-
ການປົກຄອງຂອງພະເຈົ້າແມ່ນຫຍັງ?ຊີວິດທີ່ມີຄວາມສຸກຕະຫຼອດໄປ!—ໄດ້ຮັບປະໂຫຍດຈາກການຮຽນຄຳພີໄບເບິນ
-
-
ບົດທີ 31
ການປົກຄອງຂອງພະເຈົ້າແມ່ນຫຍັງ?
ເລື່ອງສຳຄັນທີ່ສຸດໃນຄຳພີໄບເບິນແມ່ນເລື່ອງການປົກຄອງຂອງພະເຈົ້າ. ພະເຢໂຫວາຈະໃຊ້ການປົກຄອງນີ້ເພື່ອເຮັດໃຫ້ທົ່ວໂລກກາຍເປັນສວນອຸທິຍານຄືກັບທີ່ເພິ່ນຕັ້ງໃຈໄວ້ຕັ້ງແຕ່ທຳອິດ. ການປົກຄອງຂອງພະເຈົ້າແມ່ນຫຍັງ? ເຮົາຮູ້ໄດ້ແນວໃດວ່າການປົກຄອງຂອງພະເຈົ້າກຳລັງປົກຄອງຢູ່ຕອນນີ້? ການປົກຄອງນີ້ເຮັດຫຍັງໄປແດ່ແລ້ວ? ແລະຈະເຮັດຫຍັງອີກໃນອະນາຄົດ? ໃນບົດນີ້ແລະອີກສອງບົດຕໍ່ໄປຈະຕອບຄຳຖາມເຫຼົ່ານີ້.
1. ການປົກຄອງຂອງພະເຈົ້າແມ່ນຫຍັງ ແລະໃຜເປັນກະສັດໃນການປົກຄອງນີ້?
ການປົກຄອງຂອງພະເຈົ້າແມ່ນລັດຖະບານທີ່ພະເຢໂຫວາຕັ້ງຂຶ້ນ. ເພິ່ນແຕ່ງຕັ້ງພະເຢຊູຄລິດໃຫ້ເປັນກະສັດ ແລະລັດຖະບານນີ້ປົກຄອງຈາກສະຫວັນ. (ມັດທາຍ 4:17, ໂຢຮັນ 18:36) ຄຳພີໄບເບິນເວົ້າເຖິງພະເຢຊູວ່າ: ‘ເພິ່ນຈະເປັນກະສັດປົກຄອງ . . . ຕະຫຼອດໄປ.’ (ລູກາ 1:32, 33) ພະເຢຊູເປັນກະສັດໃນການປົກຄອງຂອງພະເຈົ້າ ແລະເພິ່ນຈະປົກຄອງທົ່ວທັງໂລກ.
2. ໃຜຈະປົກຄອງຮ່ວມກັບພະເຢຊູ?
ພະເຢຊູບໍ່ໄດ້ປົກຄອງຜູ້ດຽວ ແຕ່ຍັງມີຄົນອື່ນທີ່ຈະປົກຄອງກັບເພິ່ນນຳ. ເຂົາເຈົ້າມາຈາກ “ທຸກຕະກູນ ທຸກພາສາ ທຸກຊາດ ແລະທຸກປະເທດ . . . ເຂົາເຈົ້າຈະເປັນກະສັດປົກຄອງໂລກ.” (ພະນິມິດ 5:9, 10) ແລ້ວຈະມີຈັກຄົນທີ່ໄປປົກຄອງກັບພະເຢຊູ? ເຖິງວ່າຈະມີຫຼາຍລ້ານຄົນທີ່ເປັນລູກສິດຂອງພະເຢຊູ ແຕ່ມີພຽງ 144.000 ຄົນເທົ່ານັ້ນທີ່ໄດ້ໄປປົກຄອງຮ່ວມກັບເພິ່ນໃນສະຫວັນ. (ອ່ານພະນິມິດ 14:1-4) ສ່ວນລູກສິດຄົນອື່ນໆຈະໄດ້ຢູ່ໃນໂລກນີ້ແລະເປັນປະຊາຊົນໃນການປົກຄອງຂອງພະເຈົ້າ.—ເພງສັນລະເສີນ 37:29
3. ເປັນຫຍັງການປົກຄອງຂອງພະເຈົ້າຈຶ່ງດີກວ່າການປົກຄອງຂອງມະນຸດ?
ເຖິງວ່າຈະມີຜູ້ນຳທີ່ເປັນມະນຸດຫຼາຍຄົນພະຍາຍາມເຮັດສິ່ງທີ່ດີ ແຕ່ເຂົາເຈົ້າກໍບໍ່ມີອຳນາດຫຼາຍພໍທີ່ຈະເຮັດທຸກຢ່າງຕາມທີ່ຕັ້ງໃຈໄວ້ ແລະໃນທີ່ສຸດກໍຈະມີຄົນອື່ນມາປົກຄອງແທນເຂົາເຈົ້າເຊິ່ງຄົນນັ້ນອາດຈະເປັນຄົນເຫັນແກ່ໂຕແລະບໍ່ສົນໃຈປະຊາຊົນ. ແຕ່ຜູ້ນຳໃນການປົກຄອງຂອງພະເຈົ້າບໍ່ໄດ້ເປັນແບບນັ້ນ ພະເຢຊູຈະປົກຄອງໂດຍບໍ່ມີໃຜມາຍາດອຳນາດໄປຈາກເພິ່ນໄດ້. ຄຳພີໄບເບິນບອກວ່າພະເຈົ້າ “ຕັ້ງການປົກຄອງໜຶ່ງຂຶ້ນ ເຊິ່ງຈະບໍ່ຖືກທຳລາຍຈັກເທື່ອ.” (ດານີເອນ 2:44) ພະເຢຊູຈະປົກຄອງທົ່ວທັງໂລກ ແລະເພິ່ນຈະເບິ່ງແຍງປະຊາຊົນຢ່າງທົ່ວເຖິງແລະເທົ່າທຽມກັນ. ເພິ່ນເປັນຜູ້ນຳທີ່ມີຄວາມເມດຕາ ຮັກຜູ້ຄົນ ແລະມີຄວາມຍຸຕິທຳ ແລະເພິ່ນຢາກສອນປະຊາຊົນຂອງເພິ່ນໃຫ້ຮັກກັນ ຊ່ວຍເຫຼືອກັນ ແລະເປັນຄົນບໍ່ລຳອຽງ.—ອ່ານເອຊາຢາ 11:9
ຮຽນຮູ້ຫຼາຍຂຶ້ນ
ມາເບິ່ງວ່າການປົກຄອງຂອງພະເຈົ້າດີກວ່າການປົກຄອງຂອງມະນຸດແນວໃດແດ່.
