Ñoliso ya mwa Sikolo sa Bukombwa sa Teokratiki

¹ Sikolo sa Bukombwa sa Teokratiki se si bile siitusiso se situna mwa ku luta bolule-lule ba Lipaki za Jehova sina likombwa za taba ye nde. Buñata bwa luna lwa hupula ka mo ne lu ikutwezi ku ba ni sabo ni ku sa kona ha ne lu iñolisize lwa pili mwa sikolo, mi cwale lwa lemuha ka buitebuho hahulu musebezi wa sona mwa kulo ya luna ya kwa moya sina babuleli ni baluti ba Linzwi la Mulimu. (Mu bapanye Likezo 4:13.) Kana mu iñolisize mwa sikolo se si makaza se?

² Ki bomañi ba ne ba kana ba iñolisa? Likepe 73 la buka ya Ba Ba Kopanyizwe ku Peta Bukombwa bwa Luna la alaba: “Bao kamukana ba ba abana ni puteho ka mukwa o tiile ne ba kana ba iñolisa, hamoho cwalo ni batu ba ba sa z’o kalisa ku fumaneha kwa mikopano, fela haiba ha ba pili bupilo bo bu sa swalisani ni mitomo ya milao ya Sikreste.” Lu mema kaufela ba ba fita ku ze konisa—banna, basali ni banana—kuli ba atumele muokameli wa sikolo ni ku kupa kuli ba ñolwe.

³ Tukiso ya 1997 ya Sikolo: Tukiso ya 1997 ya Sikolo sa Bukombwa sa Teokratiki i kopanyeleza mifuta-futa ye miñata ya lituto za Bibele ni likalulo ze fitana-fitana za ku onga-onga puteho. Fahalimw’a ku hulisa mubulelelo ni mulutelo wa luna, lu ituta ku zwelela kwa maluwo a kwa moya a fumaneha mwa lituto za sona ka viki ni viki. (Liprov. 9:9) Haiba lu itukiseza sikolo, ili nto ye kopanyeleza ku bala Bibele kwa ka viki ni viki, mi lwa fumaneha kamita kwa mikopano, lwa kona ku fumana tuso ya kwa moya ye tuna kwa tukiso.

⁴ Buñata bwa ku balwa kwa Bibele kwa mwa 1997 kwa ngambolo No. 2 ki ko ku kuswani ku fita kwa lilimo ze felile. Ha ku itukisezwa ngambolo ye, muituti u swanela ku mishala hande nako ya hae ya ku bala mi cwale ni ku nyakisisa kuli ki bukai bwa mizuzu ye ketalizoho ye filwe kalulo ya hae ye konwa ku itusiswa kwa mutahisezo ni mafelelezo. Seo si ka konisa muituti ku itusisa hande nako ya hae ka ku tala ni ku hulisa buikoneli bwa hae bwa ku bala ni bucaziba bwa ku bulela ka ku sa bona fa sikuka.—1 Tim. 4:13.

⁵ Bupaki bwa ka ku tandalelwa bu ekelizwe sina muezezo o konahala wa mitahisezo mwa Ngambolo No. 3, ili ye tomile fa buka ya Zibo. Kacwalo, kaizeli n’a kana a keta musipili wa makutisezo, tuto ya Bibele ya fa ndu, kamba bupaki bwa ka ku tandalelwa sina muezezo wa ngambolo ya hae. Kaniti, koñomeko ye tuna i swanela ku zwelapili ku tomiwa fa mulutelo o buanyu mi isiñi fa muezezo.

⁶ Ku be kuli mu na ni tohonolo ya ku fa ngambolo ya taelo, ze zwile mubano za Bibele, kamba ngambolo ya bana ba sikolo, mwa kona ku bonisa buitebuho bwa mina kwa Sikolo sa Bukombwa sa Teokratiki ka ku itukiseza ni ku lundulula kalulo ya mina hande, ka ku i tahisa ka buikolwiso ni mafulofulo, ka ku sa ca nako, ka ku teeleza ni ku itusisa kelezo ya muokameli wa sikolo, ni ka ku lika ku taleleza ka busepahali kalulo ye mu filwe. Kacwalo ku iñolisa kwa mina mwa sikolo ku ka ba mbuyoti ku mina hamohocwalo ni ku bao kaufela ba ba fumaneha teñi.