Mwa ku Itusiseza Broshuwa ya Taba ye Nde ye Zwa ku Mulimu!
Broshuwa ye Nca ye Lukiselizwe ku lu Tusa ku Eza Misipili ya Makutisezo ni ku Kalisa Lituto za Bibele
1. Ki broshuwa ifi ye ne zusizwe kwa Mukopano wa Sikiliti wa “Mu Babalele Pilu ya Mina!” ye lukiselizwe ku lu tusa ku eza hande misipili ya makutisezo ni ku kalisa lituto za Bibele?
1 Fa Mukopano wa Sikiliti wa “Mu Babalele Pilu ya Mina!” ne lu tabile hahulu ku amuhela broshuwa ye nca ye ka lu tusa ku eza misipili ya makutisezo ni ku kalisa lituto za Bibele. Broshuwa ya Taba ye Nde ye Zwa ku Mulimu! ya swana ni broshuwa ya Seo A Tokwa ye i yola, bakeñisa kuli kaufela zona li na ni lituto ze kuswani. Kamukwaocwalo, broshuwa ye nca ye, i ka lu tusa ku zamaisa hande lituto za Bibele fa mandu a batu. Broshuwa ya Seo A Tokwa, ne i na ni lituto ze bonisa ze ba tokwa ku eza Bakreste, ze kona ku ba taata kwa baituti ba Bibele ba banca ku li amuhela, kono broshuwa ye nca ye yona, i nyakisisa taba ye nde ye fumaneha mwa Bibele.—Lik. 15:35.
2. Ki kabakalañi Broshuwa ya Taba ye Nde ha ne i lukisizwe?
2 Ki kabakalañi Broshuwa ye ha ne i lukisizwe? Mizwale mwa lifasi kaufela ne ba nze ba kupa kuli ku be ni hatiso ye bunolo ye kona ku hohela batu kwa niti, ili ye ba ka kona ku itusisa kwa ku luta batu pili ba si ka shimbulukela kale mwa buka ya Bibele I Lutañi?, yona buka ye lu itusisa kwa ku zamaisa lituto za Bibele. Batu ba ba utwanga buzwa bwa ku bala libuka, hañata ba tabelanga ku ituta Bibele ka ku itusisa broshuwa. Ku zwa fo, broshuwa i kona ku tolokiwa ka bunolo mwa lipuo ze ñata.
3. Broshuwa ye, i shutana cwañi ni lihatiso ze ñwi ze lu itusisanga kwa ku zamaisa lituto za Bibele?
3 Mo I Lukiselizwe: Lihatiso za luna ze ñata ze lu itusisanga kwa ku zamaisa lituto za Bibele, li ñozwi ka nzila ye konisa mutu ku li bala ni ku utwisisa niti ya mwa Bibele ni ha sa tusiwi ki mutu yo muñwi. Kono broshuwa ye yona, i ñozwi ka nzila ye shutana. I ñozwi sina sikuka sa ku zamaisa tuto ya Bibele mi i tokwa kuli ku be ni mutu ya zamaisa tuto. Kamukwaocwalo, ha lu fa mutu broshuwa ye, ki hande ku nyakisisa ni yena paragilafu i liñwi kamba ze peli. Maparagilafu a yona ki a makuswani, kabakaleo, a kona ku nyakisiswa ka bukuswani ni mutu fa ndu ya hae kamba kwa sibaka sa hae sa lipisinisi. Nihaike kuli ki hande ku kala ka ku nyakisisa tuto 1, lu sa kona ku kala ka ku nyakisisa tuto ifi kamba ifi ya mwa broshuwa ye.
4. Broshuwa ye i lu tusa cwañi ku luta batu ku zwelela mwa Bibele?
4 Mwa lihatiso za luna ze ñata, likalabo za lipuzo ze ñozwi li fumanehanga mwa maparagilafu. Kono mwa broshuwa ye, buñata bwa likalabo li fumaneha mwa Bibele. Batu ba bañata ba tabela ku ituta ku zwelela mwa Bibele isiñi ka ku itusisa libuka za luna. Kamukwaocwalo, ibato ba kuli mañolo kaufela a bonisizwe ha si ka ngiwa ona cwalo sina ka mwa ñolezwi mwa Bibele. A swanela ku baliwa ku zwelela mwa Bibele. Nto ye i tusa baituti ba Bibele ku ziba kuli ze ba ituta li zwa ku Mulimu.—Isa. 54:13.
5. Ki kabakalañi ha ku li kwa butokwa ku muzamaisi wa tuto ku itukisezanga hande tuto ni tuto a si ka ya kale kwa ku i zamaisa?