4. ການປົກຄອງຂອງພະເຈົ້າຈະປົກຄອງທົ່ວໂລກ
ພະເຢຊູມີອຳນາດທີ່ຈະປົກຄອງຫຼາຍກວ່າຜູ້ນຳທີ່ເປັນມະນຸດທຸກຄົນທີ່ເຄີຍປົກຄອງມາ. ອ່ານມັດທາຍ 28:18 ແລ້ວລົມກັນກ່ຽວກັບຄຳຖາມຕໍ່ໄປນີ້:
ເປັນຫຍັງອຳນາດການປົກຄອງຂອງພະເຢຊູຈຶ່ງເໜືອກວ່າອຳນາດຂອງຜູ້ນຳທີ່ເປັນມະນຸດ?
ການປົກຄອງຂອງມະນຸດບໍ່ມີຄວາມໝັ້ນຄົງ ປະເທດຕ່າງໆມີການປ່ຽນລັດຖະບານເລື້ອຍໆ ແລະແຕ່ລະລັດຖະບານກໍມີອຳນາດທີ່ຈະປົກຄອງພຽງແຕ່ປະເທດຂອງໂຕເອງເທົ່ານັ້ນ. ແລ້ວການປົກຄອງຂອງພະເຈົ້າເດເປັນແນວໃດ? ອ່ານດານີເອນ 7:14 ແລ້ວລົມກັນກ່ຽວກັບຄຳຖາມຕໍ່ໄປນີ້:
ເຈົ້າຄິດວ່າເປັນຫຍັງຈຶ່ງດີທີ່ການປົກຄອງຂອງພະເຈົ້າ “ຈະບໍ່ຖືກໂຄ່ນລົ້ມຈັກເທື່ອ”?
ເຈົ້າຄິດວ່າເປັນຫຍັງຈຶ່ງດີທີ່ການປົກຄອງຂອງພະເຈົ້າຈະປົກຄອງທົ່ວໂລກ?
5. ການປົກຄອງຂອງພະເຈົ້າຈະມາແທນການປົກຄອງຂອງມະນຸດ
ເປັນຫຍັງການປົກຄອງຂອງພະເຈົ້າຕ້ອງມາແທນທີ່ການປົກຄອງຂອງມະນຸດ? ເປີດວິດີໂອ ແລ້ວລົມກັນກ່ຽວກັບຄຳຖາມຕໍ່ໄປນີ້:
ຜົນເປັນແນວໃດເມື່ອລັດຖະບານຂອງມະນຸດປົກຄອງ?
ອ່ານປັນຍາຈານ 8:9 ແລ້ວລົມກັນກ່ຽວກັບຄຳຖາມຕໍ່ໄປນີ້:
ເຈົ້າຄິດວ່າດີບໍທີ່ການປົກຄອງຂອງພະເຈົ້າຈະມາແທນທີ່ການປົກຄອງຂອງມະນຸດ? ເປັນຫຍັງເຈົ້າຈຶ່ງຄິດແບບນັ້ນ?
6. ການປົກຄອງຂອງພະເຈົ້າມີຜູ້ນຳທີ່ເຂົ້າໃຈພວກເຮົາ
ພະເຢຊູເຊິ່ງເປັນກະສັດທີ່ພະເຈົ້າແຕ່ງຕັ້ງ “ເຫັນອົກເຫັນໃຈໃນຄວາມອ່ອນແອຂອງພວກເຮົາ” ເພາະເພິ່ນເຄີຍເປັນມະນຸດມາກ່ອນ. (ເຮັບເຣີ 4:15) ຄລິດສະຕຽນທີ່ສັດຊື່ 144.000 ຄົນທັງຜູ້ຊາຍແລະຜູ້ຍິງທີ່ພະເຢໂຫວາເລືອກໃຫ້ໄປປົກຄອງກັບພະເຢຊູກໍມາຈາກ “ທຸກຕະກູນ ທຸກພາສາ ທຸກຊາດ ແລະທຸກປະເທດ.”—ພະນິມິດ 5:9
ເຈົ້າຄິດວ່າດີບໍທີ່ພະເຢຊູແລະທຸກຄົນທີ່ປົກຄອງກັບເພິ່ນເຄີຍເປັນມະນຸດຄືເຮົາ? ເປັນຫຍັງເຈົ້າຈຶ່ງຄິດແບບນັ້ນ?
ພະເຢໂຫວາເລືອກຜູ້ຊາຍແລະຜູ້ຍິງຈາກພູມຫຼັງທີ່ແຕກຕ່າງກັນໃຫ້ມາປົກຄອງຮ່ວມກັບພະເຢຊູ.
7. ກົດໝາຍຂອງການປົກຄອງຂອງພະເຈົ້າດີກວ່າຂອງມະນຸດ
ປົກກະຕິແລ້ວລັດຖະບານຈະມີກົດໝາຍເພື່ອເບິ່ງແຍງແລະປົກປ້ອງປະຊາຊົນ. ການປົກຄອງຂອງພະເຈົ້າກໍມີກົດໝາຍທີ່ປະຊາຊົນຕ້ອງເຮັດຕາມ. ອ່ານ 1 ໂກຣິນໂທ 6:9-11 ແລ້ວລົມກັນກ່ຽວກັບຄຳຖາມຕໍ່ໄປນີ້:
ເຈົ້າຄິດວ່າໂລກຈະເປັນແນວໃດຖ້າທຸກຄົນເຮັດຕາມກົດໝາຍຂອງພະເຈົ້າ?a
ເຈົ້າຄິດວ່າພະເຢໂຫວາມີສິດທີ່ຈະບອກໃຫ້ປະຊາຊົນທີ່ຢູ່ພາຍໃຕ້ການປົກຄອງຂອງເພິ່ນເຮັດຕາມກົດໝາຍຂອງເພິ່ນບໍ? ເປັນຫຍັງເຈົ້າຈຶ່ງຄິດແບບນັ້ນ?
ເຮົາຮູ້ໄດ້ແນວໃດວ່າຄົນເຮົາສາມາດປ່ຽນແປງໂຕເອງແລະມາເຮັດຕາມກົດໝາຍຂອງພະເຈົ້າໄດ້?—ເບິ່ງຂໍ້ 11
ປົກກະຕິແລ້ວລັດຖະບານຈະມີກົດໝາຍເພື່ອເບິ່ງແຍງແລະປົກປ້ອງປະຊາຊົນ. ການປົກຄອງຂອງພະເຈົ້າກໍມີກົດໝາຍເພື່ອເບິ່ງແຍງແລະປົກປ້ອງປະຊາຊົນຄືກັນ ແລະກົດໝາຍຂອງພະເຈົ້າດີກວ່າກົດໝາຍຂອງມະນຸດ.
