Mu Kutaze Taba ye Nde Kai ni Kai

¹ Bakreste ba kwa makalelo ne ba kutalize taba ye nde kai ni kai. Ne ba na ni tukufalelo hahulu kuli mwahal’a lilimo ze 30 ku zwa fa zuho ya Jesu Kreste, lushango lwa Mubuso ne lu se lu “bulezwi ku ba ba li teñi kaufela mwatas’a lihalimu.”—Makolo. 1:23.

² Batanga ba Jehova ba kacenu ba ba na ni tukufalelo ba na ni mulelo o swana—wa ku fita ku mañi ni mañi ya konahala ka taba ye nde ya Mubuso. Ki sifi se si kona ku lu tusa mwa ku peta sona sikonkwani seo? Batu ba bañata ni ku fita ba sweli ku beleka ka nako ye tezi mi hañata ha ba yo fa mandu ha lu pota teñi. Ha ba sa sebezi, ne ba kana ba li mwa misipili, ku leka lika, kamba ku ndongwama mufuta o muñwi wa za ku itabisa ka zona. Ba ba swanelwa mwahal’a bona ba swelwi ku fitiwa cwañi ku bona ka lushango lwa Mubuso?—Mat. 10:11.

³ Ba bañwi ba swelwi ku fumanwa kwa libaka za bona za mubeleko. Nihaiba tutolopo to tunyinyani tu na ni libaka za lipisinisi k’o batu ba bañata ba tola mwahal’a nako ye ñata ya lizazi. Mwa mileneñi ye mituna, batu ba ba sebeza mwa likalulo za miyaho ya za bumapangapanga kamba mwa miyaho ye shangatami ya maofisi ni ba ba pila mwa mandu a shangatami ili a’ silelelizwe hahulu ba sweli ku fiwa bupaki—ili lwa pili ku ba bañata. Kwa mafelelezo a liviki, ba bañwi ba se ba bonanwi ni bona ha ba nze ba ishumusa mwa libaka ze buheha, za ku itabiseza teñi, za ku ezeza teñi minganda, kamba mwa tundu twa ku pumulela teñi kamba ha ba nze ba libelela mo ku yemisezwa limota kamba mwa libaka za mabenkele se ba fumanwi ku ba ba ba amuhela taba ye nde.

⁴ Bahasanyi ba ba sweli ku ekezeha kwa palo ba sweli ku eza buikatazo bo bu ipitezi bwa ku fa bupaki mwa libaka za nyangela, kaufela ko ku konwa ku fumanwa batu. Pili, bona Lipaki bao ne ba zina-zinile ni ku ikutwa boi kabakala ku twaela ku kutaza mwa miinelo ya kamita, inge cwalo fa ndu ni ndu. Ba ikutwa cwañi cwale?

⁵ “Seo si matafalize sinca bukombwa bwa ka!” ki mw’a makalela muzwale yo muñwi ya na ni yeloseli. Yo muñwi u ekeza kuli: “Si ni bisa wa mamelelo ye sa biuki.” Paina ya sa hulile u talusa kuli: “Si bile se si fa m’ata mwa munahano, kwa mubili, ni kwa moya, . . . mi ni sa hula.” Muhasanyi yo muñwi u lemuha kuli cwale s’a fita kwa batu ba bañata ili bao ni kamuta ha ba si ka ambola kale ni Lipaki za Jehova. Ba banca ni bona ba sweli ku ikenya mwa moya wa musebezi o ikoliwa wo. Yo munca yo muñwi u bulela cwana: “Ki o tabisa kakuli mutu u bulela kwa batu ba bañata hahulu.” Yo muñwi u li: “Ni sweli ku fa libuka ze ñata hakalo ku fita lili pili!” Zeo kaufela li sweli ku ezahala mwa kalulo ye sebelezwa teñi ka ku kuta-kutela.

