Lipina ze Nca ze ka Itusiswa Mwa ku Lapela!
1 Kwa mukopano wa ka silimo o ne bile teñi cwanoñu fa wa Watch Tower Bible and Tract Society of Pennsylvania, la October 4, 2014, ne ku zibisizwe kuli ku eziwa litukiso za ku lukisa sinca buka ya luna ya lipina ye lu itusisa cwale. Zibiso yeo ne i tabisize luli! Baputehi kaufela ne ba hupulisizwe kuli lipina za luna za Mubuso ki za butokwa mwa bulapeli bwa luna.—Samu 96:2.
2 Mu kana mwa ipuza kuli: ‘Ki kabakalañi ha ku tokwahala ku lukisa sinca buka ya lipina?’ Ku na ni mabaka a mañata. Libaka la pili kikuli, kutwisiso ya luna ya Mañolo i zwelapili ku bolosolwa, mi ku eza cwalo kwa ama manzwi a fumaneha mwa lipina za luna. (Liprov. 4:18) Libaka le liñwi ki la kuli: Buñata bwa manzwi a itusisizwe mwa buka ya lipina ya cwale naa ngilwe mwa Bibele ya kale ya Sikuwa ya New World Translation. Manzwi ao, a lukela ku cinciwa kuli a lumelelane ni manzwi a mwa Bibele ya New World Translation ye lukisizwe sinca. Bakeñisa kuli ki musebezi o mutuna ku cinca manzwi a mwa buka ya lipina kuli a zamaelele ni kutwisiso ya cwale, ne ku atuzwi kuli ku ekezwe kwateñi lipina ze nca li sikai.
3 Kana lu ka tokwa ku libelela ku fitela buka ya lipina ha i ka hatiswa kihona lu ka kalisa ku itusisa lipina ze nca? Batili. Lu ba ba tabile ku mi zibisa kuli mwa likweli li sikai ze taha, lipina ze nca li ka beiwanga fa Webusaiti ya luna ya jw.org. Pina ye nca a i zwisiwa, i ka beiwanga fa tomahanyo kwa mafelelezo a Mukopano wa Sebelezo kuli i opelwe mi i ka ñolwanga kuli “pina ye nca.”
4 Mwa ku Itutela Lipina ze Nca: Ku kona ku ba taata ku ituta pina ye nca. Niteñi, sina walisamu, lu bata ku opelanga kwa mikopano ya puteho isiñi ku ‘ina lu kuzize.’ (Samu 30:12) Kuli mu itute pina ye nca, mu nge mihato ye bunolo ye latelela:
Mu teeleze ka ku kuta-kutela kwa mulumo wa pina ye lizizwe ye beilwe fa Webusaiti ya luna. Ha mu ka teeleza hahulu kwa pina yeo, ku ka mi bela bunolo ku i hupula.
Mu itute manzwi a pina, mi mu a pete.
Mu opele manzwi a mwa pina inze mu latelela mulumo wa yona. Mu eze cwalo ku fitela mu ziba ku opela pina yeo.
Mu itutange lipina ze nca ka Nako ya ku Lapela Sina Lubasi ku fitela lubasi lwa mina lu kona ku opela hande lipina zeo.
5 Mwa likweli za kwapili, pina ye nca a i beilwe fa tomahanyo kuli i be yona ye ka opelwa kwa mafelelezo a Mukopano wa Sebelezo, puteho i ka teeleza hañwi kwa mulumo wa pina yeo. Kihona cwale baputehi ba ka opela pina yeo ka ku latelela mulumo wa yona, sina mo lu ezanga ha lu opela lipina ze ñwi.
6 Mu ka lemuha kuli, ku opela ka nako ya mikopano ku lu fanga kolo ya ku swalisana ni ba bañwi ka tabo mwa ku lumbeka Jehova ka pina. Kacwalo, ha lu swaneli ku ba ni mukwa wa ku zwelanga kwande ka nako ya ku opela ha lu li kwa mikopano ya luna ya Sikreste.
7 Ku na ni nzila ye ñwi hape ye lu kona ku bonisa ka yona kuli lwa itebuha lipina za luna ze kenile ze lu itusisa kwa ku lapela. Kwa mikopano ya mipotoloho ni kwa mikopano ye mituna, tukiso ni tukiso i kalanga ka lipina za ku teeleza feela. Habeli ka silimo, mizwale ni likaizeli ba ba ifanile ba zwanga mwa linaha ze shutana-shutana za lifasi ku ya kwa Patterson, New York, ku yo liza lipina ze nde za ku itusisa mwa bulapeli bwa luna. Kacwalo, muina-situlo a lu kupa kuli lu ine mwa lipula za luna kuli lu teeleze kwa lipina zeo ze lizizwe ki mizwale ni likaizeli, lu swanela ku eza cwalo. Ku eza cwalo ku lu tusa ku itukiseza mwa lipilu za luna ku teeleza kwa litaba ze ka nyakisiswa.—Ezira 7:10.
8 Kwa mafelelezo a mikopano ya luna kacenu, lu ka opela pina ye nca ye na ni toho ya taba ye li: “Mubuso wa Busa—Ha U Tahe!” Pina ye, ye ne zwisizwe fa mukopano wa ka silimo o ne bile teñi cwanoñu fa wa Watch Tower Bible and Tract Society of Pennsylvania, sihulu ne i lukiselizwe ku talusa za lilimo ze 100 za ku ba teñi kwa Mubuso.
9 Ku si na ku kakanya, lipina ze nca ki “lika ze nde” ze zwa ku Jehova. (Mat. 12:35a) Haike lu ikatulele ku ituta lipina ze nca ze, ni ku li opelanga ku zwelela kwa lipilu za luna ilikuli lu fe tumbo ni likute le li swanela ku Mulimu wa luna!—Samu 147:1.