Ka Mo Ba Sebeleza Baokameli ba Maeto Sina Likombwa ze Sepahala

“Mutu ni mutu, mw’a fezwi mpo ki Mulena, a sebeleze ba bañwi ka yona, sina ha ku lukelwa likombwa ze nde za sishemo sa Mulimu se si taha ka mikwa ye miñata.”—1 PITROSI 4:10.

1, 2. (a) Ne mu ka talusa cwañi linzwi la “sikombwa”? (b) Ki bomañi ba ba kopanyelelizwe mwahal’a likombwa ze itusiswa ki Mulimu?

JEHOVA u itusisa Bakreste ba ba sepahala kaufela sina likombwa. Hañata sikombwa ki mubeleki ya zamaisa lapa. Hape n’a kana a zamaisa ni litaba za pisinisi ya mulen’a hae. (Luka 16:1-3; Magalata 4:1, 2) Jesu n’a bizize sikwata sa batoziwa ba hae ba ba sepahala fa lifasi-mubu kuli ki “sikombwa se si sepahala.” U beile sona sikombwa seo fahalimw’a “tutu ya hae kaufela,” ku kopanyeleza teñi ni misebezi ya ku kutaza Mubuso.—Luka 12:42-44; Mateu 24:14, 45.

² Muapositola Pitrosi n’a bulezi kuli Bakreste kamukana ki likombwa za sishemo sa Mulimu se si si ka libelelwa ili se si taha ka linzila ze ñata. Mukreste yo muñwi ni yo muñwi u na ni sibaka mw’a kona ku petela bukombwa ka busepahali. (1 Pitrosi 4:10) Maeluda ba Sikreste ba ba ketilwe ki likombwa, mi mwahal’a bona ku na ni baokameli ba maeto. (Tite 1:7) Bona maeluda ba maeto bao ba swanelwa k’u ngiwa cwañi? Ki tulemeno ni milelo ifi ze ba swanela ku ba ni zona? Mi ba kona ku peta cwañi ze nde ka ku fitisisa?

Lwa Itumela kwa Sebelezo ya Bona

3. Ki kabakalañi baokameli ba maeto ha ba konwa ku bizwa “likombwa ze nde”?

³ Ha ne ba ñolezi muokameli wa maeto ni musal’a hae, bosinyalana ba bañwi ba Bakreste ne ba bulezi kuli: “Lu bata ku talusa buitumelo bwa luna kwa nako ni lilato kaufela le mu lu file. Sina lubasi, lu tusizwe hahulu ki susuezo ni kelezo ya mina kaufela. Lwa ziba kuli lu na ni ku zwelapili ku hula kwa moya, kono ka tuso ya Jehova ni ka ku ba ni mizwale ni likaizeli ba ba cwale ka mina, lisineneketo za ku hula za fokoliswa.” Lipulelo ze cwale ka ze ki ze atile kakuli baokameli ba maeto ba fa mamelelo ya ka butu kwa balumeli sina bona, sina sikombwa yo munde ha babalela hande butokwi bwa lapa. Ba bañwi ki babuleli ba ba zwile mubano. Ba bañata ba eza hande hahulu mwa musebezi wa ku kutaza, hailif’o ba bañwi ba zibwa ka silikani ni mufelañeke wa bona. Ka ku tahisa ni ku itusisa buikoneli bo bu cwalo mwa ku sebeleza ba bañwi, baokameli ba maeto ba konwa ku bizwa “likombwa ze nde” ka ku swanela.

4. Ki lipuzo mañi ze ka nyakisiswa cwale?

⁴ “Se si batahala kwa likombwa kikuli li sepahale,” ki mwa n’a ñolezi Paulusi. (1 Makorinte 4:2) Ku sebeleza Bakreste ba bañwi mwa puteho i sili ka viki ni viki ki tohonolo ye ipitezi ili ye tabisa. Nihakulicwalo, hape isali buikalabelo bo bu buima. Kacwalo, baokameli ba maeto ba kona cwañi ku peta bukombwa bwa bona ka busepahali mi ili ka ku kondisa lika?