ບາງຄົນອາດຖາມວ່າ: “ການປົກຄອງຂອງພະເຈົ້າແມ່ນຫຍັງ?”
ຖ້າມີຄົນຖາມແບບນີ້ ເຈົ້າຈະຕອບແນວໃດ?
ສະຫຼຸບ
ການປົກຄອງຂອງພະເຈົ້າເປັນລັດຖະບານແທ້ໆທີ່ຢູ່ໃນສະຫວັນແລະຈະປົກຄອງທົ່ວທັງໂລກ.
ຄຳຖາມທົບທວນ
ໃຜແດ່ເປັນຜູ້ປົກຄອງໃນການປົກຄອງຂອງພະເຈົ້າ?
ເປັນຫຍັງການປົກຄອງຂອງພະເຈົ້າຈຶ່ງດີກວ່າການປົກຄອງຂອງມະນຸດ?
ພະເຢໂຫວາຢາກໃຫ້ປະຊາຊົນທີ່ຢູ່ພາຍໃຕ້ການປົກຄອງຂອງເພິ່ນເຮັດຫຍັງ?
ເບິ່ງເພີ່ມເຕີມ
ພະເຢຊູບອກວ່າການປົກຄອງຂອງພະເຈົ້າຢູ່ໃສ.
“ການປົກຄອງຂອງພະເຈົ້າເປັນພຽງແຕ່ສິ່ງທີ່ຢູ່ໃນໃຈເຮົາບໍ?” (ບົດຄວາມໃນເວັບໄຊ)
ເປັນຫຍັງພະຍານພະເຢໂຫວາຈຶ່ງເຊື່ອຟັງການປົກຄອງຂອງພະເຈົ້າຫຼາຍກວ່າເຊື່ອຟັງການປົກຄອງຂອງມະນຸດ?
ຄຳພີໄບເບິນບອກຫຍັງກ່ຽວກັບ 144.000 ຄົນທີ່ພະເຢໂຫວາເລືອກໃຫ້ໄປປົກຄອງກັບພະເຢຊູ?
ອັນໃດເຮັດໃຫ້ຜູ້ຍິງຄົນໜຶ່ງທີ່ຕິດຄຸກໝັ້ນໃຈວ່າພະເຈົ້າເທົ່ານັ້ນທີ່ຈະເຮັດໃຫ້ໂລກນີ້ມີຄວາມຍຸຕິທຳ?
“ຂ້ອຍເຂົ້າໃຈແລ້ວວ່າຈະແກ້ໄຂຄວາມບໍ່ຍຸຕິທຳໄດ້ແນວໃດ” (ຕື່ນເຖີດ! ເດືອນພະຈິກ ປີ 2011)
-
-
ການປົກຄອງຂອງພະເຈົ້າປົກຄອງແລ້ວ!ຊີວິດທີ່ມີຄວາມສຸກຕະຫຼອດໄປ!—ໄດ້ຮັບປະໂຫຍດຈາກການຮຽນຄຳພີໄບເບິນ
-
-
ບົດທີ 32
ການປົກຄອງຂອງພະເຈົ້າປົກຄອງແລ້ວ!
ການປົກຄອງຂອງພະເຈົ້າເລີ່ມປົກຄອງໃນສະຫວັນໃນປີ ຄ.ສ 1914 ແລະໃນເວລາດຽວກັນ ການປົກຄອງຂອງມະນຸດກໍມາເຖິງໄລຍະສຸດທ້າຍ. ແຕ່ເຮົາຮູ້ໄດ້ແນວໃດ? ເຮົາຮູ້ເລື່ອງນີ້ໄດ້ຈາກຄຳພະຍາກອນໃນຄຳພີໄບເບິນ ສິ່ງຕ່າງໆທີ່ເກີດຂຶ້ນໃນໂລກ ແລະນິດໄສຂອງຜູ້ຄົນຕັ້ງແຕ່ປີ ຄ.ສ 1914.
1. ຄຳພະຍາກອນໃນຄຳພີໄບເບິນບອກໃຫ້ເຮົາຮູ້ຫຍັງ?
ຄຳພີໄບເບິນບອກໄວ້ໃນປຶ້ມດານີເອນວ່າການປົກຄອງຂອງພະເຈົ້າຈະເລີ່ມປົກຄອງເມື່ອໄລຍະເວລາທີ່ເອີ້ນວ່າ “7 ປີ” ສິ້ນສຸດລົງ. (ດານີເອນ 4:16, 17) ຫຼາຍຮ້ອຍປີຫຼັງຈາກສະໄໝຂອງດານີເອນ ຕອນທີ່ພະເຢຊູຢູ່ໃນໂລກເພິ່ນເອີ້ນໄລຍະເວລາ “7 ປີ” ວ່າ “ເວລາຂອງຄົນຕ່າງຊາດ” ແລະເພິ່ນບອກອີກວ່າໄລຍະເວລານັ້ນຍັງບໍ່ສິ້ນສຸດລົງ. (ລູກາ 21:24) ໃນບົດນີ້ເຮົາຈະໄດ້ຮູ້ວ່າໄລຍະເວລາ “7 ປີ” ໄດ້ຈົບລົງແລ້ວໃນປີ ຄ.ສ 1914.
2. ຕັ້ງແຕ່ປີ 1914 ມີຫຍັງເກີດຂຶ້ນແດ່ແລະນິດໄສຂອງຜູ້ຄົນເປັນແນວໃດ?
ພວກລູກສິດຂອງພະເຢຊູຖາມເພິ່ນວ່າ: “ຈະມີຫຍັງເປັນສັນຍານບອກໃຫ້ຮູ້ວ່າທ່ານກັບມາແລະບອກໃຫ້ຮູ້ວ່າພວກເຮົາຢູ່ໃນສະໄໝສຸດທ້າຍຂອງໂລກນີ້?” (ມັດທາຍ 24:3) ພະເຢຊູຕອບພວກລູກສິດວ່າ ຫຼັງຈາກທີ່ເພິ່ນປົກຄອງເປັນກະສັດໃນການປົກຄອງຂອງພະເຈົ້າທີ່ຢູ່ໃນສະຫວັນຈະມີຫຼາຍຢ່າງເກີດຂຶ້ນ ເຊັ່ນ ສົງຄາມ ການຂາດແຄນອາຫານ ແລະແຜ່ນດິນໄຫວ. (ອ່ານມັດທາຍ 24:7) ຄຳພີໄບເບິນບອກລ່ວງໜ້າອີກວ່າ ນິດໄສຂອງຜູ້ຄົນໃນ “ສະໄໝສຸດທ້າຍ” ຈະເຮັດໃຫ້ມີແຕ່ “ຄວາມຫຍຸ້ງຍາກລຳບາກ.” (2 ຕີໂມທຽວ 3:1-5) ເຫດການຕ່າງໆທີ່ເກີດຂຶ້ນໃນໂລກແລະນິດໄສຂອງຜູ້ຄົນກໍເປັນແບບນັ້ນແທ້ໆຕັ້ງແຕ່ປີ 1914.
