Joani Ulukisa Nzila

Joani, mwana Zakaria ni Elizabeta, naabile mupolofita hanaahulile. Jehova naaitusisize Joani kuluta batu kuli Mesia wataha. Kono mwa sibaka sa kukutaleza mwa masinagoge ni mwa litolopo, Joani naakutalezanga mwa lihalaupa. Batu nebazwanga mwa Jerusalema ni mwa libaka kaufela za Judea kuto lutiwa ki Joani. Naabalutile kuli nebatokwa kutuhela kueza lika zemaswe kuli batabise Mulimu. Hamulaho wa kuteeleza ku Joani, buñata bwa batu babakela libi zabona, mi Joani abakolobeza mwa Nuka ya Jordani.

Joani naapila bupilo bobubunolo. Naatinanga libyana zepangilwe fa boya bwa kamele mi naacanga nziye ni linosi za mwa naheñi. Batu nebanyolezwi kuziba Joani. Nihaiba Bafalisi ni Basaduki bane baikuhumusa nebatile kuto mubona. Joani ababulelela kuli: ‘Mutokwa kuambuka lika zemaswe zemuezanga ni kubaka. Musike mwanahana kuli muba butokwa hahulu inze muipulelisa kuli mu bana ba Abrahama. Taba yeo haitalusi kuli mu bana ba Mulimu.’

Batu babañata bataha ku Joani mi bamubuza kuli: ‘Lutokwa kuezañi kuli lutabise Mulimu?’ Joani abulelela Majuda ali: ‘Haiba munani liapalo zepeli, mufe kwateñi yomuñwi yasina.’ Kana mwaziba libaka hanaabulezi cwalo? Naabata kutusa balutiwa bahae kuziba kuli nebatokwa kulata batu kuli batabise Mulimu.

Joani naabulelezi batelisi kuli: ‘Musepahale mi musike mwapuma batu.’ Naabulelezi masole kuli: ‘Musike mwaamuhela likweta kamba kubulela buhata.’

Baprisita ni Malivi ni bona nebatile ku yena mi bamubuza kuli: ‘Ki wena mañi? Batu kaufela babata kuziba.’ Joani kihaa li: ‘Ki na linzwi yahuweleza mwa lihalaupa, yalibisa batu ku Jehova, sina mwanaapolofitezi Isaya.’

Batu nebalata zanaa baluta Joani. Batu babañata nebakakanya haiba Joani neli yena Mesia. Kono ababulelela kuli: ‘Yanifita kwa maata wataha. Mi hanina tukelo ya kutamulula mihala ya makatulo ahae. Nikolobeza ka mezi, kono yena ukakolobeza ka moya okenile.’