Ku Peta Bukombwa bwa Bona ka ku Kondisa Lika

5, 6. Ki kabakalañi ku itinga ku Jehova ko ku buniti ha ku li kwa butokwa hahulu mwa bupilo bwa muokameli wa maeto?

⁵ Ku itinga ku Jehova ka tapelo ki kwa butokwa hahulu kuli baokameli ba maeto ba kone ku ba likombwa ze kondisa lika. Bakeñisa tomahanyo ya bona ni buikalabelo bo buñata, ka linako ze ñwi ba kona ku ikutwa ku imelwa. (Mu bapanye 2 Makorinte 5:4.) Kacwalo ba tokwa k’u nga muhato ka ku lumelelana ni pina ya walisamu Davida ye li: “U lwalise [Jehova, NW] mulwalo wa hao, mi u ka ku tiisa. H’a na ku lumela kuli ya na ni niti a nyanganyiswe.” (Samu 55:22) Manzwi a mañwi, a’ omba-omba hape, ki a Davida a’ li: “Ku lumbekwe Mulimu ya lu lwalela milwalo ka zazi ni zazi.”—Samu 68:19.

⁶ Paulusi n’a fumani kai m’ata a ku peta buikalabelo bwa hae bwa kwa moya? N’a ñozi kuli: “Ni kona linto kamukana ka Kreste ya ni fa mata.” (Mafilipi 4:13) Ee, Jehova Mulimu ne li yena Simbule sa m’ata a Paulusi. Ka ku swana, Pitrosi n’a elelize kuli: “Yo muñwi h’a bulela, a ye ka manzwi a Mulimu; yo muñwi h’a sebeleza batu, a eze ka mata a’ fiwa ki Mulimu; kuli mwa linto kaufela Mulimu a lumbekwe ka Jesu Kreste.” (1 Pitrosi 4:11) Muzwale yo muñwi ya n’a li muokameli wa maeto ka lilimo ze ñata n’a koñomekile tokwahalo ya ku itinga ku Mulimu, ili ku bulela kuli: “Kamita mu itinge ku Jehova mwa ku talima butata, mi mu bate tuso ya kopano ya hae.”

7. Buitikanelelo bu peta cwañi kalulo ye ñwi mwa musebezi wa muokameli wa maeto?

⁷ Buitikanelelo bwa tokwahala ku muokameli wa maeto ya kondisa lika. Ka ku swana sina Bakreste ba bañwi, u lika ka t’ata ku “lemuha linto ze nde ku fita.” (Mafilipi 1:10)a Maeluda ba fa sibaka ha ba ba ni lipuzo ka za taba ye ñwi, ki ko ku butali ku bona ku buza muokameli wa mupotoloho ya pota. (Liproverbia 11:14; 15:22) Ka mo ku kana kwa bela, maikuto a hae a’ itikanelezi ni kelezo ya mwa Mañolo li ka fumaneha ku ba ze tusa hahulu maeluda ha ba nze ba zwelapili ku talima taba ha s’a shimbulukile mwa puteho. Ka muhupulo o bat’o swana, Paulusi n’a bulelezi Timotea kuli: “Z’o utwile ku na, fapil’a lipaki ze ñata, u li beye kwa batu ba ba sepahala, ba ba ka kona ku li luta ba bañwi hape.”—2 Timotea 2:2.

