ບົດທີ 39
ພະເຈົ້າບອກຫຍັງໃນເລື່ອງເລືອດ?
ເລືອດສຳຄັນຫຼາຍຕໍ່ຊີວິດ. ເຮົາຈະບໍ່ສາມາດມີຊີວິດຢູ່ໄດ້ຖ້າບໍ່ມີເລືອດ. ພະເຢໂຫວາມີສິດທີ່ຈະບອກວ່າເຮົາຄວນໃຊ້ເລືອດແນວໃດ ເພາະເພິ່ນເປັນຜູ້ສ້າງໂຕເຮົາ. ເພິ່ນບອກຫຍັງໃນເລື່ອງເລືອດ? ເຮົາຈະກິນເລືອດຫຼືຮັບເລືອດເຂົ້າສູ່ຮ່າງກາຍໄດ້ບໍ? ແລ້ວເຮົາຄວນຕັດສິນໃຈແນວໃດກ່ຽວກັບເລື່ອງນີ້?
1. ພະເຢໂຫວາຄິດແນວໃດກ່ຽວກັບເລືອດ?
ພະເຢໂຫວາບອກຜູ້ນະມັດສະການເພິ່ນໃນສະໄໝກ່ອນວ່າ: “ເລືອດໝາຍເຖິງຊີວິດຂອງຄົນແລະສັດທຸກຊະນິດ.” (ລະບຽບພວກເລວີ 17:14) ພະເຢໂຫວາເບິ່ງວ່າເລືອດມີຄ່າເທົ່າກັບຊີວິດ. ດັ່ງນັ້ນ ຖ້າເຮົາເບິ່ງວ່າຊີວິດເປັນຂອງຂວັນທີ່ມີຄ່າຫຼາຍຈາກພະເຈົ້າ ເລືອດກໍຕ້ອງເປັນຂອງຂວັນທີ່ພິເສດຫຼາຍຈາກເພິ່ນຄືກັນ.
2. ພະເຢໂຫວາບໍ່ໃຫ້ເຮົາເອົາເລືອດໄປເຮັດຫຍັງ?
ຫຼັງຈາກນ້ຳຖ້ວມໂລກ ພະເຢໂຫວາອະນຸຍາດໃຫ້ຄົນຂອງເພິ່ນກິນຊີ້ນສັດໄດ້ ແຕ່ຫ້າມກິນເລືອດ ແລະຕໍ່ມາເພິ່ນກໍສັ່ງເລື່ອງນີ້ກັບຄົນອິດສະຣາເອນນຳ. (ອ່ານປະຖົມມະການ 9:4 ແລະລະບຽບພວກເລວີ 17:10) ເມື່ອມາຮອດສະໄໝຄລິດສະຕຽນລຸ້ນທຳອິດ ພະເຢໂຫວາກໍຢ້ຳຄຳສັ່ງນີ້ອີກເທື່ອໜຶ່ງໂດຍໃຫ້ຄະນະກຳມະການປົກຄອງບອກຄລິດສະຕຽນທຸກຄົນວ່າ “ໃຫ້ງົດເວັ້ນ . . . ຈາກເລືອດ.”—ອ່ານກິດຈະການ 15:28, 29
ແຕ່ການງົດເວັ້ນຈາກເລືອດໝາຍເຖິງຫຍັງ? ສົມມຸດວ່າໝໍບອກໃຫ້ເຈົ້າງົດກິນເຫຼົ້າ ເຈົ້າຈະກິນບໍ? ເຈົ້າຄືຊິບໍ່ກິນ. ແຕ່ເຈົ້າຈະກິນອາຫານທີ່ໃສ່ເຫຼົ້າຫຼືເຈົ້າຈະສັກເຫຼົ້າເຂົ້າໄປໃນຮ່າງກາຍບໍ? ເຈົ້າຄືຊິບໍ່ເຮັດແບບນັ້ນແນ່ນອນ. ຄ້າຍຄືກັນ ຄຳສັ່ງຂອງພະເຈົ້າທີ່ໃຫ້ງົດເວັ້ນຈາກເລືອດກໍໝາຍຄວາມວ່າເຮົາຈະບໍ່ກິນເລືອດຫຼືບໍ່ກິນຊີ້ນຂອງສັດທີ່ຖືກຂ້າໂດຍບໍ່ໄດ້ເອົາເລືອດອອກ ແລະເຮົາກໍຈະບໍ່ກິນອາຫານທີ່ໃສ່ເລືອດນຳ.
