Kalulo Ya Puzo

◼ Ki sika mañi se si swanelwa ku eziwa muta kozi i ezahala ye ama luli mizwale ba luna?

Haiba Kozi I Ezahala mwa Sibaka sa Mina: Mu si ke mwa shomboka. Mu we pilu, ni ku isa mamelelo ku se si li luli sa butokwa—ili bupilo, isiñi maluwo. Mu talime za butokwi bwa lubasi lwa mina bo butuna bwa kwa mubili. Cwale mu zibise maeluda ka za miinelo ya mina ni ko mu inzi ka nako yeo.

Maeluda ni batanga ba bukombwa ba peta kalulo ye butokwa mwa ku fitisa tuso ya kimululo. Haiba ku filwe cimo temuso ka za kozi, inge mo ku belanga ha ku banga ni mañungwa a matuna, mizwale bao ba swanela ku bona teñi kuli mutu kaufela u mwa sibaka se si silelelizwe, mi haiba nako i lumeleza, ba swanela ku fumana ni ku abela lika ze ne li kana za tokwahala.

Hasamulaho, bazamaisi ba lituto za buka ba swanela ku ziba ko ku inzi lubasi ni lubasi ni ku buza ka za buiketo bwa bona. Muokameli ya zamaisa kamba eluda yo muñwi u swanelwa ku zibiswa ka za muinelo wa lubasi ni lubasi, niha neikaba kuli muinelo kaufela u lukile. Haiba yo muñwi u holofezi, maeluda ba ka lika ku eza litukiso za kalafo ya milyani. Hape ba ka fa lika lifi kamba lifi za kwa mubili ze cwale ka lico, liapalo, mukunda, kamba libyana za mwa ndu ze tokwahala. (Joa. 13:35; Magal. 6:10) Maeluda ba fa sibaka ba ka fa kemelo ya kwa moya ni ya mwa maikuto kwa puteho mi ba ka eza litukiso ka bubebe ka mo ku konahalela kaufela kuli mikopano ya puteho i kaliswe. Hasamulaho wa ku alakanya ka ku tala, eluda u swanela ku bonana ni muokameli wa mupotoloho ka ku yemela sitopa sa maeluda ili ku mu lemusa ka za likolofalo lifi kamba lifi, sinyeho kwa Ndu ya Mubuso, kamba lisinyehelo kwa mandu a mizwale hamohocwalo ni za butokwi bo bu ipitezi bufi kamba bufi. Muokameli wa mupotoloho cwale u ka lumela luwaile kwa ofisi ya mutai ili ku fitisa piho ya muinelo. Ofisi ya mutai i ka lukisa za mihato ye mituna ya za kimululo ifi kamba ifi ye tokwahala.

Haiba Kozi I Ezahalela ku Sili: Mu hupule mizwale ni likaizeli mwa litapelo za mina. (2 Makor. 1:8-11) Haiba mu itakaleza ku fa tuso ya za mali, ne mu kana mwa lumela linubu za mina kwa Sosaiti, k’o mali a kimululo a lukisezwa mulelo wo. Keyala ki: Watchtower, Box 33459, Lusaka 10101. (Lik. 2:44, 45; 1 Makor. 16:1-3; 2 Makor. 9:5-7; mu bone The Watchtower ya December 1, 1985, makepe 20-2.) Mu si ke mwa lumela libyana kamba lika kwa sibaka sa kozi konji haiba mu kupilwe luli ki mizwale ba ba na ni buikalabelo. Seo si ka ezisa buikatazo bwa kimululo bo bu zamaiswa hande ni ku abelwa kwa lika ka swanelo. (1 Makor. 14:40) Shangwe mu si ke mwa liza-lizeza fela Sosaiti, kakuli seo si kona ku kwala linzila za mawaile ze tokwahala mwa ku talima za lipiho ze zwa kwa sibaka sa kozi.

Ha se ku nyakisisizwe hande, Sosaiti i ka bona haiba katengo ka kimululo ka tokwahala ku eziwa. Mizwale ba ba na ni buikalabelo ba ka zibiswa. Batu kaufela ba swanela ku swalisana ni maeluda ba ba etelela ilikuli butokwi bo butuna bwa mizwale kaufela bu talimwe ka ku kwanisa.—Mu bone Jehovah’s Witnesses—Proclaimers of God’s Kingdom, makepe 310-15.