⁶ Baokameli ba Maeto Ba Sweli ku Fa Ketelelo: Ka ku lemuha kuli “mukwa wa lifasi le wa fela,” Sosaiti cwanoñu fa ne i akalelize kuli baokameli ba maeto ba cince tomahanyo ya bona ya sebelezo ya mwa simu ka viki ni viki ilikuli batu ba bañata ka mo ku konahalela kaufela ba kone ku fitiwa ku bona ka taba ye nde. (1 Makor. 7:31) Ka lilimo-limo, baokameli ba mipotoloho ne ba sebelisa kakusasana ka mazazi a mwahal’a viki kuli ba abane mwa musebezi wa fa ndu ni ndu, mi ne ba neela musihali kwa ku eza misipili ya makutisezo ni ku zamaisa lituto za Bibele za mwa ndu. Mwa libaka ze ñwi, tomahanyo yeo neikana i sa li ye sebeza hande. Ku ze ñwi, ne ku si ke kwa petiwa se si likani ka ku sebeza fa ndu ni ndu mwahal’a kakusasana ka mazazi a mañwi a mwahal’a viki. Mwa miinelo ye cwalo, muokameli wa maeto n’a kana a keta kuli kwa makalelo a lizazi ne ku ka ba hande ku abana mwa musebezi wa fa sintolo ni sintolo kamba ku fa bupaki mwa makululu. Kamba n’a kana a lukisa kuli likwata ze nyinyani li fe bupaki mwa miyaho ye shangatami ya maofisi, mwa libaka za mabenkele, mo ku yemisezwa limota, kamba mwa libaka ze ñwi za nyangela. Ka ku itusisa kwa bahasanyi nako ye fumaneha kwa neku la sebelezo ya mwa simu ka buanyu hahulu, batu ba bañata ni ku fita ba ka ambolwa ku bona.

⁷ Lipiho li bonisa kuli cinceho yeo se i latilwe hahulu ki baokameli ba maeto hamohocwalo ni bahasanyi. Litopa za maeluda ze sikai se li memile muokameli wa mupotoloho kuli a lute bahasanyi ba sikai mwa miinelo ya musebezi ye tokwa ku fiwa mamelelo fa sibaka. Se ku bile ko ku tusa kuli bona bahasanyi bao ba ye ni muokameli wa maeto ha nze a abana ku o muñwi wa misebezi yeo. Ku zwa f’o, bahasanyi ba ba lutilwe, ni bona ba konile ku luta ba bañwi. (2 Tim. 2:2) Kacwalo, cwale batu ba bañata ni ku fita se ba fitiwa ku bona ka taba ye nde.

⁸ Ka mo ku inezi fela, ha mu tokwi ku libelela kuli muokameli wa mupotoloho a pote ilikuli mu like kwa linzila ze ñwi zeo za ku kutaza ka zona. Ki ye mihupulo ye fitana-fitana ye ne mu kana mwa fumana ku ba ye sebeza hande mwa kalulo ya mina:

⁹ Ku Fa Bupaki mwa Makululu: Ka linako ze ñwi mwa mazazi a mwahal’a viki ha lu nze lu potela sibaka sa mandu mo ba siyo batu lu ipuzanga kuli ‘Batu kaufela ba ile kai?’ Ba bañwi ne ba kana ba fumanwa ba li mwa tusipili kamba ba sweli ku leka lika. Kana se mu likile ku fita ku bona ka ku fa bupaki mwa makululu? Ha u eziwa hande, muinelo wo wa bukombwa u kona ku ba o tahisa se siñwi hahulu. Mwa sibaka sa ku yema kulokulikuñwi ni limagazini, ki ko kunde ka ku fitisisa ku atumela batu ni ku kalisa puhisano ye silikani. Haki ko ku tokwahala ku fa bupaki ku lifitanzila kaufela. Mu bulele ku ba ba si ka hema, ba ba cwale ka ba ba bonela fa mahaulo ze lekiswa, ba ba mwa limota ze yemi, kamba batu ba ba libelela litanansipoti za nyangela. Pili, ne mu kana mwa mu lumelisa fela ka mukwa o silikani ni ku litela kalabo. Haiba mutu y’o wa tabela ku ambola, mu kupe maikuto a hae fa taba ye mu nahana kuli neikana ya hoha mamelelo ya hae.

¹⁰ Muokameli wa maeto yo muñwi n’a memile bahasanyi ba silezi ku ya ni yena ni musal’a hae mwa ku fa bupaki mwa makululu. Ki sifi se ne si zwile mwateñi? “Ne lu bile ni nako ya kakusasana ye nde hahulu!” ki mw’a bihela. “Batu ne ba li teñi. Limagazini ze 80 ni matrakiti a mañata ne li filwe. Ne lu bile ni ku ambolisana ko ku sikai ko ku nyangumuna. Yo muñwi wa bahasanyi, ili ya n’a abana mwa musebezi wa mwa makululu lwa pili, n’a makalile kuli: ‘Se ni bile mwa niti ka lilimo-limo mi ne ni sa lemuhi se ne ni yawa!’ Mafelelezo a viki ha t’o esha, limagazini za puteho ze ne bundami ne se li felile.”