5 Broshuwa ye ha i talusi mañolo kaufela. Kabakalañi? I lukisizwe ka nzila ye susueza muituti wa Bibele ku buza lipuzo ni ku tusa muzamaisi wa tuto ku itusisa buikoneli bwa hae bwa ku luta. Kabakaleo, ki kwa butokwa ku itukisezanga hande tuto ni tuto lu si ka ya kale kwa ku i zamaisa. Temuso ku muzamaisi wa tuto: Mu si ke mwa bulela hahulu ha mu zamaisa tuto. Lwa lata ku talusa Mañolo. Kono lu kona ku tusa hande muituti haiba lu mu tuhelela ku talusa mañolo. Mi lwa kona ku mu tusa ku utwisisa hande taluso ya mañolo e lu nyakisisa, ka ku itusisa hande lipuzo.—Lik. 17:2.
6. Lu kona ku itusisa cwañi broshuwa ye: (a) ha lu ambola ni batu ba ba kakanya kuli Mulimu u teñi ni batu ba ba sa kuteki Bibele? (b) mwa bukombwa bwa fa ndu ni ndu? (c) kwa ku kalisa lituto za Bibele fa musipili wa pili? (d) ha lu eza misipili ya makutisezo?
6 Lwa kona ku fa broshuwa ye kwa batu ka nako ifi kamba ifi ku si na taba ni kuli ki lihatiso mañi ze fiwa mwa kweli yeo sina feela mo lu ezezanga kwa lihatiso ze ñwi ze lu itusisanga kwa ku zamaisa lituto za Bibele. Bahasanyi ba bañata ba ka ikola ku itusisa broshuwa ye kwa ku kalisa lituto za Bibele fa musipili wa pili. Ku tuha fo, sina mo ne ku taluselizwe fa mukopano wa sikiliti, ku itusisa broshuwa ye ha lu potela batu ba ne ba tabezi, “ku ka tahisa kuli musipili wa makutisezo u be o tabisa luli!”—Mu bone tumbokisi to tu fa makepe 5-7.
7. Mu kona ku zamaisa cwañi tuto ya Bibele ka ku itusisa broshuwa ye?
7 Mwa ku Zamaiseza Tuto: Mwa kona ku kala tuto ka ku bala lipuzo ze na ni linombolo ze ñozwi mwa muñolo o tibile. Ku tuha fo, mu bale paragilafu ni mañolo a ñozwi ka ku siyamiswa. Mu itusise hande lipuzo kuli mu tuse muñaa ndu ku utwisisa sa talusa mañolo. Mu si ka shimbulukela kale fa kalulo ye tatama, mu kupe muñaa ndu ku alaba puzo ye ñozwi mwa muñolo o tibile kuli mu zibe haiba wa utwisisa za ituta. Fa misipili ya makalelo i sikai, neikaba hande ku nyakisisa feela puzo i liñwi kwa lipuzo ze ñozwi mwa muñolo o tibile. Hamulaho wa nako, lwa kona cwale ku ekeza kwa lipuzo ze lu nyakisisanga ku fitela lu kona ku nyakisisa tuto mukatumbi.
8. Mu kona ku bulelañi ha mu bata ku bala liñolo mi ki kabakalañi ha mu swanela ku bulela cwalo?
8 Liñolo le li ñozwi hasamulaho feela wa manzwi a kuli “mu bale” ki lona sihulu le li fa kalabo kwa puzo ye ñozwi mwa muñolo o tibile. Ha mu bata ku bala liñolo, mu ambuke ku bulelanga kuli, “Muapositola Paulusi naa ñozi kuli” kamba, “Ha mu bone za naa polofitile Jeremia.” Muñaa ndu u kona ku nahana kuli mu sweli ku bala manzwi a naa ñozwi ki batu-tu feela. Neikaba hande ku bulela kuli, “Linzwi la Mulimu li bulela kuli” kamba, “Ha mu bone ze ne i polofitile Bibele.”
9. Kana lwa swanela ku bala mañolo kaufela a bonisizwe ha lu zamaisa tuto?
9 Kana lwa swanela ku bala mañolo kaufela a bonisizwe kamba lu swanela feela ku bala mañolo a na ni manzwi a kuli “mu bale”? Ku itingile ka mo lu bonela miinelo. Mañolo kaufela a bonisizwe mwa broshuwa ye, a na ni mulelo wa ona. Kaufelaa ona a na ni litaba za butokwa ze lu kona ku nyakisisa ni muituti. Kono haiba muituti ha na nako ye ñata ya ku ituta, ha tabeli hande ku ituta, kamba ha zibi hande ku bala, fo lwa kona ku bala feela mañolo a na ni manzwi a kuli “mu bale.”
