Mwa ku Petela Likonkwani za Mina za kwa Moya
1. Ki likonkwani mañi za kwa moya ze ba na ni zona mikulwani ba bañata ba Sikreste?
1 Ka ku ba Mukreste wa mukulwani, ha ku na kakanyo ya kuli likonkwani za mina mwa bupilo li tomile fa lilato la mina la ku lata Jehova ni manzwi a Jesu kwa Bakreste kaufela a kuli ‘ba bate pili mubuso.’ (Mat. 6:33) Mwendi mu lela ku eza ze ñata mwa bukombwa bwa mina ka ku sebeza sina paina kamba ku yo sebeleza ko ku na ni butokwi bo butuna bwa bakutazi ba Mubuso. Ba bañwi ba kona ku nahana za ku itatela ku eza musebezi wa ku yaha, ku sebeleza fa mutai, kamba ku sebeleza ko ku na ni butokwi bo butuna. Zeo ki likonkwani ze nde luli!
2. Ki nto mañi ye kona ku mi tusa ku peta likonkwani za mina za kwa moya?
2 Se si kona ku mi tusa ku peta likonkwani za mina za kwa moya ki ku li ñola. Tora ya ku Libelela ya July 15, 2004, ne i ize: “Mulelo o sa utwahali hande u kona ku ba wa luli ni o utwahala hande ha [mu] u talusa ka manzwi. Kacwalo ne [mu] kana [mwa] tabela ku ñola likonkwani za [mina] ni ze [mu] swanela ku eza kuli [mu] li taleleze.” Hape ku itomela likonkwani ze nyinyani ze ka mi konisa ku peta likonkwani ze tuna ku ka mi tusa ku ziba zwelopili ye mu ezize ni ku tundamena ku peta sikonkwani se situna.
3. Ha mu taluse likonkwani ze nyinyani ze kona ku tusa mutu kuli a kolobezwe.
3 Likonkwani ze Nyinyani: Haiba ha mu si ka kolobezwa kale, mu nyakisise ze mu swanela ku eza kuli mu pete sikonkwani seo. Mwendi mu tokwa ku utwisisa hande lituto za matatekelo za Bibele. Haiba ku cwalo, mu itomele sikonkwani sa ku ituta ka tokomelo buka ya Bibele I Lutañi?, ni ku bala mañolo kaufela a bonisizwe. (1 Tim. 4:15) Hape mu itomele sikonkwani sa ku bala Bibele mukatumbi ku zwa kwa Genese ku ya kwa Sinulo, inge mo ba ezezanga ba fa Betele ni baituti ba kwa Giliadi. Ha se mu ezize cwalo, mu zwelepili ku bala Bibele zazi ni zazi. (Samu 1:2, 3) Mu nahane mo mu kona ku hulela kwa moya ha mu eza cwalo! Kamita ha mu bala Bibele ni ha mu ituta, mu kalise ni ku feza ka tapelo ye zwelela kwa pilu, mi mu tundamene ku eza ze mu ituta.—Jak. 1:25.
4. Ki likonkwani mañi ze nyinyani za kona ku itomela Mukreste ya na ni sikonkwani se situna sa ku belekela fa Betele kamba ku ba mulumiwa?
4 Haiba mu kolobelizwe kale, ki lifi likonkwani ze ñwi ze mu kona ku itomela? Kana mu bata ku ekeza kwa bukwala bwa mina bwa ku kutaza? Ka mutala, kana mwa kona ku itomela sikonkwani sa kuli mu be likwala ze tuna kwa ku itusisa Linzwi la Mulimu mwa bukombwa? (2 Tim. 2:15) Mu kona ku zuseza cwañi pili bukombwa bwa mina? Mu itomele likonkwani ze nyinyani ka ku ya ka buhulu bwa mina ni muinelo wa mina mi ili ze ka mi konisa ku peta likonkwani za mina ze tuna.
5. Ku itomela likonkwani ze nyinyani ne ku tusize cwañi muzwale yo muñwi kuli a pete sikonkwani sa hae sa ku yo belekela fa Betele?
5 Mutala O Munde: Tony wa lilimo ze 19 ha n’a potezi ofisi ya mutai ya Lipaki za Jehova, n’a kalile ku lakaza ku belekela fa Betele. Nihakulicwalo, ne li lingulunde, mi n’a si ka ineela kale ku Mulimu. Tony a kala ku cinca bupilo bwa hae ka ku lumelelana ni likuka za Jehova, mi sikonkwani sa hae n’e li sa ku fita fa ku kolobezwa. Hasamulaho wa ku kolobezwa, a itomela sikonkwani sa ku eza bupaina bwa ku tusa ni bwa kamita, mi a ñola fa kalenda ya hae lizazi la n’a bata ku kalisa bupaina bwa ku tusa mi hasamulaho ni bwa kamita. Mu nahane mwa n’a tabezi ha n’a bizizwe ku yo sebeleza fa Betele hamulaho wa ku sebeza sina paina!
6. Ki nto mañi ye kona ku mi tusa ku peta likonkwani za mina za kwa moya?
6 Ni mina mwa kona ku peta likonkwani za mina za kwa moya ha mu nze mu beya tato ya Mulimu mwa sibaka sa pili. Mu taluseze Jehova ‘misebezi ya mina’ mwa tapelo mi mu tundamene ku i peta.—Liprov. 16:3; 21:5.