Ku Eza ze Ñata mwa Bukombwa bwa Luna

¹ Muapositola Paulusi n’a elelize Bakreste kuli ba zamaye ka nzila ye tabisa Mulimu ni kuli ba “ekeze kwateñi ka nako ni nako.” (1 Mates. 4:1) Lu kona ku eza cwañi cwalo? Nzila ye ñwi ye lu kona ku eza cwalo ka yona ki ka ku zwelapili ku peta lika ze ñata za kwa moya, ili ku beleka ka t’ata kamita kuli lu ‘feleleze za bukombwa bwa luna.’—2 Tim. 4:5.

² Takazo ya Luna: Se si tisa kuli lu eze ze ñata mwa bukombwa ki takazo ya luna ya ku bata ku sebeleza Mubupi wa luna ka m’ata a luna kaufela. Lu bata ku hula kwa moya ni ku peta hande bukombwa bwa luna. Tomahanyo ye nde ya ku ezanga lika za kwa moya ni takazo ya ku sebeleza Mulimu li ka lu tusa ku peta likonkwani za luna za kwa moya.—Samu 1:1, 2; Mafil. 4:6; Maheb. 10:24, 25.

³ Kuli lu eze ze ñata mwa bukombwa bwa luna, lu tokwa ku ba ni moya wa ku ifana, wa ku sebeleza ba bañwi. Lu kona ku ba ni moya wo cwalo haiba lu nahanisisa mutala wa n’a lu tomezi Jesu. (Mat. 20:28) Mwa bukombwa bwa hae kaufela, Jesu n’a bile ni tabo ye tuna ka ku sebeleza ba bañwi. (Lik. 20:35) Lwa kona ku likanyisa Jesu ka ku isa pilu ku ba bañwi ni ka ku ezanga ze ñata mwa bukombwa bwa luna.—Isa. 6:8.

⁴ Bashemi Ba Kona ku Tusa: Takazo ya ku sebeleza ba bañwi ni ya ku eza ze ñata mwa bukombwa i kona ku suñiwa mwa lipilu za banana inze ba sa li ba ba nyinyani. Banana ba lemuhanga tukufalelo ya lubasi lwa bona ni moya wa lubasi lwa bona wa ku eza ze ñata mwa bukombwa. Muzwale yo muñwi ha n’a sa li mwanana, n’a ezanga misebezi ya kwa moya ni bokukw’a hae mi kacwalo a ba ni moya wa ku tusa ba bañwi. Ka ku bona tukufalelo ni tabo ya bokukw’a hae, ni yena a ba ni moya wa ku ifana kuli a tuse mizwale ba hae. Ha lu bulela cwana, muzwale y’o ki mutang’a bukombwa.

⁵ Mizwale Ba Tokwahala: “Mutu h’a lata ku kena fa buluti, u lakaza musebezi o munde.” (1 Tim. 3:1) Manzwi ao a susueza mizwale kuli ba beleke ka t’ata kuli ba fiwe buikalabelo mwa kopano ya Jehova. Kuli muzwale a fiwe buikalabelo mwa kopano ha tokwi ku ba pili ni buikoneli bo buñwi cwalo. Muzwale s’a tokwa fela ku eza ki ku bata pili Mubuso ni ku beleka ka t’ata mwa bukombwa. (Mat. 6:33; 2 Tim. 4:5) U swanela ku ikataza ku tomela ba bañwi mutala o munde.

⁶ Ze Petwa Lifasi Kamukana: Jehova u sweli ku akufisa musebezi wa kutulo. (Isa. 60:22) Bote ba ba latelela mutala wa Jesu ba susuezwa ku sebeza hahulu mwa bukombwa bwa bona. Piho ya lifasi kaufela i bonisa kuli mwa silimo sa sebelezo sa 2006, batu ba 248,327 ne ba kolobelizwe. Palo yeo i bonisa kuli ka avareji, batu ba ba fitelela 680 ne ba kolobezwa ka zazi ni zazi! Haike kaufel’a luna lu zwelepili ku eza ze ñata mwa bukombwa bwa luna.