Ku fa Taluso ye Utwahala fa Ku Ba Teñi kwa Kreste

“Mwan’a mutu nako y’a ka taha mwa kanya ya hae, . . . u ka keta ba bañwi ku ba bañwi.”—MATEU 25:31, 32.

1. Bahulu ba bulapeli ba Krestendomu ba tolokile manzwi a’ kwa Mateu 24:3 ku ba a’ talusa nto mañi?

MAZAZI a malalu pili Jesu a si ka shwa kale, balutiwa ba hae ba bane ne ba mu atumezi ni ku mu kupa ka buniti kuli: “U lu bulelele zeo fo li ka bonahalela, ni se si ka supa ku taha [“ku ba teñi,” NW; Sigerike, pa·rou·siʹa] kwa hao, ni ku fela kwa lifasi.” Ka lilimo ze myanda-nda bahulu ba bulapeli ni bañoli ba Krestendomu se ba tolokile ona manzwi ao a n’a bulezwi ku Jesu kwa Mateu 24:3 kuli a talusa kuli hape u ka bonahala mwa nama ka ku bonwa ki mufuta wa mutu kamukana. Kacwalo, se ba lutile kuli ku kuta kwa Kreste ku ka bonahala ka poniso ye tuna ni ku bonahala kwa kanya ye tuna. Ba ama ku seo sina ku taha kwa Kreste kwa bubeli. Kono kana liakalezo za bona li nepahezi?

2, 3. (a) Ki fapahano ifi yeo Volyumu 2 ya Studies in the Scriptures ne i ezize mwahal’a manzwi a “ku taha” ni “ku ba teñi”? (b) Ki sifi seo batu ba Jehova ne ba fitile fa ku utwisisa ka ku ama kwa taluso ya pa·rou·siʹa ya Kreste?

² Pili 1889 i si ka fita kale, batoziwa ba Jehova, ka ku ba sina balwali ba liseli ba mwa lilimo za mwanda wa bu-19, ne se ba amuhezi kale hakululo fa taba ya ku kuta kwa Kreste. Mwa Volyumu 2 ya Studies in the Scriptures, makepe 158 ku isa 161, Charles T. Russell, prezidenti wa pili wa Watch Tower Bible and Tract Society, n’a ñozi kuli: “Parousia . . . i yemela ku ba teñi, mi ni kamuta ha li swaneli ku tolokiwa sina ku taha, sina mo ku inezi mwa Bibele ye atile ya Sikuwa . . . ‘Emphatic Diaglott,’ toloko ye butokwa hahulu ya Testamente ye Nca, i toloka hande parousia, kuli ku ba teñi . . . , isiñi kuli ku taha, inge y’a mwa nzila, kono ku ba teñi, sina hamulaho wa ku fita [Jesu] u bulela kuli, ‘Mo ne ku inezi mwa mazazi a Nuwe, ku ka ba cwalo kwa parousia [ku ba teñi] kwa Mwan’a mutu.’ Mu lemuhe, kuli bapanyo yeo haki ya mwahal’a ku taha kwa Nuwe ni ku taha kwa Mulen’a luna . . . Fapahano, kacwalo he, i mwahal’a nako ya ku ba teñi kwa Nuwe mwahal’a batu ‘pili munda u si ka ba teñi,’ ni nako ya ku ba teñi kwa Kreste mwa lifasi, fa ku taha kwa hae kwa bubeli, ‘pili mulilo u si ka ba teñi’—ili but’ata bo butuna bwa mwa Lizazi la Mulena [Jehova] ka b’o lusika lo lu ka fela.”—Mateu 24:37.

³ Kacwalo batu ba Jehova ba mwa lilimo za mwanda wa bu-19 ne ba utwisisize ka ku nepahala kuli pa·rou·siʹa ya Kreste neikaba ya ka ku sa bonahala. Ne ba fitile hape fa kutwisiso ya kuli mafelelezo a Linako za ba Macaba na ka fita kwa mafelelezo a mbumbi ya 1914. Monyehelo ya kwa moya ha ne inze i zwelapili, hamulaho ne ba utwisisize kuli Jesu Kreste n’a beilwe fa lubona mwa lihalimu sina Mulena wa Mubuso ku sona silimo se si swana seo, sa 1914.—Liproverbia 4:18; Daniele 7:13, 14; Luka 21:24; Sinulo 11:15.