3. ຫຼັງຈາກທີ່ການປົກຄອງຂອງພະເຈົ້າເລີ່ມປົກຄອງ ເປັນຫຍັງສະພາບການໃນໂລກຈຶ່ງຮ້າຍແຮງຂຶ້ນ?
ບໍ່ດົນຫຼັງຈາກທີ່ພະເຢຊູເປັນກະສັດໃນການປົກຄອງຂອງພະເຈົ້າ ເພິ່ນກໍເຮັດສົງຄາມໃນສະຫວັນກັບຊາຕານແລະພວກປີສາດ. ແລ້ວຝ່າຍຊາຕານກໍແພ້. ຄຳພີໄບເບິນບອກວ່າ ‘ຊາຕານຖືກຖິ້ມລົງມາໃນໂລກ ແລະທູດສະຫວັນທີ່ຢູ່ຝ່າຍມັນກໍຖືກຖິ້ມລົງມາຄືກັນ.’ (ພະນິມິດ 12:9, 10, 12) ຊາຕານໃຈຮ້າຍຫຼາຍເພາະມັນຮູ້ວ່າອີກບໍ່ດົນມັນຈະຖືກທຳລາຍ. ມັນເລີຍເຮັດໃຫ້ຜູ້ຄົນໃນໂລກຕ້ອງເຈິກັບຄວາມທຸກແລະຄວາມເຈັບປວດ. ນີ້ເຮັດໃຫ້ເຮົາເຂົ້າໃຈວ່າເປັນຫຍັງສະພາບການໃນໂລກຈຶ່ງຮ້າຍແຮງຂຶ້ນຂະໜາດນີ້! ແຕ່ການປົກຄອງຂອງພະເຈົ້າຈະເຮັດໃຫ້ບັນຫາທຸກຢ່າງໝົດໄປ.
ຮຽນຮູ້ຫຼາຍຂຶ້ນ
ເປັນຫຍັງເຮົາຈຶ່ງຮູ້ວ່າການປົກຄອງຂອງພະເຈົ້າເລີ່ມປົກຄອງໃນປີ 1914 ແລະເຮົາຢາກຈະເຮັດຫຍັງເມື່ອຮູ້ເລື່ອງນີ້.
4. ການຄິດໄລ່ເວລາຈາກສິ່ງທີ່ຄຳພີໄບເບິນບອກເຮັດໃຫ້ເຮົາຮູ້ວ່າການປົກຄອງຂອງພະເຈົ້າເລີ່ມປົກຄອງແລ້ວໃນປີ 1914
ພະເຈົ້າເຮັດໃຫ້ເນບູກາດເນັດຊາກະສັດຂອງບາບີໂລນຝັນເຫັນສິ່ງທີ່ຈະເກີດຂຶ້ນໃນອະນາຄົດ. ດານີເອນອະທິບາຍວ່າ ຄວາມຝັນນີ້ກ່ຽວຂ້ອງກັບການປົກຄອງຂອງກະສັດເນບູກາດເນັດຊາແລະກ່ຽວຂ້ອງກັບການປົກຄອງຂອງພະເຈົ້ານຳ.—ອ່ານດານີເອນ 4:17a
ອ່ານດານີເອນ 4:20-26 ແລ້ວເບິ່ງແຜນວາດເພື່ອຕອບຄຳຖາມຕໍ່ໄປນີ້:
(ກ) ກະສັດເນບູກາດເນັດຊາຝັນເຫັນຫຍັງ?—ເບິ່ງຂໍ້ 20 ແລະ 21
(ຂ) ເກີດຫຍັງຂຶ້ນກັບຕົ້ນໄມ້?—ເບິ່ງຂໍ້ 23
(ຄ) ເກີດຫຍັງຂຶ້ນຫຼັງຈາກ “7 ປີ” ສິ້ນສຸດລົງ?—ເບິ່ງຂໍ້ 26
ຕົ້ນໄມ້ໃນຄວາມຝັນກ່ຽວຂ້ອງກັບການປົກຄອງຂອງພະເຈົ້າແນວໃດ
ຄຳພະຍາກອນ (ດານີເອນ 4:20-36)
ການປົກຄອງ
(ກ) ຕົ້ນໄມ້ໃຫຍ່
ການປົກຄອງສິ້ນສຸດລົງ
(ຂ) ‘ຕັດຕົ້ນໄມ້ໃຫ້ລົ້ມລົງ’ ແລະປ່ອຍໄວ້ “ຈົນຮອດ 7 ປີ”
ເລີ່ມການປົກຄອງອີກເທື່ອໜຶ່ງ
(ຄ) “ທ່ານກໍຈະໄດ້ອານາຈັກຄືນມາ”
ຄຳພະຍາກອນເກີດຂຶ້ນແທ້ເທື່ອທຳອິດ . . .
(ງ) ຕົ້ນໄມ້ໝາຍເຖິງໃຜ?—ເບິ່ງຂໍ້ 22
(ຈ) ການປົກຄອງຂອງກະສັດເນບູກາດເນັດຊາສິ້ນສຸດລົງແນວໃດ?—ອ່ານດານີເອນ 4:29-33
(ສ) ເກີດຫຍັງຂຶ້ນກັບກະສັດເນບູກາດເນັດຊາຫຼັງຈາກຄົບ “7 ປີ”?—ອ່ານດານີເອນ 4:34-36
ຄຳພະຍາກອນເກີດຂຶ້ນແທ້ເທື່ອທຳອິດ
ການປົກຄອງ
(ງ) ເນບູກາດເນັດຊາກະສັດຂອງບາບີໂລນ
ການປົກຄອງສິ້ນສຸດລົງ
(ຈ) ຫຼັງຈາກປີ 606 ກ່ອນ ຄ.ສ ກະສັດເນບູກາດເນັດຊາເສຍສະຕິແລະບໍ່ສາມາດປົກຄອງໄດ້ເປັນເວລາ 7 ປີ
ເລີ່ມການປົກຄອງອີກເທື່ອໜຶ່ງ
(ສ) ກະສັດເນບູກາດເນັດຊາກັບມາເປັນປົກກະຕິແລະປົກຄອງອີກເທື່ອໜຶ່ງ
ຄຳພະຍາກອນເກີດຂຶ້ນແທ້ເທື່ອທີສອງເຊິ່ງຍິ່ງໃຫຍ່ກວ່າ . . .