8. Ki kabakalañi tuto ya Bibele, patisiso, ni ku yeya ha li li za butokwa hahulu?

⁸ Tuto, patisiso, ni ku yeya za mwa Mañolo ki ze tokwahala kwa neku la ku fa kelezo ye nde. (Liproverbia 15:28) Muokameli yo muñwi wa sikiliti n’a bulezi kuli: “Ha lu kopana ni maeluda, ha lu swaneli ku saba ku lumela kuli ha lu zibi kalabo kwa puzo ye ñwi.” Ku eza buikatazo bwa ku fumana “muhupulo wa Kreste” fa taba ku konahalisa ku fa kelezo ye tomile fa Bibele ili ye ka tusa ba bañwi ku lumelelana ni tato ya Mulimu. (1 Makorinte 2:16) Ka linako ze ñwi muokameli wa maeto u tokwa ku ñolela Sosaiti kuli i mu fe ketelelo. Ku be cwañi kamba cwañi, tumelo ku Jehova ni lilato la ku lata niti ki za butokwa hahulu ku fita ponahalo kamba bunangu mwa ku bulela. Mwa sibaka sa ku taha ka “bunde bo butuna bwa manzwi, kamba bwa butali,” Paulusi n’a kalisize bukombwa bwa hae mwa Korinte ka ‘ku fokola, ni ka ku saba, ni ku ngangama ko kutuna.’ Kana seo ne si mu bisize ya si na buanyu? Ka ku fapahana, ne si tusize ba mwa Korinte kuli tumelo ya bona “i si ke ya tomwa fa butali bwa batu, kono i tomwe fa mata a Mulimu.”—1 Makorinte 2:1-5.

Tulemeno To Tuñwi twa Butokwa Hahulu

9. Ki kabakalañi kutwelo-butuku ha i tokwiwa ki maeluda ba maeto?

⁹ Ku utwela ba bañwi butuku ku tusa baokameli ba maeto ku peta ze nde. Pitrosi n’a susuelize Bakreste kamukana kuli ba “be ni mukekecima,” kamba “kutwelo-butuku.” (1 Pitrosi 3:8, NW litaluso za kwatasi.) Muokameli yo muñwi wa mupotoloho u ikutwa kuli ku na ni tokwahalo ya ku ‘ba ni cisehelo ku mañi ni mañi mwa puteho ni ku fa mamelelo ka buniti.’ Ka moya o bat’o swana, Paulusi n’a ñozi kuli: “Mu tabe ni ba ba tabile, mu lile ni ba ba lila.” (Maroma 12:15) Mubonelo o cwalo u susueza baokameli ba maeto ku eza buikatazo bo bu buniti bwa ku utwisisa butata ni miinelo ya balumeli sina bona. F’o ba kona ku fa kelezo ya mwa Mañolo ye yahisa ili ye kona ku peta ze nde luli haiba i sebeliswa. Muokameli wa mupotoloho ya eza hande hahulu mwa ku bonisa kutwelo-butuku n’a amuhezi liñolo le ku zwelela kwa puteho ye li bukaufi ni Turin, kwa Italy: “Haiba mu bata ku ba ya hoha mamelelo, mu ise mamelelo ku ba bañwi; haiba mu bata ku tabisa, mu nyakalalise; haiba mu bata ku latiwa, mu tahise lilato; haiba mu bata ku tusiwa, mu itukiseze ku tusa. Seo ki sona se lu itutile ku mina.”

10. Ki sifi seo baokameli ba mipotoloho ni ba likiliti ba bulezi ka za ku ikokobeza, mi ki mutala ufi wa n’a file Jesu ku seo?

