“Mu Be ni Buitumelo”

¹ Buñata bwa luna ne lu twaelizwe kwa bwanana ku bulela kuli “shangwe” ni “ni itumezi” muta mutu a lu bonisa sishemo kamba musa. Paulusi u lu lemusa ku n’o ‘itumelanga’ kamita, mi sihulu lu swanela ku itebuha ku Jehova. (Makolo. 3:15, 16) Kono lu kona ku bonisa cwañi buitumelo ku Mubupi wa luna ya Makaza? Mi ki mabaka mañi a ipitezi ao lu na ni ona a ku itumela ku yena?

² Muapositola Paulusi n’a ñozi kuli: “Lu itumele ku Mulimu ya lu file ku tula ka mulen’a luna Jesu Kreste.” (1 Makor. 15:57) Ka nako ya kupuzo silimo ni silimo, lwa hupuliswa ka za lilato le li si na maciñekelo leo Mulimu hamohocwalo ni Kreste ba bonisize mwa ku fa tiululo ye lu fa sepo ya bupilo bwa kamita. (Joa. 3:16) Bakeñisa kuli ibata iba kuli kaufel’a luna lu se lu shwezwi ki batu be lu lata, lu ba ba itebuha hakalo kwa neku la sepiso ya Jesu ya zuho! Lipilu za luna za yubauka ka buitebuho ha lu kengeyela tibelelo ya ku punyuha mafelelezo a muinelo wo ku si na ku shwa ni kamuta. (Joa. 11:25, 26) Ku t’ata ku fumana manzwi a ku bonisa ka ona buitumelo kwa limbuyoti ze makaza kaufela ze lu sa na ni ku ipumana ku zona ku zwelela ku Jehova mwa Paradaisi ye taha ya lifasi-mubu. (Sin. 21:4) Ki mabaka mañi a mande ni ku fita ao mutu a kona ku ba ni ona kuli ‘a itumele’ ku Mulimu?

³ Mwa ku Boniseza Buitumelo ku Mulimu: Kamita ki ko ku swanela ku bonisa buitumelo bwa luna mwa tapelo ku Jehova kabakala bunde bwa hae. (Samu 136:1-3) Hape lwa susuezwa, ku bonahaza buitumelo bwa luna ku yena mwa linzila ze ñwi ze buniti. Ka mutala, lu ka fumaneha teñi luli kwa Kupuzo ya lifu la Kreste la Sunda, March 23. Ka tabo lu ‘kuteka Jehova ka tutu ya luna’ ili ku tusa ku ze tokwahala za kwa mubili za puteho ya fa sibaka ni za musebezi wa mwa lifasi kamukana. (Liprov. 3:9) Lwa fa kemelo ye tezi kwa maeluda ni ku swalisana ni bona, ili ku bonisa buitebuho bwa luna ku Jehova kwa neku la tuso ya fa ka bona. (1 Mates. 5:12, 13) Ka zazi, lwa satalala ku bukeleza muzamao o lukile ili o bubeka libizo la Mulimu. (1 Pit. 2:12) Jehova u tabiswa ki zona liponahazo ze kaufela za buitebuho bwa luna.—1 Mates. 5:18.

⁴ Ponahazo ya Luna ya Buitumelo ye Nde ka ku Fitisisa: Ku ba ni kabelo ya ka moyo kaufela mwa musebezi wa ku kutaza Mubuso, ku kuteka libizo la Jehova, ku bonisa buitebuho mwa tapelo, ni ku yemela niti ka busepahali ki ze ñwi za liponiso ze nde ka ku fitisisa za buitumelo bo bu zwelela kwa pilu ili zeo lu kona ku eza ku Mubupi wa luna kwa neku la zeo a lu ezelize kaufela. Jehova u tabela ku lu bona lu nze lu mu ezeza likezo za sebelezo ye kenile mwa ku yemela tato ya hae ya “kuli batu kamukana ba piliswe.” (1 Tim. 2:3, 4) Ki kabakaleo bahasanyi ba bañata hahulu ba ba kona ku ipakanya ka za teñi ba sweli ku alaba pizo ye ne li mwa Bukombwa bwa Luna bwa Mubuso bwa February ya ku iñolisa sina mapaina ba ku tusa mwa kweli nihaiba i liñwi fela ku za March, April, ni May. Ku ekeza teñi kwa buikatazo mwa bukombwa ki nzila ye nde ya ku ‘itumela’ ka yona ku Mulimu. Kana mu ka kona ku kena fa mindandwe ya mapaina mwa April? mwa May?

⁵ Lu filwe sepiso ye buniti ya ku pila ku ya ku ile. Ha lu ka i bona inze i talelezwa, lu ka ba ni mabaka a mañata hahulu a ekezehile ka zazi ni zazi a ku zwelapili ku fa buitumelo bwa ka nyakalalo ku Jehova.—Samu 79:13.