(ຊ) ຕົ້ນໄມ້ໝາຍເຖິງໃຜ?—ອ່ານ 1 ຂ່າວຄາວ 29:23
(ຍ) ການປົກຄອງຂອງກະສັດຄົນອິດສະຣາເອນທີ່ເປັນຕົວແທນຂອງພະເຈົ້າສິ້ນສຸດລົງຕອນໃດ? ເຮົາຮູ້ໄດ້ແນວໃດວ່າຕອນທີ່ພະເຢຊູຢູ່ໃນໂລກກໍບໍ່ມີການປົກຄອງຂອງກະສັດຄົນອິດສະຣາເອນທີ່ເປັນຕົວແທນຂອງພະເຈົ້າ?—ອ່ານລູກາ 21:24
(ດ) ພະເຢຊູເລີ່ມປົກຄອງໃນການປົກຄອງຂອງພະເຈົ້າຕອນໃດແລະເພິ່ນຈະປົກຄອງຈາກໃສ?
ຄຳພະຍາກອນເກີດຂຶ້ນແທ້ເທື່ອທີສອງເຊິ່ງຍິ່ງໃຫຍ່ກວ່າ
ການປົກຄອງ
(ຊ) ກະສັດອິດສະຣາເອນທີ່ເປັນຕົວແທນຂອງພະເຈົ້າ
ການປົກຄອງສິ້ນສຸດລົງ
(ຍ) ເມືອງເຢຣູຊາເລັມຖືກທຳລາຍ ບໍ່ມີເຊື້ອສາຍກະສັດຄົນອິດສະຣາເອນປົກຄອງເປັນເວລາ 2.520 ປີ
ເລີ່ມການປົກຄອງອີກເທື່ອໜຶ່ງ
(ດ) ພະເຢຊູເລີ່ມປົກຄອງເປັນກະສັດໃນການປົກຄອງຂອງພະເຈົ້າທີ່ຢູ່ໃນສະຫວັນ
ໄລຍະເວລາ 7 ປີດົນປານໃດ?
ຂໍ້ຄຳພີບາງຂໍ້ຈະຊ່ວຍໃຫ້ເຮົາເຂົ້າໃຈຂໍ້ຄຳພີອື່ນໆຫຼາຍຂຶ້ນ. ຕົວຢາງເຊັ່ນ ປຶ້ມພະນິມິດບອກວ່າສາມປີເຄິ່ງເທົ່າກັບ 1.260 ມື້. (ພະນິມິດ 12:6, 14) ດັ່ງນັ້ນ ເຈັດປີຈຶ່ງເປັນສອງເທົ່າຂອງສາມປີເຄິ່ງຈະເທົ່າກັບ 2.520 ມື້. ໃນຄຳພີໄບເບິນບາງເທື່ອຄຳວ່າ “ມື້” ໝາຍເຖິງ “ປີ.” (ເອເຊກຽນ 4:6) ເພາະສະນັ້ນ ໄລຍະເວລາ “7 ປີ” ທີ່ເວົ້າເຖິງໃນປຶ້ມດານີເອນກໍຕ້ອງເທົ່າກັບ 2.520 ປີ.
5. ໂລກປ່ຽນໄປຕັ້ງແຕ່ປີ 1914
ພະເຢຊູບອກລ່ວງໜ້າວ່າໂລກຈະເປັນແນວໃດຫຼັງຈາກທີ່ເພິ່ນເປັນກະສັດ.ອ່ານລູກາ 21:9-11 ແລ້ວລົມກັນກ່ຽວກັບຄຳຖາມຕໍ່ໄປນີ້:
ຈາກຂໍ້ຄຳພີທີ່ອ່ານໄປ ມີເຫດການຫຍັງແດ່ທີ່ເຈົ້າໄດ້ເຫັນຫຼືເຄີຍໄດ້ຍິນ?
ອັກຄະສາວົກໂປໂລບອກວ່າ ໃນໄລຍະສຸດທ້າຍຂອງການປົກຄອງຂອງມະນຸດ ຜູ້ຄົນຈະມີນິດໄສແນວໃດ. ອ່ານ 2 ຕີໂມທຽວ 3:1-5 ແລ້ວລົມກັນກ່ຽວກັບຄຳຖາມຕໍ່ໄປນີ້:
ເຈົ້າເຫັນວ່າຜູ້ຄົນໃນທຸກມື້ນີ້ມີນິດໄສແນວໃດແດ່?
6. ເຮົາຢາກຈະເຮັດຫຍັງເມື່ອຮູ້ວ່າການປົກຄອງຂອງພະເຈົ້າປົກຄອງແລ້ວ?
ອ່ານມັດທາຍ 24:3, 14 ແລ້ວລົມກັນກ່ຽວກັບຄຳຖາມຕໍ່ໄປນີ້:
ມີການເຮັດວຽກສຳຄັນຫຍັງທີ່ເຮັດໃຫ້ຮູ້ວ່າການປົກຄອງຂອງພະເຈົ້າປົກຄອງແລ້ວ?
ເຈົ້າຈະມີສ່ວນຮ່ວມໃນວຽກນີ້ໄດ້ແນວໃດ?
ການປົກຄອງຂອງພະເຈົ້າປົກຄອງໃນສະຫວັນແລ້ວ ແລະອີກບໍ່ດົນການປົກຄອງນີ້ຈະປົກຄອງທົ່ວທັງໂລກ. ອ່ານເຮັບເຣີ 10:24, 25 ແລ້ວລົມກັນກ່ຽວກັບຄຳຖາມຕໍ່ໄປນີ້:
ເຮົາທຸກຄົນຄວນເຮັດຫຍັງເມື່ອ “ເຫັນວ່າວັນນັ້ນໃກ້ຈະມາຮອດແລ້ວ”?
ຖ້າເຈົ້າຮູ້ຫຍັງບາງຢ່າງທີ່ເປັນປະໂຫຍດແລະອາດຈະຊ່ວຍຊີວິດຄົນອື່ນໄດ້ເຈົ້າຢາກຈະເຮັດຫຍັງ?
