Kalulo ya Puzo

◼ Bakeñisa kuli cwale se lu na ni buka ya Zibo Ye Isa kwa Bupilo bo Bu Sa Feli, tuto ya Bibele ya fa ndu i swanela ku zamaiswa ka nako ye kuma kai?

Bukombwa bwa Luna bwa Mubuso bwa September 1993 ne bu babalize kuli tuto ya Bibele ya fa ndu i zamaiswe ni ba ba sa z’o tabela ku fitela libuka ze peli li itutiwa. Cwale ha se lu na ni buka ya Zibo, ku bonahala ku ba ko ku swanela ku eza cinceho mwa muezezo wo, sina ka mo ku boniselizwe fa makepe 25 ku isa 27 a musulo wa January 1, 1996, wa Tora ya ku Libelela.

Buka ya Zibo i lukiselizwe ku tusa “ba mayemo a mande kwa bupilo bo bu sa feli” kuli ba itute ze ba tokwa ku ziba kuli ba eza buineelo ku Jehova ni ku kolobezwa. (Lik. 13:48, NW) Kacwalo, hamulaho wa ku feza hatiso ye nca yeo, ha ku swaneli ku ba ko ku tokwahala ku ituta buka ya bubeli ni muituti ya swana. Baituti ba mina ba Bibele ha ba kalisa ku ikungela niti, mwa kona ku ba susueza ka ku zwelapili kuli ba taleleze zibo ya bona ka ku fumaneha kwa mikopano ya Lipaki za Jehova hamohocwalo ni ka ku bala Bibele ni lihatiso za Sikreste ze fapahana-fapahana.

Haiba mwa ziba hande lipuzo ze fa makepe 175 ku isa 218 a buka ya Ba Ba Kopanyizwe ku Peta Bukombwa bwa Luna, seo ne si kana sa tusa. Nihaike kuli ha mu swaneli ku ama kwa lipuzo zeo kamba ku li lundulula ni muituti wa Bibele, ne ku ka ba hande ku koñomeka lisupo mwa buka ya Zibo ili ze ka konisa muituti ku bonisa kutwisiso ye swanela ya liniti za Bibele ze mutomo muta maeluda ba lundulula lipuzo ni linumwana ba kolobezo.

Ha ku na tokwahalo ya ku ekeza fa litaba ze mwa buka ya Zibo, ili ku tisa litaba za kwande kamba lipulelo ze ekezehile za ku yemela lituto za Bibele kamba ku lwanisa lituto za buhata. Seo ne si ka liyehisa fela tuto. Ka ku fapahana, ku sepiwa kuli buka yeo i konwa ku fezwa kapili, mwendi mwa likweli ze ba bat’o ba ze silezi. Seo si koñomeka tokwahalo ya kuli lu itute cimo litaba zeo ka ku tala ilikuli lu kone ku li tahisa ka ku utwahala ni ka ku nonga hande fa lisupo. Muituti wa Bibele ni yena u swanelwa ku susuezwa ku ituta cimo, ku bala mañolo a’ bonisizwe, ni ku lika ku lemuha hande seo buka yeo i luta mwa kauhanyo ye ñwi ni ye ñwi.

Tora ya ku Libelela se i koñomekile tokwahalo ya kuli Lipaki za Jehova ba zamaise palo ye tuna ya lituto za Bibele mwa nako ye kuswani. (Mu bone Isaya 60:22.) Ku itusisa buka ya Zibo ka buanyu ku kona ku tusa ba banca ku fumana zibo ye isa kwa bupilo bo bu sa feli ni k’u nga muhato ka yona.—Joa. 17:3.