Mu Tokomele Kamita Tuto ya Mina

¹ Tukiso ye nca ya Sikolo sa Bukombwa sa Teokratiki i ka kalisa mwa January 1995. Mwahal’a silimo libuka za Ku Swalisana Hamoho mwa ku Lapela Mulimu A Nosi wa Niti kamba ya Ba Ba Kopanyizwe ku Peta Bukombwa bwa Luna li ka sebeliswa mwa ngambolo ya taelo. Bakeñisa kuli ha ku na ku b’a nga ni lipuzo za lundululo hamulaho fela wa ku fiwa kwa ngambolo ya taelo ye zwelela mwa buka ya Ba Ba Kopanyizwe, ki sika mañi se lu kona ku eza ili ku fa tokomelo kwa tuto ya luna ni ku fumana lituso ze nde ka ku fitisisa?—1 Tim. 4:16.

² Nihaili kuli buñata se ba balile kale libuka za Ba Ba Kopanyizwe ni ya Ku Swalisana Hamoho, nyakisiso ya litaba fa tomahanyo ya sikolo i ka tusa b’ote ku itebuha hahulu ni ku fita sanda sa bona sa teokratiki. (Samu 71:17, 18) Kiñi ha mu sa beyi kwatuko nako ka viki ni viki ya ku lundulula litaba ze filwe mwa libuka zeo?

³ Lingambolo za Taelo ze Nyangumuna ni ku Tabisa: Lingambolo za taelo ze zwelela mwa libuka za Ba Ba Kopanyizwe ni ya Ku Swalisana Hamoho li swanela ku tahiswa ka mukwa o’ nyangumuna ni o’ tabisa. Hape li swanela ku tunafaza ku sebeza ko ku butokwa kwa litaba zeo, ka ku itusisa zona mwa ku tungisa kutwisiso ya luna ya Linzwi la Mulimu ni ku li sebelisa ka ku tala ni ku fita mwa bupilo bwa luna. Hape lu ka tusiwa ku ba ni mubonelo o tezi wa ka m’o puteho ya Sikreste i sebeleza kacenu. Haiba lubasi lo luñwi ni lo luñwi lo lu fumaneha kwa Sikolo ne lu ka itwalela kopi ya lihatiso zeo kwa mukopano, f’o lilama za lubasi ne ba ka kona ku latelela ka ku tala luli ngambolo ya taelo ni ku fumana tuso kwa lisupo ze buhisanwa.

⁴ Ku Baliwa kwa Bibele ko ku Hoha Muhupulo: Ku bala ko ku nde, ka ku koñomeka manzwi ni ka ku ikutwa, ki kalulo y’e li ya butokwa ya ku luta ka buanyu. Fahalimu a seo, buñata bwa litaba ze filwe ze na ni ku baliwa mwa Ngambolo No. 2 haki ze ñata hahulu, mi nako ye likani hañata i k’a ba teñi ku mubuleli ya ku fa litaluso za makalelo ni za mafelelezo. Makalelo a swanela ku nyangumunena cisehelo kwa litaba ze filwe ni ku tahisa kuli baputehi ba itemuhele ku ama kwa zona ko kutuna. Mafelelezo na kana a kopanyeleza ni ku taluswa kwa maikuto ni ku sebeliswa kwa litaba, ili f’o mubuleli a itusisa ka ku tala nako ya filwe.

⁵ Litaba ze ñwi ka za tukiso ya sikolo ni ka m’o likalulo li na ni ku felwa li konwa ku fumanwa mwa “Tomahanyo ya Sikolo sa Bukombwa sa Teokratiki ya 1995.” Lu tokomela tuto ya luna ka ku lundulula litaelo ze mwa litaba zeo, ka ku itukiseza hande likalulo za luna, ni ku sebelisa kelezo ye lu fiwa, ilikuli lu zwisezepili bukwala bwa ku bulela ni ku luta. Bao ba ba si ka iñolisa kale mwa sikolo ba memiwa ka mufutumala kuli ba iñolise.