¹⁰ Ku ikokobeza ni ku atumeleha ku tusa baokameli ba maeto ku peta ze nde ze ñata. Muokameli wa mupotoloho yo muñwi n’a bulezi kuli: “Ki kwa butokwa hahulu ku ba ni mubonelo wa buikokobezo.” N’a elezanga baokameli ba maeto ba banca kuli: “Mu si ke mwa ituhelela ku kukuezwa ka ku sa swanela ki mizwale ba limbombo kabakala se ne ba kana ba mi ezeza, mi hape mu si ke mwa ciñekeza silikani sa mina ku ba ba cwalo, kono mu like ka t’ata kuli kamita ba sebelisane ni ba bañwi ka ku tokwa sobozi.” (2 Makolonika 19:6, 7) Mi muokameli wa maeto ya ikokobeza luli h’a na ku ikunga ku ba wa butokwa ka ku tula tikanyo kabakala kuli ki muyemeli wa Sosaiti. Muokameli yo muñwi wa sikiliti ka ku swanela n’a bulezi kuli: “Mu ikokobeze ni ku tabela ku teeleza kwa mizwale. Mu be ba ba atumeleha kamita.” Ka ku ba mutu yo mutuna ka ku fitisisa ya n’a kile a pila fa lifasi-mubu, Jesu Kreste n’a ka kona ku tahisa kuli batu ba ikutwe ku pitihanyiwa ha ba li ni yena, kono n’a ikokobelize ni ku atumeleha hahulu kuli mane nihaiba banana ne ba ikutwa ku iketa ha ba li ku yena. (Mateu 18:5; Mareka 10:13-16) Baokameli ba maeto ba bata kuli banana, ba ba nonoboka, basupali—ka mo ku inezi fela ufi kamba ufi ni mañi ni mañi mwa puteho—ba ikutwe ku lukuluha ku ba atumela.

11. Ha bu tokwiwa, buinyazo bu kona ku ba ni ku ama kufi?

¹¹ Ka mo ku inezi fela, “kaufela lu fosa mwa linto ze ñata,” mi ha ku na muokameli wa maeto ya sa fosi. (Jakobo 3:2) Ha ba fosa, buinyazo bo bu buniti bu fa maeluda ba bañwi mutala wa buikokobezo. Ka ku ya ka Liproverbia 22:4, “mupuzo wa ku ikokobeza ni ku saba Mulimu [kwa ka ku mu kuteka], ki bufumu, ni ku kutekiwa, ni bupilo.” Mi kana batanga ba Mulimu kaufela ha ba tokwi ku ‘zamaya ka buikokobezo ni Mulimu wa bona’? (Mika 6:8) Ha n’a buzizwe kuli ki kelezo mañi ya n’a ka fa ku eluda yo munca wa maeto, muokameli wa mupotoloho yo muñwi n’a talusize kuli: “U kuteke hahulu mizwale kaufela, mi u ba nge kuli ki ba ba ku fita. U ka ituta ze ñata kwa mizwale. U zwelepili ku ikokobeza. U si ke wa ipumisa. U si ke wa ba ni kamoya.”—Mafilipi 2:3.

12. Ki kabakalañi cisehelo mwa bukombwa bwa Sikreste ha i li ya butokwa hahulu?

¹² Cisehelo mwa bukombwa bwa Sikreste i koñomeka manzwi a muokameli wa mupotoloho. Ka mo ku inezi, muta yena ni musal’a hae ba fa mitala ya cisehelo mwa musebezi wa ku hasanya evangeli, maeluda, basali ba bona, ni ba bañwi kaufela mwa puteho ba susuezwa ku bonisa cisehelo mwa bukombwa bwa bona. “Mu cisehele mwa sebelezo,” ki mwa n’a susuelelize muokameli wa mupotoloho yo muñwi. N’a ekelize kuli: “Ni fumani kuli, ka nañungelele, ka m’o puteho i bezi ye na ni cisehelo mwa bukombwa, ki ka mo i bela ni butata bo bunyinyani.” Muokameli wa maeto yo muñwi n’a bulezi kuli: “Ni lumela kuli haiba maeluda ba sebeza ni mizwale ni likaizeli mwa simu ni ku ba tusa ku ikola bukombwa, seo si ka tisa kozo ya mwa munahano ni buikolwiso bo butuna ka ku fitisisa mwa ku sebeleza Jehova.” Muapositola Paulusi n’a ‘ndumebile kuli a bulele Evangeli ya Mulimu ku ba mwa Tesalonika mwa ndwa ye tuna.’ Ha ku komokisi ha ne ba hupula hande ku pota kwa hae ni musebezi wa hae wa ku kutaza mi ne ba shukelwa ku mu bona hape!—1 Matesalonika 2:1, 2; 3:6.

