Ku Swalisana Hamoho mwa Tamo ye Petahezi ya Lilato

“[Mu] kopane mwa lilato.”—MAKOLOSE 2:2.

1, 2. Ki kukuezo mañi ya lifapahano ye utwiwa sihulu kacenu?

AMU teeleze! Linzwi le li tiile le li nze li utwahala mwa lihalimu kaufela, li li: “Mu na ni bumai mina ba ba yahile mwa lifasi ni mwa liwate! kakuli Diabulosi u shetumukezi ku mina a halifile maswe, ka ku ziba kuli nako ya hae ki ye nyinyani.” (Sinulo 12:12) Ka silimo ni silimo se si fita, lushango l’o lu fita fa ku tisa tibelelo ya ze maswe ni ku fita kwa bayahi ba lifasi-mubu.

² Sila se situna sa Jehova s’a zibahalile ka nako ye telele sina muhanyezi (Satani) ni musawani (Diabulosi). Kono yena lihata y’o cwale s’a bile ni kalulo ye ñwi ye maswe hahulu—u fitile fa ku ba mulimu y’a nyemile! Kabakalañi? Kakuli n’a lunduzwi mwa lihalimu ki Mikaele ni mangeloi ba hae mwa ndwa ye ne i kalile mwa lihalimu ka 1914. (Sinulo 12:7-9) Diabulosi wa ziba kuli u na ni nako ye nyinyani fela ya ku fa bupaki bwa shemaeto ya hae ya kuli wa kona ku yaulula batu kaufela ku zwa kwa ku lapela Mulimu. (Jobo 1:11; 2:4, 5) Ka ku s’a ba ni mabandukelo, yena ni badimona ba hae ba swana sina sikutu sa limuka ze halifile ze t’o zwiseza buhali bwa zona fa likwata za mufuta wa mutu o mwa misunga.—Isaya 57:20.

3. Ki sifi se si bile ku ama kwa ku lundulwa kwa Satani mwa linako za luna?

³ Zona likezahalo zeo, ze si k’a bonwa ki meto a batu, li fa libaka ha ku na ni ku shandauka kwa ka nañungelele kwa muzamao mwahal’a mufuta wa mutu. Hape li fa libaka la buikatazo bwa batu bwa ka maikuto a’ tiile bwa ku onga-onga ku kauhana-kauhana kwa macaba ili ao ka bunolo fela a s’a koni ku pila ka kutwano. Likwata za mishobo ni mipilelo ye fapahana li sweli ku itwanisa ka situhu, ili ku tahisa kuli ku be ni bolule-lule ba batu ba ba si na mahae ni ba ba balehile mwa mahae a bona. Ha ku komokisi kuli ku tokwa mulao ku sweli ku ekezeha ka sipimo se si si k’a bonwa kale! Sina ka mwa n’a bulelezi cimo Jesu, ‘lilato la ba bañata ba mufuta wa mutu li sweli l’a fola.’ Kai ni kai kw’a talima mutu, ku s’a utwana ni ku tokwa lilato ki yona miinelo ya batu ba kacenu ba ba mwa misunga.—Mateu 24:12.

4. Ki kabakalañi batu ba Mulimu ha ba mwa lubeta lo lu ipitezi?

⁴ Ka ku beya mwa munahano muinelo wa mwa lifasi, tapelo ya Jesu kwa neku la balateleli ba hae i ba ni butokwa bo butuna ni ku fita: “Ha ni ku lapeli kuli u ba zwise mwa lifasi, kono kuli u ba sileleze kwa bumaswe [“ku ya maswe,” NW]. Hasi ba lifasi, sina na ha ni si wa lifasi.” (Joani 17:15, 16) Kacenu, “ya maswe” u zwiseza buhali bwa hae sihulu ku bao ba ba “buluka milao ya Mulimu, ni ba ba sweli bupaki bwa Jesu.” (Sinulo 12:17) Kambe kikuli Jehova h’a ba babaleli ka lilato ni ka ku ba libelela, Lipaki za hae ba ba sepahala ne ba ka be ba yundisizwe. Bupilo bwa luna bu itingile fa ku itusisa litukiso kaufela zeo Mulimu a eza kwa neku la silelezo ni buiketo bwa luna bwa kwa moya. Seo si kopanyeleza ni ku itiisa kwa luna ka ku lumelelana ni ku sebeza kwa m’ata a Hae ka Kreste, sina muapositola mwa n’a susuelize kwa Makolose 1:29.

