Mu Kutaze ka Kutwisiso
1 Ku ba ni kutwisiso ku tokwa kuli lu tekelele nto ye ñwi ka za batu bao lu kutaza ku bona. Kabakalañi? Bakeñisa kuli ku kondisa kwa luna mwa ku fita kwa lipilu za batu ku itingile fa buikoneli bwa luna bwa ku fitisa lushango lwa Mubuso ka mukwa o hoha mamelelo ku bona. Mwahal’a kweli ya January, lu ka fa mifuta-futa ya libuka za lituto za Bibele ili zeo puteho neikana ya ba ni zona. Haiba zeo li siyo, bahasanyi ba ka itusisa buka ya Kozo ni Buiketo za Niti—Mu Ka Li Fumana Cwañi? Liakalezo ze latelela ne li kana za tusa.
2 Haiba mu keta ku fa buka ya “Kozo ni Buiketo za Niti—Mu Ka Li Fumana Cwañi?” ne mu ka ama kwa siswaniso se si fa likepe 4 ni ku bulela kuli:
◼ “Siswaniso s’e si bonisa muhupulo wa muswanisi ka za seo Bibele i luta ka za mulelo wa Mulimu kwa neku la lifasi-mubu. Mu hupula kuli ne ku ka tokwahala nto mañi ku mina ni lubasi lwa mina kuli mu pile mwa lifasi-mubu le li li paradaisi? [Mu litele kalabo.] Bibele i bonisa kuli kozo ni buiketo za niti li ka be li bile teñi cwale-cwale fa mwa lifasi-mubu kamukana ni kuli Paradaisi i ka kutiswa sinca. [Mu bale Samu 37:10, 11.] Buka ye ya kona ku mi bonisa seo mu swanela ku si eza kuli mu fumane tuso ku seo Mulimu a ka si eza. Ni lakaza ku mi siyela kopi ye.”
3 Ha mu itusisa buka ya “Ku Eza Bupilo bwa Lubasi lwa Mina ku ba bwa Tabo,” ne mu kana mwa bulela nto ye swana sina ye:
◼ “Kana ne mu ka lumela kuli mabasi a mwa mazazi a cwale a talimani ni lishemaeto ze ne li sa zibwi ki masika a kwamulaho? [Mu litele kalabo.] Ka ku ya ka muhupulo wa mina, ki kabakalañi seo ha si sweli ku ezahala? [Mu amuhele kalabo. Mu apule kwa 2 Timotea 3:1-3 ni ku i bala.] Lipulelo za kuli ‘ba ba sa utwi bashemi’ ni ‘ba ba si na lilato la taho’ li talusa ka ku nepahala muinelo wa ba bañata mwa lizazi la luna. Niteñi, Mulimu ya swana ili ya bulezi cimo butata bo hape u lu file ketelelo ye nde ka mwa ku swalisaniseza lubasi hamoho.” Mu bale paragilafu ye zwa kwa “Bahasanyi” ye fa likepe 2. Mu litele kalabo, mu fe buka kuli i siyale.
4 Muatumelelo o muñwi o ne u kana wa itusiswa ka buka ya “Kozo ni Buiketo za Niti—Mu Ka Li Fumana Cwañi?,” u kalisa ka puzo ye:
◼ “Kacenu batu ba bañata ba lumela kuli Mulimu ha isi luli mamelelo ku luna batu fa lifasi-mubu ni kuli ha na ku eza nto ni ye kana ka za butata bo bu li teñi fa. Kana ki mona mo mu ikutwela? [Mu litele kalabo.] Ha lu boneñi ni mi balele seo buka y’e ye li siitusiso sa tuto ya Bibele i si bulela ka za mulelo wa Mulimu kwa neku la mutu ni lifasi-mubu. [Mu bale paragilafu 1 ni mubamba wa pili wa paragilafu 2 fa likepe 43.] Ni mi bulelela niti, kuli ku na ni libaka le linde la ku tuhelela kwa Mulimu butata bo bu li teñi fa lifasi-mubu. Haiba ne mu ka tabela ku ziba kuli ki lifi, shangwe mu bale buka ye, ye na ni toho ya taba ye li Kozo ni Buiketo za Niti—Mu Ka Li Fumana Cwañi?” Haiba mutu y’o wa itebuha taba yeo, mu fe buka.
5 Haiba ne mu ka tabela ku eza mutahisezo o mukuswani ka ku itusisa buka ya “Buiketo Lifasi Kaufela Mwatas’a ‘Mulena wa Kozo,’” ne mu ka apula buka kwa likepe 4 ni ku buza kuli:
◼ “Lifasi-mubu li ka ba cwañi? Ba bañata ba buza ka za seo. Kana mu hupula kuli li ka ba paradaisi nako ye ñwi?” Mu amuhele kalabo ya muñ’a ndu, mi cwale mu bale manzwi a makalelo fa likepe 2. Mu fe buka.
6 Kutwisiso ye nde i ka lu konisa ku lemuha butokwi ni licisehelo za batu bao lu katana ni bona. Liproverbia 16:23 i lu kolwisa ka za seo, kuli: “Pilu ya mutu ya talifile i mu bulelelisa ka [kutwisiso, NW]; mi i ekeza kwa zibo ye mwa mulomo wa hae.”