Mu Tuse Batu ku Teeleza ku Mulimu
1. Ki libroshuwa mañi ze ne zwisizwe kwa Mukopano wa Sikiliti wa “Mubuso wa Mulimu u Tahe!” mi ki lika mañi ze tahisa kuli libroshuwa ze, li be ze tusa hahulu?
1 Kwa Mukopano wa Sikiliti wa “Mubuso wa Mulimu u Tahe!” ne ku zwisizwe libroshuwa ze peli ze nca, ya Mu Teeleze ku Mulimu mi mu Pile ku ya ku Ile ni ye nolofalizwe ye li, Mu Teeleze ku Mulimu. Bakeñisa kuli li na ni litaba ze nyinyani, libroshuwa ze, li kona ku tolokiwa ka bubebe, ili ka bunolo. Mane ka nako ye ne i zwisizwe broshuwa ya Mu Teeleze ku Mulimu mi mu Pile ku ya ku Ile, broshuwa ye, ne se i lumelelizwe ku tolokiwa mwa lipuo ze 431.
2. Ki bo mañi ba ba ka tusiwa ki libroshuwa ze?
2 Ki bo mañi sihulu ba ba ka tusiwa ki libroshuwa ze? Ha mu nyakisise miinelo ye latelela ye ezahalanga kamita mwa lifasi:
• Muhasanyi ya buisana ni muñaa ndu, mwendi fa musipili wa pili kamba fa musipili wa makutisezo, u lemuha kuli muñaa ndu ha zibi ku bala kamba a bali hande.
• Muhasanyi u kutaza kwa batu ba ba bulela puo ye na ni lihatiso za luna li sikai kamba ye si na lihatiso za luna. Kamba mwendi batu ba bañata mwa kalulo ya simu yeo, ha ba zibi ku bala hande puo ye ba bulela.
• Muhasanyi u itusisa puo ya bosusu ku kutaza susu mwa sibaka sa kutalezanga.
• Mushemi u lakaza ku luta niti ku mwanaa hae yo munyinyani ya si ka ziba kale ku bala.
3. Makepe a broshuwa ya Mu Teeleze ku Mulimu a lukisizwe cwañi?
3 Mo li Lukiselizwe: Broshuwa ya Mu Teeleze ku Mulimu i na ni litaba ze nyinyani hahulu, kwatasaa likepe ni likepe ku na ni mubamba u li muñwi feela ni Liñolo le li bonisizwe, ili ze tunumeka lisupo ze tuna. Ki kabakalañi ha i lukisizwe ka nzila yeo? Mu nge kuli mutu yo muñwi u mi fa broshuwa ye mwa puo ye mu sa koni ku bala, mwendi ye ñozwi ka litaku ze mu sa zibi. Kana ne mu ka i tabela niha neikaba ni maswaniso a mande? Mwendi ne mu si ke mwa i tabela. Kamukwaoswana, batu ba ba sa zibi ku bala ba zwafanga ha ba bona lihatiso ze na ni litaba ze ñata. Kabakaleo, fa likepe ni likepe ku na ni maswaniso a lukisizwe hande mi ku beilwe ni lisupo ze supeza mwa swanela ku nyakisisezwa maswaniso.
4. Makepe a broshuwa ya Mu Teeleze ku Mulimu mi mu Pile ku ya ku Ile a lukisizwe cwañi?
4 Broshuwa ya Mu Teeleze ku Mulimu mi mu Pile ku ya ku Ile i na ni maswaniso a swana ni a mwa broshuwa ya Mu Teeleze ku Mulimu. I lukiselizwe ku ituta ni batu ba ba sa koni ku bala hande kamba ba ba sa ituta ku bala. Broshuwa ye hape ya kona ku itusiswa ki mutu ya zamaisa tuto ku muituti ya itusisa broshuwa ya Mu Teeleze ku Mulimu. Tuto ni tuto i nyakisiswa fa makepe a mabeli, mi i na ni puzo fahalimu a likepe le li kwa nzohoto, ili puzo ye alabilwe fa makepe ao. Kwa maswaniso ku na ni litaba ze ñozwi ni mañolo a bonisizwe. Kwatasi a makepe a mañata ku na ni kambokisi ka ka na ni litaba ze ekelizwe ni mañolo a bonisizwe, ili ze kona ku nyakisiswa ni muituti ku likana ni buikoneli bwa hae.