5, 6. Muapositola Paulusi n’a ikutwile cwañi ka za Bakreste ba mwa Kolose, mi ki kabakalañi liñolo le lituna la silimo sa 1995 ha li li le li swanela?

⁵ Nihaike kuli Paulusi mwendi ni kamuta n’a si ka bonana ni bona, n’a lata mizwale ba hae ba mwa Kolose. N’a ba bulelezi kuli: “Ne ni lakaza kuli kambe ne mu ka utwisisa ka za butungi bwa ku iyakatwa kwa ka ka za mina.” (Makolose 2:1, The New Testament in Modern English, ya J. B. Phillips) Bakeñisa kuli balateleli ba Jesu haki ba lifasi, “ya maswe” n’a ka zwelapili ku lika ku loba swalisano ya mizwale ka ku suña moya wa lifasi mwahal’a bona. Litaba za n’a tisize Epafrasi ku zwa kwa Kolose ne li bonisize kuli seo ne si ezahala ka sipimo se siñwi.

⁶ Taba ye ñwi yeo Paulusi n’a iyakatitwe ka za yona ka butuna kwa neku la mizwale ba hae ba Sikreste ne i konwa ku kusufazwa ka manzwi a: “[Mu] kopane mwa lilato.” Manzwi a hae a na ni taluso ye ipitezi kacenu, mwa lifasi le li tezi ku s’a swalisana ni ku tokwa lilato. Haiba lu ikungela kelezo ya Paulusi, lu k’a ikola pabalelo ya Jehova. Hape lu k’a iponela m’ata a moya wa hae mwa bupilo bwa luna, ili ku lu tusa ku lwanisa lisineneketo za lifasi. Ki ye butali hakalo kelezo yeo! Kacwalo, Makolose 2:2 li ka ba lona liñolo la luna le lituna la mwa 1995.

7. Ki kutwano ifi ye swanelwa ku fumaneha mwahal’a Bakreste ba niti?

⁷ Mwa liñolo la pili ku ba kwa Korinte, muapositola y’o n’a itusisize mubili wa mutu sina mutala. N’a ñozi kuli “ku kauhana ku tokwahale” mwa puteho ya Bakreste ba ba tozizwe kono kuli “lilama li babalelane.” (1 Makorinte 12:12, 24, 25) Ki mutala o mbwetukisa hakalo! Lilama za luna li itingile se siñwi ku se siñwi, mi se siñwi kaufela si ngungekilwe kwa mubili wa luna kaufela. Ki nto ye swana ni kwa swalisano ya luna ya mizwale ya mwa lifasi kamukana, ye kopanyeleza ba ba tozizwe ni bolule-lule ba ba sepa ku pila fa lifasi-mubu le li li paradaisi. Ha lu lukeli ku ikauhanya kwa mubili wa Bakreste ba bañwi kuli lu pile ka ku ikemela! Ka ku sebeleza ku Kreste Jesu, moya wa Mulimu u taha ku luna ka sipimo se situna ka swalisano ya luna ni mizwale ba luna.

Kutwano I Zamaelela ni Zibo

8, 9. (a) Ki sifi se si li sa mutomo kwa ku peta kwa luna kalulo ye ñwi kwa kutwano mwa puteho? (b) Mu fumani cwañi zibo ka za Kreste?

⁸ Se siñwi sa lisupo ze tuna za Paulusi ne li sa kuli kutwano ya Sikreste i zamaelela ni zibo, sihulu ye ama Kreste. Paulusi n’a ñozi kuli Bakreste ba swanela kuli ba “kopane mwa lilato, kuli ba fiwe bufumu kamukana bwa kutwisiso ye tezi, mi ba zibe kunutu ya Mulimu, kikuli yena Kreste.” (Makolose 2:2) Lu fumani zibo—litaba luli—haisali lu kalisa ku ituta Linzwi la Mulimu. Ka ku ba kalulo ya ku fumana kutwisiso ka za sibaka sa buñata bwa zona litaba zeo mwa mulelo wa Mulimu, lu bona kalulo ya butokwa hahulu ya Jesu. “Ku yena ku patilwe maluwo kamukana a butali ni a zibo.”—Makolose 2:3.