‘Ku Ba Teñi kwa Mulen’a Luna’

4. ‘Ku ba teñi kwa Mulen’a luna Jesu Kreste’ ku ama kwa nto mañi?

⁴ Mwa lizazi la luna, kacwalo, ki sifi se si taluswa ki pulelo ya mwa Bibele ya “ku [ba teñi, NW] kwa Mulen’a luna Jesu Kreste”? (1 Matesalonika 5:23) C’aziba yo muñwi u talusa kuli linzwi la “ku ba teñi,” pa·rou·siʹa, “ne li fitile fa ku ba linzwi le li zibahala hahulu kwa neku la ku pota kwa mutu wa situlo se si pahami, [sihulu] kwa malena ni babusi ba ba potela silalo.” Kacwalo pulelo yeo i ama kwa ku ba teñi ka bulena kwa Mulena Jesu Kreste sina Mulena, ku kala ka 1914 ni ku isa cwalo kwapili, hamulaho wa ku beiwa kwa hae fa lubona mwa lihalimu. U teñi ka ku sa bonahala ili ku ‘busa mwahal’a lila za hae,’ ku busa ka ku tala sina Mulena kuli a taleleze taelo yeo ya bupolofita. (Samu 110:2) Ka lilimo ze bat’o ba ze 79, batu ba lifasi-mubu se ba ipumani mwa muinelo o’ tahiswa ki ku ba teñi kwa Kreste kwa ka bulena ili ka ku sa bonahala.

5. Ki likezahalo lifi za mwahal’a pa·rou·siʹa ze ka buhisanwa mwa litaba ze talu za magazini ye?

⁵ Mwa litaba ze talu ze, ze tatamani, lu ka lundulula bupaki bo bu makaza kwa lika ze petilwe ki Mubuso wa Kreste mwahal’a yona nako ye. Pili, lu ka tahisa bupolofita bwa mwa Bibele bo bu sikai bo bu bulela cimo ka za likezahalo ze se li ezahezi kale kamba mane ze sweli ku ezahala cwale. Sa bubeli, lu ka talusa musebezi o mutuna o swelwi ku petiwa ki sitopa sa mutanga ya sepahala ili ya na ni kutwisiso y’a itusiswa ki Jesu mwahal’a yona nako ye kamukana ya ku ba teñi kwa hae ka bulena. (Mateu 24:45-47) Taba ya bulalu i ka lu taluseza mafelelezo a makaza, nako ya “ñalelwa ye tuna.” Yeo ki nako ya ka taha Jesu sina Muatuli wa Jehova ku t’o timeza batu ba ba si ka luka ni ku lukulula ba ba lukile. (Mateu 24:21, 29-31) Yona nako yeo ya timezo i taluswa ki muapositola Paulusi sina ye tisa ku “mina ba ba kaleliswa, . . . pumulo ni luna, nako y’a ka bonahala Mulena Jesu, a zwa kwa lihalimu ni mangeloi a mata a hae, Mwa malimi a mulilo; kuli a nate ka koto ba ba sa zibi Mulimu, ni ba ba sa ipeyi kwatas’a Evangeli ya Mulena Jesu.”—2 Matesalonika 1:7, 8.

