ເຄັດລັບການຄົ້ນຄວ້າ
ກຽມຫົວໃຈຂອງເຈົ້າ
ຕອນທີ່ອ່ານແລະສຶກສາຄຳພີໄບເບິນ ເຮົາຢາກໃຫ້ສິ່ງທີ່ເຮົາຮຽນກ່ຽວກັບພະເຢໂຫວາມີຜົນຕໍ່ຄວາມຄິດ ຄວາມຮູ້ສຶກ ແລະການກະທຳຂອງເຮົາ. ເອັດຊະຣາເປັນຕົວຢ່າງທີ່ດີໃນເລື່ອງນີ້. ລາວໄດ້ “ກຽມຫົວໃຈເພື່ອຈະສຶກສາແລະເຮັດຕາມກົດໝາຍຂອງພະເຢໂຫວາ.” (ອຊຣ. 7:10, ໄຂເງື່ອນ) ເຮົາຈະກຽມຫົວໃຈຂອງເຮົາແນວໃດ?
ອະທິດຖານ. ກ່ອນຈະເລີ່ມສຶກສາສ່ວນໂຕ ໃຫ້ອະທິດຖານກ່ອນທຸກເທື່ອ. ຂໍພະເຢໂຫວາຊ່ວຍເຈົ້າໃຫ້ເຂົ້າໃຈແລະເອົາສິ່ງທີ່ໄດ້ຮຽນໄປໃຊ້.—ພສ. 119:18, 34
ປູກຝັງຄວາມຖ່ອມ. ພະເຈົ້າເຊື່ອງຄວາມຈິງໄວ້ຈາກຄົນທີ່ຄິດວ່າໂຕເອງສະຫຼາດແລະມີຄວາມຮູ້. (ລກ. 10:21) ຢ່າສຶກສາຄົ້ນຄວ້າຍ້ອນຢາກເຮັດໃຫ້ຄົນອື່ນເຫັນວ່າເຈົ້າມີຄວາມຮູ້ຫຼາຍ. ເມື່ອເຈົ້າສຶກສາສ່ວນໂຕແລະເຫັນວ່າມີບາງຢ່າງທີ່ເຈົ້າຕ້ອງປ່ຽນແປງ ກໍໃຫ້ຖ່ອມໂຕແລະພ້ອມທີ່ຈະປັບປ່ຽນ.
ຟັງເພງຂອງອົງການ. ສຽງເພງມີພະລັງແລະຊ່ວຍກຽມຫົວໃຈຂອງເຮົາໃຫ້ພ້ອມທີ່ຈະນະມັດສະການພະເຈົ້າ. ສະນັ້ນ ໃຫ້ຟັງເພງຂອງອົງການກ່ອນທີ່ຈະເລີ່ມສຶກສາສ່ວນໂຕ. ການເຮັດແບບນີ້ອາດຊ່ວຍກຽມຫົວໃຈຂອງເຈົ້າໄດ້.