⁹ Kana mu ikutwa cwalo ka za Jesu ni kalulo ya hae mwa mulelo wa Mulimu? Ba bañata mwa Krestendomu ba akufela ku bulela Jesu, ili ku ipapata kuli ba mu amuhezi mi ba pilisizwe. Kono kana ba mu ziba luli? Ku tokwa ni hanyinyani, kakuli buñata ba lumela tuto ye si ya mwa mañolo ya Silalu. Haki kuli mu ziba niti mwa taba yeo fela kono hape mu kana mu bile ni zibo ye tuna ya sa n’a bulezi ni ku eza Jesu. Bolule-lule se ba tusizwe ku seo ki tuto ye fa litaba ze ñata ili ya ku itusisa buka ya The Greatest Man Who Ever Lived. Niteñi lu tokwa ku swalelela ku tungisa zibo ya luna ya Jesu ni linzila za hae.

10. Zibo ye patilwe i fumaneha cwañi ku luna?

¹⁰ Pulelo ya kuli “maluwo kamukana a butali ni a zibo” a “patilwe” ku Jesu ha i talusi kuli ha lu koni ku utwisisa zibo ye cwalo. Ka ku fapahana, i bat’o swana sina mukoti mo ku lafiwa butale bo buñwi. Ha lu tokwi ku bata-bata fa sibaka se situna lu s’a zibi fo lu k’a kalela ku kata. Se lu zibile fateñi—zibo tenyene i kala ka seo Bibele i patulula ka za Jesu Kreste. Ha lu nze lu itebuha ka ku tala ni ku fita kalulo ya Jesu mwa ku petiwa kwa mulelo wa Jehova, lu fumana za bufumu bwa butali bwa niti ni zibo ye nepahezi. Kacwalo se lu tokwa ki ku yepa ka butungi ni ku fita, lu nze lu lafa bufumu kamba lika za butokwa ze ekezehile ili ze fumaneha mwa simbule mo se lu yepile.—Liproverbia 2:1-5.

11. Ne lu kana lwa ekeza cwañi zibo ni butali bwa luna ka ku nahanisisa ka butuna za Jesu? (Mu fe mutala ka ku tapisa mahutu a balutiwa kwa Jesu, kamba mu itusise mitala i sili.)

¹¹ Sina ka mutala, lu kana lwa ziba kuli Jesu n’a tapisize mahutu a baapositola ba hae. (Joani 13:1-20) Nihakulicwalo, kana luna lu nahanile ka butungi fa tuto ya n’a luta ni mubonelo wa n’a bonisize? Ha ne lu ka eza cwalo, ne lu kana lwa tahisa bufumu bwa butali ili bo bu lu konisa—ee, bo bu lu susueza—ku eza licinceho ka mo lu sebelisanela ni muzwale kamba kaizeli y’o bupilo bwa hae se bu lu filikanyize ka nako ye telele. Kamba muta lu fiwa musebezi o lu s’a tabeli, ne lu kana lw’a nga muhato ka nzila ye fapahana ha lu se lu utwiselize taluso ye butokwa ya Joani 13:14, 15. Zibo ni butali li lu ama cwalo. Ba bañwi ne ba kana ba amiwa cwañi ha ne lu ka likanyisa hahulu ni ku fita mutala o lu fumana mwa zibo ye ekezehile ya Kreste? Mwendi mutapi u ka ‘kopana ni ku fita mwa lilato.’a

Liyembuluko Li Kona ku Sinya Kutwano

12. Lu tokwa ku itibelela ku za zibo mañi?

¹² Haiba zibo ye nepahezi i lu nolofaleza ku ‘kopana mwa lilato,’ ki sifi se si tahiswa ki “zibo ye ba li ki zibo”? Ki se si fapahana luli—ili mizeko, lifapahano, ni ku biuka mwa tumelo. Kacwalo lu lukela ku itibelela kwa zibo ya buhata ye cwalo, sina Paulusi ha n’a lemusize Timotea. (1 Timotea 6:20, 21) Paulusi hape n’a ñozi kuli: “Ni mi bulelela seo kuli mutu a si ke a mi puma ka manzwi a ku mi shemba. Mu tokomele, mutu a si ke a mi swasa ka tuto ya butali, ni ka ku mi shemba ka ze si na tuso, a mi ise ka litaba ze ba fanana batu ka mulomo, ni ka lituto za lifasi za makalelo, isi ka Kreste.”—Makolose 2:4, 8.