10. Ki li li fo lu kona ku shimbulukela ku zwa mwa broshuwa ni ku kalisa ku itusisa buka ya Bibele I Lutañi?
10 Fo lu Kona ku Shimbulukela Mwa Buka ya Bibele I Lutañi?: Hamulaho wa ku nyakisisa lituto ze ñatanyana mwa broshuwa ye, ni ku bona kuli muituti wa tabela ku ituta ze ñata, lwa kona ku shimbulukela mwa buka ya Bibele I Lutañi? kamba ku zwelapili ni yena mwa broshuwa ya Taba ye Nde ku fitela lu i feza. Bahasanyi ba kona ku lemuha fo ba kona ku kaliseza ku itusisa buka ya Bibele I Lutañi? Ha lu shimbulukela mwa buka ya Bibele I Lutañi?, kana lwa swanela ku kalela kwa makalelo a yona? Batili, kakuli buikoneli bwa batu bwa shutana. Nihakulicwalo, baituti ba Bibele ba bañata ba kona ku tusiwa hahulu ka ku ituta litaba zeo hape ka butungi mwa buka ya Bibele I Lutañi?
11. Ki kabakalañi ha lu swanela ku itusisa hande broshuwa ye nca ye?
11 Lu na ni tohonolo ye tuna hahulu ya ku zibahaza taba ye nde ka ku fitisisa mwa lifasi le li maswe le, yona ya kuli Mubuso wa Mulimu wa busa ni kuli ona cwale-cwale fa, u ka tahisa lifasi le li nca mo ku yahile ku luka! (Mat. 24:14; 2 Pit. 3:13) Lu sepa kuli batu ba bañata ba ba utwa lushango lo, ba ka lumelelana ni manzwi a ñozwi ka susumezo ya moya a li: “Ki a mande cwañi fa malundu, mautu a ya tisa litaba ze nde, ya shaela kozo; ya tisa litaba ze nde, ya shaela za ku pilisa, ya li ku Sione: Mulimu wa hao ki ya busa!” (Isa. 52:7) Haike lu itusise broshuwa ye nca ye, ku zibahaza taba ye nde ye zwa ku Mulimu kwa batu ba ba nyolelwa ku ziba za Mulimu mwa kalulo ya luna ya simu!
[Mbokisi fa likepe 5]
Ha lu Ambola ni Batu ba ba Kakanya Kuli Mulimu U Teñi ni Batu ba ba sa Kuteki Bibele:
● Mwa libaka ze ñwi, bahasanyi ba lemuhanga kuli manzwi a kuli, “Mulimu” ni “Bibele” a kaulezanga lipuisano. Ha lu potela batu lwa pili mwa sibaka se si cwalo, neikaba hande ku ambolisana ni bona fa litaba ze ba bilaeza, ze cwale ka za libaka batu ha ba tokwa mubuso o munde, kwa ku fumana litaba ze tusa mabasi, ni ka za lika ze ka ezahala kwapili. Hamulaho wa ku nyakisisa ni bona litaba ze ñata ka za libaka ha lu lumela kuli Mulimu u teñi ni kuli Bibele ki buka ye sepeha, mwendi cwale lwa kona ku ba bonisa broshuwa ya Taba ye Nde.
[Mbokisi fa likepe 6]
Ha lu li Mwa Bukombwa Bwa fa Ndu ni Ndu:
● “Ni tilo mi potela kuli ni mi bonise mo mu kona ku zibela ka bunolo za ka ezeza batu Mulimu kwapili. Kana mwa nahananga ka za haiba Mulimu u ka felisa manyando a luna? [Mu litele kalabo.] Broshuwa ye, i bonisa mañolo a mwa Bibele a kona ku alaba puzo yeo. [Mu fe muñaa ndu broshuwa, mi kihona mu ka bala paragilafu ya pili ya tuto 1, ni liñolo la Jeremia 29:11.] Mu bona cwañi, kana litaba ze ha li bonisi kuli Mulimu u bata kuli lu pile bupilo bo bunde kwapili? [Mu litele kalabo.] Haiba mwa tabela naa kona ku mi siyela broshuwa ye. Nako ye tatama, lwa kona ku to nyakisisa paragilafu ya bubeli kuli lu zibe kalabo ya Bibele kwa puzo ye li, ‘Mulimu u ka felisa cwañi lika ze nyandisa batu?’” Haiba muñaa ndu u naa ni nako ye ñata fa musipili wa pili, mwa kona ku bala ni ku buisana ni yena paragilafu ya bubeli ni mañolo a yona a malaalu. Mu lukise ku to mupotela hape kuli mu to buisana ni yena puzo ya bubeli mwa tuto ye swana yeo.