¹¹ Ha n’a nze a sebeleza puteho ye tatama, muokameli wa maeto ya swana y’o n’a fitile fa ku ziba kuli bahasanyi ba sikai ne ba abani mwa ku fa bupaki mwa makululu ka ku itahanela nako ye ñwi kakusasana kono ne ku si ka konda hande. Kaizeli yo muñwi n’a bulezi kwa batu ba babeli fela mwahal’a nako kaufela ya ku fa bupaki, kakuli ba bañwi kaufela ba n’a katana ne ba matela kwa misebezi. Muokameli wa maeto n’a akalelize kuli kaufel’a bona ba kutele ku lona likululu leo hamulahonyana kakusasana. Ne ba ezize cwalo, mi ne ba bile ona k’o ku fitela musihali-tuna. Kaizeli ya n’a bile ni lipuhisano ze peli fela ka ku itahanela kakusasana n’a ezize hande ni ku fita ha n’a kutile. N’a file limagazini ze 31 ni libroshuwa ze 15, a’ nga mabizo ni likeyala za batu ba supile, mi a kalisa lituto za Bibele za fa ndu ze peli! Ba bañwi mwa sikwata seo ne ba bile ni ze ne zwile mwateñi ze susueza ka nzila ye swana.

¹² Haiba mu fumana mutu ya bonisa cisehelo, mu like k’u nga libizo, keyala, ni nombolo ya luwaile lwa hae. Mwa sibaka sa ku kupa litaba zeo onaf’o, ne mu kana mwa bulela kuli: “Ni ikozi puhisano ye. Kana ku na ni nzila ye lu kona ku zwisezapili puhisano yeo ka nako ye ñwi?” Kamba mu buze kuli: “Kana ku na ni nzila ifi kamba ifi ye ni kona ku mi etela ka yona kwa ndu ya mina?” Ba bañata ba ba ambolisanwi ni bona cwalo ba lumelanga musipili wa makutisezo.

¹³ Ha mu ambola ni mutu ya tabela ili ya pila mwa kalulo ye filwe kwa puteho ye ñwi, mu swanela ku fa litaba zeo ilikuli mizwale ba k’o ba kone ku latelela cisehelo yeo. Kana ku fa bupaki mwa makululu ne ku ka ba nzila ye buanyu ya ku hasanya ka yona taba ye nde mwa silalo sa habo mina? Haiba ku cwalo mu lundulule taba ye li “Ku Fumana Ba Ba Tabela ka ku Itusisa ku Fa Bupaki mwa Makululu ko ku Buanyu” mwa musulo wa July 1994 wa Bukombwa bwa Luna bwa Mubuso. Cwale mu lukise ku abana mwa ku fa bupaki mwa makululu ka nako ye swanela ya lizazi ili ye ka mi konisa ku fita kwa batu ba bañata ka mo ku konahalela kaufela.

¹⁴ Ku Fa Bupaki mwa Litanansipoti za Nyangela: Nako ye ñwi kakusasana, mapaina ba sikai ne ba ketile ku fa bupaki kwa batu ba ne ba litela mbasi bukaufi ni sikolo se si pahami sa fa sibaka. Nihaike kuli ne ba bile ni lipuhisano ze tabisa, ne ku na ni butata. Puhisano ha ne i kalisa ku tiya, mbasi ne i taha, ili ku felisa puhisano yeo kapili-pili. Mapaina ne ba tatuluzi butata b’o ka ku kwela mbasi yeo ni ku zwelapili ku fa bupaki kwa bazamai ba ka mbasi ha ne ba nze ba pumahanya mwa tolopo. Kwa mafelelezo a musipili, mapaina ne ba kwela mbasi ye kuta ko ne ba zwile, ba nze ba fa bupaki ha ba nze ba ya. Hamulaho wa misipili ye sikai ya ku ya ni ku kuta, ne ba kopanyize ze ne zwile mwa buikatazo bwa bona: Ne ba file limagazini ze fitelela 200 mi lituto ze silezi ne li kalisizwe. Bazamai ba bañwi ne ba file likeyala ni linombolo za luwaile lwa bona ka ku itatela ilikuli ba konwe ku potelwa kwa ndu. Viki ye ne i tatami, mapaina ne ba kutezi kwa siteshini sa limbasi mi ne ba latelezi muezezo o swana ni wa pili. Ne ba file limagazini ze 164 mi ne ba kalisize tuto ya Bibele ye ñwi hape i liñwi. Fa siteshini se siñwi muzamai n’a kwezi mbasi mi a ina fa sipula si nosi se ne si si na mutu—ili bukaufi ni paina. A talima muzwale y’o ni ku bulela ka lumenyo kuli: “Na ziba, mu na ni Tora ya ku Libelela ya ku ni fa.”