13, 14. (a) Ki kabakalañi mizwale ba kwa Kolose ha ne ba li mwa lubeta ha ku amiwa kwa zibo? (b) Ki kabakalañi ba bañwi kacenu ha ne ba kana ba ikutwa kuli ha ba yo mwa lubeta lo lu swana?

¹³ Bakreste ba kwa Kolose ne ba potolohilwe ki susuezo ye lubeta ka ku sa lemuseha ili ya se ne si li zibo ye ba twi ki zibo. Batu ba bañata mwa Kolose ni mabapa a ona ne b’a nga ka butuna tuto ya Sigerike ya za mihupulo ya butu. Hape ne ku na ni ba ne ba ndongwami lizo za Sijuda ili ba ne ba bata kuli Bakreste ba buluke Mulao wa Mushe, o cwale ka mazazi a ona a mikiti ni litaelo za lico. (Makolose 2:11, 16, 17) Paulusi na s’a lwanisi ku fumana zibo ya niti kwa mizwale ba hae, kono ne ba tokwa ku tokomela kuli ku si ke kwa ba ni ya ka ba swasa, ka ku itusisa manzwi a ku ba shemba kuli ba lumele ku ikungela mubonelo wa butu fela fa bupilo ni likezo. Mwa kona ku utwisisa kuli haiba ba bañwi mwa puteho ba tuhelela minahano ni likatulo za bona kuli li etelelwe ki mihupulo ni mibonelo ya bupilo ye cwalo ye si ya mwa mañolo, seo ne si ka sebeza ku shandaula kutwano ni lilato mwahal’a lilama za puteho.

¹⁴ Ne mu kana mwa nahana kuli, ‘Ee, n’a bona kozi ye ne ba talimani ni yona ba mwa Kolose, kono ha ni mwa lubeta lwa ku susuezwa ki mihupulo ya Sigerike, ye cwale ka moyo o s’a shwi kamba mulimu wa silalu; mi hape ha ni yo mwa lubeta lufi kamba lufi lwa ku hohiwa ki lipumulo za sihedeni za bulapeli bwa buhata bo ni bandukile ku bona.’ Ki hande. Ki ko kunde ku ikatulela ka za niti ye bunolo ye patuluzwi ka Kreste ni ye fumaneha mwa Mañolo. Nihakulicwalo, kana ne ku ka ba kuli lu mwa lubeta kwa lituto ze ñwi za mihupulo kamba mibonelo ya butu ye atile kacenu?

15, 16. Ki mubonelo ufi wa bupilo o ne u kana wa ama munahanelo wa Mukreste?

¹⁵ Mubonelo o muñwi o’ cwalo se u bile teñi ka nako ye telele, wa kuli: “I kai cwale sepiso ya ku taha kwa hae? Bondat’a luna ki kale ba bulukiwa, kono niteñi linto kaufela li zwelapili sina mo se li bezi luli kamita.” (2 Pitrosi 3:4, The New English Bible) Yona pulelo yeo ne i ka bulelwa ka manzwi a sili, kono mubonelo ki o swana. Sina ka mutala, mutu n’a kana a nyakisisa kuli, ‘Ha ne ni itutile niti pili lilimo ze mashumi-shumi kwamulaho, mafelelezo n’a li “fa ngo ni mulomo.” Kono h’a si k’a fita kale, mi ki mañi y’a ziba fa k’a tela?’ Ki niti, ha ku na mutu ya ziba fa k’a tela mafelelezo. Niteñi, mu lemuhe mubonelo wa n’a susuelize Jesu: “Mu libelele, mu tone, mi mu lapele; kakuli ha mu zibi nako kana ikaba lili?”—Mareka 13:32, 33.

¹⁶ Ne ku ka ba ko ku lubeta cwañi ku ba ni mubonelo wa kuli, ka ku s’a ziba fa k’a tela mafelelezo, lu swanela ku eza litukiso za ku ba ni bupilo bwa ku eza lika ze ñata ni bo bu twi ki bo bu iketile. Muatumelelo o cwalo ne u ka bonwa mwa ku nahana kuli, ‘Kashe ni ikungele fela mihato ye ka ni lumeleza (kamba bana ba ka) ku ba ni mubeleko o kutekeha ili wa ku hola mali a mañata mi u ka ni konisa ku ikola bupilo bwa mbombolelwa. Ka mo ku inezi fela, ni ka fumaneha kwa mikopano ya Sikreste ni ku ba ni kabelo ye ñwi mwa musebezi wa ku kutaza, kono ha ku na libaka la kuli ni itiise kamba ku eza buitomboli bo butuna.’—Mateu 24:38-42.

