Ba Banca—Likonkwani za Mina za kwa Moya Ki Lifi?

¹ Jehova wa ziba ka m’o musebezi wa ngana ni likonkwani ze konwa ku fitwa ku zona li konela ku tisa tabo. (Mu bone Genese 1:28; 2:15, 19.) Kacenu, Jehova u file batu ba hae musebezi wa ku kutaza ni ku luta. Hape lu na ni sikonkwani sa kwa nalulelule sa ku fumana bupilo bo bu sa feli mwa Paradaisi. Ha lu nze lu libile ku sona, lu tokwa ku toma likonkwani za kwa moya ze zwelapili haiba lu bata ku ambuka ku sinya-sinya m’ata ni maluwo a luna.—1 Makor. 9:26.

² Likonkwani za Ba Banca ze Konahala: Ba banca ba swanela ku ba ni likonkwani za teokratiki ze ba kona ka ku ya ka muinelo wa ka butu wa bona. (1 Tim. 4:15) Ba bañwi ba ba li banana hahulu ba fitile fa sikonkwani sa bona sa ku n’o petanga libuka za Bibele mane ba si ka ituta kale ku bala. Ka tuto ya lubasi, banana ba ituta ku itukiseza mikopano ilikuli ba kone ku fita fa likonkwani za ku n’o alabanga ze utwahala ni ku iñolisa mwa Sikolo sa Bukombwa sa Teokratiki. Banana ha ba ya ni bashemi ba bona mwa sebelezo ya mwa simu, ba ituta ku ba ni kabelo mwa ku fa bupaki ha ba nze ba zwelapili kwa neku la sikonkwani sa ku ba bahasanyi ba ba si ka kolobezwa. Bashemi ba swanela ku koñomekela bana ba bona sikonkwani sa buineelo ni kolobezo.

³ Haiba mu sa nonoboka, likonkwani za mina za kwa moya li kopanyeleza lifi? “U hupule Mubupi wa hao” ka ku toma mamelelo fa likonkwani za butokwa luli mwa bupilo. (Muek. 12:1; Samu 71:17) Kiñi ha mu sa ezi bupaina bwa ku tusa mwa likweli ze mu pumula kwa sikolo? Kana se mu nahanile ka za ku eza bukombwa ka nako ye tezi ka ku ba paina wa kamita? Ku cwañi ka za ku ituta puo ye ñwi ilikuli kwapili mu kone ku tusa ba likwata kamba liputeho za lipuo ze ñwi mwa silalanda sa mina kamba ko kuñwi cwalo? Ba bañata ba ba sebeleza fa Betele cwale kamba ba ba sebeza sina baokameli ba maeto kamba balumiwa ne ba tomile sebelezo ye ipitezi ya nako ye tezi sina sikonkwani sa bona ha ne ba sa li kwa sikolo. Kiñi ha mu sa ezi cwalo?

⁴ Ha mu sa li ba banyinyani, mu likanyise ka t’ata mutala wa Jesu. Niha n’a sa li wa lilimo za bwanana ze 12, n’a ipulelela ka ku lukuluha ka za litaba za kwa moya. (Lu. 2:42-49, 52) Ku itomela likonkwani ze tusa za ku eza tuto ya ka butu, ku bala Bibele ka zazi, ni ku eza sango kamita ni Bakreste ba ba hulile kwa moya kwa mikopano ni mwa sebelezo ku ka mi tusa ku fumana bucaziba bwa ku luta ba bañwi ka za Mubuso wa Mulimu sina mwa n’a ezelize Jesu.