Mu Kutaze Kwa “Batu ba Mufuta Kaufela”

1. Bakutazi ba taba ye nde ba ba na ni buanyu ba swana cwañi ni bapangi ba likwala?

¹ Mupangi wa sikwala u banga ni lisebeliso ze shutana-shutana, mi wa ziba fa lukela ku itusiseza sisebeliso ni sisebeliso ni mwa ku itusiseza sona. Ni luna lu na ni lisebeliso ze shutana-shutana ze lu tusa ku peta musebezi wa luna wa ku ba bakutazi ba taba ye nde. Ka mutala, ku na ni libroshuwa ze ñata ze shutana-shutana ze lukiselizwe ku lu tusa ku kutaza kwa “batu ba mufuta kaufela.” (1 Makor. 9:22) Ñambeko ya Bukombwa bo, i kolohanya ze ñwi za libroshuwa zeo, ku bonisa batu be li lukiselizwe, ni ku fa liakalezo za mo li kona ku felwa mwa simu.

2. Ki lili fo lu swanela ku fela libroshuwa mwa bukombwa?

² Fo Lu Swanela ku Itusiseza Libroshuwa: Mupangi u itusisanga sisebeliso fa lemuhela kaufela kuli si ka mu tusa. Kamukwaoswana, lwa kona ku fa mutu broshuwa fo lu lemuhela kaufela kuli ya kona ku mu tusa isiñi feela mwa likweli ze i fiwa broshuwa yeo. Ka mutala, haiba hatiso ye lu fa mwa kweli yeo ki buka ya Bibele I Lutañi? mi lu kutaza mwa naha mo ku pila batu ba ba si Bakreste ili ba ba sa tabeli hande litaba za Bibele, ki hande ku ba fa broshuwa ye swanela, kihona lu ka ba fa buka ya Bibele I Lutañi? hamulaho wa ku ba tusa ku ba ni cisehelo mwa litaba za Bibele.

3. Ki kabakalañi ha lu swanela ku ba ni buanyu mwa ku itusisa lisebeliso za luna za ku itusisa mwa bukombwa?

³ Mañolo a lumba batu ba ba na ni bukwala mwa musebezi wa bona. (Liprov. 22:29) Ku si na ku kakanya, ha ku na musebezi wa butokwa hahulu inge “musebezi o kenile wa taba ye nde.” (Maro. 15:16) Kuli lu be “mubeleki ya sa swabeli se siñwi,” lu swanela ku lika ka taata ku ba ni buanyu mwa ku itusisa lisebeliso za luna.—2 Tim. 2:15.