Jesu Uba Mesia

Joani naasweli kuluta kuli: ‘Yanifita kwa maata wataha.’ Jesu hanaatuha akwanisa lilimo ze 30, ataha kwa Galilea kwa Nuka ya Jordani, ili kwanaakolobeleza batu Joani. Jesu naabata kuli Joani amukolobeze, kono Joani ali ku yena: ‘Haniswaneli kukukolobeza. Ki wena yaswanela kunikolobeza.’ Jesu ali ku Joani: ‘Jehova ubata kuli unikolobeze.’ Kacwalo, bakena mwa Nuka ya Jordani, mi Joani anwelisa Jesu mwa mezi.

Jesu hasaazwile mwa mezi, alapela. Ka yona nako yeo, mahalimu akwaluluha, moya wa Mulimu washetumukela ku yena sina liiba. Jehova abulela kuzwelela kwa lihalimu kuli: “Ki wena Mwanaka, yalatwa; yanitabisa.”

Moya okenile wa Jehova hane utile ku Jesu, aba Kreste, kamba Mesia. Cwale naaka kala musebezi wanaa mulumezi Jehova kuli ato eza fa lifasi.

Hamulaho feela wa kolobezo yahae, Jesu aya mwa lihalaupa mi ayo ina mwateñi mazazi a 40. Hanaakutile kuzwa mwa lihalaupa, aya kuyo bona Joani. Jesu hanaataha ku yena, Joani ali: ‘Yo ki yena Ngunyana wa Mulimu yakazwisa sibi sa lifasi.’ Ka kubulela cwalo, Joani naatusize batu kuziba kuli Jesu neli yena Mesia. Kana mwaziba zeneezahalile Jesu hanaali mwa lihalaupa? Halunyakisiseñi ka za teñi.