Ku Fumaneha kwa Mikopano Kamita ki ko Kunde Luli!
1 Ka lilimo ze mashumi-shumi mwa Eastern Europe, buñata bwa mizwale ba luna ba ba lateha ne ba tuhelisizwe ku ba nga ni mikopano ya nyangela. Mu nahane tabo ye ne ba bile ni yona kona ku tuheliswa ko ha ne ku felile mi ne ba kona ku kopana ka tukuluho!
2 Muokameli wa mupotoloho yo muñwi ha n’a potezi puteho ye ñwi ye cwalo, n’a ñozi ka za teñi kuli: “La Bubeli manzibwana, kwa makalelo luli a ku pota kwa ka, lipangaliko ze tahisa mufutumala za mbwenjuka. Kwande ne ku kangezi ka silami, mi mwahali, mufutumala ne u eza 5 degrees celsius. Mizwale ba ina ba apezi licansi, litaulo mwa milala ni kwa litoho, masokisi a kwa mazoho, ni liheta ze tiile. Ha ku na ya n’a kona ku kwalula Bibele ya hae, kakuli ku apula makepe ne ku sa konahali. Ha ne ni yemi fa libulelelo ni nze ni apezi suti, ne ni mbumbile kabakala ku hazela, mi mo ne ni bulelela kaufela, ne ni kona ku bona musi o zwa mwa hanu ya ka. Kono nto ye ne i ni tabisize ki kuli ne ni si ka utwa nihaiba linzwi li li liñwi la pilaelo. Mizwale kaufela ne ba bulezi ka za mo ne ku bezi hande ku ba teñi!” Mizwale bao mane ne ba si ka nahana za ku sa fumaneha kwa mukopano w’o!
3 Kana Ki Mona mo Lu Ikutwela? Kana lwa lata nako ya ku kopana ka tukuluho kwa mikopano ya luna ya viki ni viki? Kamba kana ha l’u ngi mikopano ka butokwa miinelo ha i li ye minde? Ku fumaneha kwa mikopano kamita ku kana kwa ba t’ata, mi fokuñwi lu kana lwa ba ni libaka le li tiile la ku sa ba teñi. Kono mu si ke mwa libala ni kamuta kuli, mwahal’a luna ku na ni ba bañwi bao ku si na taba ni ku cembala, matuku-tuku a mubili, buyanga, mipateho ya misebezi, ni buikalabelo bo buñwi bo butuna, ba bona butokwa bwa ku ba kwa mikopano mi ibata i ba ka nako kaufela ba funaneha teñi. Yeo ki mitala ye minde luli ye lu kona ku likanyisa!—Mu bapanye Luka 2:37.
4 Lu itwaeze ku yemela bulapeli bwa niti ka ku fumaneha kwa mikopano ya luna kaufela ya Sikreste, ku kala ka kakwatanyana ka tuto ya buka ku yo fita kwa mukopano o mutuna. Ki kabakalañi ha lu swanela k’u nga kuli ku ba teñi ku yona mikopano yeo ki kwa butokwa? Kakuli ki Mulimu ya laezi kuli lu kopane hamoho. Kono ku na ni mabaka a mañwi a butokwa. Kaufel’a luna lu tokwa lituso za ketelelo ya bumulimu ni tuso ya moya o kenile, ze fumaneha kwa mikopano. (Mat. 18:20) Lwa yahiswa ka ku susuezana ha lu kopana ni mizwale ba luna.—Maheb. 10:24, 25.
5 Ka nako ya ku fetuha, Pitrosi n’a ize: “[Muñ’a] ka, ki bunde ha lu ka ina mo.” (Lu. 9:33) Lu swanela ku ikutwa ka nzila ye swana ka za mikopano ya luna ya Sikreste kaufela. Kaniti, ki ko kunde luli ku fumaneha kwa mikopano kamita!