13. Ki sifi seo muokameli wa maeto a si hupula ha sebeza ni Bakreste sina yena mwa sebelezo ya mwa simu?

¹³ Ha sebeza ni Bakreste sina yena mwa bukombwa bwa mwa simu, muokameli wa maeto u beya mwa munahano miinelo ni bufokoli bwa bona. Nihaike kuli liakalezo za hae ne li kana za ba ze tusa, wa ziba kuli ba bañwi ne ba kana ba ba ni boi ha ba kutaza ni eluda ya cuukile. Mwa miinelo ye miñwi, kacwalo, susuezo neikana ya ba ye tusa hahulu ku fita kelezo. H’a ya hamoho ni bahasanyi kamba mapaina kwa tuto ya Bibele, ne ba kana ba bata kuli a zamaise tuto yeo. Seo si kona ku ba bonisa linzila ze ñwi za ku eza ka zona zwelopili mwa milutelo ya bona.

14. Ki kabakalañi ha ku konwa ku bulelwa kuli baokameli ba maeto ba ba na ni cisehelo ba nyangumuna ba bañwi kuli ba be ni cisehelo?

¹⁴ Baokameli ba maeto ba ba na ni cisehelo ba nyangumuna ba bañwi kuli ba be ni cisehelo. Muokameli wa mupotoloho yo muñwi mwa Uganda n’a zamaile mwa mutemwa ka hora ilikuli a ye ni muzwale yo muñwi kwa tuto ya Bibele ye ne i sa ezi zwelopili ye nde. Ha ne ba nze ba zamaya pula ya cuumuka kuli mane ba y’o fita ba kolobile hahulu. Lubasi lwa batu ba ba silela l’o ha ne lu fitile fa ku ziba kuli muenyi wa bona ne li muokameli wa maeto, ne ba sisimuhile hahulu. Ne ba ziba kuli ba mwa keleke ya bona ni kamuta ne ba si ke ba bonisa cisehelo ye cwalo kwa mutapi. La Sunda le ne li tatami, ne ba fumanehile kwa mukopano lwa pili mi ne ba bonisize takazo ya kuli ba be Lipaki za Jehova.

15. Ki se si bonwi sifi se sinde se ne si ipumanwi ku sona ki muokameli wa mupotoloho ya na ni cisehelo mwa Mexico?

¹⁵ Mwa kalulo ya Mexico ye bizwa Oaxaca, muokameli wa mupotoloho yo muñwi n’a ezize buikatazo bo ne bu si ka libelelwa luli ku yena. N’a lukisize kuli a lobale mwa tolongo masihu a mane ilikuli a potele sikwata sa mapantiti ba ba supile ba ne ba bile bahasanyi ba Mubuso. Ka mazazi a’ sikai n’a yanga ni mapantiti bao ha ne ba nze ba kutaza mwa muzuzu ni muzuzu wa mwa tolongo ni ku zamaisa lituto za Bibele. Bakeñisa cisehelo ye ne i bonisizwe, ze ñwi za lituto zeo ne li zamaisizwe ku isa busihu luli. “Kwa mafelelezo a ku pota k’o, mapantiti ni na ne lu ikutwile ku tala tabo kabakala susuezano yeo,” ki mwa ñolela muokameli wa mupotoloho y’o ya na ni cisehelo.