¹⁵ Bahasanyi ba bañata ba fa bupaki bo bu buanyu ha ba nze ba zamaya ka mbasi, sitimela, kamba fulai. Mu kona ku kalisa cwañi puhisano ni muzamai ya inzi bukaufi ni mina? Muhasanyi yo muñwi wa lilimo za buhulu ze 12 n’a kalisize fela ku bala Awake! mwa mbasi, ili ka ku sepa ku hoha mamelelo ya musizana ya sa nonoboka ya n’a inzi mabapa ni yena. Ne ku bile honacwalo. Musizana y’o n’a mu buzize sa n’a bala, mi mushimani wa paki n’a alabile kuli n’a bala ka za tatululo kwa butata bo ba talimana ni bona ba banca. N’a ekelize kuli n’a fumani hahulu tuso kwa taba yeo ni kuli ne i ka mu tusa ni yena. Musizana a amuhela limagazini ka tabo. Puhisano ya bona ne i utwilwe ki ba banca ba bañwi ba babeli ili bao ni bona ne ba kupile likopi za limagazini. Ha se ku bile cwalo, muzamaisi wa mbasi a yemisa mbasi kwatuko a mukwakwa mi a buza libaka ha ne ku na ni cisehelo ye tuna cwalo mwa limagazini zeo. Ha n’a zibile libaka, ni yena a amuhela likopi. Ka mo ku inezi fela, zeo kaufela ne li si ke za ezahala kabe muhasanyi yo munca yani n’a si na limagazini ze ñata za ku abana ni mañi ni mañi ya n’a bonisize cisehelo!

¹⁶ Ku Fa Bupaki mwa Libaka ze Buheha ni mo ku Yemisezwa Limota: Ku fa bupaki mwa libaka ze buheha ni mo ku yemisezwa limota ki nzila ye nde hahulu ya ku fita ka yona kwa batu. Kana se mu likile ku fa bupaki mwa mayemisezo a limota a kwa sibaka sa mabenkele? Kamita mu bange ni nakonyana ya ku bonisisa sibaka se mu li ku sona. Mu bate mutu ya si ka hema kamba ya libelela mwa mota ye yemi mi mu like ku kalisa puhisano ye silikani. Haiba puhisano i zwelapili, mu tise teñi lushango lwa Mubuso. Mu like ku sebeza ka ku ikaba kono ku nze ku na ni muhasanyi yo muñwi fakaufi. Mu tokolomohe ku lwala mukotana o mutuna, o’ bululuhile kamba ku hohela mamelelo kwa musebezi wa mina ka mukwa o muñwi. Mu be ni butali. Ne ku kana kwa ba hande ka ku fitisisa ku itusisa nako ye nyinyani fela fa mayemisezo a li mañwi a limota mi cwale ni ku ya ku a sili. Haiba mutu yo muñwi h’a tabeli ku ambola ni mina, ka maoyo mu ikele mi mu y’o bata mutu u sili ye mu ka atumela. Ka ku itusisa yona miezezo ye, muzwale yo muñwi n’a file limagazini ze 90 mwa kweli i liñwi ha n’a nze a fa bupaki mwa mayemisezo a limota.

¹⁷ Batu ba bañwi ba yanga kwa sibaka se si buheha kuli ba yo ikatulusa; ba bañwi ba yanga teñi ku y’o bapala kamba ku y’o tola ni bana ba bona. Ku si na ku filikanya misebezi ya bona ka ku sa swanela, mu bate sibaka sa ku fa bupaki. Muzwale yo muñwi n’a kalisize puhisano ni mubabaleli wa sibaka se si buheha mi a fumana kuli n’a bilaela ka za milyani ye kola ni nako ya kwapili ya bana ba hae. Tuto ya Bibele ya fa ndu ne i kalisizwe mi ne i zamaisizwe kamita mwa sibaka se si buheha seo.