Sisupo

6. Ki sisupo sifi se si shobani-shobani se si talusizwe kwa Mateu likauhanyo 24 ni 25?

⁶ Lilimo ze myanda ye 19 kwamulaho k’o, balutiwa ba Jesu ba ne ba lwala liseli ne ba mu kupile sisupo, kamba bupaki, bwa ku ba teñi kwa hae mwa nako ya kwapili mwa m’ata a Mubuso. Kalabo ya hae, ye ñozwi mwa Mt likauhanyo 24 ni 25 za Mateu, ne i file sisupo se si shobani-shobani, ili seo miinelo ya sona kaufela cwale se i talelezwa fa sipimo sa mwahal’a macaba kaufela. Talelezo ya sisupo seo i tisa nako ye t’ata ni ya ku likiwa ko kutuna. Jesu n’a lemusize kuli: “Mu bone kuli mutu a si ke a mi puma. Kakuli ba bañata ba ka taha ka Libizo la ka, inze ba li: Ki na Kreste; mi ba bañata ba ka pumwa. Mu ka utwa lindwa ni milumo ya lindwa; mu bone kuli mu si ke mwa saba, kakuli zeo li tamehile ku taha; kono, fo, ha ku si ka ba kale mafelelezo.”—Mateu 24:4-6.

7. Ki miinelo mañi ya sisupo ye lu boni i talelezwa haisali ku zwiwa ka 1914?

⁷ Jesu ka ku zwelapili n’a polofitile kuli ku ka ba ni lindwa fa sipimo se si si ka bonwa kale. Ka ku taleleza seo, ze peli za zeo se li balilwe sina lindwa za lifasi, ye ñwi ku zwa 1914 ku isa 1918 mi ya bubeli ku zwa 1939 ku isa 1945. Hape, n’a bulezi kuli ku ka ba ni kusufalo ya lico ni lizikinyeho ku zwa mwa sibaka se siñwi ku ya ku se siñwi. Bakreste ba ba buniti ne ba ka nyandiswa hahulu. Ka buniti bwa bupolofita, Lipaki za Jehova, balwali ba liseli ba mwa lizazi la cwale, ba ipumani mwa nyandiso mwahal’a lilimo ze mashumi a ketalizoho ka a malalu ze se li felile ha ba nze ba kutaza taba ye nde ya Mubuso wa Mulimu “mwa lifasi kaufela, ibe bupaki mwa macaba kamukana.” (Mateu 24:7-14) Yearbook of Jehovah’s Witnesses ye ñwi ni ye ñwi i ekeza kwa bupaki bwa kuli kalulo yeo ya sisupo i swelwi ku talelezwa.

8, 9. (a) Ku ba teñi kwa Jesu kwa silena ku ama nto mañi? (b) Bupolofita bwa Jesu bo bu ama ku bo Kreste ba buhata bu bonisa nto mañi ka za sibaka ni mukwa wa ku ba teñi kwa hae?

⁸ Bakeñisa kuli bulena bwa Jesu bu kwahela lifasi-mubu kaufel’a lona, bulapeli bwa niti bu sweli ku hula mwa likalulo kamukana za lifasi-mubu. Ku ba teñi (pa·rou·siʹa) kwa hae kwa silena ki nako ya tatubisiso ya lifasi kamukana. (1 Pitrosi 2:12) Kono kana ku na ni muleneñi wa tamaiso, kamba sibaka se situna, ku seo Jesu a konwa ku buziwa teñi? Jesu n’a alabile seo ka ku talusa cimo kuli mwahal’a tibelelo ya ku ba teñi kwa hae, bo Kreste ba buhata ba ka taha. Na lemusize kuli: “Niha ba ka mi bulelela, ba li: Ki yo, [Kreste] u mwa lihalaupa; mu si ke mwa zwela kwateñi; kamba: Ki yo, mwa muzuzu wa ndu; mu si ke mwa lumela. Kakuli sina lumonyi lwa pula ha lu taha kwa Upa, lu y’o bonahalelela ni kwa Wiko, ku taha [“ku ba teñi,” NW; pa·rou·siʹa] kwa Mwan’a mutu ku ka ba honacwalo.”—Mateu 24:24, 26, 27.