ແລ້ວການໃຊ້ເລືອດທາງການແພດເດ? ວິທີການປິ່ນປົວບາງຢ່າງຜິດກົດໝາຍຂອງພະເຈົ້າຢ່າງຈະແຈ້ງ. ເຊັ່ນ ການໃສ່ເລືອດຫຼືສ່ວນປະກອບຫຼັກ 4 ຢ່າງຂອງເລືອດ ບໍ່ວ່າຈະເປັນເມັດເລືອດແດງ ເມັດເລືອດຂາວ ເກັດເລືອດ ແລະປຼາດສະມາ. ແຕ່ກໍມີວິທີການປິ່ນປົວບາງຢ່າງທີ່ກົດໝາຍຂອງພະເຈົ້າບໍ່ໄດ້ບອກກົງໆວ່າຮັບໄດ້ຫຼືບໍ່. ເຊັ່ນ ການໃຊ້ສ່ວນປະກອບຍ່ອຍບາງຢ່າງທີ່ສະກັດຫຼືແຍກອອກມາຈາກສ່ວນປະກອບຫຼັກຂອງເລືອດ ຫຼືການປິ່ນປົວທີ່ກ່ຽວຂ້ອງກັບການໃຊ້ເລືອດຂອງຜູ້ປ່ວຍເອງ. ຖ້າເປັນແນວນັ້ນ ແຕ່ລະຄົນຕ້ອງຄິດໃຫ້ດີແລະຕັດສິນໃຈດ້ວຍໂຕເອງວ່າຈະໃຊ້ວິທີການປິ່ນປົວເຫຼົ່ານີ້ຫຼືບໍ່.a—ຄາລາເຕຍ 6:5
ຮຽນຮູ້ຫຼາຍຂຶ້ນ
ຖ້າການປິ່ນປົວກ່ຽວຂ້ອງກັບການໃຊ້ເລືອດ ເຈົ້າຈະຕັດສິນໃຈແນວໃດ.
3. ເລືອກວິທີການປິ່ນປົວທີ່ພະເຢໂຫວາພໍໃຈ
ເຈົ້າຈະເຮັດໃຫ້ພະເຈົ້າພໍໃຈໄດ້ແນວໃດເມື່ອຕ້ອງຕັດສິນໃຈເລື່ອງການປິ່ນປົວທີ່ກ່ຽວຂ້ອງກັບການໃຊ້ເລືອດ? ເປີດວິດີໂອ ແລ້ວລົມກັນວ່າເປັນຫຍັງຈຶ່ງສຳຄັນທີ່ຈະເຮັດຕາມຂັ້ນຕອນຕ່າງໆຕໍ່ໄປນີ້:
ອະທິດຖານຂໍສະຕິປັນຍາຈາກພະເຈົ້າ.—ຢາໂກໂບ 1:5
ຄົ້ນຄວ້າຫຼັກການຕ່າງໆໃນຄຳພີໄບເບິນແລະຄິດເບິ່ງວ່າເຈົ້າຈະເອົາໄປໃຊ້ໄດ້ແນວໃດ.—ສຸພາສິດ 13:16
ໂຮງໝໍໃກ້ເຮືອນເຈົ້າມີວິທີການປິ່ນປົວແບບໃດແດ່.
ຕັດສິນໃຈຢ່າງຈະແຈ້ງວ່າວິທີການປິ່ນປົວແບບໃດແດ່ທີ່ເຈົ້າຈະບໍ່ຮັບ.
ເຮັດໃຫ້ແນ່ໃຈວ່າການຕັດສິນໃຈຂອງເຈົ້າຈະບໍ່ເຮັດໃຫ້ເຈົ້າຮູ້ສຶກຜິດຕໍ່ພະເຈົ້າ.—ກິດຈະການ 24:16b
ເມື່ອຕັດສິນໃຈເລື່ອງທີ່ກ່ຽວກັບໃຈຮູ້ຜິດຮູ້ຖືກ ເຈົ້າຕ້ອງຕັດສິນໃຈດ້ວຍໂຕເອງ ບໍ່ຄວນໃຫ້ຄູ່ແຕ່ງດອງ ຜູ້ດູແລ ຫຼືຄົນທີ່ມາສອນຄຳພີໄບເບິນບອກວ່າເຈົ້າຄວນຕັດສິນໃຈແນວໃດ.—ໂຣມ 14:12
ເຮັດເອກະສານທີ່ບອກວ່າເຈົ້າໄດ້ຕັດສິນໃຈເລືອກການປິ່ນປົວແບບໃດແດ່.
