Mizwale ba Mitangana, Kana Mwa Ikataza ku Kwanisa ze Tokwahala Kuli mu Fiwe Buikalabelo?
1. Muzwale wa mutangana u kona ku kalisa lili ku sebelisa taelo ye kwa liñolo la 1 Timotea 3:1?
1 “Mutu ha eza ka taata . . . , u lakaza musebezi o munde.” (1 Tim. 3:1) Manzwi a tahile ka susumezo ya moya o kenile ao a susueza mizwale ku kwanisa ze tokwahala kuli ba fiwe buikalabelo mwa puteho. Kana mu tokwa ku ba mutu yo muhulu kuli mu kwanise ze tokwahala? Mane ki ko kunde hahulu ku kalisa ku kwanisa ze tokwahala ha mu sa li banana. Ha mu ka eza cwalo mu ka lutiwa misebezi ye ka mi tusa ku bonisa haiba mwa swanela ku ketiwa ku ba sikombwa sa puteho ha mu ka hula. (1 Tim. 3:10) Haiba mu muzwale ya kolobelizwe kono mu sa li banana, mu kona ku kwanisa cwañi ze tokwahala?
2. Mutu u kona ku ba cwañi ni moya wa buitomboli mi u kona ku u bonisa kamukwaufi?
2 Buitomboli: Mu hupule kuli mulelo wa mina ki wa ku kwanisa ze tokwahala kuli mu eze musebezi o munde, isiñi kuli mu be ni situlo. Kamukwaocwalo, mu be ni takazo ya ku tusa mizwale ni likaizeli ba mina. Nzila ye ñwi ye mu kona ku eza cwalo ka yona ki ku nahana za mutala o munde wa naa tomile Jesu. (Mat. 20:28; Joa. 4:6, 7; 13:4, 5) Mu lapele ku Jehova kuli a mi tuse ku iyakatwa ba bañwi. (1 Makor. 10:24) Kana mwa kona ku itatela ku tusa basupali kamba liyanga ba ba mwa puteho ya mina? Kana mwa itatelanga ku sheula bucwañi kamba ku eza misebezi ye miñwi ya ku ba babalela Ndu ya Mubuso? Kana mwa kona ku fa ngambolo ya ku itatela ka nako ya Sikolo sa Bukombwa sa Teokratiki? Mu ka lemuha kuli mu ka ba ni tabo haiba mu itombola ku tusa batu ba bañwi.—Likezo 20:35.
3. Ku ba ni silikani se sinde ni Mulimu ki kwa butokwa cwañi, mi mu kona ku ba cwañi ni silikani seo?
3 Silikani se Sinde ni Mulimu: Ki kwa butokwa hahulu kuli sikombwa sa puteho a be ni silikani se sinde ni Mulimu ku fita ku ba ni zibo ye ipitezi kamba ku ba ni buikoneli. Mutu ya naa ni silikani se sinde ni Mulimu, u likanga ka taata ku nga lika sina mwa li ngela Jehova ni Jesu. (1 Makor. 2:15, 16) Mutu ya cwalo u bonisanga “muselo wa moya.” (Magal. 5:22, 23) Ki mukutazi ya tukufalezwi ili ya bata pili za Mubuso mwa bupilo bwa hae. (Mat. 6:33) Mwa kona ku ba ni tulemeno to tunde ka ku itutanga kamita. Fo kikuli mu swanela ku balanga Bibele ka zazi, ku balanga magazini ni magazini ya Tawala ya Mulibeleli ni ya Mu Zuhe!, ku itukisezanga mikopano ni ku yo fumaneha teñi. (Samu 1:1, 2; Maheb. 10:24, 25) Paulusi ha naa susueza mutangana Timotea kuli a eze zwelopili ya kwa moya, naa ñozi kuli: “U zwelepili ku tokomela . . . tuto ya hao.” (1 Tim. 4:15, 16) Kamukwaocwalo, mu itukisezange hande ha mu filwe ngambolo mwa Sikolo sa Bukombwa sa Teokratiki. Mu itukisezange bukombwa ni ku abananga teñi kamita. Mu itomele likonkwani za kwa moya mi mu eze lika ze ka mi konisa ku li peta, ili likonkwani ze cwale ka ku eza bupaina, ku sebeleza fa Betele, kamba ku kena Sikolo sa Bibele sa Mizwale ba Makwasha. Ku ba ni silikani se sinde ni Mulimu ku ka mi tusa ku ambuka “litakazo za kwa bunca.”—2 Tim. 2:22.