ບາງຄົນອາດຖາມວ່າ: “ເປັນຫຍັງພະຍານພະເຢໂຫວາຈຶ່ງບອກວ່າປີ 1914 ເປັນປີທີ່ສຳຄັນ?”
ຖ້າມີຄົນຖາມແບບນີ້ ເຈົ້າຈະຕອບແນວໃດ?
ສະຫຼຸບ
ຄຳພະຍາກອນໃນຄຳພີໄບເບິນ ການຄິດໄລ່ເວລາຈາກສິ່ງທີ່ຄຳພີໄບເບິນບອກ ແລະເຫດການຕ່າງໆທີ່ເກີດຂຶ້ນເຮັດໃຫ້ໝັ້ນໃຈວ່າການປົກຄອງຂອງພະເຈົ້າປົກຄອງແລ້ວ. ເຮົາເຊື່ອວ່າການປົກຄອງຂອງພະເຈົ້າປົກຄອງແລ້ວ ເຮົາເລີຍປະກາດເລື່ອງການປົກຄອງຂອງເພິ່ນແລະເຂົ້າຮ່ວມປະຊຸມເປັນປະຈຳ.
ຄຳຖາມທົບທວນ
ປຶ້ມດານີເອນບອກລ່ວງໜ້າວ່າຈະເກີດຫຍັງຂຶ້ນຫຼັງຈາກ “7 ປີ” ສິ້ນສຸດລົງ?
ອັນໃດເຮັດໃຫ້ເຈົ້າໝັ້ນໃຈວ່າການປົກຄອງຂອງພະເຈົ້າເລີ່ມປົກຄອງໃນປີ 1914?
ເຈົ້າຈະເຮັດຫຍັງເພື່ອສະແດງໃຫ້ເຫັນວ່າ ເຈົ້າເຊື່ອວ່າການປົກຄອງຂອງພະເຈົ້າປົກຄອງແລ້ວໃນຕອນນີ້?
ເບິ່ງເພີ່ມເຕີມ
ນັກປະຫວັດສາດແລະຄົນອື່ນໆບອກວ່າໂລກປ່ຽນໄປແນວໃດຕັ້ງແຕ່ປີ 1914.
“ເມື່ອສິນລະທຳເສື່ອມລົງຢ່າງໜ້າຕົກໃຈ” (ຕື່ນເຖີດ! ເດືອນເມສາ ປີ 2007)
ຄຳພະຍາກອນໃນມັດທາຍ 24:14 ປ່ຽນຊີວິດຂອງຜູ້ຊາຍຄົນໜຶ່ງແນວໃດ.
“ຂ້ອຍຮັກເບດສ໌ບອນຫຼາຍກວ່າທຸກສິ່ງ!” (ຫໍສັງເກດການສະບັບທີ 3 ປີ 2017)
ເຮົາຮູ້ໄດ້ແນວໃດວ່າຄຳພະຍາກອນໃນດານີເອນບົດ 4 ກ່ຽວຂ້ອງກັບການປົກຄອງຂອງພະເຈົ້າ?
“ການປົກຄອງຂອງພະເຈົ້າເລີ່ມປົກຄອງເມື່ອໃດ? (ຕອນ 1)” (ຫໍສັງເກດການ 1 ຕຸລາ 2014)
ອັນໃດເຮັດໃຫ້ຮູ້ວ່າ “7 ປີ” ທີ່ເວົ້າເຖິງໃນດານີເອນບົດ 4 ສິ້ນສຸດລົງໃນປີ 1914?
“ການປົກຄອງຂອງພະເຈົ້າເລີ່ມປົກຄອງເມື່ອໃດ? (ຕອນ 2)” (ຫໍສັງເກດການ 1 ພະຈິກ 2014)
a ເບິ່ງສອງບົດຄວາມສຸດທ້າຍໃນສ່ວນເບິ່ງເພີ່ມເຕີມຂອງບົດນີ້.
-
-
ການປົກຄອງຂອງພະເຈົ້າຈະເຮັດຫຍັງໃນອະນາຄົດຊີວິດທີ່ມີຄວາມສຸກຕະຫຼອດໄປ!—ໄດ້ຮັບປະໂຫຍດຈາກການຮຽນຄຳພີໄບເບິນ
-
-
ບົດທີ 33
ການປົກຄອງຂອງພະເຈົ້າຈະເຮັດຫຍັງໃນອະນາຄົດ?
ການປົກຄອງຂອງພະເຈົ້າປົກຄອງໃນສະຫວັນແລ້ວ. ອີກບໍ່ດົນການປົກຄອງນີ້ຈະປົກຄອງທົ່ວທັງໂລກແລະປ່ຽນແປງໂລກຂອງເຮົາໃຫ້ດີຂຶ້ນ. ໃຫ້ເຮົາມາເບິ່ງນຳກັນວ່າ ເຮົາຈະໄດ້ເຫັນສິ່ງດີໆຫຍັງເກີດຂຶ້ນແດ່ເມື່ອການປົກຄອງຂອງພະເຈົ້າປົກຄອງໂລກນີ້.
1. ການປົກຄອງຂອງພະເຈົ້າຈະເຮັດໃຫ້ໂລກນີ້ສະຫງົບສຸກແລະມີຄວາມຍຸຕິທຳໄດ້ແນວໃດ?
ພະເຢຊູທີ່ເປັນກະສັດໃນການປົກຄອງຂອງພະເຈົ້າຊິກຳຈັດຄົນຊົ່ວແລະລັດຖະບານຕ່າງໆໃນສົງຄາມອາມາເຄໂດນ. (ພະນິມິດ 16:14, 16) ໃນຕອນນັ້ນ ຄຳສັນຍາໃນຄຳພີໄບເບິນທີ່ບອກວ່າ: “ອີກຈັກໜ້ອຍກໍຈະບໍ່ມີຄົນຊົ່ວແລ້ວ” ຈະເກີດຂຶ້ນແທ້. (ເພງສັນລະເສີນ 37:10) ພະເຢຊູທີ່ເປັນກະສັດຂອງການປົກຄອງນີ້ຈະເຮັດໃຫ້ທົ່ວທັງໂລກມີແຕ່ຄວາມສະຫງົບສຸກແລະຄວາມຍຸຕິທຳ.—ອ່ານເອຊາຢາ 11:4
2. ເມື່ອໂລກເປັນແບບທີ່ພະເຈົ້າຕັ້ງໃຈໄວ້ຕັ້ງແຕ່ທຳອິດ ຊີວິດຂອງເຮົາຈະເປັນແນວໃດ?