● “Batu ba bañata ba tabelanga ku lapela, sihulu ha bali mwa butata. Kana ni mina mwa lapelanga fokuñwi? [Mu litele kalabo.] Mu bona cwañi, kana Mulimu wa teelezanga kwa litapelo kaufela kamba mwendi litapelo ze ñwi ha li mu tabisangi? [Mu litele kalabo.] Broshuwa ye, i bonisa mo lu kona ku fumanela likalabo za Bibele kwa lipuzo zeo. [Mu fe muñaa ndu broshuwa, mi mu nyakisise ni yena paragilafu ya pili ya tuto 12, kona mu ka bala mañolo a na ni manzwi a kuli “mu bale.”] Kana ha ku tabisi ku ziba kuli Mulimu wa tabela ku teeleza kwa litapelo za luna? Kono kuli Mulimu a teelezange kwa litapelo za luna, lu swanela ku mu ziba hande. [Mu apule fa tuto 2 mi mu bonise muñaa ndu litohonyana za litaba ze fateñi.] Haiba mwa tabela na kona ku mi siyela broshuwa ye, mi nako ye ñwi lwa kona ku to bala likalabo za Bibele kwa lipuzo ze.”
● “Ni tilo mi potela kuli ni ikambote ni mina ka za lipilaelo ze ba talimana ni zona batu mwa lifasi le. Kana mu nahana kuli miinelo ya mwa lifasi ikaba hande muta o muñwi? [Mu litele kalabo.] Batu ba bañata ba komokanga ku ziba kuli mwa Bibele ku na ni taba ye nde ye kona ku lu fa sepo. Ze ki ze ñwi za lipuzo ze alabiwa ki Bibele.” Mu fe muñaa ndu broshuwa, mi mu mu kupe kuli a kete puzo ya tabela kwa lipuzo ze fa likepe la mafelelezo. Cwale mu ye fa tuto ya ketile muñaa ndu, mi mu mu bonise mo i zamaisezwanga tuto ya Bibele. Mu lukise ku to mu potela hape kuli mu to nyakisisa ni yena puzo ye tatama mwa tuto yeo.
[Mbokisi fa likepe 7]
Mu Like ku Kalisa Tuto ya Bibele fa Musipili wa Pili:
● “Ni tilo mi potela ka nakonyana kuli ni ikambote ni mina ka za mo lu kona ku itutela Bibele. Broshuwa ye, i na ni lituto ze 15 ze bonisa mañolo a mwa Bibele a kona ku alaba lipuzo za butokwa. [Mu bonise muñaa ndu likepe la makalelo ni la mafelelezo la broshuwa.] Kana mu kile mwa lika ku utwisisa Bibele? [Mu litele kalabo.] Kashe ni mi bonise nzila ye bunolo ye mu kona ku utwisisa ka yona Bibele. [Mu nyakisise paragilafu ya pili ya puzo 3 ye mwa tuto 3, mi mu bale liñolo la Sinulo 21:4, 5. Haiba kwa swanela, mu nyakisise paragilafu ye tatama ni mañolo a na ni manzwi a kuli “mu bale.”] Haiba mwa tabela, na kona ku mi siyela broshuwa ye. Lu mi susueza ku itutanga Bibele ni luna nihaiba feela hañwi ka sunda. Haiba mwa tabela tuto ye, lu ka zwelapili ku itutanga ni mina. Nako ye tatama, lwa kona ku to nyakisisa tuto ya pili. Mu lemuhe kuli tuto ye i fa likepe li li liñwi feela.”
[Mbokisi fa likepe 7]
Mu Itusise Yona ha mu Eza Musipili wa Makutisezo:
● Ha lu potela mutu ya naa tabezi, lwa kona ku bulela kuli: “Ni tabile hahulu ku mi fumana hape kacenu. Ni mi tiselize broshuwa ye, ye fa likalabo za Bibele kwa lipuzo ze ñata. [Mu fe muñaa ndu broshuwa, mi mu mu kupe ku talima fa likepe la mafelelezo.] Kwa litaba ze bonisizwe fo, ki ifi taba ye ne mu ka tabela ku ziba? [Mu litele kalabo. Kihona mu ka ya fa tuto ya ketile muñaa ndu.] Kashe ni mi bonise mo lu kona ku itusiseza broshuwa ye ku fumana likalabo za Bibele.” Mu mu bonise mwa ku itutela Bibele ka ku nyakisisa ni yena paragilafu i liñwi kamba ze peli ni mañolo a na ni manzwi a kuli “mu bale.” Wo ki ona muezezo o bunolo wa ku kalisa ka ona tuto ya Bibele! Mu siyele muñaa ndu broshuwa, mi mu eze litukiso za ku to mu potela hape. Ha se mu felize tuto, mwa kona ku nyakisisa tuto ye ñwi ya ketile muñaa ndu kamba ku kala ku ituta ni yena kwa makalelo a broshuwa.