້າຕົວະສະເໝີໄປ. ຕົວຢ່າງເຊັ່ນ ບາງຄູ່ຢາກຮູ້ຈັກກັນກ່ອນໄລຍະໜຶ່ງ ແຕ່ກໍບໍ່ຢາກໃຫ້ຫຼາຍຄົນຮູ້ວ່າເຂົາເຈົ້າຄົບກັນ. ຍ້ອນຫຍັງ? ຄືກັບທີ່ໂທມັດບອກ ອາດເປັນຍ້ອນ “ເຂົາເຈົ້າບໍ່ຢາກໃຫ້ໃຜມາຖາມຕະຫຼອດວ່າ ‘ພວກເຈົ້າຊິແຕ່ງດອງກັນມື້ໃດ?’”
ຄວາມກົດດັນຈາກຄົນອື່ນອາດຈະກໍ່ຜົນເສຍຫາຍໄດ້. (ເພງຂອງໂຊໂລໂມນ 2:7) ດັ່ງນັ້ນ ໃນຊ່ວງທີ່ເລີ່ມຄົບກັນ ບາງຄົນຈຶ່ງຕັ້ງໃຈທີ່ຈະບໍ່ບອກໃຫ້ຄົນອື່ນຮູ້. (ສຸພາສິດ 10:19) ແອນນ້າອາຍຸ 20 ປີເວົ້າວ່າ: “ການເຮັດແບບນີ້ຊ່ວຍໃຫ້ທັງສອງຄົນມີເວລາຕັດສິນໃຈວ່າເຂົາເຈົ້າຈະເຂົ້າກັນໄດ້ບໍ່. ຖ້າຄິດວ່າເຂົ້າກັນໄດ້ ກໍຈຶ່ງຈະບອກຄົນອື່ນ.”
ແຕ່ໃນຂະນະດຽວກັນ ເຈົ້າກໍບໍ່ຄວນປິດບັງຈາກຜູ້ທີ່ມີສິດຮູ້ກ່ຽວກັບເລື່ອງນີ້ ເຊັ່ນ ພໍ່ແມ່ຂອງເຈົ້າຫຼືພໍ່ແມ່ຂອງຄົນທີ່ເຈົ້າກຳລັງຄົບຫາ. ແທ້ໆແລ້ວ ຖ້າເຈົ້າບໍ່ຢາກບອກວ່າເຈົ້າມີແຟນ ເຈົ້າກໍຄວນຖາມໂຕເອງວ່າຍ້ອນຫຍັງ. ຫຼືເຈົ້າຮູ້ຢູ່ແລ້ວວ່າຖ້າບອກພໍ່ແມ່ ເຂົາເຈົ້າກໍຄືຊິບໍ່ຍອມໃຫ້ຄົບກັນ?
‘ຂ້ອຍຮູ້ວ່າຂ້ອຍຕ້ອງເຮັດແນວໃດ’
ໃນຕອນຕົ້ນ ເຮົາເວົ້າເຖິງເຈດຊິກ້າທີ່ລັກເປັນແຟນກັບເຈເຣມີ້ ແຕ່ຕໍ່ມາລາວກໍປ່ຽນໃຈຫຼັງຈາກທີ່ໄດ້ລົມກັບພີ່ນ້ອງຄລິດສະຕຽນຄົນໜຶ່ງທີ່ເຄີຍລັກມີແຟນຄືກັນ. ເຈດຊິກ້າເວົ້າວ່າ: “ເມື່ອຂ້ອຍຮູ້ວ່າພີ່ນ້ອງຄົນນັ້ນເລີກກັບແຟນ ຂ້ອຍກໍຮູ້ເລີຍວ່າຂ້ອຍຕ້ອງເຮັດແນວໃດ.” ມັນງ່າຍບໍທີ່ຈະເລີກກັນ? ບໍ່ງ່າຍເລີຍ! ເຈດຊິກ້າບອກວ່າ: “ລາວເປັນຜູ້ຊາຍຄົນດຽວທີ່ຂ້ອຍມັກຫຼາຍແທ້ໆ. ຂ້ອຍຮ້ອງໄຫ້ທຸກມື້ບັກຫຼາຍໆອາທິດ.”