16. Ki kabakalañi ha ku tusa hahulu muta baokameli ba maeto ni basali ba bona ba fa susuezo?

¹⁶ Baokameli ba maeto ba lika ku susueza. Paulusi ha n’a potezi liputeho za mwa Masedonia, n’a ba “kutalize . . . ka manzwi a mañata.” (Likezo 20:1, 2) Manzwi a susuezo a kona ku tusa hahulu mwa ku libisa ba bahulu hamohocwalo ni banana kwa likonkwani za kwa moya. Kwa ofisi ye ñwi ye tuna ya mutai wa Watch Tower Society, patisiso ye si ka ipitela ne i patuluzi kuli baokameli ba mipotoloho ne ba tusize kabelo ye bat’o ba 20 pesenti ya baitateli kuli ba kene mwa sebelezo ya nako ye tezi. Ka mutala wa hae o munde sina mushaeli wa Mubuso wa ka nako ye tezi, musal’a muokameli wa maeto ni yena u ipumanehisa ku ba simbule se situna sa susuezo.

17. Muokameli wa mupotoloho yo muñwi ya s’a supezi u ikutwa cwañi ka za tohonolo ya hae ya ku tusa ba bañwi?

¹⁷ Sihulu basupali ni ba ba lembwalile ba tokwa hahulu susuezo. Muokameli yo muñwi wa mupotoloho ya s’a supezi u ñola kuli: “Kalulo ya musebezi wa ka ye ni fa tabo ye tuna hahulu mwa pilu ki tohonolo ya ku tusa ba ba tuhezi ku kutaza ni ba ba fokola kwa mubili mwahal’a mutapi wa Mulimu. Manzwi a kwa Maroma 1:11, 12 a na ni taluso ye ipitezi ku na, kakuli ni fumana susuezo ni m’ata a matuna ha ni nze ni ‘fa mpo ye ñwi ya kwa moya ku ba ba cwalo ilikuli ba fumane ku tiiswa.’”

Mipuzo ya Musebezi wa Bona wa ka Tabo

18. Ki milelo mañi ya ka Mañolo ye ba na ni yona baokameli ba maeto?

¹⁸ Baokameli ba maeto ba cisehela ka buniti ku tusa balumeli sina bona. Ba bata ku tiisa liputeho ni ku li yaha kwa moya. (Likezo 15:41) Muokameli wa maeto yo muñwi u sebeza ka t’ata “ku susueza, ku wetulusa, ni ku hulisa takazo ya ku taleleza bukombwa ni ku zwelapili ku pila ka niti.” (3 Joani 3) Yo muñwi u bata ku toma balumeli sina yena mwa tumelo. (Makolose 2:6, 7) Mu hupule kuli muokameli wa maeto ki ‘mulikani wa niti ya kwa coko ni luna,’ haki ya busa tumelo ya ba bañwi. (Mafilipi 4:3; 2 Makorinte 1:24) Ku pota kwa hae ki nako ya susuezo ni musebezi o ekezehile, hamohocwalo ni sibaka sa kuli sitopa sa maeluda si lundulule zwelopili ye ezizwe ni ku nyakisisa likonkwani za mwa nako ya kwapili. Ka manzwi ni mutala wa hae, bahasanyi ba mwa puteho, mapaina, batanga ba bukombwa, ni maeluda ba kona ku libelela ku yahiwa ni ku nyangumunelwa musebezi o kwapili. (Mu bapanye 1 Matesalonika 5:11.) Kacwalo he, mu fe kemelo ya ka pilu kamukana kwa ku pota kwa muokameli wa mupotoloho, mi mu itusise ka ku tala sebelezo ye fiwa ki muokameli wa sikiliti.

19, 20. Baokameli ba maeto ni basali ba bona ba fumani cwañi mupuzo kwa sebelezo ya bona ya ka busepahali?

