Ku Tusa mwa ku Tahisa Nyangela ye Tiile ka ku Hulisa Lipimo ni Tabo ya Lubasi
1 Kacenu buñwi bwa lubasi bu mwa sineneketo ye tuna ku fita lili kaufela. M’ata a matuna a beile ku ba teñi kwa bupilo bwa lubasi mwa lubeta. Batu ba bañata ba bilaela ka za palo ye ekezeha ya litelekano ni ku fela kwa lipimo za mabasi mwa nyangela ya luna. Kacenu lubasi lwa cinca. Bukwenuheli bwa ba banca, ku itusisa maswe kwa bana, ku nyandisa sinyalana ni yena, bucakolwa, ni butata bo buñwi bo bu holofaza bu felisa tabo ya mabasi a mañata. Kwa bana ni ba bahulu ba bañata, lubasi ni kamuta haki makundamo.
2 Mabasi a’ sebelisa likuka za Bibele ni ku toma bupilo bwa ona fa Mubuso wa Mulimu a fumani kuli butata bwa ona bu fukuzehile, kamba ku tatululwa, mi a fumana tabo. Kana l’o haki lushango lo lunde lwa ku tiseza mabasi a mwa kalulo ya mina mwa kweli ya June, ka ku itusisa buka ya Sinotolo kwa Tabo ya Lubasi? Lu ka eza cwañi seo? Ka ku hohela mamelelo ya ona kwa Linzwi la Mulimu, le li fa likuka za bupilo bwa lubasi bwa tabo. Batu ba nahana ka za bupilo bwa lubasi. Mu itatele ku atumela batu ka taba ya bupilo bwa lubasi. Mu bulele ze nde ka za teñi. Mu kona ku kala cwañi?
3 Mwa kona ku kala ka nzila ye:
◼ “Ni til’o abana ni mina litaba ze ñwi ka za butata bo bu ama batu ba bañata kacenu. Bu ama tabo ya lubasi. Kaufel’a luna lu bata mabasi a luna ku ba a’ tabile, kono lwa ziba kuli mabasi a mañata h’a na tabo luli. Ki sifi se mu nahana kuli si ka tusa batu ku fumana tabo ye tuna mwa bupilo bwa bona bwa lubasi? [Mu litele kalabo.] Lipiho li bonisa kuli batu ba bañata ba fumana butata mwa lapa. Ki sifi se mu lumela kuli si ka tusa mabasi ku tiya hahulu ni ku fumana tabo? [Mu litele kalabo.] Kana ha mu lumeli kuli neikaba hande ku teeleza ku sa bulela Mubupi wa lubasi? U file likuka ze tokwahala mwa Bibele. Zona likuka zeo li talusizwe mwa buka ye ya Sinotolo kwa Tabo ya Lubasi.” Mu bulele litoho za likauhanyo ze ñwi ze hoha mamelelo. Mu apule fa likepe 10 mi mu bale mubamba wa mafelelezo mwa paragilafu 17 ku fita kwa mafelelezo a paragilafu 18. Mu fe buka yeo. Mu taluse kuli mu na ni ze ñata za ku bulela mi mu buze nako ye mu kona ku kopana hape.
4 Kamba mwa kona ku kalisa puhisano ka ku bulela butata, mwendi ka ku bulela cwana:
◼ “Mañi ni mañi niha bata buiketo ni buikolwiso, ku bonahala kuli mabasi a mañata h’a si ka fumana zeo luli. Ki sifi se mu nahana kuli ne si ka a fumanisa tabo ya luli? [Mu litele kalabo.] Kale-kale k’o, Bibele ne i patuluzi butata bo lu bona mwa mabasi kacenu. [Mu bale 2 Timotea 3:1-3.] Niteñi, Bibele hape i bulelela mabasi sa ku eza kuli a tatulule butata b’o ili ku fumana tabo ye inelela. Likuka za yona li ñozwi mwa buka ye, ya Sinotolo kwa Tabo ya Lubasi.” Cwale mu bonise kakwenda ka lundululo kwa mafelelezo a kauhanyo ye swanela, mu ka bale, mi mu fe buka yeo.
5 Fa musipili wa makutisezo, mwa kona ku ba ni sikonkwani sa ku kalisa tuto ya Bibele ka ku bulela cwana:
◼ “Ni nahanile ze ne mu bulezi ka za bupilo bwa lubasi, mi ni mi tiselize nto ye ni nahana kuli mu ka ikola yona. [Mu bonise broshuwa ya Seo A Tokwa, mu apule fa likepe 16, mi mu bale lipuzo ze silezi ze fahalimu.] Ka niti, mañi ni mañi mwa lubasi u lukela ku peta kalulo ya hae ye ekeza kwa tabo ya lubasi. Haiba mu na ni mizuzu ye sikai, ni ka mi bonisa mo mu kona ku tusezwa hahulu ki litaba ze.” Cwale mu kalise ku ituta Tuto 8.
6 Haiba fa musipili wa pili ne bu buhisani butokwa bwa ku teeleza ku Mubupi wa lubasi, mu zwisezepili puhisano ka ku bulela nto swana sina ye:
◼ “Ba bañwi ba nahana kuli kelezo ya Bibele ha i sebezi mwa lifasi la luna la cwale. Mina mu nahanañi ka za seo? [Mu litele kalabo.] Kana ha mu lumeli kuli buka ye fa kelezo ye nde ye lu konisa ku ba ni bupilo bwa lubasi bwa tabo ya sebeza? [Mu litele maikuto.] Mihupulo ni likezo ze ama bupilo bwa lubasi li cincize mi ze zwile mwateñi ze lu bona kacenu haki ze nde. Kono mabasi a’ sebelisa se i bulela Bibele ka mutomo a tiile mi a tabile.” Mu bale Makolose 3:18-21. Mu taluse kuli lu fa tuto ya Bibele ya fa ndu ye sa lifelwi.
7 Ka mo ku inezi fela, ha mu bulela ni batu ka za butata bwa bupilo bwa lubasi, mu be ni maseme. Mu pime ku fa muhupulo wa kuli mu nahana kuli muñ’a ndu u na ni butata mwa lubasi lwa hae. Neikaba hande ku bulela ka za butata sina bo bu li teñi kwa nyangela ka nañungelele.
8 Lu kolwa kuli mu lumela kuli buka ye i ka tusa hahulu mabasi mwa kalulo ya luna. Kacwalo, ha mu nze mu ikataza ku tahisa balutiwa, mu nahane ka za ku tusa mabasi kamukana. Mu a tuse ku bona butokwa bwa lushango lwa Mubuso ilikuli a kone ku abana hamoho mwa limbuyoti za kwapili. (Sin. 21:4) Ha lu abeleñi hahulu buka ya Tabo ya Lubasi ilikuli batu kai ni kai ba kone ku tusiwa ki Linzwi la Mulimu kuli ba fumane nako ya kwapili ya kamita.—1 Tim. 6:19.