“Liseli la Mina A Li Bonise”

¹ Lifasi le lu pila ku lona li mwa lififi ku za muzamao ni za kwa moya. Liseli la niti li beya fa ngandaleza “misebezi ye si na tuso” ya lififi ilikuli lisitataliso ze bulaya zeo li kone ku pimiwa. Kacwalo, muapositola Paulusi n’a elelize Bakreste kuli: “Mu zamaye sina bana ba liseli.”—Maef. 5:8, 11.

² “Muselo wa liseli” u fapahana hahulu ni lififi la lifasi le. (Maef. 5:9) Kuli lu be ni muselo w’o, lu tokwa ku ba ni mupilelo wa Sikreste o munde hahulu, ili ku ba batu b’a amuhela Jesu. Hape lu lukela ku bonisa mikwa ye cwale ka ku ifana ka pilu kaufela, ku sepahala, ni ku cisehela niti. Muselo w’o u lukela ku boniswa mwa bupilo bwa luna kaufela ni mwa bukombwa bwa luna.

³ Mu Bonise Liseli Fo ku Fumanehela Nako Kaufela: Jesu n’a bulelezi balutiwa ba hae kuli: “Liseli la mina a li bonise batu.” (Mat. 5:16) Ka ku likanyisa Jesu, lu bonisa liseli la Jehova ka ku kutaza za Mubuso wa Mulimu ni milelo ya hae. Lu benya sina mamonyi ha lu potela batu mwa malapa a bona ni ha lu shaela niti kwa mubeleko, kwa sikolo, mwahal’a bomuyahwa ni luna, kamba kai ni kai ko lu kona ku fumana kolo.—Mafil. 2:15.

⁴ Jesu n’a bulezi kuli ba bañwi ne ba ka toya liseli. (Joa. 3:20) Kacwalo, ha lu zwafi buñata ha ba hana ku benyisezwa “liseli la Evangeli ya kanya ya Kreste.” (2 Makor. 4:4) Jehova wa ziba lipilu za batu mi h’a lati kuli mwahal’a batu ba hae ku be baezi ba ze maswe.

⁵ Ha lu latelela linzila za Jehova ni ku ikola liseli la kwa moya, lwa kona ku li benyisa ku ba bañwi. Haiba ba lemuha ka likezo za luna kuli lu “[na] ni liseli la bupilo,” u zibe ni bona ba kana ba susuezwa ku eza licinceho ze tokwahala ilikuli ba be babenyisi ba liseli.—Joa. 8:12.

⁶ Ka ku benyisa liseli la luna, lu lumbekisa Mubupi wa luna mi lu tusa ba ba sepahala ku fita fa ku mu ziba ni ku fumana sepo ya bupilo bo bu sa feli. (1 Pit. 2:12) Ka ku ba kuli lu na ni liseli, haike lu itusise lona mwa ku tusa ba bañwi ku zwa mwa lififi la kwa moya ni ku kalisa ku eza misebezi ya liseli.