Gaa-Zaɣa-Kɛɛ Kɔlɔ Lodo Beaitiɛ Ta Bo

Zɛɓɛi Jehova vaazu puuzu zuu wũ-tuoitiɛ yii zu na luoi zu?

Nii ɣa Faa wuloai kɛnɛ ma 17:16, 17 boga ga e vaazu ɣɛɛzu faa ɓoei walai lɔɔ-zei zuvɛ. E ɣɛ: “Mela puugɔi è pɛtɛni te vɛɛ file zuoi va ta zili ga ŋaza nui nii é ɓɔɔ ɣɛɛ ga yaawo. Ta máa ʋoo é ɣɛ ga ɓuse te teve gá kpenegele te gala ga ŋabu. Ɓɔvɛlaale Gala ge pua te yii zu ga te ziɛ ga ná deʋei te ɣigi ɣɛɛ vele ma ɣile tiɛ ta ɣalaso gaa-ɓai ʋe file zuoi ya ga é yɛ su Gala daa woi leve ma.” Wɔlɔ-wɔlɔi zu, da wɔlɔitiɛ te vɛɛ bosu ga ki-gaa-ziɛi Jehova vaazu puuzu wũ-tuoitiɛ yii zu tɔ ga te zɛɛ ʋaa ɣala pɛlɛitiɛ zu ŋala-ŋala.

Na ɓalaa ɣɛɛvɛ, maa nɛɛ de faa taniga maa ʋelibo. Ki-gaa-ziɛi Jehova vaazu puuzu wũ-tuo veaitiɛ yii zu tɔ ga “tiɛ ta ɣalaso gaa-ɓai ʋe file zuoi ya.” Ga de kwɛ̃ɛ velei fai niitiɛ te vaazu ɣɛɛzu la, wɛlɛ gaa-zaɣa-kɛɛ niitiɛ ɣaa wotegi va.

Ɓɛɛni ka Gala goi niitiɛ te yɛpɛzu e vile te va? “Ŋaza nui nii é ɓɔɔ ɣɛɛ ga yaawo” towa kɔnɔ da tili ga “Babelɔ̃ laa ɓakpa walai.” Tɔwɔ, su-wulo-zu ɣa ga zɛɛ ʋaa ɣala pɛlɛitiɛ ɓɔgapɛ. “File zuo ɓoeigi” zu-wulo-zu ɣa ga ɓulugi nii ta tili ga United Nations. Te ɓulugi nii lɔɔ-zeini 1919 ga te va ga zii-laa zui zu. Towa tɔ tili ga, the League of Nations. (Faa. 17:3-5) “Mela puugɔi” zu-wulo-zu ɣa ga gɔmɛtitiɛ ɓɔgapɛ te gaa-ɓaa ʋeezu file zuoi ya.

Ŋaza nui nii e ɓɔɔ ɣɛɛ ga yaawo e vɛɛ file zuo ɓoeigi va, siɛ-pulu zɛɓɛi e te yɔɔzu? Ŋaza nui nii e ɓɔɔ ɣɛɛ ga yaawo “e vɛɛ zeini” file zuoi maazu, yɛi tuuyiɛ loo file zuoi na ma, na ɣa ɣɛɛna yiɛ na leʋe ga nii nɛpɛgi e wõini, na kɛ bɛ.

Zɛɓɛi e vaazu ɣɛɛzu ga ŋaza nui nii e ɓɔɔ ɣɛɛ ga yaawo? File zuoi, e vɛɛ mela puugɔi niitiɛ va te ɓɔsu ba, “ta zili ga ŋaza nui nii é ɓɔɔ ɣɛɛ ga yaawo.” Ta na kpɛtɛitiɛ wulo zeea na ɣa ɣɛɛna te na faa yowũitiɛ lɛ ga nu ɓɔgapɛ. Tɔwɔ, ta su ŋala-ŋala e ɣɛ velei nɔ Jehova boga la. (Faa. 17:1; 18:8) Zɛɛ ʋaa ɣala pɛlɛitiɛ te wɛ̃ɛgi ɣa ɣɛ sa ga na. Kɛ, na ɔ vɛɛ ɣɛɛzu, Jehova ɣa vaazu yɛsu ga zaɓu ga zuu wũ-tuoitiɛ te fai ta ɣɛ lɛ dɛ wɔlɔ-wɔlɔ ɣɛɛni.

Zɛɓɛi Jehova vaazu yɛsu ga zaɓu ga zuu wũ-tuoitiɛ te kɛ? Jehova ɣa vaazu na ki-gaa-ziɛi wuuzu mela puugɔi yii zu ga te “ta ɣaa-ɓai [ʋe file zuo ɓoeigi] ya”—na ɣa ga, the United Nations. (Faa. 17:13) Na zu-wulo-zu ɣa ga zɛɓɛ? E ɣisu nu ɓuse wɔmɛtitiɛ ta nɔ vaazu deʋezu ga te ta ɣaa-ɓaitiɛ ɓɔgapɛ fe file zuoi ya? Ɓa! Gala Kɔlɔi boga ga, Gala kagi ɣa e vaazu puuzu te yii zu ga te na ɣɛ. (Prov. 21:1; wɛlɛ Isaiah 44:28 va.) E ɣisu fai nii ɣa vaazu ɣɛɛzu ga pɛlɛ-pɛlɛ? Ɓa! Fai na ɣa vaazu ɣɛɛzu nɔ su ɣile. Na ɣa ɣɛɛna, file zuoi nii sa e vaazu gaa-ɓai maa zɔlɔ wosu towa e vaazu nii ɣɛɛzu Jehova boga ga e zɛɛ ʋaa ɣala pɛlɛitiɛ ɓɔgapɛ kulona.

Zɛɓɛi sa de maa kpowũsu ga e ɣɛ na luoi zu? De mɛ lɛ ɣɛ naa maa kpowũsu ga de ki-daa-wodo maa zɔlɔwo e vile velei va gɔmɛtitiɛ te vɛɛzu la ɓulugi nii va ga pɛlɛ-pɛlɛ na ɣa ga the United Nations. Kɛ nii ɣa maa nɛɛ de maa kpowũ: Jehova ɣa vaazu puuzu gɔmɛti wũ-tuo veaitiɛ yii zu ga te ta ɣaa-ɓaitiɛ ɓɔgapɛ fe file zuoi ya. Tɔwɔ nii ɣa vaazu nɔ ɣɛɛzu su ɣile. Ani na ɣa ɣɛɛna da kwɛ̃ɛ sa ga, faa ɓoei walai ɣa sa vaazu tɔɔ zeizu. Na ma, “a de yɛ ɣaazu ma de ɣaazu lai ga daa vele” zaɓui ɣa ga su lɛ sa vaa leɓesu ga fai niitiɛ te ɣɛ!—1 Tɛsɛ. 5:6.