⁹ Ku fita mutu ufi ni ufi fa lifasi-mubu, Jesu, “Mwan’a mutu,” n’a ziba kwa n’a ka fumaneha ku ba teñi kwa hae ha ku kalisa luli. N’a si ke a ina fa kamba fani kamba fa sibaka sifi kamba sifi fa lifasi-mubu. N’a si ke a iponahaza mwa sibaka se siñwi se si kwa mukunda, “mwa lihalaupa,” ilikuli ba ne ba ka bata Mesiya ne ba ka bonana ni yena ko ba s’a bonwi ki ba tamaiso ya mulonga wa naha, sibaka k’o balateleli ne ba ka kona ku lutiwa mwatas’a ketelelo ya hae, ili ku itukiseza ku fa koto ya bupolitiki ni ku mu beya sina Mubusi wa Bumesiya wa lifasi. Fahalimu a seo, n’a si ke a ipata “mwa muzuzu wa ndu” ye ñwi, ka ku ba ni ba banyinyani fela ba ba ziba kw’a inzi, ilikuli kona k’o, ka ku s’a bonwa ni ku lemuhiwa, a kone ku eza petuhelo ni ku lukisa milelo ya kwa mukunda ni balikani ba hae ya ku tulula mibuso ya lifasi ni ku iketa sina yena Mesiya y’a sepisizwe. Ku tokwa!

10. Mamonyi a niti ya Bibele se a benyize cwañi mwa nzila ya lifasi kamukana?

¹⁰ Ka ku fapahana, ne ku si ke kwa ba ni nto ni ye kana ya ku pata ka za ku taha kwa Jesu sina Mulena, kwa makalelo a ku ba teñi kwa hae kwa ka bulena. Sina Jesu ha n’a talusize cimo, ka nzila ya lifasi kamukana, mamonyi a niti ya Bibele a zwelapili ku benya mwa libaka ze tuna ku zwa mwa likalulo za kwa upa ku ya mwa likalulo za kwa wiko. Kaniti, ka ku ba balwali ba liseli ba mwa lizazi la cwale, Lipaki za Jehova se ba fumanehile ku ba “liseli la macaba, kuli ka [bona] ku pilisa kwa [Jehova] ku yo fita ni kwa mafelelezo a lifasi.”—Isaya 49:6.

Misebezi ya Mangeloi

11. (a) Ki ka nzila ifi limpi za mangeloi li itusiswa mwa ku benyisa liseli la Mubuso? (b) Ki l’ili mi ki mwa sikwata mañi lilama za sitopa sa buloto ba kubukanyelezwa?

¹¹ Mañolo a mañwi a’ ama kwa ku ba teñi kwa Jesu a mu talusa kuli u sindeketwa, kamba ‘ku luma’ limpi za mangeloi. (Mateu 16:27; 24:31) Mwa swanisezo ya buloto ni mufuka, Jesu n’a talusize kuli “simu ki lifasi” ni kuli “kutulo, ki nako ya ku fela kwa lifasi; bakutuli ki mangeloi.” Seo, nihakulicwalo, hasi talusi kuli mwahal’a ku ba teñi kwa hae mwa m’ata ni kanya ya Mubuso, u sebelisa balumiwa ba mangeloi fela mwa ku peta lika fa lifasi-mubu. Ku kala ka 1919, mangeloi mwatas’a ketelelo ya Jesu ne a ketahanyize sitopa sa buloto bona batoziwa ba ba pepilwe ka moya fa lifasi, ili ba ne ba hasanyizwe ki likezahalo za Ndwa ya Lifasi ya I, mi bona bao ne ba itukiselize ku ba ni musebezi o’ ekezehile ka libizo la Mulena. (Mateu 13:38-43) Mwa ma-1920 likiti-kiti za batu ba bañwi b’a nga mayemo a bona kwa lineku la Mubuso wa Mulimu o tomilwe mi ne ba tozizwe ka moya wa Mulimu. Ba ba tozizwe bao ka mo ku inezi fela ne ba kopanyizwe kwa likwata za bao ba ne ba se ba bile kale bomasiyaleti. Ka ku ba sikwata hamoho, ba fita fa ku ba sitopa sa mutanga ya sepahala ili ya na ni kutwisiso wa mwa lizazi la luna.