17, 18. Ki mubonelo ufi w’o Jesu ni baapositola ne ba lu susuelize ku ba ni ona?

¹⁷ Nihakulicwalo, taba ye sa konwi ku yayiwa ki ya kuli Jesu ni baapositola ba hae ne ba babalize kuli lu pile ka maikuto a muinelo wa putako ka za kuli lu kutaze taba ye nde, ku itiisa ni ku tabela ku eza buitomboli. Paulusi n’a ñozi kuli: “Banabahesu, se ni bulela ki se, nako ki ye kuswani; ku zwa cwale ba ba na ni basali, ba be inge ha ba na bona; . . . ba ba leka, ba be inge ha ba si ka luwa se siñwi; Ba ba itusisa ka za lifasi le, ba be inge ha ba itusisi ka zona; kakuli mukwa wa lifasi le wa fela.”—1 Makorinte 7:29-31; Luka 13:23, 24; Mafilipi 3:13-15; Makolose 1:29; 1 Timotea 4:10; 2 Timotea 2:4; Sinulo 22:20.

¹⁸ Ka ku s’a akaleza ni hanyinyani kuli lu eze bupilo bwa mbombolelwa ku ba sikonkwani sa luna, Paulusi n’a ñozi mwatas’a puyelelo kuli: “Ha lu si ka tisa se siñwi mwa lifasi, mi ha lu koni ku ya ni se siñwi ha lu li siya. Cwale ha lu na ni lico ni liapalo, lu kolwe ki zona. . . . Lwana ndwa ye nde ya tumelo, swala bupilo bo bu sa feli bo u bizelizwe, bo n’o ipulezi ka buipulelo bo bunde fapil’a lipaki ze ñata.”—1 Timotea 6:7-12.

19. Puteho i amiwa cwañi ba ba ku yona ha ba amuhela mubonelo wa bupilo wa n’a susuelize Jesu?

¹⁹ Puteho ha i li ya Bakreste ba ba na ni cisehelo ili ba ba lika ka t’ata ku ‘fa buipulelo bo bunde,’ kutwano i taha ka taho. Ha ba ituheleli ku ba ni mubonelo wa kuli, “U na ni ze nde ze ñata, ze kubukanyelizwe myaha ye miñata. U pumule, u ce, u nwe, u itabise.” (Luka 12:19) Ka ku fapahana, ba swalisani hamoho mwa buikatazo bo bu swana, ba itatela ku eza buitomboli bwa ku ba ni kabelo ye tezi ka mo ku konahalela kaufela mwa musebezi wo o’ si ke wa kutelwa ni kamuta.—Mu bapanye Mafilipi 1:27, 28.

Ku Ba ni Tokomelo ka za Manzwi a ku Shemba

20. Ki ifi kalulo ye ñwi mo ne ba kana ba pumiwa Bakreste?

²⁰ Ka mo ku inezi, ku na ni linzila ze ñwi zeo ka zona Bakreste ne ba kana ba ‘pumiwa ka litaba ze susueza’ kamba bupumi bo bu mukungulu bo bu filikanya ku ‘kopana mwa lilato.’ Ofisi ya Watch Tower Society mwa Germany ne i ñozi kuli: “Taba ye ñwi ne i isize kwa likañi, bahasanyi mi nihaiba maeluda ne ba ikaba ka ku yemela mifuta ya mialafelo ye itusisizwe ki muzwale.” Ne ba ekelize kuli: “Bakeñisa sa mifuta ye miñata ya miezezo ye itusisizwe ni butuna bwa palo ya bakuli, ye ki kalulo ye tisa likananisano mi ili yeo, haiba mialafelo i ba ni miinelo ya za ku lapela mioya, neikana ya tisa lubeta.”—Maefese 6:12.