¹⁹ Baokameli ba maeto ni basali ba bona ba fuyolwa hahulu kabakala sebelezo ya bona ya ka busepahali, mi ba kona ku ikolwisisa kuli Jehova u ka ba fuyola kabakala bunde bo ba eza. (Liproverbia 19:17; Maefese 6:8) Georg ni Magdalena ki bosinyalana ba basupali ili ba ne ba sebelize ka lilimo ze ñata mwa musebezi wa maeto. Kwa mukopano mwa Luxembourg, Magdalena n’a atumezwi ki mutu y’o n’a file bupaki ku yena lilimo ze fitelela 20 kwamulaho k’o. Cisehelo ya musali wa Mujuda y’o mwa niti ne i zusulusizwe ki lihatiso za Bibele za n’a siyezwi ki Magdalena, mi nako ha ne i nze i ya a fita fa ku kolobezwa. Georg n’a atumezwi ki kaizeli wa kwa moya ya n’a hupula ku pota kwa Georg kwa ndu ya kaizeli y’o lilimo ze fitelela 40 kwamulaho k’o. Mutahisezo wa hae wa ka tukufalelo wa taba ye nde kwa nalulelule ne u tisize kuli kaizeli y’o ni munn’a hae ba amuhele niti. Ka mo ne ku bezi fela, Georg hamohocwalo ni Magdalena ne ba tabile hahulu.

²⁰ Bukombwa bwa Paulusi bo ne bu tahisize siselo mwa Efese ne bu mu tiselize tabo mi ne bu kana bu mu susuelize ku ama manzwi a Jesu a’ li: “Ku na ni mbuyoti mwa ku fana, ye fita ye mwa ku fiwa.” (Likezo 20:35) Bakeñisa kuli musebezi wa maeto u ama ku fana kwa kamita, ba ba abana ku ona ba fumana tabo, sihulu ha ba lemuha ze nde ze zwa mwa musebezi wa bona. Muokameli wa mupotoloho yo muñwi ya n’a tusize eluda ya n’a zwafile n’a bulelezwi mwa liñolo kuli: “Mu ni ‘tiisize hahulu pilu’ mwa bupilo bwa ka bwa kwa moya—ku fita mo mu zibela. . . . Ni kamuta ha mu na ku utwisisa ka ku tala ka mo mu tuselize Asafi wa mwa linako za cwale, ili y’o ‘mautu a hae a batile ku sitatala.’”—Makolose 4:11; Samu 73:2.

21. Ki kabakalañi ha ne mu ka bulela kuli 1 Makorinte 15:58 ki ye ama kwa misebezi ya baokameli ba maeto?

²¹ Mukreste wa musupali ya n’a li mwa musebezi wa mupotoloho ka lilimo-limo u lata ku nahana ka za 1 Makorinte 15:58, ili k’o Paulusi n’a susuelize kuli: “Mu tiye, mu si ke mwa zikinyeha, mi mu tiise kamita musebezi wa Mulena, inze mu ziba kuli musebezi wa mina o tata ha u na ku ba o si na tuso ku Mulena.” Ka buniti fela baokameli ba maeto ba na ni ze ñata za ku eza mwa musebezi wa Mulena. Mi lu ba ba itumela hakalo kuli ba sebeza ka tabo luli sina likombwa ze sepahala za sishemo sa Jehova se si si ka libelelwa!

[Litaluso za kwatasi]

Ne Mu Ka Alaba Cwañi?

◻ Ki kabakalañi baokameli ba maeto ha ba konwa k’u ngiwa sina “likombwa ze nde”?

◻ Ki ifi ye miñwi ya miinelo ye tusa baokameli ba mipotoloho ni ba likiliti ku peta ze nde ze ñata?

◻ Ki kabakalañi buikokobezo ni cisehelo ha li li za butokwa hahulu ku ba ba abana mwa musebezi wa maeto?

◻ Ki milelo ifi ye minde ye ba na ni yona baokameli ba maeto?

[Siswaniso se si fa likepe 15]

Baokameli ba maeto ba bata ku susueza balumeli sina bona

[Maswaniso a fa likepe 16]

Ba banca hamohocwalo ni basupali ba kona ku fumana tuso kwa sango ni baokameli ba maeto ni basali ba bona

[Siswaniso se si fa likepe 17]

Bukombwa bwa ka cisehelo bwa muokameli wa maeto bu hulisa cisehelo ku ba bañwi