Ki Mañi Y’a Ka Teeleza kwa Lushango lwa Luna?

¹ Ku fita lili kaufela mwa litaba ze ezahezi za butu, batu ba fuzelelwa litaba, zeo buñata bwa zona ki za mbwashula mane ni ze yaulula. Ka h’o, ba bañata ba ikutwa ku eshulwa, mi ku ba t’ata ku luna ku ba konisa ku teeleza kwa lushango lwa za Mubuso wa Mulimu. Ha ba utwisisi ku ama ko ku buniti k’o ku teeleza kwa bona kwa Linzwi la Mulimu ku kona ku ba ku bona.—Lu. 11:28.

² Lwa nyakalala kuli mwa libaka ze ñata za lifasi, mashumi a’ likiti-kiti a batu ba teeleza kwa lushango l’o mi ba amuhela ku fa kwa luna lituto za Bibele za fa ndu. Mwa likalulo ze ñwi, nihakulicwalo, nyangumuko haki ye tuna cwalo. Buñata bwa ku pota ko lu eza mwa bukombwa ki ko ku si na ze zwa mwateñi ze nde, mi ne lu kana lwa kakanya ka za ya ka teeleza kwa lushango lwa luna.

³ Lu lukela ku itibelela kwa ku zwafa. Paulusi n’a talusize kuli: “Mutu ni mutu ya biza Libizo la Mulena u ka piliswa. Kono ba ka biza cwañi ye ba si . . . ka utwa za hae? Mi ba ka utwa cwañi, mubuleli h’a li siyo? . . . Sina ha ku ñozwi kuli: Ki a mande hahulu mautu a ba ba . . . tisa litaba ze nde.” (Maro. 10:13-15) Ha lu tukufalelwa ku cala peu ya Mubuso, Mulimu u ka i melisa mwahal’a bao ba lipilu ze buniti.—1 Makor. 3:6.

⁴ Sinotolo Ki ku Eza Misipili ya Makutisezo ya Kamita: Mwa likalulo mo ku bonahala kuli batu ba sikai ba teeleza kwa lushango lwa luna, lu tokwa ku isa mamelelo fa ku hulisa cisehelo ifi kamba ifi ye lu fumana, ku be kuli lwa siyalisa libuka kamba kutokwa. Ki kabakalañi ku matukela mubonelo wa kuli ha ku na se si ka petiwa? Ha lu cala peu, ha lu zibi fo i ka konda. (Muek. 11:6) Haiba lu kutela teñi inze lu itukiselize ku abana se siñwi mwa Mañolo, niha neikaba fela hakuswanyani, ne lu kana lwa kona ku fita kwa pilu ya mutu. Lwa kona ku siyalisa trakiti kamba ku fa limagazini ze li teñi. Kwa mafelelezo, ne lu kana lwa kona ku bonisa mo ku itutelwa tuto ya Bibele. Lu ka komoka ka ku tabiswa ki ku bona sipimo seo Jehova a fuyaula ka sona buikatazo bwa luna.—Samu 126:5, 6.

⁵ Trakiti ne i siyezwi musali ya n’a bonisize cisehelo ye ñwi. N’a si ka fumanwa fa ndu hape ku fitela likweli ze peli hasamulaho, mi ka nako yeo n’a patehile hahulu kuli mane n’a sa koni ku ambola. Trakiti ye swana ne i siyezwi yena hape. Ku si na taba ni buikatazo bwa muhasanyi bwa ka tundamo ya ku fita ku yena kwa ndu, ne ku tandile likweli ze talu hape kuli a katanwe, konji ku fumana kuli n’a kula. Kaizeli n’a potile hape viki ye ne i tatami, mi puhisano ye kuswani ka za trakiti ne i latelezi. Kaizeli ha n’a kutezi teñi viki ye ne i tatami, musali y’o n’a bonisize cisehelo ye buniti kwa lushango lwa Mubuso. Cinceho ya miinelo mwa bupilo bwa hae ne i mu ezisize ku ba ya itemuhela butokwi bwa hae bwa kwa moya. Tuto ya Bibele ne i kalisizwe, mi ka tukufalelo n’a itutanga ka viki ni viki ku zwa f’o.

⁶ Sina mo ne ku ka bela kwa sika sifi kamba sifi se lu bata ku bona ha si hula, ibe lipalisa, miloho, kamba cisehelo kwa lushango lwa Mubuso, pabalelo ya tokwahala. Seo si nga nako, ku satalala, mukwa wa ku tokomela, ni keto ye tiile ya ku sa tuhela. Ñohola, batu ba ba fitelela kalulo ya bulalu ya lule ili ku bona bao peu ya Mubuso ne i melile, ne ba kolobelizwe! Haiba lu zwelapili ku kutaza, lu ka ikolwisisa ka za ku fumana ba bañata ni ku fita ba ba ka teeleza kwa lushango lwa luna.—Mu bapanye Magalata 6:9.