Mu Kute Kuli Mu Puluse Ba Bañwi
1 Ki tato ya Mulimu “kuli batu kamukana ba piliswe, mi ba fite fa zibo ya ku ziba niti.” (1 Tim. 2:4) Lu kona ku eza nto mañi kuli lu fe tuso? Mu eze misipili ya makutisezo ka mulelo wa ku luta niti. Mu ka yo bulela sika mañi? Liakalezo ze latelela ne li kana za mi tusa.
2 Ha mu potela mutu ya n’a amuhezi buka ya “Kozo ni Buiketo za Niti—Mu Ka Li Fumana Cwañi?” ne mu kana mwa ama hape kwa siswaniso se si fa likepe 4 ni ku buza muñ’a ndu kuli:
◼ “Hasamulaho wa ku zwelapili ku tatuba buka ye ne ni mi siyezi ni ku hupula ka za sepiso ya Mulimu ya lifasi-mubu le li li paradaisi, mu ikutwa cwañi ka za lisepiso ze makaza zeo Mulimu a ezelize mufuta wa mutu?” Ha se mu amuhezi kalabo ya muñ’a ndu ni ku bulela ka bukuswani fa kalabo yeo, ne mu kana mwa hohela mamelelo kwa likauhanyo 2 ni 3 mi mu kete ku buhisana libaka buikatazo bwa mufuta wa mutu kwa neku la kozo ni buiketo, hamohocwalo ni bwa muinelo wa bulapeli, ha bu palezwi.
3 Haiba ne mu siile muñ’a ndu inze a kengeyela ka za libaka Mulimu ha tuhelezi bumaswe, ha mu kutela teñi ne mu kana mwa zusulusa puhisano ka ku bulela kuli:
◼ “Ne ni ikozi puhisano ya luna ha ne lu kopani lwa pili, mi ne ni lakalize ku kuta kuli ni t’o ziba ka mo mu ikutwela ka za libaka Mulimu ha tuhelezi mikwangalakanyi ni mifilifili ye li teñi mwa lifasi kacenu. [Mu litele kalabo. Mu apule kwa likepe 54 mwa buka ya Kozo ya Niti ni ku bala paragilafu 25, hamohocwalo ni ze amilwe ku zwelela kwa 2 Pitrosi 3:8, 9.] Mu lemuhe kuli kauhanyo ye latelela mwa buka i buza kuli, ‘Ki Sifi sa Sweli ku Eza Mulimu?’ Mwendi lwa kona ku buhisana kalabo kwa puzo yeo fa ku pota kwa ka ko ku tatama.”
4 Ne mu kana mwa kutela ko ne mu siile buka ya “Ku Eza Bupilo bwa Lubasi lwa Mina ku ba bwa Tabo” ka muatumelelo wo:
◼ “Ha ne ni mi potezi lwa pili, ne ni tabisizwe ki ku iyakatwa kwa mina ka za lubasi lwa mina. Ka mo lu pilela cwana mwa mazazi a maungulelo a muinelo wa linto o maswe wo, ki kwa butokwa hahulu kuli mabasi a zwelepili ku itukiseza ka za nako ya kwa pili. Kabakaleo, buka ye ne ni mi siyezi, ya Ku Eza Bupilo bwa Lubasi lwa Mina ku ba bwa Tabo, i babaza ka ku tiya ku banga ni lipuhisano za Bibele za kamita mwa ndu. [Mu bale paragilafu 10 fa likepe 185-6.] Haiba ku konahala, ne ni lakaza ku nga fela mizuzu ye sikai ili ku mi bonisa ka mo batu mwa linaha ze fetelela 200 ba buhisanela Bibele kwa mandu sina likwata za mabasi.” Nako ha i lumeleza, mu itusise litaba ze mwatas’a toho-nyana ya taba ye fa likepe 70 ili ku bonisa ka mwa ku itutela.
5 Ne mu kana mwa latelela ku fiwa kwa buka ya “Buiketo Lifasi Kaufela” ka ku bulela kuli:
◼ “Ne ni lakalize ku kuta ni ku t’o mi bonisa ze ñwi ka za mulelo wa Mulimu kwa lifasi-mubu le.” Mu apule kwa siswaniso fa likepe 33, mu bale Sinulo 21:3, 4, mi cwale mu taluse ka bukuswani ka mo Mubuso wa Mulimu u ka taleleza sepiso yeo. Mu fe tuto ya Bibele ya fa ndu ye si na tifo.
6 Mu hupule kuli mulelo wa ku eza misipili ya makutisezo ki ku kalisa lituto za Bibele. Buka ye nca, ya Zibo ye Isa kwa Bupilo bo Bu Sa Feli, sihulu-hulu i lukiselizwe ku zamaisa lituto. Muta lu kutela ko lu siile libuka za kale ni ku kalisa tuto, neikaba hande ku isa mamelelo kwa buka ye nca yeo. Lu ka fumana tabo ye tuna muta bao ba ba ituta ba fita fa ku ziba ku biza fa libizo la Jehova kuli ba puluswe.—Lik. 2:21.