Mu Fumane Tuso ku Zwelela kwa Sikolo sa Bukombwa sa Teokratiki sa 1996—Kalulo 3
1 Muapositola Paulusi n’a bata kuli mizwale ba hae ba mu lapelele ilikuli a te a fumane buikoneli bwa ku bulela taba ye nde ka bundume. (Maef. 6:18-20) Lu lakaza ku hulisa buikoneli bo bu swana b’o. Kuli ku be cwalo, lwa itebuha tuso ye fiwa ki Sikolo sa Bukombwa sa Teokratiki, ili m’o ba ba fitile ku ze konisa ba ba fumaneha kwa mikopano ba susuezwa ku iñolisa teñi.
2 Sina baituti, lu amuhela kelezo ya ka butu ili ku lu tusa ku zwisezapili buikoneli bwa mubulelelo ni mulutelo wa luna. (Liprov. 9:9) Hape lwa kona ku tuseha ka ku teeleza kwa kelezo ye amuhelwa ki baituti ba bañwi, ku sebelisa se lu ituta ku ili luna. Ha lu itukiseza ngambolo, lu swanela ku ituta ka tokomelo simbule sa litaba ili ku ikolwisa kuli ku li talusa kwa luna ku nepahalile. Lisupo ze tuna ni mañolo ao lu itusisa li swanela ku lumelelana ni mutahisezo wa toho ya taba ka nañungelele. Haiba ngambolo i ama mutu yo muñwi, i swanelwa ku lundululwa ku sa na ni nako pili i si ka fiwa mwa sikolo. Ha lu nze lu eza zwelopili, buikatazo bu swanelwa ku eziwa bwa ku bulela ka ku sa bona fa sikuka, ili ka ku itusisa lisupo isiñi ngambolo ya ku bala.
3 Kaufela ba ba na ni likalulo mwa sikolo ba swanela ku fita ka ku itahanela, ku fa muokameli wa sikolo kapampili ka bona ka Kelezo ya ku Bulela, ni ku inela bukaufi ni kwapil’a ndu. Likaizeli ba swanela ku zibisa muokameli wa sikolo ka bunako mulukisezo wa bona ni ka za haiba ba ka yema kamba ku ina fa kalulo ya bona. Ku swalisana mwa linzila zeo ku peta kalulo ye ñwi mwa tukiso ye nde mi kwa tusa bao ba ba bona za libulelelo ku lukisa lika kaufela ka bunako.
4 Ku Itukiseza Ngambolo No. 2: Mulelo o muñwi wa ku bala Bibele ki ku tusa muituti ku zwisezapili buikoneli bwa hae bwa ku bala. Seo si konwa ku petiwa cwañi hande ka ku fitisisa? Ku bala taba ka ku tumusa ka ku kuta-kutela ki yona nzila ye nde ka ku fitisisa ya ku kona seo, mi muituti wa kona ku utwisisa hande mihupulo ye mituna mwa munahano. Mu ñole mubizezo wa manzwi fa timana. Cwale mu itwaeze ku fa ngambolo ka ku tumusa ili ku itwaelisa mutahisezo wa muñoli tenyene wa litaba zeo. Babali ba bañwi ba fumana kuli ku itwaeza ka ku tumusa inze ba li fapil’a siiponi kwa ba tusa ku zwisezapili ku talimana ni baputehi.
5 Ku bala Bibele ki kwa butokwa kwa banana ni ba bahulu kaufela. Hañata ku na ni miinelo ye tokwa ku balwa kwa Bibele ka ku tumusa. Yeo ki ye ñwi ya lingambolo mwa Sikolo sa Bukombwa sa Teokratiki. Hape kaufel’a luna lwa balanga Mañolo ha lu bulela kwa batu mwa bukombwa bwa luna. Kono kana lwa a balanga hande? Kana lu itukiselize ona ilikuli lu si ke lwa sitatala, ilikuli lu koñomeke likalulo ze lumelelana ni taba ya luna ye buhisanwa ni kuli mubalelo wa luna u utwahale ku ba wa ka taho, ili wa puhisano? Kaniti buitukisezo bwa tokwahala ha ku amiwa ku bala mwa Bibele. Mu hupule kuli leo ki Linzwi la Mulimu, kuli li tezi litaba ze na ni bunde ni maikuto a ipitezi, hamohocwalo ni nahanisiso ye nepahezi ni ye utwahala. Lu swanela ku bata ku i tahisa ka ku swaneleha kwa neku la tuso ya bateelezi. Haiba lu ziba ka bunako kuli lu ka bala Bibele, buitukisezo bwa ka tokomelo bu swanelwa ku eziwa, ili ku pima ku sitatala fa manzwi, lipulelo kamba mibulelelo ye sienyi.
6 Bashemi ba kona ku tusa bana ba bona ba banyinyani ku itukiseza ngambolo ya ku bala. Seo ne si kana sa kopanyeleza ku teeleza mwanana ha nze a lundulula mi cwale ni ku mu fa liakalezo ze tusa kwa neku la zwelopili. Nako ye filwe i lumeleza makalelo a makuswani ni mafelelezo a swanela ili ze talusa muitusisezo wa lisupo ze tuna. Kacwalo muituti u hulisa buikoneli bwa hae bwa ku bulela ka ku sa bona fa sikuka.
7 Walisamu n’a kupile ka tapelo kuli: “Mulena, u atamise milomo ya ka, mi mulomo wa ka u ka opela milumbeko ya hao.” (Samu 51:15) Haike ku abana kwa luna mwa Sikolo sa Bukombwa sa Teokratiki ku lu tuse ku kulisa takazo ye swana yeo.