ເມື່ອການປົກຄອງຂອງພະເຈົ້າປົກຄອງ ໃນຕອນນັ້ນ “ຄົນທີ່ເຮັດສິ່ງທີ່ຖືກຕ້ອງຈະໄດ້ຮັບແຜ່ນດິນເປັນມໍລະດົກ ແລະເຂົາເຈົ້າຈະໄດ້ຢູ່ຫັ້ນຕະຫຼອດໄປ.” (ເພງສັນລະເສີນ 37:29) ລອງຄິດເບິ່ງວ່າເຈົ້າຈະມີຄວາມສຸກສ່ຳໃດທີ່ໄດ້ຢູ່ໃນໂລກທີ່ທຸກຄົນເປັນຄົນດີ ຮັກກັນ ແລະຮັກພະເຢໂຫວາ! ບໍ່ມີໃຜຕ້ອງເຈັບປ່ວຍ ແລະທຸກຄົນຈະມີຊີວິດຕະຫຼອດໄປ.
3. ການປົກຄອງຂອງພະເຈົ້າຈະເຮັດຫຍັງຫຼັງຈາກທີ່ຄົນຊົ່ວຖືກທຳລາຍແລ້ວ?
ຫຼັງຈາກທີ່ຄົນຊົ່ວຖືກທຳລາຍ ພະເຢຊູຈະປົກຄອງເປັນກະສັດ 1.000 ປີ. ໃນໄລຍະເວລານັ້ນ ພະເຢຊູກັບ 144.000 ຄົນທີ່ປົກຄອງກັບເພິ່ນຈະຊ່ວຍໃຫ້ທຸກຄົນທີ່ຢູ່ໃນໂລກກັບມາເປັນມະນຸດທີ່ສົມບູນແບບ. ເມື່ອຄົບ 1.000 ປີ ທົ່ວທັງໂລກຈະເປັນສວນອຸທິຍານທີ່ສວຍງາມ ແລະທຸກຄົນຈະມີຄວາມສຸກເພາະເຂົາເຈົ້າເຊື່ອຟັງກົດໝາຍຂອງພະເຢໂຫວາ. ແລ້ວພະເຢຊູກໍຈະຄືນການປົກຄອງທີ່ເພິ່ນປົກຄອງໃຫ້ພະເຢໂຫວາພໍ່ຂອງເພິ່ນ. ໃນທີ່ສຸດ ຊື່ຂອງພະເຢໂຫວາຈະ “ໄດ້ຮັບຄວາມນັບຖືຫຼາຍທີ່ສຸດຕະຫຼອດໄປ.” (ມັດທາຍ 6:9, 10) ທຸກຄົນຈະໄດ້ເຫັນວ່າພະເຢໂຫວາເປັນຜູ້ປົກຄອງທີ່ດີທີ່ສົນໃຈແລະຫ່ວງໃຍປະຊາຊົນ. ພະເຢໂຫວາຈະທຳລາຍຊາຕານ ພວກປີສາດ ແລະທຸກຄົນທີ່ກະບົດຕໍ່ເພິ່ນ. (ພະນິມິດ 20:7-10) ການປົກຄອງຂອງພະເຈົ້າຊິເຮັດໃຫ້ໂລກນີ້ເປັນສວນອຸທິຍານທີ່ສວຍງາມແລະຜູ້ຄົນຈະມີຊີວິດທີ່ມີຄວາມສຸກຕະຫຼອດໄປ.
ຮຽນຮູ້ຫຼາຍຂຶ້ນ
ພະເຈົ້າຈະເຮັດໃຫ້ຄຳສັນຍາທຸກຢ່າງທີ່ເພິ່ນບອກໄວ້ໃນຄຳພີໄບເບິນເກີດຂຶ້ນແທ້ ເພິ່ນຈະເຮັດແບບນັ້ນໂດຍທາງການປົກຄອງຂອງເພິ່ນ.
4. ການປົກຄອງຂອງພະເຈົ້າຈະມາແທນທີ່ການປົກຄອງຂອງມະນຸດ
ການທີ່ “ມະນຸດປົກຄອງມະນຸດແລະຄົນທີ່ຢູ່ໃຕ້ການປົກຄອງກໍຕ້ອງທົນທຸກລຳບາກ.” (ປັນຍາຈານ 8:9) ໂດຍທາງການປົກຄອງຂອງພະເຈົ້າ ເພິ່ນຊິຈັດການກັບຄວາມເສຍຫາຍທີ່ເກີດຈາກຄວາມບໍ່ຍຸຕິທຳ.
ອ່ານດານີເອນ 2:44 ແລະ 2 ເທຊະໂລນິກ 1:6-8 ແລ້ວລົມກັນກ່ຽວກັບຄຳຖາມຕໍ່ໄປນີ້:
ພະເຢໂຫວາແລະພະເຢຊູລູກຊາຍຂອງເພິ່ນຊິເຮັດຫຍັງກັບການປົກຄອງຂອງມະນຸດແລະຄົນທີ່ສະໜັບສະໜູນເຂົາເຈົ້າ?
ຈາກທີ່ໄດ້ຮຽນມາ ເປັນຫຍັງເຈົ້າຈຶ່ງໝັ້ນໃຈໄດ້ວ່າສິ່ງທີ່ພະເຢໂຫວາແລະພະເຢຊູເຮັດຈະຍຸຕິທຳ?
5. ພະເຢຊູເປັນກະສັດທີ່ດີທີ່ສຸດ
ພະເຢຊູທີ່ເປັນກະສັດໃນການປົກຄອງຂອງພະເຈົ້າຈະເຮັດຫຼາຍຢ່າງທີ່ເປັນປະໂຫຍດຫຼາຍເພື່ອປະຊາຊົນຂອງເພິ່ນ. ເປີດວິດີໂອ ເພື່ອເບິ່ງວ່າພະເຢຊູເຮັດໃຫ້ເຫັນແນວໃດວ່າເພິ່ນຢາກຊ່ວຍຜູ້ຄົນແລະພະເຈົ້າກໍໃຫ້ອຳນາດເພິ່ນທີ່ຈະເຮັດແບບນັ້ນ.
ຕອນທີ່ຢູ່ໃນໂລກ ພະເຢຊູເຮັດໃຫ້ເຫັນວ່າການປົກຄອງຂອງພະເຈົ້າຈະເຮັດຫຍັງແດ່ໃນອະນາຄົດ. ອ່ານຂໍ້ຄຳພີຕ່າງໆທີ່ຢູ່ໃນຕອນທ້າຍຂອງຂໍ້ນີ້ກ່ຽວກັບສິ່ງດີໆທີ່ຈະເກີດຂຶ້ນ. ແລ້ວຄິດເບິ່ງວ່າເຈົ້າຢາກໃຫ້ເລື່ອງໃດເກີດຂຶ້ນຫຼາຍທີ່ສຸດ?