¹⁸ Ku Fa Bupaki ka ku Tandalelwa mwa Libaka za Mabenkele: Hailif’o haki ko ku konahala kamita ku kutaza ka ku sa tandalelwa fa sintolo ni sintolo mwa libaka za mabenkele bakeñisa likaniso za fa sibaka kwa neku la misebezi ye cwalo, bahasanyi ba bañwi ba tahisa sibaka sa ku fa bupaki teñi k’o ka ku tandalelwa. Ba ina fa sipula sa mabala ni ku kalisa puhisano ye silikani ni ba bañwi ba ba ina kuli ba ikatuluse. Cisehelo ha i boniswa, ka butali ba fa trakiti kamba magazini mi ba lika ku eza litukiso za musipili wa makutisezo. Hamulaho wa ku itusisa mizuzu ye sikai ba nze ba fa bupaki mwa kalulo i liñwi, ba ya ku i sili ni ku y’o ambolisa mutu u sili. Ka mo ku inezi fela, ku swanelwa ku tokomelwa kuli mu si ke mwa hoha mamelelo ye sa swaneli ha mu nze mu fa bupaki ka nzila yeo.

¹⁹ Ha mu lumelisa mutu, mu kalise puhisano ka muinelo o silikani. Haiba muteelezi wa mina a alaba, mu buze puzo, cwale mu teeleze ka mamelelo ha nze a bulela. Mu be ni cisehelo ya ka butu ku seo a bulela. Mu bonise kuli mu nga maikuto a hae ka butuna. Ha ku konahala, mu lumelelane ni yena.

²⁰ Kaizeli yo muñwi n’a bile ni ngambolo ye tabisa hahulu ni musali wa musupali ka ku bulela ka mo se bu tulela bupilo. Musali y’o a lumela ka bunolo, mi puhisano ye mufutumala ya ba teñi. Kaizeli n’a konile ku fumana libizo ni keyala ya musali y’o, mi musipili wa makutisezo ne u ezizwe ona viki yeo.

²¹ Ku Sebeza fa Sintolo ni Sintolo: Liputeho ze ñwi li na ni libaka za pisinisi ze mwa kalulo ye li filwe. Muzwale ya talima za kalulo ya simu n’a kana a lukisa makadi a limapa ze ipitezi za zona libaka za lipisinisi zeo za miyaho ye titihani. Makadi afi kamba afi a kalulo ya simu ya maino a batu ili ao a na ni likalulo za lipisinisi a swanela ku bonisa hande-nde kuli libaka za pisinisi ha li swanelwi ku sebelezwa sina ze li mwa kalulo ya simu. Mwa likalulo ze ñwi, libaka za pisinisi li konwa ku sebelezwa hamoho ni za maino a batu. Maeluda ne ba kana ba mema bahasanyi ba ba fitile ku ze konisa kuli ba sebeleze mwa likalulo zeo za lipisinisi kamita ilikuli musebezi wa fa sintolo ni sintolo u si ke wa keshebisiwa.

²² Haiba mu memiwa kuli mu abane mwa musebezi w’o mi ni kamuta ha mu si ka u eza kale, nzila ye nde ya ku ‘tiya’ ka yona ki ya ku sebeza mwa tuntolo to tunyinyani tu sikai pili; ku zwa f’o, ha mu ikutwa ku ikolwisa ni ku fita, mu sebeleze ku a matunanyana. (1 Mates. 2:2) Ha mu sebeza fa sintolo ni sintolo, mu tine mo ne mu ka tinela ha mu fumaneha kwa mukopano kwa Ndu ya Mubuso. Haiba ku konahala, mu kene mwa sintolo ha ku si na baleki ba ba libelela ku lekiswa. Mu kupe ku bulela ku muzamaisi kamba ya na ni buikalabelo. Mu be ba ba silikani, mi fahalimu a zeo kaufela, mu kusufaze litaba. Ha ku na tokwahalo ya ku bonisa buinyazo. Lipisinisi ze ñata li iyakatitwe ku tusa baleki mi li fitile fa ku libelela ku filikanyiwa.

