Tukiso ya Luna ye Nolofalizwe ya ku Abela Lihatiso
1 Se ku fitile silimo ku zwa fo i kaliselize tukiso ye nolofalizwe ya ku abela lihatiso ku si na tifo. Kana tukiso yeo i bile ye kondile? Lipiho za sebelezo ya mwa simu li bonisa kekezeho mwa ku abela lihatiso za mifuta kaufela. Bolule-lule ba sweli ba fiwa tohonolo ya ku ‘taha ni ku ikungela fela kwa mezi a bupilo.’—Sin. 22:17.
2 Kono ha lu yo mwa tamo ya ku fanisa fela lihatiso za luna ku mutu ufi kamba ufi ya ka li amuhela, mi ha lu lakazi ku eza cwalo. Sina fela ha lu itusisa hande tutu ya luna, muhasanyi ni muhasanyi u na ni buikalabelo bwa ku itusisa hande lihatiso z’a amuhela ka puteho ya fa sibaka ku zwa kwa Sosaiti a sa li lifeli. Sosaiti ha i fa bahasanyi lihatiso ku si na tifo luli ha ku talusi kuli ha ku na mali a sa sinyeheli fateñi mwa ku li hatisa ni ku li hasanya. Bote sihulu ba lukela ku lemuha butokwa bwa lihatiso za luna mwa ku tusa ba ba sepahala ba ba nyolelwa zibo ye nepahezi ka za Jehova Mulimu ni Mwan’a hae Jesu Kreste.—Joa. 17:3.
3 Sosaiti i kona cwañi ku fa lihatiso za yona ku bote ku si na tifo? Lisinyehelo ze sa koni ku pimiwa za ku hatisa ni ku hasanya lihatiso zeo li lifelwa ka linubu. Batanga ba Jehova ba ba ineezi ki bona sihulu ba ba fa tuso yeo. Lipaki za Jehova ha ba si ka bata ku tuswa ki nyangela mwa musebezi wa butokwa hahulu w’o wa ku shaela Mubuso. Ha lu si ka kupa fateñi mali kwa nyangela, mi ha lu na ku eza cwalo cwale. Nihakulicwalo, linubu ze nyinyani ze zwa ku ba ba tabela luli ni ba ba itumela be lu kopana ni bona mwa simu za itebuhiwa.
4 Ze Li Peta Linubu za Luna: Kacwalo, ki kwa butokwa kuli lu itukiseze ku talusa ka bukuswani ni ka ku utwahala m’o musebezi wa luna wa mwa lifasi kamukana wa tuto ya Bibele u tusezwa ka linubu za ka ku itatela. Mali kaufela a’ amuhelwa a itusiswa kwa ku lifela lisinyehelo ze tuna za ku peta musebezi wa ku kutaza Mubuso mwa miteñi ya cwale. Kwand’a ku tahisa lihatiso za ku abela mwa lifasi kamukana, Sosaiti i lifela lisinyehelo za liofisi za mitai, mahae a Betele, likolo za bukombwa ni za balumiwa, balumiwa, baokameli ba mipotoloho, libaka ko li fitisezwa lihatiso, ni misebezi ye miñwi ye miñata-ñata ye tokwa mali ili ye tokwahala mwa ku peta musebezi kaufela w’o Jesu n’a file balutiwa ba hae.—Mat. 24:14; 28:19, 20.
5 Kulo ye tuna ye sweli ku ezahala kwa batu ba Jehova i susuelize ba bañata ku buza ze ba kona ku eza kuli ba tuse. Ba bañata ha ba koni ku tusa ka butu mwa ku yaha mitai ni Mandu a Mibuso a manca kamba ku ya kwa linaha ze kwahule kuli ba yo tusa mwa buikatazo bwa ku hasanya evangeli. Kono kuli ba kone ku eza ka mo ku konahalela kaufela ku ba ni kabelo mwa misebezi ye tabisa yeo, bahasanyi ba bañata ni mabasi a bona ba bile ni mukwa wa ku beya nto ye ñwi kwatuko ya ku fa sina nubu ya za musebezi w’o wa mwa lifasi kamukana. (Mu bapanye 1 Makorinte 16:1, 2) Ka ku eza cwalo, misebezi kaufela ya Sosaiti y’a lifelwa, ku kopanyeleza cwalo ni ku hasanya lihatiso. Ha ku na ya lukela k’u nga linubu zeo za ka ku itatela za musebezi wa mwa lifasi kamukana kuli ki tifo fela ya ku lifela lisinyehelo za lihatiso.
6 Ha lu atumela bañi ba mandu kamba ba bañwi ka mulelo wa ku fa bupaki, lu itukiseze ku ikambota ni bona ka za taba ye tomile fa Bibele. Mifuta ye fitana-fitana ya litaba ze tabisa za mitahisezo, hamohocwalo ni litaba ze ñata ze swanela za Bibele, li akalelizwe mwa bukanyana ya Ka mwa ku Kaliseza Lipuhisano za Bibele. Ka ku ya ka mw’a ngela lushango lwa Mubuso mutu, muhasanyi a atule ka za haiba wa kona ku fa lihatiso. Haiba h’a bonahali ku ba y’a tabela luli kuli a fiwe buka kamba lihatiso ze ñwi, mu kana mwa atula ka maseme ku tuhela ku ambola ni yena ni ku zwelapili fa ndu ye ñwi. Kamba mu kana mwa mu siyela trakiti haiba a sepisa ku bala lushango lwa yona. Mu bone teñi kuli mwa lemuha za cisehelo ilikuli mu eze musipili wa makutisezo. Mu kana mwa eza nto ye swana haiba ha ku na nako ye likani ya kuli mu kalise ku ikambota ko kunde ni mutu kakuli u patehile kamba ha lu si ka taha ka nako ye swanela.
7 Tukiso ye nolofalizwe ya ku abela ka yona lihatiso i tusa bote ku bona kuli musebezi wa luna wa tuto ya Bibele haki wa ku fumanela teñi mali ka nzila ifi kamba ifi. Hape u lu tusa ku beya kwapili mulelo wa luna wa ku shaela taba ye nde ya Mubuso ni ku tahisa balutiwa ba Jesu Kreste. Ka ku shutana hahulu ni likopano ze eza “musebezi wa ku kupa tuso,” Lipaki za Jehova ba tabela ku bona teñi kuli lihatiso za kona ku fiwa ku bote ku si na tifo. Ni kamuta ha lu kupangi linubu za musebezi wa mwa lifasi kamukana kwa batu ba ba sa tabeli luli lushango lwa luna. (Mu bone The Watchtower, ya December 1, 1990, makepe 22 ni 23.) Linubu kaufela ze fiwa li itusiswa kwa ku tusa musebezi wa mwa lifasi kamukana wa tuto ya Bibele, kakuli babeleki kaufela ki ba ka ku itatela mi ha ku na ni yo mukana mwa kopano ya lifiwa. Taba ya linubu za ku tusa mwa musebezi wa mwa lifasi kamukana i nyakisiswa fela ni ba ba buza kamba bao mwendi ba bonisa kuli ba tabela musebezi wa luna.
8 Ha lu nze lu yandulula bukombwa bwa luna ka cisehelo, lu nze lu itusisa hande lihatiso za Sosaiti za butokwa, Jehova u ka zwelapili ku fa kekezeho. Batu ba ba sepahala ko ba fumaneha kaufela ba itebuha litaluso za luna ze nahanisizwe ka za bukombwa bwa luna mi ba tabela ku bonisa tuso ya bona ka ku fa linubu za ka ku itatela.