Baokameli Ba ba Etelela—Muokameli wa Sikolo sa Bukombwa sa Teokratiki

¹ Muokameli wa Sikolo sa Bukombwa sa Teokratiki ki mutu ya hulile kwa moya ya sebeza ka t’ata mwa ku talusa ni ku luta mi ili ye lu lukela ku kuteka ni ku sebelisana hande ni yena. (1 Tim. 5:17) Buikalabelo bwa hae ki bufi?

² Ki yena ya babalela pulukelo ya libuka ya Sikolo sa Bukombwa sa Teokratiki kwa Ndu ya Mubuso. U na ni cisehelo ye tuna mwa ku susueza kaufela ba ba fitile ku ze konisa za ku iñolisa mwa sikolo. U ikolwisa kuli ze ñozwi ze nepahezi za bulukiwa ilikuli lingambolo li abelwe ka nzila ye lukile liviki ze talu kamba ku fitelela pili sikolo ni sikolo si si ka eziwa kale. U tokwa ku ziba hande puteho, ili ku ziba muituti ni muituti ni buikoneli bwa hae. Niha n’a ka ba ni muzwale yo muñwi ya mu tusa ku lukisa tomahanyo ya sikolo, muokameli ki yena ya lukela ku zamaisa ku abelwa ko ku lukile kwa lingambolo.

³ Kuli a kone ku luta mwa sikolo ka buanyu, muokameli u lukela ku itukiseza hande viki ni viki, ili ku ituta ka butungi litaba ze filwe. Nto yeo i mu konisa ku ezisa puteho ku ba ye tabela litaba ze itutiwa, ku bona haiba litaba ze mwa lingambolo li fiwa ka ku nepahala, ni ku koñomeka lisupo za butokwa ze ka ba mwa lilundululo za ku ñola.

⁴ Hamulaho wa ngambolo ni ngambolo ye fiwa ki muituti, muokameli u ka babaza muituti ni ku talusa libaka mukwa o muñwi wa ku bulela ha ne u li o munde kamba ha u tokwa ku bolosolwa. Haiba mutu yo muñwi u tokwa tuso ye ekelizwe mwa ku itukiseza lingambolo za hae mwa sikolo, muokameli kamba mutu yo muñwi ya ketilwe ki yena u kona ku fa tuso ya ka butu.

⁵ Kuli lu fumane tuso ye tezi kwa musebezi o mutuna o eziwa ki muokameli wa Sikolo sa Bukombwa sa Teokratiki ni baelezi bafi kamba bafi ba ba mwatas’a ketelelo ya hae, lu swanela ku fumaneha kwa sikolo kamita. Hape lu swanela ku fa lingambolo ze lu filwe kaufela ni ku sebelisa likelezo kaufela ze lu fiwa ni ze fiwa baituti ba bañwi. Kacwalo, lu ka zwelapili ku kondolokisa buikoneli bwa luna bwa ku tahisa lushango lwa Mubuso fa nyangela ni fa ndu ni ndu.—Lik. 20:20; 1 Tim. 4:13, 15.