²³ Hamulaho wa ku lumelisa mulekisi, ne mu kana mwa bulela cwana: “Batu ba lipisinisi ba patehile hahulu kuli mane ki ka siwela lu ba fumana kwa mandu a bona, kacwalo lu mi potela kwanu kwa pisinisi ya mina kuli lu mi siyele taba ye nyangumuna munahano yeo mu ka bala.” Cwale mu bulele taba i liñwi kamba ze peli ka za magazini ye swelwi ku fiwa.

²⁴ Kamba ne mu kana mwa lika ku bulela cwana ha mu atumela muzamaisi: “Lu lemuhile kuli batu ba lipisinisi ba lika ku ziba hande lika. Musulo o munca wa Tora ya ku Libelela (kamba Awake!) u na ni taba y’e lu ama ka butu kaufel’a luna.” Mu taluse seo i li sona, mi mu feze ka ku bulela kuli: “Lu kolwa kuli mu ka ikola ku i bala.”

²⁵ Haiba ku na ni babeleki, mi ku bonahala ku swanela, ne mu kana mwa ekeza kuli: “Kana ne mu ka tabela ha ne ni ka fa litaba ze kuswani ze swana kwa babeleki ba mina?” Haiba mu lumelezwa, mu hupule kuli mu sepisize ku kusufaza litaba, mi muzamaisi u ka tokwa kuli mu sepahale kwa sepiso ya mina. Haiba babeleki bafi kamba bafi ba bata ku kena mwa puhisano ye telele, ne ku ka ba hande ku ba potela kwa mandu a bona.

²⁶ Cwanoñu fa, bahasanyi ba sikai mwa tolopo ye nyinyani ne ba ile ni muokameli wa mupotoloho mwa musebezi wa fa sintolo ni sintolo. Ba bañwi ba bahasanyi bao ne ba ikalezwi kwa makalelo, ka ku ba ba ne ba si ka eza kale musebezi wo ni kamuta; kono hañihañi ba iketa mi ba kalisa ku ikola ona. Mwa nako ye sa kwani hora iliñwi, ne ba ambozi ni batu b’a 37 ni ku fa limagazini ze 24 ni mabroshuwa a’ mane. Muzwale yo muñwi n’a bulezi kuli hañata ne ba sa koni ku ambola ni batu ba bañata mwa kweli mukatumbi ya musebezi wa fa ndu ni ndu sina bo ne ba ambozi ni bona ha ne ba nze ba sebeza fa sintolo ni sintolo mwa nako yeo ye kuswani.

²⁷ Ku Tahisa Sibaka sa ku Kutaza: Jesu n’a sa kutazi fela ka mihato ye lukiselizwe cimo. N’a hasanyize taba ye nde fa kezahalo ye swanela kaufela. (Mat. 9:9; Lu. 19:1-10; Joa. 4:6-15) Mu lemuhe ka m’o bahasanyi ba bañwi ba sweli ku tahiseza sibaka sa ku kutaza.

²⁸ Ba bañwi ba ba ni mukwa wa ku fa bupaki kwa bashemi ba ba sweli ku libelela bana ba bona bukaufi ni makenelo a fa sikolo. Bakeñisa kuli bashemi ba bañata ba fita ka ku itahanela ko ku kona ku ba mizuzu ye 20, ku na ni nako ya ku ba kenya mwa puhisano ye nyangumuna ya taba ya mwa Mañolo.

²⁹ Mapaina ba bañata ba iyakatwa ka za ku fita kwa batu ba ne ba kana ba ba ni licisehelo ze ipitezi mwa litaba ze ñwi ze talimwa mwa limagazini za luna. Sina ka mutala, kaizeli yo muñwi n’a bile ni ze zwa mwateñi ze nde ka ku potela likolo ze silezi mwa kalulo ya simu ya puteho ya habo ka litaba ze ne tatamani za “Schools in Crisis” (Likolo mwa Silikwalikwani), ili ze ne bonahezi mwa Awake! ya December 22, 1995. Hape n’a potezi likopano ze fa kelezo ka za pabalelo ya lubasi ka ku isa teñi limagazini ze ne bulela ka za bupilo bwa lubasi ni ku itusiswa maswe kwa banana mi n’a memilwe kuli a n’o tahanga ha na ni misulo ye miñwi ye talima litaba ze swana ni zeo. Kamuhelo ya n’a fumani kwa ofisi ye tusa ba ba si na mibeleko ha n’a fitisize teñi Awake! ya March 8, 1996, ye bulela ka za ku tokwa mibeleko ne i talusizwe kuli ne li “ye nyangumuna.”

