Mu Lumbeke Jehova “Ka Mazazi Kamukana”

¹ Samu 145:2 i na ni sepiso ya n’a sepisize Mulena Davida ku Jehova kuli: “Ni ka ku lumba ka mazazi kamukana, ni lumbe Libizo la hao ku ya ku ile.” Ni luna lu na ni libaka la ku lumbeka ni ku bubeka Ndat’a luna wa kwa lihalimu! Kono lu kona ku likanyisa cwañi mutala wa Davida mwa ku bubanisa bubusi bwa Jehova “ka mazazi kamukana”?

² Lu Taze Lipilu za Luna Buitebuho ku Jehova: Tuto ya kamita ya Linzwi la Mulimu i tungisa buitumelo bwa luna ku seo Jehova a lu ezelize, s’a sweli ku lu ezeza, ni s’a ka lu ezeza. Ha lu nze lu hulisa buitebuho bwa luna kwa likezo za hae ze makaza, lu ka ipumana lu nze lu bulela ka za bunde bwa hae. (Samu 145:7) Lu ka lumbeka Jehova ka tukufalelo ka nako kaufela ye swanela.

³ Mu Lumbeke Jehova mwa ku Ambolisana kwa ka Zazi: Ha mu ambolisana ni bomuyahwa ni bona, bo mu kena ni bona sikolo, bo mu sebeza ni bona, ni ba bañwi be lu bonana ni bona ka zazi, ne lu kana lwa fumana libaka za ku abana sepo ya luna ni bona. Muyahwa ni yena n’a kana a bulela za ku iyakatwa ka za bukebenga mwa silalanda; yo mu kena ni yena sikolo n’a kana a bilaela ka za ku itusisa maswe milyani kamba muzamao o maswe; yo mu sebeza ni yena n’a kana a talusa maikuto a hae ka za taba ye ñwi ya bupolitiki. Lwa kona ku supa kwa likuka ni lisepiso ze mwa Linzwi la Mulimu ze bonisa nzila ye lukela ya ku nga cwale ni tatululo ye ka ba teñi kwa nalulelule ku bona butata b’o. Manzwi a cwalo a bulezwi ka “nako ye swanela” a kona ku ba mbuyoti hakalo!—Liprov. 15:23, NW.

⁴ Mu Bulele za Jehova ka Nako ye Tezi: Mutu ya na ni buitebuho bo bu tungile ku Jehova u bata ku abana taba ye nde ni ba bañwi ba bañata ka mo ku konahalela kaufela. (Samu 40:8-10) Mwa muinelo w’o lu swanela ku ipuza kuli ‘Kana na eza zeo kaufela miinelo ya ka i lumeleza?’ Ba bañata ba fumani kuli ka ku eza licinceho ze likani, ba konile ku ba mapaina ba kamita. Haiba miinelo ya cwale ha i lumelezi seo, kana lwa kona ku iñolisa sina mapaina ba ku tusa? Bakeñisa kuli nako ya Kupuzo ye taha ki nako ya musebezi o ekezehile, likweli za March ni April ne li ka ba nako ye nde ya ku ekeza sebelezo ya luna ka ku eza bupaina bwa ku tusa.

⁵ Mu Tuse Ba Banca ku Swalisana ni Luna mwa ku Lumbeka Jehova: Mukiti wa Kupuzo ya lifu la Jesu kamita u lu hupulisa ka za mabaka a ku itumela ku Jehova ni ku lumbeka libizo la Hae. Sihulu yeo ki nako ye nde ya ku susueza baituti ba Bibele ba luna ku swalisana ni luna mwa ku bulela fa nyangela ka za bulena bwa Jehova. Mu ba susumeze ku nahana ka butuna hahulu ku se si bulezwi mwa maparagilafu 7-9 fa makepe 173-5 mwa buka ya Knowledge That Leads to Everlasting Life. Haiba ba fita ku ze konisa, ha ba swaneli ku itulela ka libaka fela la kuli ha ba na yeloseli. Bahasanyi ba ba kona ba teñi kuli ba ba bonise ka mo musebezi wa ku kutaza za Mubuso u ezezwa. Haiba ba banca ba kona ku ba ni bundume bwa ku bulela taba ye nde, ba kona ku ikolwisa kuli Jehova u ka ba tusa.—Lik. 4:31; 1 Mates. 2:2.

⁶ Lwa itahiseza limbuyoti za kamita hamohocwalo ni ku li tahiseza ba bañwi ha lu bata ku lumbeka Jehova ka mazazi kamukana.