ຕອນຢູ່ໃນໂລກ ພະເຢຊູ . . .
ຈາກສະຫວັນ ພະເຢຊູຈະ . . .
ມີອຳນາດຄວບຄຸມດິນຟ້າອາກາດ.—ມາຣະໂກ 4:36-41
ເຮັດໃຫ້ບັນຫາສິ່ງແວດລ້ອມໝົດໄປ.—ເອຊາຢາ 35:1, 2
ລ້ຽງອາຫານຫຼາຍພັນຄົນຢ່າງອັດສະຈັນ.—ມັດທາຍ 14:17-21
ເຮັດໃຫ້ບໍ່ມີໃຜຕ້ອງອຶດຢາກອີກເລີຍ.—ເພງສັນລະເສີນ 72:16
ປິ່ນປົວຄົນເຈັບປ່ວຍຫຼາຍຄົນ.—ລູກາ 18:35-43
ເຮັດໃຫ້ທຸກຄົນມີສຸຂະພາບດີແລະບໍ່ເຈັບປ່ວຍ.—ເອຊາຢາ 33:24
ເຮັດໃຫ້ຄົນຕາຍກັບມາມີຊີວິດອີກ.—ລູກາ 8:49-55
ເຮັດໃຫ້ຄົນຕາຍກັບມາມີຊີວິດອີກແລະເຮັດໃຫ້ຄວາມຕາຍບໍ່ມີອີກຕໍ່ໄປ.—ພະນິມິດ 21:3, 4
6. ການປົກຄອງຂອງພະເຈົ້າຈະເຮັດໃຫ້ເຈົ້າໄດ້ຮັບສິ່ງດີໆໃນອະນາຄົດ
ການປົກຄອງຂອງພະເຢໂຫວາຈະເຮັດໃຫ້ສິ່ງທີ່ເພິ່ນຕັ້ງໃຈໄວ້ຕັ້ງແຕ່ທຳອິດເກີດຂຶ້ນແທ້. ມະນຸດຈະມີຊີວິດຕະຫຼອດໄປໃນໂລກທີ່ເປັນສວນອຸທິຍານ. ເປີດວິດີໂອ ເພື່ອເບິ່ງວ່າພະເຢຊູຈະເຮັດໃຫ້ສິ່ງທີ່ພະເຢໂຫວາຕັ້ງໃຈໄວ້ເກີດຂຶ້ນແທ້ແນວໃດ.
ອ່ານເພງສັນລະເສີນ 145:16 ແລ້ວລົມກັນກ່ຽວກັບຄຳຖາມຕໍ່ໄປນີ້:
ເຈົ້າຮູ້ສຶກແນວໃດທີ່ໄດ້ຮູ້ວ່າພະເຢໂຫວາຈະ “ໃຫ້ທຸກຊີວິດໄດ້ສົມຫວັງ”?
ບາງຄົນເວົ້າວ່າ: “ຖ້າເຮົາທຸກຄົນຮ່ວມມືກັນ ເຮົາກໍຈະແກ້ໄຂບັນຫາທັງໝົດໄດ້.”
ການປົກຄອງຂອງພະເຈົ້າຈະມາແກ້ໄຂບັນຫາຫຍັງທີ່ການປົກຄອງຂອງມະນຸດບໍ່ສາມາດແກ້ໄຂໄດ້?
ສະຫຼຸບ
ການປົກຄອງຂອງພະເຈົ້າຈະເຮັດໃຫ້ສິ່ງທີ່ພະເຢໂຫວາຕັ້ງໃຈໄວ້ເກີດຂຶ້ນແທ້. ການປົກຄອງນີ້ຈະເຮັດໃຫ້ທົ່ວທັງໂລກເປັນສວນອຸທິຍານແລະຈະມີແຕ່ຄົນທີ່ເຮັດສິ່ງທີ່ຖືກຕ້ອງໄດ້ຢູ່ຫັ້ນ. ເຂົາເຈົ້າຈະນະມັດສະການພະເຢໂຫວາຕະຫຼອດໄປ.
ຄຳຖາມທົບທວນ
ການປົກຄອງຂອງພະເຈົ້າຈະເຮັດຫຍັງເພື່ອເຮັດໃຫ້ຊື່ຂອງພະເຢໂຫວາໄດ້ຮັບຄວາມນັບຖືຫຼາຍທີ່ສຸດຕະຫຼອດໄປ?
ເປັນຫຍັງເຮົາໝັ້ນໃຈໄດ້ວ່າການປົກຄອງຂອງພະເຈົ້າຈະເຮັດໃຫ້ຄຳສັນຍາທຸກຢ່າງທີ່ເພິ່ນບອກໄວ້ໃນຄຳພີໄບເບິນເກີດຂຶ້ນແທ້?
ການປົກຄອງຂອງພະເຈົ້າຈະເຮັດສິ່ງດີໆຫຼາຍຢ່າງ ເຈົ້າຢາກໃຫ້ເລື່ອງໃດເກີດຂຶ້ນຫຼາຍທີ່ສຸດ?
ເບິ່ງເພີ່ມເຕີມ
ມາເບິ່ງວ່າອາມາເຄໂດນແມ່ນຫຍັງ.
ໃຫ້ເຮົາມາເບິ່ງວ່າຈະເກີດຫຍັງຂຶ້ນໃນຊ່ວງ “ຄວາມທຸກຍາກລຳບາກຄັ້ງໃຫຍ່” ທີ່ພະເຢຊູເວົ້າເຖິງ.
“ຄວາມທຸກຍາກລຳບາກຄັ້ງໃຫຍ່ແມ່ນຫຍັງ?” (ບົດຄວາມໃນເວັບໄຊ)
ໃຫ້ທຸກຄົນໃນຄອບຄົວນຶກພາບວ່າຈະເປັນແນວໃດຖ້າໄດ້ຢູ່ນຳກັນໃນໂລກທີ່ເປັນສວນອຸທິຍານ.
ອ່ານເລື່ອງ “ຂ້ອຍມີຄຳຖາມຄາໃຈຫຼາຍຂໍ້” ເພື່ອຈະເບິ່ງວ່າຜູ້ຊາຍຄົນໜຶ່ງໄດ້ມາຮູ້ວ່າບັນຫາຕ່າງໆຂອງມະນຸດຈະຖືກແກ້ໄຂໄດ້ແນວໃດ.
-