21. Mukreste n’a kana a latehelwa cwañi ki mutomo o nepahezi kacenu?

²¹ Bakreste ba bata ku siyala ba sepahala mi ba na ni buikangulo bo bunde ilikuli ba kone ku lapela Jehova. Nihakulicwalo, mwa muinelo wo lu telwa ki ku supala ni makulano ze tiswa ki ku s’a petahala. Mwa sibaka sa ku koñomeka litaba za buikangulo, lu swanela ku toma mamelelo fa tatululo luli, ku luna ni ku ba bañwi. (1 Timotea 4:16) Kreste ki yena mutomo wa tatululo yeo, sina ha n’a li mutomo wa kelezo ya Paulusi ku ba kwa Kolose. Kono mu hupule kuli, Paulusi n’a bonisize kuli ba bañwi ba kana ba taha ‘ka manzwi a ku shemba’ ili ku zwisa mamelelo ya luna ku Kreste, mwendi ka ku i libisa kwa miezezo, likalafo, kamba micelo ya za lipatisiso fela.—Makolose 2:2-4.

22. Ki mubonelo mañi o’ lukile o lu swanela ku ba ni ona ha ku amiwa kwa buipapato bo bu atile bwa za lipatisiso ni likalafo?

²² Batu ku potoloha lifasi ba boniswa hahulu ze fund’otiwa ni litaba ze babaza likalafo za mifuta kamukana ni mibatisisezo. Ze ñwi za zeo li itusiswa ki ba bañata mi l’i ngiwa hande; ze ñwi li nyaziwa ki ba bañata kamba li konwa ku s’a sepiwa.b Mutu yo muñwi ni yo muñwi u na ni buikalabelo bwa ku atula seo a k’a eza ha ku amiwa kwa buikangulo bwa hae. Kono ba ba amuhela kelezo ya Paulusi ye fumanwa kwa Makolose 2:4, 8 ba k’a silelezwa kwa ku pumiwa ki ‘manzwi a ku shemba’ kamba ‘ku shemba ka ze si na tuso’ ko ku yaulula ba bañata ili bao, ka ku tokwa sepo ya Mubuso, ba mwa nyewa-nyewa kwa neku la kimululo. Nihaiba kuli Mukreste u na ni buikolwiso bwa kuli mualafelo o muñwi u bonahala ku ba o munde ku yena, h’a swaneli ku u fund’ota mwa kopano ya mizwale ba Sikreste, kakuli u kona ku ba taba ye buhisanwa hahulu ni ku kananisanwa. Kacwalo u kona ku bonisa kuli u kuteka hahulu butokwa bwa kutwano mwa puteho.

23. Ki kabakalañi luna sihulu ha lu na ni libaka la ku ba ni tabo?

²³ Paulusi n’a koñomekile kuli kutwano ya Sikreste ki mutomo wa tabo luli. Mwa lizazi la hae palo ya liputeho ka buniti fela ne li ye nyinyani ku ya kacenu. Niteñi n’a kona ku ñolela ba kwa Kolose kuli: “Kakuli ha ni li siyo ka mubili, ni inzi ni mina ka moya, ni nze ni tabela mi ni buha ku iswala kwa mina, ni ku tiya kwa tumelo ya mina ku Kreste.” (Makolose 2:5; mu bone hape Makolose 3:14.) Ki nto ye tuna hakalo ye lu tiseza ku nyakalala! Ne lu kana lwa bona bupaki luli bwa kutwano, tamaiso ye nde, ni ku tiya kwa tumelo mwa puteho ya luna luli, ili nto ye bonisa muinelo wa ka nañungelele wa batu ba Mulimu mwa lifasi kamukana. Kacwalo mwa nako ye kuswani ye siyezi mwa muinelo wa cwale, haike yo muñwi ni yo muñwi wa luna a ikatulele ku ‘kopana mwa lilato.’

[Litaluso za kwatasi]

Kana Ne Mu Lemuhile?

◻ Liñolo la silimo sa 1995 la Lipaki za Jehova ki lifi?

◻ Ki kabakalañi Bakreste ba kwa Kolose ha ne ba tokwa ku kopana hamoho ka kutwano mwa tabo, mi ki kabakalañi luna kacenu ha lu tokwa ku eza cwalo?

◻ Ki mubonelo mañi wa bupilo o’ lubeta ka ku sa lemuseha ili w’o Bakreste sihulu ba tokwa ku itibelela ku ona kacenu?

◻ Ki kabakalañi Bakreste ha ba swanela ku lemuha lika kuli ba si ke ba yaululwa ki manzwi a ku shemba ka ku ama kwa buikangulo ni mibatisisezo?

[Maswaniso a fa likepe 26]

Kana milelo ya mina ya kwapili i tomile fa ku ba teñi kwa Jesu?