ເຖິງວ່າເຈດຊິກ້າຈະຫຼົງເຮັດສິ່ງທີ່ບໍ່ດີແດ່ ແຕ່ລາວກໍຢາກເຮັດສິ່ງທີ່ຖືກຕ້ອງແທ້ໆຍ້ອນລາວຮັກພະເຢໂຫວາ. ເມື່ອເວລາຜ່ານໄປ ຄວາມເຈັບປວດຈາກການອົກຫັກກໍຄ່ອຍໆຫາຍໄປ. ເຈດຊິກ້າເວົ້າວ່າ: “ຕອນນີ້ ຄວາມສຳພັນຂອງຂ້ອຍກັບພະເຢໂຫວາດີຂຶ້ນກວ່າແຕ່ກ່ອນ. ຂ້ອຍຮູ້ສຶກຂອບໃຈເພິ່ນຫຼາຍແທ້ໆທີ່ຊີ້ນຳຂ້ອຍໃນເວລາທີ່ເໝາະສົມ!”
ຖ້າເຈົ້າພ້ອມທີ່ຈະມີແຟນແລ້ວ ແລະເຈິຄົນທີ່ເຈົ້າມັກແລ້ວ ເຈົ້າຈະຮູ້ໄດ້ແນວໃດວ່າຄົນນີ້ເໝາະກັບເຈົ້າ?
ຂໍ້ຄຳພີຫຼັກ
“ພວກເຮົາຕັ້ງໃຈຈະປະພຶດໂຕສັດຊື່ໃນທຸກເລື່ອງ.”—ເຮັບເຣີ 13:18
ຄຳແນະນຳ
ເຈົ້າບໍ່ຈຳເປັນຕ້ອງປະກາດໃຫ້ທຸກຄົນຮູ້ວ່າເຈົ້າມີແຟນ. ແຕ່ຢ່າງໜ້ອຍເຈົ້າຄວນບອກພໍ່ແມ່ຂອງເຈົ້າ ແລະພໍ່ແມ່ຂອງແຟນ ເພາະເຂົາເຈົ້າມີສິດທີ່ຈະຮູ້.
ເຈົ້າຮູ້ບໍ . . . ?
ເພື່ອຈະຄົບກັນໄດ້ດົນໆຕ້ອງມີຄວາມໄວ້ໃຈກັນ. ການລັກຄົບກັນເຮັດໃຫ້ພໍ່ແມ່ບໍ່ໄວ້ໃຈເຈົ້າ ແລະຍັງທຳລາຍຄວາມສຳພັນຂອງເຈົ້າກັບແຟນນຳ.
ແຜນພາກປະຕິບັດ!
ຖ້າຂ້ອຍກຳລັງລັກຄົບກັບພີ່ນ້ອງຄລິດສະຕຽນ ຂ້ອຍຈະ ․․․․․
ຖ້າໝູ່ຂອງຂ້ອຍລັກມີແຟນ ຂ້ອຍຈະ ․․․․․
ສິ່ງທີ່ຂ້ອຍຢາກຖາມພໍ່ແມ່ກ່ຽວກັບເລື່ອງນີ້ແມ່ນ ․․․․․
ເຈົ້າຄິດແນວໃດ?
● ກັບໄປເບິ່ງສາມສະຖານະການໃນໜ້າທີ 22 ທີ່ເນັ້ນດ້ວຍໂຕເຂັ້ມ. ລອງຄິດເບິ່ງວ່າບາງເທື່ອເຈົ້າຮູ້ສຶກຄືກັບຂໍ້ໃດ?
● ເຈົ້າຈະຈັດການກັບບັນຫານັ້ນແນວໃດໂດຍບໍ່ລັກມີແຟນ?
● ເຈົ້າຈະເຮັດແນວໃດຖ້າເຈົ້າຮູ້ວ່າໝູ່ກຳລັງລັກມີແຟນ ແລະເປັນຫຍັງເຈົ້າຈຶ່ງເລືອກທີ່ຈະເຮັດແບບນັ້ນ?
[ຖ້ອຍຄຳທີ່ຍົກມາໜ້າ 27]
“ຂ້ອຍເລີກກັບຜູ້ຊາຍຄົນນັ້ນແລ້ວ. ທຸກເທື່ອທີ່ເຫັນລາວຢູ່ໂຮງຮຽນ ຂ້ອຍກໍຮູ້ສຶກເຈັບປວດໃຈຫຼາຍ. ແຕ່ຂ້ອຍຮູ້ວ່າພະເຢໂຫວາພະເຈົ້າເຫັນທຸກຢ່າງທີ່ເຮົາເຮັດແລະຮູ້ດີກວ່າເຮົາ ເຮົາຈຶ່ງຕ້ອງໄວ້ໃຈເພິ່ນ.”—ເຈດຊິກ້າ
[ຮູບພາບໜ້າ 25]
ເມື່ອໝູ່ລັກມີແຟນແລ້ວເຮົາຊ່ວຍປິດບັງ ກໍຄືກັບເຮົາຊ່ວຍປິດບັງຄົນທີ່ເປັນເບົາຫວານທີ່ລັກກິນຂອງຫວານ