Ku Tiisana Kaufela Luna
1. Ki ifi kolo ye banga teñi baokameli ba maeto ha ba potela liputeho?
1 Muapositola Paulusi na ñolezi puteho ya Maroma kuli: “Ni shukezwi ku mi bona, kuli ni mi fe mpo ye ñwi ku za Moya, mi mu fumane ku tiiswa. Kikuli na, hamoho ni mina, lu kutazane ka tumelo ye li ku mina ni ku na.” (Maro. 1:11, 12) Ni kacenu le ku cwalo, baokameli ba maeto ha ba potelanga liputeho lu banga ni kolo ya ku tiisana.
2. Ki kabakalañi zibiso ya ku pota kwa muokameli wa mupotoloho ha i fiwanga ka ku itahanela?
2 Puteho: Liputeho li zibiswanga mazazi a ka to potela puteho muokameli wa mupotoloho mi hañata zibiso yeo i fiwanga ku sa siyezi ibato ba likweli ze talu. Ku zibiselezwa cimo cwalo ku lu tusa ku itukiseza ilikuli lu to fumana tuso ye tuna. (Maef. 5:15, 16) Haiba mwa beleka, mwa kona ku kupa sibaka kwa musebezi ilikuli mu sebeze ni puteho mwa bukombwa mwahal’a sunda yeo. Ba bañwi ba itukisezanga ku eza bupaina bwa ku tusa mwa kweli ya taha muokameli wa mupotoloho. Haiba ne mu lukisize ku tama musipili mwa kweli yeo, kana ha mu koni ku cinca kuli ite mu fumanehe sunda yeo?
3. Ki lika mañi ze lu swanela ku eza kuli lu fumane ku tiiswa mwa sunda ya pota muokameli wa mupotoloho?
3 Mulelo o mutuna wa potelanga muokameli wa mupotoloho ki ku susueza mizwale ni likaizeli ka butu ni ku ba tusa mwa bukombwa. Kana ha mu koni ku iñolisa ku sebeza ni yena kamba musal’a hae haiba u nyezi? Muokameli wa mupotoloho u tabelanga ku sebeza ni bahasanyi ba ba fitana-fitana, ku kopanyeleza cwalo ni bani ba ba sa zo kalisa ku yanga mwa simu kamba ba ba tokwa ku tusiwa mwa bukombwa. Kaufela luna lwa kona ku ituta kwa mutala wa mwa ku kutaleza ni ku sebelisa liakalezo za kona ku lu fa ha lu sebeza ni yena. (1 Makor. 4:16, 17) Ku mema muokameli wa mupotoloho kwa lico ku ka lu fa kolo ye ñwi ya ku tiisana. (Maheb. 13:2) Lu swanela ku teelezanga ka tokomelo kwa lingambolo za muokameli wa mupotoloho kakuli u itukisezanga zona ka ku ya ka butokwi bwa puteho.
4. Lu kona ku tiisa cwañi muokameli wa luna wa mupotoloho?
4 Muokameli wa Mupotoloho: Muapositola Paulusi na sa shutani ni mizwale ba na sebeleza kakuli ni yena na kopana ni matata ni lipilaelo mi na itebuhanga ku susuezwa. (2 Makor. 11:26-28) Puteho ya kwa Roma ha ne i utwile kuli Paulusi, ya na li lipantiti ka nako yeo, wa taha kuli a to ba potela, ba bañwi mwa puteho yeo ba yo mu katanyeza kwa Musika wa Apiusi—mi wo ne li musipili wa likilomita ze 74! “Paulusi a man’o ba bona, a itumela ku Mulimu, a tiya pilu.” (Lik. 28:15) Ni mina mwa kona ku tiisa muokameli wa mina wa mupotoloho. Mu mu ‘kuteke ni ku fita’ ka ku abana ka mafulo-fulo mwa litukiso za sunda ya potela puteho ya mina. (1 Tim. 5:17) Mu bonise ka manzwi ni ka likezo za mina kuli mwa itebuha luli kwa buikatazo bwa eza kabakala mina. Muokameli wa mupotoloho ni musal’a hae ba ka taba ha ba ka bona tumelo ya mina, lilato la mina, ni buitiiso bwa mina.—2 Mates. 1:3, 4.
5. Ki kabakalañi kaufela luna ha lu tokwa ku tiiswa kacenu?
5 Ki mañi hape ku luna ya sa tokwi ku tiiswa ona mwa “linako ze tata” ze ze lu pila ku zona? (2 Tim. 3:1) Kacwalo mu ikatulele ku abananga ka ku tala mwa litukiso za sunda ye ipitezi ya ku pota kwa muokameli wa mupotoloho. Kaufela luna—ibe baokameli ba maeto kamba bahasanyi—lwa kona ku tiisana ka tabo. Hape, ka ku eza cwalo, lu ka ‘tiisana lipilu ni ku yahisana.’—1 Mates. 5:11.