4. ພະຍານພະເຢໂຫວາພະຍາຍາມເລືອກວິທີການປິ່ນປົວທີ່ດີທີ່ສຸດ
ພະຍານພະເຢໂຫວາເຊື່ອຟັງກົດໝາຍຂອງພະເຈົ້າໃນເລື່ອງເລືອດ ເຮົາພະຍາຍາມເລືອກວິທີການປິ່ນປົວທີ່ດີທີ່ສຸດເທົ່າທີ່ເຮົາຈະຫາໄດ້ແລະບໍ່ຂັດກັບກົດໝາຍຂອງພະເຈົ້າ. ເປີດວິດີໂອ.
ອ່ານຕີໂຕ 3:2 ແລ້ວລົມກັນກ່ຽວກັບຄຳຖາມຕໍ່ໄປນີ້:
ເປັນຫຍັງເຮົາຄວນລົມກັບແພດດ້ວຍຄວາມສຸພາບແລະໃຫ້ກຽດເຂົາເຈົ້າ?
ຄລິດສະຕຽນທຸກຄົນຮັບບໍ່ໄດ້ |
ແຕ່ລະຄົນຕ້ອງຕັດສິນໃຈດ້ວຍໂຕເອງ |
|---|---|
ກ. ປຼາດສະມາ |
ສ່ວນປະກອບຍ່ອຍຈາກປຼາດສະມາ |
ຂ. ເມັດເລືອດຂາວ |
ສ່ວນປະກອບຍ່ອຍຈາກເມັດເລືອດຂາວ |
ຄ. ເກັດເລືອດ |
ສ່ວນປະກອບຍ່ອຍຈາກເກັດເລືອດ |
ງ. ເມັດເລືອດແດງ |
ສ່ວນປະກອບຍ່ອຍຈາກເມັດເລືອດແດງ |
5. ເມື່ອຕ້ອງຕັດສິນໃຈກ່ຽວກັບສ່ວນປະກອບຍ່ອຍຂອງເລືອດ
ເລືອດມີສ່ວນປະກອບຫຼັກ 4 ຢ່າງຄື ເມັດເລືອດແດງ ເມັດເລືອດຂາວ ເກັດເລືອດ ແລະປຼາດສະມາ. ສ່ວນປະກອບຫຼັກແຕ່ລະຢ່າງສາມາດສະກັດຫຼືແຍກຍ່ອຍລົງໄປໄດ້ອີກເຊິ່ງເຮົາເອີ້ນວ່າ ສ່ວນປະກອບຍ່ອຍຂອງເລືອດ.c ສ່ວນປະກອບຍ່ອຍຂອງເລືອດບາງຊະນິດຖືກເອົາມາໃຊ້ເພື່ອປິ່ນປົວພະຍາດຫຼືເພື່ອຊ່ວຍຫ້າມເລືອດຫຼືຫຼຸດການເສຍເລືອດ.
ເມື່ອຕັດສິນໃຈໃນເລື່ອງສ່ວນປະກອບຍ່ອຍຂອງເລືອດ ຄລິດສະຕຽນແຕ່ລະຄົນຕ້ອງຕັດສິນໃຈດ້ວຍໂຕເອງໂດຍໃຊ້ໃຈຮູ້ຜິດຮູ້ຖືກທີ່ກົງກັບຫຼັກການໃນຄຳພີໄບເບິນ. ບາງຄົນອາດຕັດສິນໃຈບໍ່ຍອມຮັບການປິ່ນປົວຫຼືວິທີທາງການແພດບາງຢ່າງທີ່ກ່ຽວຂ້ອງກັບສ່ວນປະກອບຍ່ອຍຂອງເລືອດ. ແຕ່ບາງຄົນອາດຕັດສິນໃຈວ່າຍອມຮັບໄດ້ເພາະຮູ້ສຶກວ່າບໍ່ຂັດກັບໃຈຮູ້ຜິດຮູ້ຖືກຂອງເຂົາເຈົ້າ.