4. Ki kabakalañi ha ku li kwa butokwa ku ba ya itingwa ni ya sepahala?
4 Ku Sepahala ni ku Itingwa: Bakeñisa kuli mizwale ba ne ba filwe musebezi wa ku abela lico kwa Bakreste ba ne ba li mwa butokwi mwa puteho ya kwa makalelo ne “ba itingwa,” ku bonahala kuli ne ba sepilwe mi ne ba sepahala, kamukwaocwalo, baapositola ne ba sa tokwi ku ikalelwa ka za haiba musebezi wo ne u ka eziwa. Seo ne si konisize baapositola ku isa mamelelo ya bona kwa lika ze ñwi za butokwa. (Lik. 6:1-4) Kabakaleo, ha mu filwe musebezi mwa puteho, mu u pete ka mo mu konela kaufela. Mu likanyise Nuwe ya naa latelezi ka tokomelo litaelo za naa filwe za mwa ku yahela aleka. (Gen. 6:22) Jehova u tabela hahulu mutu ya sepahala mi ku sepahala ku bonisa kuli mutu u hulile kwa moya.—1 Makor. 4:2; mu bone kambokisi ka ka li: “Bunde Bwa ku Luta ba Bañwi Misebezi.”
5. Ki kabakalañi mizwale ba mitangana ha ba swanela ku kwanisa ze tokwahala?
5 Sina mo ne ku polofitezwi, Jehova u akufisa musebezi wa ku kubukanya batu. (Isa. 60:22) Ka avareji, ku kolobezwanga batu ba ba eza 250 000 ka silimo ni silimo. Bakeñisa kuli ku taha batu ba bañata hahulu cwalo mwa niti, ku tokwahala baana ba ba kwanisize ze tokwahala kuli ba pete misebezi mwa liputeho. Kacenu ku na ni misebezi ye miñata hahulu ye tokwa ku petiwa mwa sebelezo ya Jehova. (1 Makor. 15:58) Mina mizwale ba mitangana, kana mwa ikataza ku kwanisa ze tokwahala? Haiba ki cwalo, u zibe mu lakaza musebezi o munde hahulu luli!
[Manzwi a fa likepe 2]
Bakeñisa kuli ku taha batu ba bañata hahulu cwalo mwa niti, ku tokwahala baana ba ba kwanisize ze tokwahala kuli ba pete misebezi mwa liputeho
[Mbokisi fa likepe 3]
Bunde Bwa ku Luta ba Bañwi Misebezi
Mizwale ba mitangana ba ba kwanisa ze tokwahala ba tusehanga baana-bahulu ha ba ba fa misebezi ni ku ba luta mwa ku i ezeza. Hamulaho wa mikopano, muokameli wa mupotoloho naa inzi fa libulelelo inzaa susueza muhasanyi. A bona mushimani ya naa yemi kwa kwatuko, mi sa mu buza haiba naa libelela kuli a ikambote ni yena hasamulaho. Muzwale wa mutangana yo, a alaba kuli naa filwe musebezi wa ku kenisanga fa libulelelo hamulaho wa mikopano. Bashemi ba hae ne se ba funduka, kono yena naa sa bati ku ya pili a si ka peta kale musebezi wa hae. Muokameli wa mupotoloho a zwa fa libulelelo inzaa tabile. Naa bulezi kuli: “Baana-bahulu mwa puteho yeo ne ba itukiselize kamita ku luta mizwale ba banana ba ba kwanisa ze tokwahala ka ku ba fanga misebezi mwa puteho. Kabakaleo, nako kaufela ha ne ni potelanga puteho ye, ne ba babazanga muzwale wa mutangana kuli a be sikombwa sa puteho.”