³⁰ Muokameli wa sikiliti u biha kuli yena ni musal’a hae ba fa bupaki kamita ka ku tandalelwa ha ba nze ba leka-leka ze ba tokwa. Ba lekanga ka linako zeo sintolo si si na batu ba bañata, ili f’o baleki ba sweli ku zamaya-zamaya mwahal’a mashelufu ka ku iketa. Ba bihanga ku ba ni lipuhisano ze nde ze ñata.

³¹ Mwa mileneñi ye miñwi bahasanyi ba biha ku ba ni ze nde ze taha ha ba nze ba kutaza kwa batu mwa matapisezo a nyangela. Ha ba siyi fela limagazini ha ku si na batu. Sikonkwani sa bona ki ku fita kwa batu ka taba ye nde, kacwalo ba lika ka t’ata ku bulela ka butu ku bao ba ba itusisa muyaho w’o.

³² Mwa libaka ze ñwi, bahasanyi ba ba ketilwe ba lumelelizwe ku fa bupaki kwa mabala a lifulai. Ka linako ze ñwi, ba bile ni tabo ya ku fa bupaki kwa bazamai ba kwa linaha li sili ili ba ba pila mwa linaha m’o palo ya batu ba Jehova ili ye nyinyani. Ko ku fumanwa cisehelo, ba file trakiti kamba limagazini.

³³ Haiba ba sa lumelezwi ku fa bupaki ka butu ku ba ba pila mwa miyaho ye shangatami ili ye silelelizwe hahulu mwa kalulo ya puteho, ba bañwi ba bile ni mukwa wa ku fa bupaki ka maseme kwa balibeleli ba ba sebeza teñi kamba kwa bazamaisi mwa maofisi a malifelo a mandu ao. Muezezo o swana wa itusiswa mwa libaka ze haniswa, ze mwa makwakwa. Muokameli wa mupotoloho ni bahasanyi ba sikai ne ba potezi ka yona nzila yeo miyaho ya maino ye shangatami ili ye supile. Ku o muñwi ni o muñwi, ne ba bulelezi muzamaisi kuli nihaike ha ba lumelezwi ku pota fa mandu ka nzila ya luna ya kamita, ne ba sa bati kuli yena a yawe litaba ze mwa limagazini ze nca. Bazamaisi mwa miyaho ye supile yeo kaufela ne ba amuhezi limagazini zeo ka tabo ni ku kupa misulo ye tatama hape! Ba ba pila mwa miyaho yeo cwale ba amboliswa ka luwaile.

³⁴ Mu Satalale Kuli Mu Kutaze Kai ni Kai: Ku pila ka buineelo bwa luna ku kopanyeleza cwalo ni maikuto a putako ka za musebezi wa luna wa ku kutaza lushango lwa Mubuso. Kuli lu fite kwa batu ka nako ye swanela ku bona, lu tokwa ku kasheza kwatuko za ka butu ze lu lata ilikuli lu “pilise ba bañwi.” Batanga ba Jehova kaufela ba ba ineezi ba bata ku kona ku bulela, sina mwa n’a bulelezi muapositola Paulusi, kuli: “Ni eza linto kaufela kabakala Evangeli, kuli ni fumane ku abelwa kwateñi.”—1 Makor. 9:22, 23.

³⁵ Paulusi n’a ekelize ku ñola kuli: “Ka tabo luli, ni lata ku itumba ka mifokolo ya ka, kuli ni apeswe mata a Kreste. . . . Kakuli nako ye ni fokola, ki yona nako ye ni na ni mata.” (2 Makor. 12:9, 10) Ka mubulelelo o muñwi, ku luna ha ku na ya n’a ka kona ku peta musebezi wo ka m’ata a luna tota. Lu tokwa ku lapela ku Jehova ku kupa moya wa hae o kenile ili o m’ata. Haiba lu lapelela m’ata ku Mulimu, lwa kona ku ikolwisa kuli u ka alaba litapelo za luna. Cwale lilato la luna kwa batu li ka lu libisa kwa ku bata sibaka sa ku kutaza taba ye nde ku bona, ba fumanehe kai kamba kai. Mwahal’a viki ye taha, kiñi ku sa lika ye ñwi ya liakalezo ze filwe mwa ñambeko ye?