ເມື່ອຕ້ອງຕັດສິນໃຈກ່ຽວກັບເລື່ອງນີ້ ຂໍໃຫ້ເຈົ້າຖາມໂຕເອງດ້ວຍຄຳຖາມຕໍ່ໄປນີ້:
ຂ້ອຍຈະອະທິບາຍໃຫ້ໝໍຟັງແນວໃດວ່າ ເປັນຫຍັງຂ້ອຍຕັດສິນໃຈຮັບຫຼືບໍ່ຮັບສ່ວນປະກອບຍ່ອຍບາງຢ່າງຂອງເລືອດ?
ບາງຄົນອາດຖາມວ່າ: “ເປັນຫຍັງພະຍານພະເຢໂຫວາຄືບໍ່ໃສ່ເລືອດ?”
ຖ້າມີຄົນຖາມແບບນີ້ ເຈົ້າຈະຕອບແນວໃດ?
ສະຫຼຸບ
ພະເຢໂຫວາຢາກໃຫ້ເຮົາງົດເວັ້ນຈາກເລືອດ.
ຄຳຖາມທົບທວນ
ເປັນຫຍັງພະເຢໂຫວາເບິ່ງວ່າເລືອດເປັນສິ່ງທີ່ພິເສດຫຼາຍ?
ເຮົາຮູ້ໄດ້ແນວໃດວ່າຄຳສັ່ງຂອງພະເຈົ້າທີ່ໃຫ້ງົດເວັ້ນຈາກເລືອດໝາຍເຖິງການບໍ່ໃສ່ເລືອດນຳ?
ຖ້າເຈົ້າຕ້ອງຕັດສິນໃຈເລື່ອງວິທີການປິ່ນປົວທີ່ກ່ຽວຂ້ອງກັບເລືອດ ເຈົ້າຄວນເຮັດແນວໃດແດ່?
ເບິ່ງເພີ່ມເຕີມ
ເຈົ້າຄວນຄິດເຖິງຫຍັງແດ່ກ່ອນທີ່ຈະຕັດສິນໃຈເລືອກວິທີທາງການແພດທີ່ກ່ຽວຂ້ອງກັບການໃຊ້ເລືອດຂອງໂຕເອງ?
ເຈົ້າຄວນຄິດເຖິງຫຍັງແດ່ກ່ອນທີ່ຈະຕັດສິນໃຈວ່າຈະຮັບຫຼືບໍ່ຮັບສ່ວນປະກອບຍ່ອຍຂອງເລືອດ?
ອັນໃດເຮັດໃຫ້ແພດຄົນໜຶ່ງຍອມຮັບວ່າມຸມມອງຂອງພະເຢໂຫວາໃນເລື່ອງເລືອດເປັນເລື່ອງທີ່ມີເຫດຜົນ?
“ຂ້ອຍຍອມຮັບມຸມມອງຂອງພະເຈົ້າໃນເລື່ອງເລືອດ” (ຕື່ນເຖີດ! 8 ທັນວາ 2003)
ມາເບິ່ງວ່າຜູ້ເບິ່ງແຍງທີ່ເຮັດໜ້າທີ່ເປັນຄະນະກຳມະການປະສານງານກັບໂຮງໝໍຊ່ວຍເຫຼືອພີ່ນ້ອງແນວໃດ.
b ເບິ່ງຂໍ້ 5 “ເມື່ອຕ້ອງຕັດສິນໃຈກ່ຽວກັບສ່ວນປະກອບຍ່ອຍຂອງເລືອດ”ແລະຄຳອະທິບາຍເພີ່ມເຕີມ 3 “ວິທີທາງການແພດທີ່ກ່ຽວຂ້ອງກັບເລືອດ.”
c ແພດບາງຄົນເອີ້ນສ່ວນປະກອບຫຼັກ 4 ຢ່າງວ່າສ່ວນປະກອບຍ່ອຍ. ດັ່ງນັ້ນ ເຈົ້າຕ້ອງອະທິບາຍໃຫ້ແພດເຂົ້າໃຈຈະແຈ້ງວ່າເຈົ້າຕັດສິນໃຈບໍ່ໃສ່ເລືອດຄົບສ່ວນແລະຈະບໍ່ຮັບສ່ວນປະກອບຫຼັກທັງ 4 ຢ່າງນຳຄື ເມັດເລືອດແດງ ເມັດເລືອດຂາວ ເກັດເລືອດ ແລະປຼາດສະມາ.