ບົດຮຽນ 10
ພະເຍຊູເຊື່ອຟັງສະເໝີ
ການຟັງຄວາມພໍ່ແມ່ເປັນເລື່ອງງ່າຍທຸກເທື່ອບໍ?— ບໍ່ງ່າຍໃນບາງຄັ້ງ. ລູກຮູ້ບໍວ່າພະເຍຊູເຊື່ອຟັງທັງພະເຢໂຫວາແລະພໍ່ແມ່ຂອງພະອົງ?— ພະເຍຊູເຮັດໃຫ້ເຫັນວ່າລູກຕ້ອງຟັງຄວາມພໍ່ແມ່ເຖິງວ່າຈະເປັນເລື່ອງທີ່ຍາກກໍຕາມ. ໃຫ້ເຮົາມາເບິ່ງເລື່ອງນີ້ນຳກັນຕື່ມອີກເນາະ.
ກ່ອນຈະມາຢູ່ທີ່ເທິງໂລກ ພະເຍຊູໄດ້ຢູ່ໃນສະຫວັນກັບພະເຢໂຫວາພໍ່ຂອງພະອົງ. ແຕ່ພະເຍຊູກໍມີພໍ່ແມ່ທີ່ຢູ່ເທິງໂລກ. ພໍ່ຂອງພະອົງຊື່ໂຢເຊບແລະແມ່ຊື່ມາລີ. ລູກຮູ້ບໍວ່າເຂົາເຈົ້າມາເປັນພໍ່ແມ່ຂອງພະເຍຊູໄດ້ແນວໃດ?—
ພະເຢໂຫວາໄດ້ຍົກຍ້າຍຊີວິດຂອງພະເຍຊູທີ່ຢູ່ໃນສະຫວັນ ໃຫ້ມາຢູ່ໃນທ້ອງຂອງມາລີ ເພື່ອໃຫ້ພະເຍຊູເກີດເປັນຄົນແລະມີຊີວິດຢູ່ເທິງໂລກ. ເລື່ອງນີ້ເປັນຕາງຶດແທ້ໆ! ພະເຍຊູໄດ້ເຕີບໃຫຍ່ຂຶ້ນໃນທ້ອງຂອງມາລີ ຄືກັບເດັກນ້ອຍຄົນອື່ນໆທີ່ໃຫຍ່ຂຶ້ນໃນທ້ອງຂອງແມ່. ຫຼັງຈາກເກົ້າເດືອນພະເຍຊູກໍເກີດ. ດ້ວຍເຫດນີ້ ມາລີແລະໂຢເຊບຈຶ່ງໄດ້ມາເປັນພໍ່ແມ່ຂອງພະເຍຊູ.
ເມື່ອພະເຍຊູອາຍຸໄດ້ 12 ປີ ພະອົງໄດ້ເຮັດສິ່ງໜຶ່ງທີ່ສະແດງວ່າພະອົງຮັກພະເຢໂຫວາພໍ່ຂອງພະອົງຫຼາຍແທ້ໆ. ເລື່ອງນີ້ເກີດຂຶ້ນຕອນທີ່ຄອບຄົວຂອງພະອົງເດີນທາງໄປທີ່ເມືອງເຢຣຶຊາເລມເພື່ອເຂົ້າຮ່ວມການສະຫຼອງປັດສະຄາ. ແຕ່ໃນຂະນະທີ່ເດີນທາງກັບບ້ານໂຢເຊບແລະມາລີບໍ່ເຫັນພະເຍຊູ. ລູກຮູ້ບໍວ່າພະອົງຢູ່ໃສ?—
ເປັນຫຍັງພະເຍຊູຢູ່ທີ່ວິຫານ
ໂຢເຊບແລະມາລີຈຶ່ງຟ້າວກັບຄືນໄປທີ່ເມືອງເຢຣຶຊາເລມແລະຊອກຫາພະເຍຊູຢູ່ທົ່ວທຸກບ່ອນ. ເພາະບໍ່ເຫັນພະອົງເຂົາເຈົ້າຈຶ່ງກັງວົນຫຼາຍ. ແຕ່ຫຼັງຈາກສາມມື້ ເຂົາເຈົ້າກໍພົບພະອົງຢູ່ທີ່ວິຫານ! ລູກຮູ້ບໍວ່າເປັນຫຍັງພະເຍຊູຈຶ່ງຢູ່ທີ່ວິຫານ?— ເພາະວ່າຢູ່ທີ່ນັ້ນພະອົງສາມາດຮຽນຮູ້ກ່ຽວກັບພະເຢໂຫວາພໍ່ຂອງພະອົງ. ພະເຍຊູຮັກພະເຢໂຫວາແລະພະອົງຕ້ອງການທີ່ຈະຮຽນຮູ້ແລະເຮັດສິ່ງທີ່ຈະເຮັດໃຫ້ພະເຢໂຫວາດີໃຈ. ເຖິງແມ່ນວ່າພະອົງເຕີບໂຕຂຶ້ນແລະເປັນຜູ້ໃຫຍ່ເຕັມທີແລ້ວກໍຕາມ ພະເຍຊູກໍຍັງເຊື່ອຟັງພະເຢໂຫວາສະເໝີ ພະເຍຊູເຊື່ອຟັງແມ່ນແຕ່ເລື່ອງທີ່ຍາກແທ້ໆສຳລັບພະອົງ ແລະເຖິງຂັ້ນວ່າຕ້ອງຖືກທໍລະມານພະອົງກໍຍອມ. ພະເຍຊູໄດ້ເຊື່ອຟັງໂຢເຊບກັບມາລີບໍ?— ເຊື່ອຟັງແທ້ ຄຳພີໄບເບິນບອກແນວນັ້ນ.
ລູກໄດ້ບົດຮຽນຫຍັງຈາກຕົວຢ່າງຂອງພະເຍຊູ?— ລູກຕ້ອງຟັງຄວາມພໍ່ແມ່ສະເໝີເຖິງແມ່ນວ່າເປັນເລື່ອງທີ່ຍາກ. ລູກຈະເປັນຄົນທີ່ຟັງຄວາມພໍ່ແມ່ບໍ?—