5. Ki lili fo lu swanela ku fela libroshuwa ze mwa simu mi lu kona ku li fa cwañi kwa batu?
5 Mwa ku Itusiseza Zona: Mwa kona ku fa ifi kamba ifi ya libroshuwa ze, mwa bukombwa bwa fa ndu ni ndu fo mu bonela kaufela kuli za kona ku tusa, niha i si zona ze fiwa mwa simu kweli yeo. Mwa kona ku li fa kwa batu ha mu eza musipili wa makutisezo ka ku taluseza mutu ya tabela kuli mu na ni nto ye ni bata ku mu bonisa kona mu ka mu fa ye ñwi ya libroshuwa zeo.
6. Lu ka zamaisanga cwañi tuto ya Bibele ka ku itusisa libroshuwa ze?
6 Bakeñisa kuli broshuwa ya Mu Teeleze ku Mulimu ha i na lipuzo, puisano ha i na ku ba ya lipuzo ni likalabo sina mo ku belanga kamita ha ku itusiswa buka ya Bibele I Lutañi? Batu kaufela ba tabelanga ku teeleza kwa makande. Kamukwaocwalo, mu itusise maswaniso ku talusa makande a mwa Bibele a ñozwi ka susumezo ya moya wa Mulimu. Mu taluse ze bonisizwe mwa maswaniso. Mu taluse litaba zeo ka mafulofulo. Mu kupe muituti ku talusa za bona mwa maswaniso ao ni mwa utwisiseza. Mu bale mañolo a kwatasaa likepe, ni ku buisana ni yena za talusa. Mu mu buze lipuzo ze ka tahisa kuli a taluse maikuto a hae ni ku mi tusa ku ziba nji wa utwisisa za ituta. Haiba u itusisa broshuwa ya Mu Teeleze ku Mulimu mi mu Pile ku ya ku Ile, ha mu buisana siswaniso ni siswaniso mu bale ni yena manzwi a kwa siswaniso ni mañolo a bonisizwe.
7. Lu kona ku tusa cwañi muituti wa luna wa Bibele ku eza zwelopili?
7 Mu Tuse Muituti ku Eza Zwelopili: Mwendi puisano ya mina ni muituti i ka mu tusa ku ba ni takazo ya ku ituta ku bala ilikuli a kone ku itutanga za Jehova ka ili yena. (Mat. 5:3; Joa. 17:3) Kabakaleo, haiba mu itusisanga broshuwa ya Mu Teeleze ku Mulimu, mwendi hamulaho wa nako mwa kona ku kupa muituti wa mina kuli mu mu lute ku bala, mi mwa kona ku shimbulukela mwa broshuwa ya Mu Teeleze ku Mulimu mi mu Pile ku ya ku Ile. Ibe kuli mu itusisa broshuwa ya Mu Teeleze ku Mulimu kamba ya Mu Teeleze ku Mulimu mi mu Pile ku ya ku Ile, muituti ha na ku ba ya itukiselize kolobezo niha se mu felize ku ituta broshuwa ni yena. Mu swanela ku kalisa ku ituta ni yena mwa buka ya Bibele I Lutañi? kamba mwa buka ye ñwi ye swanela ye ka mu tusa ku utwisisa Bibele ka ku tala.
8. Ki kabakalañi ha mu itumela hahulu ka ku ba ni lihatiso ze nca ze za ku itusisa mwa bukombwa?
8 Batu ba lukela ku teeleza ku Mubusi wa pupo kamukana kuli ba kone ku pila kamita ni mita. (Isa. 55:3) Mi tato ya Jehova ki ya kuli “batu ba mufuta kaufela,” ku kopanyeleza cwalo ni ba ba sa koni ku bala, ba itute ku teeleza ku yena. (1 Tim. 2:3, 4) Lwa itumela hahulu ka ku ba ni lihatiso ze nca ze, ze lu kona ku itusisa ku luta batu ze ba kona ku eza kuli ba teeleze ku Mulimu!