‘Mu Yahe Ba Ndu ya Mina’

¹ Ku si na ku kakanya, mwa mipilelo kaufela ku potoloha lifasi, bupilo bwa lubasi bu sweli bwa shakutuka. Lifasi la Satani li kapwami mwa bupumi ni muzamao o maswe. (1 Joa. 5:19) Seo si koñomeka putako ya luna ya ku ‘yaha ba ndu ya luna’ ni ku luta ba bañwi mo ba ka ezeza ka mukwa o swana ku ba bona.—Liprov. 24:3, 27.

² Likuka za Bibele Ki Silelezo: Sinotolo kwa tabo ya luli ya lubasi si fumanwa mwa ku itusisa likuka za Bibele. Liniti ze m’ata zeo li tusa silama ni silama sa lubasi mwa miinelo kamukana ya bupilo. Lubasi lo lu itusisa zona lu ka ba ni tabo mi lu ka ikola kozo ya silumeli.—Mu bapanye Isaya 32:17, 18.

³ Likuka ze ka lu tusa ku yaha ba ndu ya luna li beilwe mwa muinelo o nongile fa taba mwa buka ye nca, Sinotolo kwa Tabo ya Lubasi. Kauhanyo ni kauhanyo i fela ka kakwenda ka tuto ka ka tusa hahulu mwa ku koñomeka likuka zeo lilama za lubasi ba tokwa ku hupula. Buñata bwa tukwenda t’o tu kala ka puzo ye li, “Likuka ze za mwa Bibele li kona ku tusa cwañi. . . ?” Seo si hohela mamelelo kwa mihupulo ya Mulimu ilikuli lu utwisise mwa hupulela fa taba ye buhisanwa.—Is. 48:17.

⁴ Mu zibisise hande buka yeo. Mu itute ku fumana likuka ze kona ku tusa muta butata bo bu fapana-fapana bu zuha. Buka yeo i buhisana litaba ze cwale ka ze: zeo mutu a swanela ku batisisa ha nyakisisa ya kona ku ba sinyalana ni yena (kauhanyo 2), ki miinelo mañi ya butokwa kwa tabo ye inelela ya mwa linyalo (kauhanyo 3), ka m’o bashemi ba kona ku huliseza bana ba bona ba ba sa nonoboka kuli ba be ba ba hulile ba ba ikalabela, ili ba ba saba Mulimu (kauhanyo 6), mwa ku sileleleza lubasi kwa likukuezo ze shandaula (kauhanyo 8), likuka ze tusa mabasi a mushemi ya li likwasha kuli a konde (kauhanyo 9), tuso ya kwa moya ya mabasi a katazwa ki ku ngongwelwa ki lino ze kola ni mifilifili (kauhanyo 12), sa ku eza muta litamo za linyalo li ba fa mayemo a ku sinyeha (kauhanyo 13), se si konwa ku eziwa mwa ku kuteka bashemi ba ba li basupali (kauhanyo 15), ni mwa ku fumanela nako ya kwapili ye inelela ya lubasi lwa hae mutu (kauhanyo 16).

⁵ Mu Itusise ka ku Tala Buka ye Nca: Haiba ha mu si ka eza kale cwalo, kiñi ha mu sa ituti buka ya Tabo ya Lubasi sina lubasi hamoho? Hape, nako kaufela yeo lubasi lwa mina lu unjamiwa ki butata kamba lishemaeto ze nca, mu lundulule likauhanyo ze li mwa buka ili ze ama zeo, mi mu nyakisise ka tapelo mwa ku itusiseza kelezo. Ka ku ekeza, mwahal’a March, mu lukuluhe mwa ku tomahanya nako ya mwa sebelezo ya mwa simu ilikuli mu kone ku lika ku siyalisa Sinotolo kwa Tabo ya Lubasi mwa mazoho a batu ba bañata ka mo ku konahalela kaufela.

⁶ Mabasi a’ sebelisa buipeyo bwa silumeli a ka tiiswa kwa moya ni ku swalisana mi a ka be a itukiselize hande mwa ku talimana ni litwaniso za Satani. (1 Tim. 4:7, 8; 1 Pit. 5:8, 9) Lu ba ba itumela hakalo kuli lu na ni litaelo za bumulimu ze zwelela ku Musimululi wa lubasi!