12. Ki mwa ku kenisa kufi m’o mangeloi a abani, mi ki ka ku ba ni ze zwile mwateñi lifi za fa lifasi-mubu?

¹² Mutala o muñwi wa ku abana teñi kwa mangeloi mwahal’a ku ba teñi kwa Jesu hamulaho wa ku beiwa kwa hae fa lubona ka 1914 u ñozwi kwa Sinulo 12:7-9 ye li: “Mikaele [Jesu Kreste] ni mangeloi a hae a lwanisa drakoni. Drakoni ya lwana, i na ni mangeloi a yona. Kono mangeloi a Drakoni h’a si ka tula, mi sisa sa ona ha si si ka bonwa hape kwa lihalimu. Mi drakoni ye tuna, yona noha ya kale, ye bizwa Diabulosi ni Satani, ye pumanga lifasi kamukana, ya nepelwa mwa lifasi, ni mangeloi a yona a nepwa hamoho ni yona.” Kacwalo, mahalimu a kwahalimu cwale s’a kenisizwe, ili ku siya fela liluko la fa lifasi-mubu la Mubuso le li sa na ni ku twekiswa ka ku tala kuli libizo la Jehova li keniswe. Ku sona silimo se sa 1993, temuso ya bumulimu i sa zwelapili ku sebeza y’e li: “Mu na ni bumai mina ba ba yahile mwa lifasi . . . kakuli Diabulosi u shetumukezi ku mina a halifile maswe, ka ku ziba kuli nako ya hae ki ye nyinyani.”—Sinulo 12:12.

Zuho ya kwa Lihalimu

13, 14. (a) Ki sifi seo Mañolo a bonisa kuli si sweli ku ezahala haisali ku zwiwa ka 1918? (b) Ki sifi seo Paulusi ni Joani ba patulula ka ku ama ku bomasiyaleti ba ba tozizwe kacenu?

¹³ Nto ye ñwi ye makaza ye ezahezi mwahal’a ku ba teñi kwa Kreste ki ku kalisa kwa zuho ya ba ba ya kwa lihalimu. Muapositola Paulusi na bonisize kuli Bakreste ba ba tozizwe ba ba lobezi kale mwa mabita a bona ne ba ka ba bona ba pili mwa ku piliswa ni ku pila ni Kreste Jesu mwa liluko la kwa moya. Bupaki se bu filwe mwahal’a lilimo bo bu bonisa kuli seo si bonahala ku ba se si ezahezi ku zwa ka 1918 ku ya cwalo kwapili. Paulusi u ñola kuli: “Kaufela ba ka pila . . . ka Kreste. Kono mutu ni mutu u ka zuha ka nako ya hae: Mitamuno ki Kreste; kihona be ili ba Kreste ba ka zuha h’a taha [“ku ba teñi,” NW; pa·rou·siʹa].” (1 Makorinte 15:22, 23) Zuho ya batoziwa mwahal’a ku ba teñi kwa Kreste i bulezwi hape kwa 1 Matesalonika 4:15-17 kuli: “Se lu mi bulelela ka ku ya ka Linzwi la [Jehova, NW], ki se: Luna ba ba pila, haiba lu ka siyala Mulena mane a kute [pa·rou·siʹa], ha lu na ku laka ba ba lobezi. . . . Ba ba shwile ku Kreste kiha ba ka zuha pili; Mwamulaho, luna ba ba pila, ba ba siyalezi, lu ka ngelwa kwa malu hamoho ni bona, ku y’o katanyeza Mulena mwa mbyumbyulu.” Ku na ni ba 144,000 ba ba ku Kreste ka ku ba batoziwa bao kwa nalulelule ba amuhela mupuzo o’ makalisa w’o.—Sinulo 14:1.

