Ku Abela Lihatiso mwa Kalulo Mo ku Bulelwa Lipuo Ze Ñata

1. Ki kabakalañi liputeho ze ñata ha li tokwa lihatiso za mwa puo i sili?

¹ Mwa likalulo ze ñata, lu kutazanga ni kwa batu ba ba zwa kwa libaka ze ñwi. Buñata bwa bona ba ituta niti ka bubebe ni ka ku utwisisa hande ha ba lutiwa mwa puo ya bona. Ki lifi litukiso ze ezizwe za ku tusa ba ba tabela kuli ba fumane lihatiso za Bibele mwa puo ye ba ziba hande?

2. Ki swalisano mañi ye tokwahala muta liputeho ze peli kamba ze ñata ili ze bulela lipuo ze shutana li sebeleza mwa kalulo ya simu ye swana?

² Ha Ku Fiwa Lihatiso: Muta liputeho ze peli kamba ze ñata li sebeleza mwa kalulo ya simu ye swana, litopa za maeluda li ka sebelisana ni muokameli wa sebelezo mwa ku eza litukiso ze swanela kuli sikwata ni sikwata sa puo i sili si kone ku fiwa bupaki bo bu tezi. Ha ku kutazwa fa ndu ni ndu, bahasanyi ha ba swaneli ku abela lihatiso za mwa puo ye bulelwa ki puteho ye ñwi. Kono haiba bahasanyi ba kutaza ka ku tandalelwa kamba mwa libaka mo ku fumaneha batu ba bañata, ba kona ku fa lihatiso mwa lipuo ze bulelwa mwa silalanda seo.—mu bone Kalulo ya Puzo mwa Bukombwa bwa Luna bwa Mubuso bwa October 1990.

3. Ki mwa miinelo mañi m’o puteho i kona ku buluka lihatiso mwa puo i sili?

³ Ku Buluka Lihatiso: Ku konwa ku ezwañi haiba ku na ni batu ba banyinyani ba ba bulela puo i sili mwa silalanda mi ha ku na puteho ye itusisa puo yeo? Mwa miinelo ye cwalo yeo, liputeho li kana za buluka palonyana ya lihatiso ze fumaneha mwa puo yeo, ze cwale ka matrakiti, ni broshuwa ya Seo A tokwa ni broshuwa ya Mulikan’a Mulimu, ni buka ya Zibo. Bahasanyi ba kona ku fa lihatiso zeo ha ba fumana batu ba ba ziba ku bala puo yeo.

4. Mu kona ku fumana cwañi lihatiso za mwa puo i sili ze i si na puteho?

⁴ Mwa ku Kupela Lihatiso: Haiba puteho ha i na lihatiso mwa puo y’a kona ku bala mutu ya tabela, lihatiso za mwa puo yeo li kona ku fumanwa cwañi? Muhasanyi u swanela ku ambola ni mutang’a libuka kuli a kone ku ziba libuka ze fumaneha mwa puo yeo ilikuli lihatiso z’a tokwa li kone ku kupiwa muta puteho i kupa lihatiso kwa mutai.

5. Mulelo wa luna ki ufi ha lu abela lihatiso za Sikreste?

⁵ Haike lu itusise hande lihatiso za Sikreste mwa ku tusa “batu kamukana” ku si na taba ni puo ya bona kuli ‘ba fite fa zibo ya ku ziba niti ni ku t’o piliswa.’—1 Tim. 2:3, 4.