Mu Tusiwe ki Tukiso ya 1999 ya Sikolo sa Bukombwa sa Teokratiki
1 Jesu n’a li yena Muluti ya cuukile ka ku fitisisa. Batu ne ba “butumuka kabakala tuto ya hae.” (Mare. 1:22) Nihaike ha lu koni ku bulela ni ku luta inge mwa n’a ezelize fela Jesu, lwa kona ku ikataza ku mu likanyisa. (Lik. 4:13) Kabakaleo, ku abana mwa Sikolo sa Bukombwa sa Teokratiki ku ka lu tusa ku ekeza kwa buculoki bwa luna mwa ku bulela ni ku luta.
2 Mwa 1999, Ngambolo No. 1 i ka toma sihulu fa litaba za mwa limagazini za Tora ya ku Libelela za mwa 1997 ni Buka ya Muzamaisezo wa Sikolo. Kutwisiso ya luna ya litaba za kwa moya i ka ekezeha hahulu haiba lu bala cimo litaba zeo mi kihona lu li teeleza fa tukiso ya sikolo. Ba ba fiwa ku fa lingambolo za taelo zeo ba swanela ku bonisa hande m’o litaba zeo li sebeleza, ili ku li fa ka nzila ye tabisa ili ye munati. Ngambolo No. 3 i ka toma fa buka ya Tabo ya Lubasi ni ya Mutu Yo Mutuna mi Ngambolo No. 4 ni yona i ka toma fa buka ya Mutu Yo Mutuna ni ya Tabo ya Lubasi. Muokameli wa sikolo u swanela ku nyakisisa litaba za ngambolo a si ka li abela kale. Baituti bote ba ba fiwa ngambolo ye tomile fa buka ya Tabo ya Lubasi ba swanela ku ba ba ba fa mutala o munde mwa mupilelo wa bona mwa lubasi.
3 Mu Itusise Kelezo, mi Mu Itukiseze Hande: Mañi ni mañi wa kona ku bolosola buculoki bwa hae mwa ku bulela ni ku luta. (1 Tim. 4:13) Kabakaleo, lu kupe kelezo ku fita ku ikutwa kuli i swanela ku pimiwa. (Liprov. 12:15; 19:20) Ku tahisa niti ka buanyu kwa mikopano ni mwa bukombwa bwa mwa simu ha ku ami fela ku talusa litaba za niti kamba ku bala mañolo. Lu tokwa ku ama lipilu ni ku susumeza ba ba lu teeleza. Lwa kona ku eza seo ka ku bulela niti ka buikolwiso ili ku zwelela kwa pilu ya luna. (Mu bapanye Likezo 2:37.) Likelezo ze lu fiwa mwa sikolo li ka lu tusa ku peta zeo.
4 Mu sa fiwa fela ngambolo, mu nahane ka za lika ze mu ka sebeleza teñi ka mo li taluselizwe mwa Buka ya Muzamaisezo wa Sikolo. Mu nyakisise ze mu tokwa ku eza kuli mu sebelise kelezo ye ne mu filwe kwamulaho. Mu yeye toho ya taba ya mina, muezezo o mu ka itusisa haiba u tokwahala, ni mo mu ka sebeliseza mañolo a’ mwa ngambolo ye mu filwe. Mu nahanisise mo mu ka itusiseza hande litaba kuli mu lute ni ku susueza.—1 Tim. 4:15, 16.
5 Haiba mu ikalelwa ka za ku iñolisa mwa sikolo, mu lapele ka za teñi kihona mu ka bulelela muokameli wa sikolo mo mu ikutwela. Mañi ni mañi wa kona ku tuseha ka ku isa pilu kwa litaba ze ka fiwa mwa Sikolo sa Bukombwa sa Teokratiki sa 1999.