¹⁴ Sina ka mw’a boniseza Paulusi, bao ba ba li bomasiyaleti ba ba tozizwe ba ba pila la kacenu ha ba keni mwa Mubuso pili Bakreste ba ba tozizwe ili ba ba sepahala ba kwa makalelo ba ne ba bulaezwi tumelo ni balutiwa ba si ka eza cwalo. Muapositola Joani u ekeza ku talusa batoziwa ba ba shwa kacenu kuli: “Ba na ni mbuyoti bafu ba ba shwela ku Mulena, ku zwa cwale; E, ku bulela Moya, kakuli ba y’o pumula kwa misebezi ya bona; kakuli misebezi ya bona ya ba latelela,” f’o, ki mwa ku ba teñi kwa bona ha ba zusizwe. (Sinulo 14:13) Mi Paulusi u bulela kuli: “A mu bone, ni mi bulelela taba ye ne patilwe: Ha lu na ku lobala kaufela, kono lu ka fetuha kaufela, Ka nako i liñwi, mwa ku koba kwa liito, ka tolombita ya ku feleleza. Kakuli tolombita i ka lila, mi bafu ba ka zuha s’e li ba ba sa boli; mi ni luna lu ka fetuha.” (1 Makorinte 15:51, 52) Ki makazo ye komokisa hakalo!

15, 16. (a) Ki swanisezo mañi yeo Jesu n’a file kwa Luka 19:11-15, mi ki ka mabaka afi? (b) Bupolofita b’o bu fumani cwañi talelezo?

¹⁵ Muta o muñwi Jesu ha n’a kutaza kwa sikwata sa balateleli ba hae ka za Mubuso wa Mulimu, n’a itusisize swanisezo mwa ku ba tusa ku hakulula mihupulo ya bona ye fosahezi. Taba yeo i bala cwana: “Ne ba hupula kuli mubuso wa Mulimu u ka taha kapili. Kih’a li: Mutu wa lusika lwa bulena n’a ngile musipili, ku ya kwa naha ye kwahule ku y’o yoliswa bulena, ni ku kuta. A biza batanga ba hae ba ba lishumi, a ba fa lipondo ze lishumi, mi a li ku bona; Mu fundote, mane ni fite. . . . Ha s’a yolile bulena mi a kutile, a laela kuli batanga ba hae b’a n’a file mali, ba bizwe, kuli a zibe s’a fumani, mutu ni mutu, ka ku fundota.”—Luka 19:11-15.

¹⁶ Jesu ki yena “mutu” y’o ya n’a ile kwa lihalimu, “naha ye kwahule” k’o n’a na ni ku amuhela mubuso. Mubuso w’o n’a u fumani ka 1914. Hañi-hañi hamulaho, Kreste sina Mulena n’a tatubile lika ni ba ba ipala ku ba balateleli ba hae ili ku bona se ne ba ezize mwa ku babalela sifumu sa Mubuso se ne ba filwe. Ba sikai ba ba sepahala ne ba ketilwe ilikuli ba amuhele pabazo ya mulena ye li: “Ki hande, wena mutanga yo munde. Kabakala kuli u sepahalile mwa nto ye nyinyani, u buse minzi ye lishumi.” (Luka 19:17) Nako yeo ya ku ba teñi kwa Kreste i ama ku zwisezwapili kwa musebezi o mutuna wa ku kutaziwa kwa Mubuso, ku kopanyeleza cwalo ni ku shaela likatulo za Mulimu kwa neku la ba ba maswe, mi ku okamela musebezi w’o ne ku kopanyelelizwe cwalo mwa m’ata a n’a filwe ku “mutanga yo munde.”

Ku Kutaza kwa mwa Lifasi Kamukana

17. Ki tabo ifi ye ba teñi mwahal’a nako ya pa·rou·siʹa?

¹⁷ Ki sifi hape se ne si ka ezahala mwahal’a yona nako ye ya pa·rou·siʹa? Neikaba nako ya tabo ye tuna mwa musebezi wa ku kutaza ni ku tusa ba banca kuli ba itukiseze ku punyuha ñalelwa ye tuna ye taha. Bona bao ba “buñata bo butuna,” ba ba tusa bomasiyaleti, ba fita fa ku ba “mañolo a ku lu paka.” (Sinulo 7:9; 2 Makorinte 3:1-3) Paulusi u talusa tabo ya kutulo yeo h’a bulela kuli: “Sepo ya luna kiñi? kamba tabo ya luna, kamba kuwani ya luna ya bulena ye lu ka itumba ka yona? Ha ni li, ki mina, Mulena Jesu h’a ka taha [“ku ba teñi,” NW; pa·rou·siʹa]?”—1 Matesalonika 2:19.

Mu Ipuluke Mu Kenile mi Mu S’a Nyazahali

18. (a) Ki tapelo mañi ya Paulusi ye ama kwa pa·rou·siʹa? (b) Ki moya ufi o’ luna kaufela lu lukela ku bonisa mwahal’a nako ye, mi ki ka linzila lifi?

¹⁸ Paulusi hape n’a lapelezi ku keniswa kwa ba ba pila mwahal’a yona nako ye ya ku ba teñi kwa Kreste kuli: “Mulimu wa kozo, Yena ka sibili, a mi kenise ku feleleza; mi za mina kaufela, moya ni pilu ni mubili, li bulukelwe ku taha [“ku ba teñi,” NW; pa·rou·siʹa] kwa Mulen’a luna Jesu Kreste, li si na se si nyazahala.” (1 Matesalonika 5:23) Ee, kacenu, ku si na taba ni kuli lu ba kalulo ya bomasiyaleti ba ba tozizwe kamba ya palo ye tuna ya lingu ze ñwi, moya wa swalisano u lu tama hamoho ka busepahali ilikuli lu kone ku zwelapili ku ba mwa bukeni mi lu si na se si nyazahala ka nako ye ipitezi ye. Ka ku swana, lu tokwa ku ba ni pilu-telele. Jakobo n’a ñozi kuli: “Haili luna banabahesu, lu itiise, lu talimele Mulena mane a fite [pa·rou·siʹa]. . . . Mu itiise mwa lipilu za mina; kakuli ku taha [pa·rou·siʹa] kwa Mulena ku se ku li fakaufi.”—Jakobo 5:7, 8.

19. Ki temuso ifi yeo Pitrosi n’a utwahalize ka ku ama kwa pa·rou·siʹa, mi lu swanela k’u nga cwañi muhato ka za yona?

¹⁹ Muapositola Pitrosi ni yena n’a na ni se siñwi sa ku bulela ku luna ba ba pila ku yona nako ya cwale ye. N’a lu file temuso ka za basheununi, ili ba ba atile mwa likalulo kamukana za lifasi-mubu. Pitrosi u bulela kuli: “Pili mu zibe se, kikuli mwa mazazi a maungulelo, ku ka taha basheununi ba ba tezi busomi, ba ba zamaya ka litakazo za bona luli; Ba ka sheununa, ba li: I kai sepiso ya ku taha [pa·rou·siʹa] kwa hae? Kakuli isamba ba shwa bokuku ba kale, linto kamukana li nze li itulezi mo ne li inezi kwa makalelo ha li eziwa.” (2 Pitrosi 3:3, 4) Ku si na taba ni ku ñatafala kwa basheununi mwahal’a ku ba teñi kwa Kreste, batu ba Jehova ba zwelapili ku benya sina liseli la lifasi, ili ku tisa puluso ku ba bañata.

Lipuzo za Lundululo

◻ Batu ba Jehova ne ba monyehezwi cwañi ka ku zwelapili kwa neku la pa·rou·siʹa?

◻ Mateu 24:4-8 i bile cwañi ni talelezo?

◻ Mangeloi a sebelize cwañi ka ku swalisana ni Kreste y’a beilwe fa lubona?

◻ Ki makazo ifi ye komokisa ye bonahala ku zamaelela ni pa·rou·siʹa?

◻ Ki tabo ifi ye fumanwa mwahal’a yona nako ye, mi ki bomañi ba ba abana ku yona?